འབྲོ། ང་ཚོ་ཚང་མ་རྒྱ་གར་དུ་འབྲོ།

དེང་སྐབས་བོད་ནང་གི་གྲྭ་བ་དང་སློབ་མ་ཚོ་རྒྱ་གར་ལ་འབྲོ་རྒྱུའི་འདུན་པ་ཤུགས་ཆེ་རུ་འགྲོ་གི་འདུག ད་སྐབས་གྲོགས་པོ་སུ་ལ་ཐུག་ཀྱང་རྒྱ་གར་ལ་བྲོས་བྱོལ་དུ་འགྲོ་རྒྱུའི་ཐབས་ལམ་ཏག་ཏག་བཤད་གི་འདུག་ཡིན་ཡང་བྲོས་ནས་ཐར་ས་ཞིག་ཡོད་རབས་མི་འདུག་ཟེར།

ཉེ་ལམ ༢༠༠༩ ལོའི་རྒྱལ་སྤྱིའི་ལོ་སར་དང་བསྟུན་ནས་ངན་པ་དགུ་འཛོམས་དང་བཟང་བོ་བཅུ་འཛོམས། ད་དུང་རེས་གཟའ་ཉི་མ་སོགས་རིམ་བཞིན་ཉིན་བཞིའི་རིང་གུང་གསེང་སྤྲད་སོང༌། ང་རང་གི་སེམས་ལ་ངན་པ་དགུ་འཛོམས་ཞེས་འཛེམས་རྒྱུ་དང་བཟང་བོ་བཅུ་འཛོམས་ཞེས་དགའ་བ་ཞིག་ཁྱོན་ནས་སླེབས་མ་སོང༌། སྐབས་དེར་སྐྱོ་གདུང་དང་ན་ཟུག་གི་བར་ན་བཟི་བའི་ངའི་གོམ་ཁ་ཁྱར་ཁྱོར་དེ་དྲ་ཁང་ཞིག་གི་ཕྱོགས་སུ་བསྐྱོད་པ་ཡིན། དྲ་ཁང་དེ་ནས་ངས་བོད་ནང་གི་གྲོགས་པོ་སྐོར་ཞིག་ལ་འབྲེལ་བ་བྱས། དེའང་བསམ་བཙུགས་ནས་བོད་ནང་གི་ཛ་དྲག་གནས་སྟངས་དེ་ཚོར་ ༢༠༠༩ ལོའི་ནང་འགྱུར་བ་འདྲ་ཐེབས་ཡོད་མེད་ཤེས་འདོད་སྐྱེས་ནས་འབྲེལ་བ་བྱས་པ་ཡིན། ཁོང་ཚོ་ནི་སློབ་མ་དང་གྲྭ་བ་རྐྱང་རྐྱང་རེད། དང་པོ་ང་ཚོས་ཁྱེད་བདེ་ང་སྐྱིད་ཀྱི་འཚམས་འདྲི་སྟབས་བདེ་ཞིག་བྱས་ནས་རིམ་བཞིན་ལབ་གླེང་འདྲ་མིན་བྱས་པ་ཡིན། སྐབས་དེར་ངས་བོད་ནང་གི་གནས་ཚུལ་ཁག་ཅིག་དྲིས་པར་ཁོང་ཚོས་གསུང་རྒྱུར། ད་སྐབས་བོད་སྤྱི་ཡོངས་ཀྱི་བདེ་འཇགས་ཐད་ནས་བལྟས་ན་ཅུང་ཙམ་ཡག་ཏུ་འགྲོ་གིན་ཡོད་ནའང༌། བྱེ་བྲག་གི་ཐད་ནས་བལྟས་ན་སྔར་ལས་ཛ་དྲག་གི་གནས་སྟངས་ཤིག་ཆགས་ཡོད་པ་རེད། དཔེར་ན་རྒྱ་ནག་གི་ཉེན་རྟོག་མི་སྣས་དགོན་སྡེ་ཁག་དང་སློབ་གྲྭ་ཁག ད་དུང་ཞིང་འབྲོག་གི་ས་གནས་ཁག་ན་ཉེན་སྲུང་བྱས་ཡོད་པ་མ་ཟད་ས་གནས་དེ་དག་གི་ནང་ནས་ཁོ་ཚོའིརྒྱ་ནག་གི་ཉེན་རྟོག་མི་སྣ།སྣང་བར་མི་འགྲོ་བའི་མི་དེ་ཚོ་གཅིག་རེ་གཉིས་རེ་བྱས་ནས་ཁྲིམས་ལ་སྦྱོར་གྱིན་ཡོད་པ་རེད། དེ་ཚོ་ལ་ཉེས་པ་ཆེན་པོ་དགོས་གི་མ་རེད། དཔེར་ན་མི་དེའི་སྐོར་ཞིག་གིས་ཁ་པར་རྒྱབ་ནས་ཡུན་རིང་འགོར་སོང་ནའང་ཉེས་པ་གཅོད་གི་རེད། ཁྱེད་ཀྱིས་ཡུན་རིང་བོ་དེ་འདྲ་ལ་ག་རེ་ལབ་གི་ཡོད། སུ་ལ་འབྲེལ་བ་བྱེད་གི་ཡོད་ཟེར་ནས་ཁྲིམས་ལ་སྦྱོར་གི་རེད། དེ་ཚོ་མི་གཞན་ལ་ལབ་ན་ཡིད་མི་ཆེས་བ་འདྲ་བོ་ཞིག་རེད། ཉེས་མེད་ཀྱི་ནག་ཉེས་བཏགས་པ་དེ་ཚོའང༌། མི་མང་གི་མགོ་འཁྲིད་ཐུབ་མཁན་དང་ཡང་ན་ཉེ་སྔོན་འོས་ལངས་བྱས་པའི་ཁྲོད་ཀྱི་མི་དེ་འདྲ་རེད། དེ་འདྲ་བྱས་ནས་མི་ཡག་པོའི་སྐོར་ཁྲིམས་ལ་སྦྱར་ན་ཁོང༼རྒྱ་ནག༽ཚོ་བདེ་འཇགས་ཡོང་གི་རེད། མི་མང་གི་མགོ་འཁྲིད་ཐུབ་མཁན་མེད་ན་འོས་ལངས་བྱེད་ཐུབ་གི་མ་རེད། དེ་འདྲ་བྱས་ནས་ཉེས་མེད་ཀྱི་ཁྲིམས་དེ་འདྲ་བཟོ་གི་ཡོད་པ་རེད། དེ་ཚོ་ཕྱི་ལོག་གི་གསར་འགྱུར་བརྒྱུད་ལམ་ཁག་ལ་འགྲོ་ཐུབ་གིན་ཡོད་པ་མ་རེད། རྒྱུ་མཚན། དེའི་རིགས་ཀྱི་དམག་མི་ཚོ་དཔུང་ཁག་དང་རྔམ་བརྗིད་བྱས་ནས་ཡོང་གི་ཡོད་པ་མ་རེད། དམག་མི་རེ་ཟུང་ཞིག་གིས་ལས་ཀ་དེ་སྒྲུབ་གིན་ཡོད་པ་རེད། ཁ་ཅིག་དམག་མི་ཡིན་པའང་ཧ་གོ་གི་མ་རེད། ཁ་ཤས་ཀྱིས་དམག་ཆས་གྱོན་ཡོད་པ་རེད། ཁ་ཤས་ཀྱིས་གྱོན་ཡོད་པ་མ་རེད། དེ་འདྲ་རེད་ཟེར།

ངས་ཁོང་ཚོར། ཁྱེད་ཅག་གིས་ཕྱི་ལོག་གི་བོད་མི་ཚོས་ཅི་ཞིག་སྒྲུབ་གི་ཡོད་མེད་དང་ཡང་ན་གསར་འགྱུར་བརྒྱུད་ལམ་དེ་འདྲ་ལ་ཉན་ཐུབ་གི་འདུག་གམ་ཞེས་དྲིས་པར། ང་ཚོས་ཅི་གང་གོ་གི་མི་འདུག ཤེས་ཐུབ་གི་མི་འདུག ཡིན་ནའང་གྲྭ་བ་དང་སློབ་མ་ཚོ་རྒྱ་གར་ལ་འགྲོ་རྒྱུའི་འདུན་པ་ཤུགས་ཆེ་རུ་འགྲོ་གི་འདུག ད་སྐབས་གྲོགས་པོ་ཚོའི་སུ་ལ་ཐུག་ཀྱང་རྒྱ་གར་ལ་བྲོས་བྱོལ་དུ་འགྲོ་རྒྱུའི་ཐབས་ལམ་ཏག་ཏག་བཤད་གི་འདུག ཡིན་ནའང་འགྲོ་ཡ་ཁག་པོ་འབྱུང་གི་ཡོད་ས་རེད། ཉེ་སྔོན་ང་ཚོའི་དགོན་པ༼རྔ་བ་སྒོ་མང་དགོན།༽ནས་གྲྭ་བ་ལྔ་དྲུག་ཅིག་སོང་བ་རེད་དེ་ཐར་ཡོད་ས་མ་རེད། ད་སྐབས་གང་དུ་ཡོད་མེད་ཀྱང་ཧ་གོ་གི་མེད་ཟེར།
སྐབས་དེར་ངས། ཁྱེད་ཚོས་བསམ་ན་བོད་དོན་འདི་ཐབས་ལམ་ག་འདྲ་ཞིག་ལ་བསྟེན་ན་ད་གཟོད་འཚེ་མེད་ཀྱི་ཐོག་ནས་འགྲུབ་པར་འདོད་ཅེས་དྲིས་པར། སློབ་མ་ཞིག་གིས་བཤད་རྒྱུར། དངོས་གནས་དྲང་གནས་བཤད་ན་འཚེ་མེད་ཀྱི་ཐོག་ནས་འགྲུབ་དགོས་ཞེས་པ་དེ་ཧང་སང་བའི་ཁག་པོ་རེད་འདོད། རྒྱུ་མཚན་ནི་རྒྱ་ནག་འདི་ཕར་ལ་སྙིང་བསྟན་ན་ཚུར་ལ་གློ་སྟོན་མཁན་ཞིག་རེད། དེ་བས་ཁོང་ཚོའི་ཁེ་ཕན་དང་རེ་བ་འགྲུབ་སོང་ན་དེ་ལས་གཅིག་ཀྱང་དགོས་གི་མ་རེད། དེ་གཅིག་རེད། རིན་པོ་ཆེ་ཁོང་ལ་དངོས་སུ་མཇལ་འཕྲད་གནང་ཐུབ་ན་ལྟ་རྒྱུ་ཞིག་ཡོད་པ་རེད་བསམ། དེ་མ་གཏོགས་ང་ལ་དེའི་སྐོར་ནས་རེ་བ་མེད་ཟེར།
མཚམས་དེ་ནས་བཟུང་ཁོང་གི་སྐད་ཆ་གསལ་བོར་གོ་གི་མི་འདུག་ལ། ཁོང་ཚོ་དྲ་ཁང་དེའི་ནང་སྟབས་བདེ་བོ་ཞིག་ཡོང་གི་མ་འདུག་ཟེར།
འབྲོག་རུ་ཆོས་གྲགས།