གཞས་དང་རྒྱའི་དམངས་གཙོ།

  རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཨ་རིའི་མིང་དུ་གྲགས་པའི་རོལ་གཞས་རུ་ཁག་ Guns N’ Roses ཡིས་རྒྱ་མིའི་དམངས་གཙོ་ཞེས་པའི་བརྙན་འཕྲིན་འོད་སྡེར་ཞིག་དཔར་འགྲེམས་བྱས་ཡོད་ལ།  དེ་ནི་རྒྱ་ནག་སྲིད་གཞུང་ལ་ཆེད་དུ་མདུང་རྩེ་གཏད་པ་རེད་ཅེས་རྒྱ་ནག་གི་ཕྱོགས་ནས་ངོ་རྒོལ་བྱས་འདུག

རོལ་ཆ་རུ་ཁག་འདི་ཡིས་ ༡༩༩༤ ལོ་ནས་འཆར་གཞི་ཡོད་པའི་རྒྱ་མིའི་དམངས་གཙོ་ཞེས་པའི་འོད་སྡེར་དེ་ཚེས་ ༢༣ ཉིན་ཨ་རིའི་ཚོང་རྭར་འགྲེམས་སྤེལ་བྱེད་མགོ་བཙུགས་འདུག  ཡིན་ན་ཡང་རྒྱ་ནག་ནས་འོད་སྡེར་འདི་བཙོང་ན་རྒྱ་ནག་སྲིད་གཞུང་གི་ཁྲིམས་དང་འགལ་ཡོད་པ་དང༌། གློག་བརྙན་དང༌།  གླུ་གཞས། རོལ་དབྱངས་སོགས་དཔར་བསྐྲུན་བྱ་པར་རྒྱ་ནག་གིས་ལྟ་རྟོག་ནན་མོ་བྱེད་ཀྱིན་ཡོད་པས་རེད། རྒྱལ་སྤྱིའི་དུས་བབ་ཅེས་པའི་གསར་ལམ་དུ་ཨ་རིའི་རོལ་གཞས་རུ་ཁག་ཞིག་གིས་རྩོམ་ཡིག་གི་ཁ་བྱང་དུ་རྒྱ་ནག་ལ་རྒོལ་རྡུང་ནན་མོ་བྱས་འདུག་ཅེས་བཀོད་པར།  རྒྱ་ནག་གི་ཀློག་མཁན་མང་པོ་ཅིག་གིས། ནུབ་ཕྱོགས་པས་དམངས་གཙོར་ཁ་གཡར་ནས་རྒྱ་ནག་འཐོར་བཤིག་གཏོང་བར་བརྩོན་པའི་དཔེ་མཚོན་ནི་རོལ་གཞས་རུ་ཁག་འདི་ལྟ་བུ་རེད་ཅེས་བསམ་ཚུལ་བཀོད་འདུག  ཡིན་ན་ཡང་རྩོམ་ཡིག་དེའི་ནང་དུ་རོལ་གཞས་རུ་ཁག་འདིའི་མདུང་རྩེ་རྣོན་པོ་རྒྱ་ནག་ལ་གཏད་འདུག་ཅེས་ཀྱང་བྲིས་ཡོད་པ་རེད། རྒྱ་ནག་ཕྱི་སྲིད་བློན་ཆེན་ལ་གློག་འཕྲིན་བརྒྱུད་ནས་རྩོམ་ཡིག་འདིའི་སྐོར་ལ་བསམ་འཆར་གང་ཡོད་མེད་དྲིས་པའི་ལན་དུ། མིང་འདོན་འདོད་མེད་པའི་མགྲིན་ཚབ་པ་ཞིག་གིས།  ང་ཚོས་དེ་ལ་བསམ་འཆར་སྤྲོད་དགོས་པ་མི་འདུག་ཅེས་དང༌། ཡང་ཤེས་རིག་བློན་ཆེན་གྱི་མགྲིན་ཚབ་པས། གློག་བརྙན་དང༌། གསར་ལམ་ཁག གླུ་གཞས། རིག་རྩལ་འཁྲབ་སྟོན་སོགས་ལ་བསམ་འཆར་གང་ཡང་སྤྲོད་ཀྱིན་མེད་པ་དེ་རྒྱ་ནག་གཞུང་གི་སྤྱིར་བཏང་གི་རྣམ་པ་ཞིག་ཡིན་ཅེས་འགྲེལ་བརྗོད་བྱས་ཡོད་འདུག རྒྱལ་སྤྱིའི་དུས་བབ་སྒང་གི་རྩོམ་ཡིག་དེས་གཞས་ཚིག་རེ་རེ་དང་དམིགས་སུ་བཀར་ནས་འགྲེལ་བརྗོད་གང་ཡང་བྱས་མི་འདུག་ཀྱང༌། འོད་སྡེར་འདི་ཡི་མིང་འདོགས་སྟངས་ལ་འགྲེལ་བརྗོད་ཀྱི་སྐད་ཆ་བཤད་པར་གཞིགས་ན། འོད་སྡེར་འདིའི་ནང་དུ།  གལ་ཏེ་ཁྱེད་ཀྱི་རྩིག་གྱང་ཆེན་པོ་དེ་ཡམ་ཡོམ་དུ་གཡོ་ཚེ་ལེ་བདའ་རང་ཉིད་ལ་བྱ་འོས་ཅེས་རྒྱ་ནག་གི་གཞུང་འཛིན་པ་ལ་ཉེན་བརྡའི་ཚུལ་དུ་བརྗོད་དེ། རྒྱ་ནག་གིས་ཆོས་འཁོར་རྩ་རླུང་སྒོམ་སྒྲུབ་པ་རྣམས་ནག་པོར་བརྩི་བ་དེར་རྒོལ་ལན་སྤྲད་ཡོད་འདུག
 
ལོ་རེ་རེར་རྒྱ་ནག་གིས་ནུབ་ཕྱོགས་པའི་གློག་བརྙན་མང་པོ་ཞིག་ནང་འདྲེན་བྱ་བར་ཆོག་མཆན་སྤྲོད་གིན་མེད་པར། ཆབ་སྲིད་དང་དམངས་གཙོ་གཉིས་ལ་འབྲེལ་བའི་གློག་བརྙན་ཡང་རྒྱ་ནག་ནང་ཁུལ་དུ་འདྲེན་པར་བཀག་འགོག་བྱེད་ཀྱིན་ཡོད་པ་དང༌། གློག་བརྙན་བཟོ་བསྐྲུན་པ་དང་ཕབ་ལེན་གྱི་ཐད་ལ་ཐེ་གཏོགས་ཤུགས་ཆེར་བྱེད་གིན་ཡོད་འདུག་པ་མ་ཟད།  རིག་རྩལ་འཁྲབ་སྟོན་དང་མི་སྒེར་གཞས་སྣ་འཁྲབ་སྟོན་སོགས་ལ་ཡང་ཇུས་གཏོགས་བྱེད་ཀྱི་འདུག་སྟེ། རྒྱ་ནག་ནས་སྤྱི་ལོ་ ༢༠༠༦ ལོར་ Rolling Stones རོལ་གཞས་རུ་ཁག་འདིས་གཞས་སྣ་འཁྲབ་སྟོན་བྱས་པར། རྒྱ་ནག་སྲིད་གཞུང་གི་ཉེན་བརྡའི་འོག་ནས་གཞས་མང་པོ་ཞིག་གཏོང་མི་ཆོག་པར་བཟོས་པ་མ་ཟད། ལོ་འདིའི་ལོ་མགོར་ bandleader Harry Connick Jr  ལ་ཡང་རྒྱ་ནག་ཧྲང་ཧེ་ནས་རང་གིས་ལེན་འདོད་པའི་གཞས་སྣ་ཁག་ཅིག་བཙན་དབང་གིས་ལེན་མི་ཆོག་པ་བཟོས་པ་སོགས་བྱུང་བས། དེའི་རྗེས་སུ་ཨེ་སི་ལན་ཌི་ཡི་གཞས་མ་ Bjork ཡིས་ཧྲང་ཧེ་ནས་གླུ་གཞས་འཁྲབ་སྟོན་བྱས་པའི་མཐའ་མར་གར་སྟེགས་སྒང་ནས་དབྱིན་ཡིག་ཐོག་བོད་རང་དབང་གི་སྐད་འབོད་བྱས་ཡོད་པ་རེད།