བོད་པ་ཚང་གི་རང་རིགས་ཀྱི་སྐད་ཡིག་ལ་བདག་པོ་རྒྱག་ལུགས་འདི་ལ་གཟབ་གཟབ་མ་བྱས་ན་ངེད་ཅག་བོད་མི་རིགས་ཀྱི་སྐད་ཡིག་གི་ཉེས་ཅན་པ་ཆགས་མི་སྲིད་པ་མ་རེད། བོད་ལུས་ཤིག་ཐོབ་པ་འདིས་ངེད་ཅན་ལ་བོད་སྐད་བཤད་པའི་འགན་ཡོད་པ་རེད་ལ། བོད་ལུས་ཤིག་ཐོབ་པ་འདིས་བོད་ཡིག་བཀོལ་སྤྱོད་བྱེད་དགོས་པའི་ལས་འགན་ཡང་ངེད་ཅག་ལ་ཡོད་པ་གསལ་བོ་བསྟན་ཡོད་པ་རེད།
ང་རང་གི་ནམ་རྒྱུན་དུ་འདི་ལྟར་འདོད་ཀྱི་ཡོད། བོད་ཀྱི་སྐད་ཡིག་འདི་ཉིད་ཕྱུག་པོ་ཆགས་དགོས་ན་ཐོག་མར་རིག་གནས་ནང་འདྲེན་བྱེད་དགོས་པ་དང་རང་གི་སྐད་ཡིག་ལ་བརྟེན་ནས་གང་ཡིན་ཡང་འབྲི་སྤྱོད་བཀོད་གསུམ་བྱེད་ཐུབ་པ་ཞིག་བྱེད་དགོས་པར་འདོད་ཀྱི་ཡོད་ལ། ད་དུང་རིག་གནས་ནང་འདྲེན་བྱེད་མཁན་དག་ནི་རང་གི་མི་རིགས་ཀྱི་མཛད་རྗེས་ཅན་ཡིན་པར་ཁས་ལེན་ཡང་བྱེད་ཀྱི་ཡོད། དེ་དང་ཆབས་གཅིག་རིག་གནས་ཕྱི་འདྲེན་བྱེད་མཁན་དག་ནི་ནམ་ཡང་བོད་ཀྱི་སྐད་ཡིག་ལ་འགན་མ་བླངས་པ་ནས་བོད་ཀྱི་སྐད་ཡིག་མེད་པོ་བཟོ་མཁན་སྐོར་ཞིག་ལ་ངོས་འཛིན་བྱེད་ཀྱི་ཡོད། གལ་ཏེ་བོད་ཀྱི་སྐད་ཡིག་འདི་ཉིད་ཀྱི་སྟེང་ནས་ཉིན་རེའི་འཚོ་བ་ཚུན་ཆད་ནས་རང་རང་གི་ཟ་སྐལ་འཐུང་སྐལ་གྱི་སྐོར་སོགས་གང་ནས་ཡིན་ཡང་བེད་སྤྱོད་གཏོང་ཐུབ་ཉིན་ངེད་ཅག་གི་དམིགས་ཡུལ་དང་དཀའ་ལས་བརྒྱབ་པ་ལ་གྲུབ་འབྲས་སོན་པར་འདོད་ཀྱི་ཡོད། དེ་མིན་རང་གི་སྐད་ཡིག་གི་སྟེང་དུ་ཡོད་པའི་རིག་གཞུང་གི་མ་ལག་དེ་ཚོ་སྐོར་ཞིག་ཡོད་པ་དེ་ཡང་ཕྱི་འདྲེན་བྱས་པ་ཡིན་ན་དེའི་ནག་ཉེས་དེ་ནི་དངོས་ནས་གནམ་མཁའ་རུ་མི་གཤོང་བར་འདོད་ཀྱི་ཡོད། དེས་ན་བོད་པ་ཚང་གི་བོད་ཡིག་ལ་དགའ་མཁན་དང་བོད་ཡིག་གི་ཚེ་སྲོག་ལ་བསམ་བློ་གཏོང་བ་ནས་འགན་ལེན་བྱེད་འདོད་ཡོད་མཁན་དག་གིས་བོད་ཀྱི་སྐད་ཡིག་གི་ཉེས་ཅན་པ་མི་ཆགས་པར་འབད་བརྩོན་བྱེད་པར་འཚལ།
