དྲ་གྲོགས་ལགས། འཁྱམས་པོ་ས་མཐའ་མི་སྐྱིད་མཛོ་འཕོང་མི་བདེ་ཟེར་སྲོལ་ཡོད་པ་ལྟར། ངེད་ཅག་ནི་ས་མཐའ་ལ་དགའ་ནས་ཡོང་བ་མ་ཡིན་པར། ངེད་ཅག་ས་མཐར་བཅུགས་པ་རེད། ངེད་ཅག་ལ་རང་དབང་དང་རང་ཡུལ་ལ་བདག་པོ་བྱེད་པའི་ཐོབ་ཐང་འཕྲོག་ནས་ངེད་ཅག་ས་མཐར་བཅུགས་པ་ཡིན་དུས། ངེད་ཅག་གི་ནམ་ཡང་དེ་ལྟར་བྱེད་མཁན་གྱི་སྲིད་གཞུང་དེ་ག་ལ་བརྗེད་སྲིད། ཡིན་ཡང་། ས་མཐའ་ནས་སེམས་པ་རེ་སྐྱོ་དུས་སྟག་ཤར་རེའི་མིག་ཆུ་ཁོག་ན་ཡོད། མ་བུ་མོའི་མིག་ཆུ་གདོང་ན་ཡོད་ཟེར་བ་དེ་ལ་འདང་རེ་བརྒྱབ་ནས་རང་སེམས་ལ་རང་གི་སྐྱོར་མ་རེ་བྱེད་ཐུབ་དགོས། དེ་མིན་ངེད་ཅག་ནི་རང་ཉིད་ལ་སྡུག་གཅོད་གཏོང་མཁན་ལས་གང་ཡང་མེད་པ་ཆགས་ངེས་ཡིན་པ་སེམས་སུ་འཛིན་རོགས་ཞུ།
དྲ་གྲོགས་ལགས། འཁྱམས་པོ་ང་རང་ཡང་ཁྱེད་རང་བཞིན་ནམ་རྒྱུན་དུ་རང་ཉིད་གཅིག་བུ་ལ་སེམས་གསོ་བྱས་དེ་འདུག་མཁན་གྱི་གྲངས་ཤིག་ཡིན། ཡིན་ཡང་། ངས་རང་ཉིད་ལ་སེམས་གསོ་བྱེད་སྟངས་ལ་འགྱུར་བ་མང་བོ་ཞིག་ཐེབས་སོང་། སྔོན་ཆད་ཡིན་ན་ང་རང་སེམས་པ་སྐྱོ་དུས་སུ་ངས་ཀྱང་ཨ་རག་ཚོད་མེད་དུ་འཐུང་ནས་རང་ཉིད་ལ་སྐྱོ་རོགས་བྱེད་པར་འདོད་ཀྱི་ཡོད། དེ་ལྟར་ང་རང་གི་ཉེ་འཁོར་གྱི་གྲོགས་པོ་མང་བོ་ཞིག་གིས་དེ་མཐོང་ནས་ཁོང་ཚོས་ང་རང་ཨ་རག་འཐུང་རྒྱུ་མང་དྲགས་དེ་ཤི་རྒྱུར་དོགས་ནས་ཐེངས་མང་བོ་ང་རང་ལ་འབོད་སྐུལ་བྱས་མྱོང་ཡོད། འོན་ཀྱང་། ང་རང་ལ་དམིགས་གསལ་གྱི་འགྱུར་བ་གང་ཡང་མ་སོང་། དེ་ནས་ངས་མུ་མཐུད་དུ་ཨ་རག་འཐུང་བ་ཡིན། སྐབས་དེ་ལ་ང་རང་ལ་ཡང་ཨ་རག་འཐུང་བྱེད་ཀྱི་སྒོར་མོའི་ཡང་དཀའ་ངལ་ཞེ་དྲགས་འཕྲད་ཀྱི་མེད་ལ་ངས་ཀྱང་དེ་ནི་ང་རང་གི་དགའ་ཕྱོགས་དང་སྐྱོ་རོགས་ཤིག་ལ་ངོས་བཟུང་དེ་ཨ་རག་འཐུང་བ་ཡིན། མུ་མཐུད་དུ།
དྲ་གྲོགས་ལགས། ལོ་ངོ་ཁ་ཤས་ཀྱི་རྗེས་སུ་ཨ་རག་ལ་རང་བཞིན་གྱིས་རང་ཉིད་ཀྱི་ཨ་རག་འཐུང་དགོས་པའི་རྒྱུ་མཚན་རྩད་གཅོད་བྱེད་འདོད་ཀྱི་བསམ་བློ་ཞིག་འཁོར་སོང་བ་ལྟར། ཉིན་མ་རེ་རེ་བཞིན་ངས་རང་ཉིད་ལ་དྲི་བ་འདྲ་མིན་བཀོད་དེ་ཨ་རག་དང་ངེད་གཉིས་བར་གྱི་འབྲེལ་བ་ལ་བསམ་བློ་གཏོང་བ་དང་དེ་ལ་ལན་རེ་ཨེ་རྙེད་བལྟས་པ་ཡིན། བར་སྐབས་དེ་འདྲ་ཞིག་ལ་ང་རང་ལ་བསམ་བློ་གཏོང་ལུགས་མ་འདྲ་བ་ཞིག་རྙེད་སོང་བ་ལྟར་ཨ་རག་དང་ངེད་གཉིས་ལ་འབྲེལ་བ་བཟང་བོ་ཞིག་མེད་པ་དང་འབྲེལ་བ་དེ་ལ་མུ་མཐུད་དུ་གཡེང་བསྡད་པ་ཡིན་ན། ཨ་རག་གི་ང་རང་ལ་གང་ཡང་བྱེད་ཐུབ་ཀྱི་མི་འདུག དམིགས་གསལ་གྱི་ཨ་རག་གིས་ང་རང་གི་སྐྱོ་སྣང་ཡོད་ཚད་མེད་དུ་འཇུག་པ་ལས་ལྡོག་ནས་སྐྱོ་སྣང་ཆེ་རུ་གཏོང་བ་དང་ཆག་སྒོ་ཇེ་མང་དུ་འགྲོ་བ། ཨ་རག་འཐུང་ཚར་རྗེས་ཀྱི་ང་རང་ནི་ནམ་རྒྱུན་གྱི་མི་དེ་མ་ཡིན་པ་ཞིག་ཆགས་ཀྱི་ཡོད་པ་ཡང་རང་ཉིད་ཀྱི་དྲན་ཐུབ་ཀྱི་མེད་ལ། རང་གི་ལུས་ཕུང་གི་བདེ་ཐང་དང་རང་ཉིད་མི་ཡུལ་དུ་སྐྱབས་བཅོལ་ལ་ཡོང་དགོས་པའི་དམིགས་ཡུལ་སོགས་ལ་ཡང་བར་ཆད་དང་གཏོར་ལོག་བྱེད་ཀྱི་འདུག་པ་ལས་བཟང་ཕྱོགས་ཀྱི་གྲུབ་འབྲས་གང་ཡང་མེད་པའི་རྒྱུ་མཚན་དང་གནས་ལུགས་ཤེས་སུ་བཅུགས་སོང་།
དྲ་གྲོགས་ལགས། ཉིན་མ་དེ་ནས་བཟུང་ང་རང་གི་ཨ་རག་འཐུང་མེད་ལ་ཨ་རག་གི་ང་རང་སྐྱོ་སྣང་སེལ་མི་ཐུབ་པའི་རྒྱུ་མཚན་ཡང་གསལ་བོ་རྟོགས་པ་བཞིན། ངས་རང་ཉིད་ཀྱི་གྲོགས་པོ་དག་ལ་ཡང་ཨ་རག་མི་འཐུང་བར་སྐུལ་འདེད་བྱེད་ཀྱི་ཡོད། དེ་ལྟར་ང་རང་ནི་ཨ་རག་ལ་དུངས་ཤ་བརླན་མཁན་ནས་ཨ་རག་དང་གཏན་བྲལ་བྱེད་ཐུབ་མཁན་གྱི་མི་ཞིག་ཆགས་སོང་ལ། དེ་ནས་བཟུང་ལུས་ཕུང་གི་བདེ་ཐང་དང་མིའི་ཆ་འཇོག་ཡང་རིམ་གྱིས་འཕེལ་སོང་། ད་དུང་རང་གི་རྣམ་རིག་ཀྱང་སྔར་ལས་ལྡབས་འགྱུར་གྱི་ཡར་རྒྱས་བྱིན་སོང་། ངས་རེ་བ་ལ་ཨ་རག་ནི་སེམས་སྐྱོ་བའི་སྐབས་སུ་ལྷག་དུ་འཐུང་རྒྱུ་ཞིག་མིན་ལ། དེ་དུས་འཐུང་ན་ཆག་སྒོ་སྣ་མང་བསུ་བའི་སྔ་ལྟས་སུ་གྱུར་འགྲོ་ལགས། རབ་ན་ཨ་རག་དང་ཁྱེད་གཉིས་བར་གྱི་འབྲེལ་བ་ལ་བསམ་བློ་ཞིབ་མོ་ཞིག་འཁོར་ཐུབ་ནས་ང་རང་གི་བསམ་པ་ལྟར་ཁྱེད་རང་ཡང་ཨ་རག་དང་འབྲེལ་ཐག་གཅོད་ཐུབ་པར་ཤོག
དྲ་གྲོགས་ལགས། རེད། མི་མང་བོ་ཞིག་གིས་ཨ་རག་འཐུང་བ་ནི་སྐྱིད་དུས་སུ་སྐྱིད་རོགས་དང་སྡུག་དུས་སུ་སྡུག་རོགས་བྱེད་ཐུབ་ཟེར་བཞིན་ཡོད་པ་རེད། དེ་ནི་སྐྱག་རྫུན་ཞིག་ལས་དྲང་བདེན་གྱི་སྐད་ཆ་ཞིག་གཏན་ནས་ཆགས་མི་འདུག ངས་འདི་ནས་གང་བྲིས་པ་དག་ཁྱེད་རང་གཙོ་བའི་དྲ་གྲོགས་ཨ་རག་ལ་དགའ་བ་དག་ལ་བསམ་ཚུལ་བཟང་བོ་ཞིག་གི་ངང་དུ་བྲིས་པ་ལས་མཁས་འདོག་སྟོན་པ་དང་བསླབ་བྱ་བརྒྱབ་པ་དེ་འདྲ་གཏན་ནས་མིན། ང་རང་གི་བསམ་ཚུལ་ནང་ལ་བོད་ལ་ཤ་ཞེན་ཡོད་པའི་བོད་མི་སུ་ཞིག་ཡིན་ཡང་། འདི་ལྟར་ས་མཐའ་ནས་སྡུག་མགོ་ཆང་གི་གནོན་བཞིན་པ་དེ་དག་གོ་ན་མི་འདོད་པ་དེ་ལས་གཞན་གང་ཡང་མིན།
གནས་ཚང་ལགས། ཁྱེད་རང་འདིར་ཕེབས་ནས་བསམ་ཚུལ་རེ་བཤད་རྒྱུར་འབོད་སྐུལ་ཞུ། ལྷག་པར་དུ་སྐུ་ཉིད་ང་རང་གི་ཟིན་བྲིས་ནང་དུ་ཕེབས་པ་ལ་ཐུགས་རྗེ་ཆེ་ཞུ། འདི་ལྟར་ངེད་ཅག་གི་རང་རང་གི་འཚོ་བའི་ནང་གི་ཉམ་མྱོང་དང་བསྒྲགས་ནས་ཕན་ཚུན་ལ་གླེང་མོལ་དང་བསམ་ཚུལ་སྤེལ་རྒྱུ་ནི་བདག་གི་རེ་བ་དང་དམིགས་ཡུལ་དུ་དྲངས་ཆོག་པ་ཡིན་ནོ།
ཕ་དམ་པ་ཆང་གི་བཟི་ཡང་དོ་དམ་པ་རླུང་ལ་མི་བསྐུར་ཟེར་བ་ནི་ཆང་འཐུང་ཚོས་རང་ཉིད་འགེབས་སྲུང་བྱེད་ཆེད་དུ་བཤད་བཞིན་པ་ཞིག་ལས། དོན་དངོས་སུ་ཆུ་བསྐྱལ་རྒྱག་མཁན་ཞིག་ལ་དཔེར་བླངས་དེ་བཤད་པ་ཡིན་ན། ཆུ་བསྐྱལ་ཡག་པོ་མི་ཤེས་མཁན་དག་ནི་ནམ་ཡང་བདེ་འཇག་ངང་དུ་འཚོ་ཡོད་པ་རེད། རྒྱུ་མཚན་ནི་ཁོ་རང་གི་ཆུ་ཡག་པོ་བསྐྱལ་མི་ཤེས་སྟབས་རྟག་དུ་སེམས་ཆུང་བྱོས་དེ་ཆུ་བསྐྱལ་བཞིན་ཡོད་པ་རེད། ཆུ་ནང་དུ་ཤི་མཁན་དག་ནི་ཆུ་བསྐྱལ་མཁས་པ་དེ་ཚོ་ཤི་བཞིན་ཡོད་པ་རེད། གང་ཡིན་ཟེར་ན་ཁོ་རང་ཚོ་ང་རྒྱལ་ཆེན་པོའི་ངང་དུ་ཆུ་བསྐྱལ་བཞིན་ཡོད་པ་རེད་ལ། ང་རང་ཆུ་བསྐྱལ་ལ་མཁས་པོ་ཡོད་ཟེར་ནས་རང་གི་ནུས་པ་དེའི་ཆུའི་སྟོབས་ཤུགས་ལ་ངོ་ཡ་མི་ཡོང་བ་དེ་ནི་སེམས་ནང་དུ་ཤར་ཐུབ་ཀྱི་མེད་པ་རེད། དེ་བཞིན་དུ་རྒྱུན་དུ་ཆང་འཐུང་མཁན་དེ་དག་གོང་གི་དེ་མཚུངས་ཀྱི་དོན་རྐྱེན་འདྲ་མིན་ལ་འཕྲད་ཀྱི་ཡོད་པ་རེད་མ་གཏོགས། ཐོག་མ་ནས་དོན་རྐྱེན་ངན་པ་ཞིག་སློང་འདོད་ཀྱི་ཀུན་སློང་ཡོད་པ་མ་རེད་ཟེར་ནས་ཐག་བཅད་ན་འགྲིག་གི་ཡོད་པ་རེད། ངས་འདི་ལྟར་བཤད་པ་ནི་ང་རང་གི་ཉམ་མྱོང་དེ་ལས་གྲོགས་པོ་ཁྱེད་རང་འདྲ་བ་ཚོ་ལ་ཕན་རེ་ཐོག་ན་སྙམ་པ་ལས་མཁས་འདོད་དང་གྲགས་འདོད་གང་ཡང་མེད་ལ་བསླབ་བྱ་རྒྱག་འདོད་ཀྱི་བཤད་པ་ཡང་མིན། གནས་ལུགས་དང་རྒྱུ་མཚན་རྙེད་ན་ག་ལེར་རང་ཉིད་ནས་མགོ་འཛུགས་བྱེད་སྟངས་ཤིག་ངོ་སྤྲོད་བྱས་པ་ཙམ་མོ།
དྲ་གྲོགས་ བོད ཤ་ཁྲག་རུས་གསུམ་ལགས་སེམས་གསོ་དང་བསླབས་བྱ་རེའི་ཁྲོད་དུ་ཁྱེད་ཀྱི་བྱུང་རབ་སྙན་མོ་དེས་བགོ་བྱ་རེ་གནང་པ་སྙིང་ནས་བཀའ་དྲིན་ཞུ། དེ་ནི་འུ་ཅག་སྐྱབས་བཅོལ་པའི་ལས་དབང་གི་རྒྱུད་རིམ་ཞིག་དུ་ངེས་པ་འདྲ་ ལྷག་པར་དུ་ང་དང་ང་འདྲ་པའི་འཁྱམས་པོ་ཚོ། ལན་རེར་ངས་ཀྱང་ཁྱེད་རང་གིས་བཤད་པ་ལྟར་བསམ་མྱོང་མ་ཟད་ལག་ལེན་དུའང་བསྟར་ན་འདོད་ ད་དུང་ངའི་ཨ་མ་དེའང་ངའི་མདུན་ན་འགྲེང་ནི་འདུག འོན་ཀྱང་དེ་ནི་་་་་་་རྒྱུད་རིམ་ངེས་ཅན་ཞིག་་་་་དེ་ནི་་་་
ཡིན་ཡང་ངས་རང་ཉིད་ལ་ནམ་ཡང་དམ་བཅའ་ཞིག་ཡོད་པ་ནི་་་་་ཕ་དམ་པ་ཆང་གིས་བཟི་ཡང་དོན་དམ་པ་རླུང་ལ་མི་སྐུར་ཞེས་པ་་་་་དེ་རེད།
ཁོ་རེ། ད་རེས་འཚམས་འདྲི་ཞིག་བྱེད་འདོད་སྐྱེས་སོང་། མ་གཞི་ངས་ག་དུས་ཀྱང་རང་ཚོས་དོན་དག་རྐང་གཅིག་ཀྱང་ལབ་ཀྱི་མེད་པར་མིང་ཚིག་སྟོང་ཟད་དུ་སྟོང་བཞིན་པར་གོ་བ་ལེན་བཞིན་ཡོད། འདིའང་པཱ་ལེ་བ་ཞིག་འཆི་མ་ཐུབ་པའི་སྔ་རྗེས་ཡིན་སྲིད་ཀྱང་། ད་རེས་ཁྱེད་རང་ལ་རང་ཚུགས་གཅིག་ཡོད་པ་ཤེས་སོང་། ཨ་རག་མི་འཐུང་བར་གཞན་ལ་འབོད་སྐད་བྱེད་ཐུབ་པར་ཡི་རངས་ཡོད། ཁ་དྲོ་ཚེ་རིང་།