ཨ་མཆོག་འཚོ་བ་བརྒྱད་ཀྱི་བོད་རིགས་མང་ཚོགས་ཀྱིས་ད་ལོར་ལོ་སར་གི་མིན་ཅེས་ས་གནས་གང་སར་སྦྱར་ཡིག་བཀྲམས་ཡོད་འདུག
ཕྱི་ཚེས་ ༢༠ ཉིན་བོད་ནས་ཁ་པར་བརྒྱུད་གནས་ཚུལ་འབྱོར་བ་ལྟར་ན། མདོ་སྨད་བླ་བྲང་ཁོངས་ཀྱི་ཨ་མཆོག་ས་ཁུལ་དུ་ལོ་འདིའི་བོད་ལུགས་ལོ་གསར་སྐབས་སྤྲོ་སྐྱིད་གཏོང་བ་དང་གླུ་ལེན་གར་རྩེད་སོགས་ཀྱི་བྱེད་སྒོ་གང་ཡང་སྤེལ་གྱི་མིན་ཅེས་ཉིན་འདི་དག་ལ་ཨ་མཆོག་ཞང་ཐོག་གི་སློབ་ཆུང་དང་དངུལ་ཁང༌། སྨན་ཁང་སོགས་ཀྱི་སྒོ་ཁར་སྦྱར་ཡིག་སྣ་ཚོགས་སྦྱོར་གྱིན་ཡོད་འདུག སྦྱར་ཡིག་ནང་དོན་ནི། སྤྱི་ལོ་ ༢༠༠༨ ལོར་བོད་ཆོལ་ཁ་གསུམ་ནས་རང་རིགས་སྤུན་ཟླ་གྲངས་མེད་མི་རིགས་ཀྱི་ཆེད་དུ་ཚེ་སྲོག་ཤོར་བ་དང་བཙོན་དུ་ཚུད་པ་སོགས་རང་ཡུལ་གངས་ཅན་ལྗོངས་ལ་ཁྲག་གི་འཁོར་ལོ་བསྐོར་ཡོད་པ། དེ་བཞིན་བོད་མི་ས་ཡ་དྲུག་གི་དོན་དུ་བོད་རིགས་མི་མང་གི་རྩ་བའི་བླ་མ་༧རྒྱལ་བ་རིན་པོ་ཆེ་དང་བོད་མི་ཁྲི་སྟོང་མང་པོས་རང་ཡུལ་བཞག་ནས་གཞན་ཡུལ་དུ་འཚོ་བ་རོལ་བཞིན་ཡོད་པས། ང་ཚོའི་བོད་རིགས་སྤུན་ཟླ་ཚོས་གླུ་ལེན་གར་རྩེད་དང་དགའ་སྐྱིད་ཀྱི་ངང་ལོ་གསར་བར་དགའ་སྟོན་རྟེན་འབྲེལ་ཞུ་མི་འོས་ལ། ཨ་མཆོག་འཚོ་བ་བརྒྱད་ཀྱི་མི་དམངས་ཚང་མས་ད་ལོར་བོད་རིགས་དཔའ་བོ་དཔའ་མོ་ཚོའི་ཆེད་དུ་མྱ་ངན་ཞུ་དགོས་ཅེས་བྲིས་ཡོད་འདུག
གནས་ཚུལ་མཁོ་འདོན་པས་བཤད་ན། ས་གནས་ཚོང་བ་ཚོས་ཀྱང་ལོ་གསར་གྱི་ཅ་དངོས་རིགས་འཚོང་གི་མེད་པ་དང་། རྒྱ་རིགས་དང་ཁ་ཆེའི་ཚོང་བ་ཚོས་ཀྱང་བོད་མི་རིགས་ལ་ལོ་གསར་མེད་པ་རྟོགས་ཏེ་དམིགས་བསལ་གྱིས་ཁྲོམ་བཤམས་པ་དེ་འདྲ་བྱས་མི་འདུག་ཟེར།
ལོ་གསར་ཕྱིར་འཐེན།
ཨ་རིའི་ནེའུ་ཡོག་ཏུ་ཡོད་པའི་བོད་ཀྱི་ཐབ་ཚང་གིས་བོད་ལུགས་ལོ་གསར་སྲུང་གཙིའི་བྱེད་སྒོ་ཕྱིར་འཐེན་བྱས་འདུག
བོད་མི་རྣམས་ཀྱིས་ད་ལོའི་ལོ་གསར་ལ་རྒྱས་སྤྲོས་དང་། སྤྲོ་སྐྱིད་ཀྱི་རྣམ་པ་སྟོན་གྱི་མིན་པའི་ཁྱབ་བསྒྲགས་གང་སར་བྱེད་ཀྱིན་པའི་སྐབས་འདིར་བོད་ཀྱི་ཨ་རིའི་ནེའུ་ཡོག་ཏུ་ཡོད་པའི་བོད་ཀྱི་ཐབ་ཚང་གིས་ཀྱང་གཞིས་ལུས་བོད་མི་རྣམས་ལ་གདུང་སེམས་མཉམ་སྐྱེད་མཚོན་ཆེད་དུ་ལོ་འདིའི་བོད་ལུགས་ལོ་གསར་སྐབས་གོ་སྒྲིག་བྱས་པའི་བྱེད་སྒོ་རིགས་ཕྱིར་འཐེན་བྱས་ཡོད་སྐོར་ཕ་ཡུལ་དྲ་རྒྱའི་སྟེང་གསལ་བསྒྲགས་སྤེལ་ཡོད་འདུག
ཉེ་ཆར་གཞིས་ལུས་བོད་མི་དང་དེ་བཞིན་བྱེས་འཁོར་བོད་མིའི་འདུས་སྡོད་ཁག་ནས་ལོ་གསར་རྒྱས་སྤྲོས་དང་དགའ་སྐྱིད་ཀྱི་འདུ་ལོང་མི་བྱེད་པའི་གསལ་བསྒྲགས་སྔ་ཕྱིར་སྤེལ་སྐབས། བོད་ཀྱི་ཐབ་ཚང་གིས་ཕ་ཡུལ་དྲ་རྒྱའི་སྟེང་དུ་ལོ་གསར་སྐབས་ནང་མ་སྟོད་གཞས་སོགས་གླུ་གར་རིགས་གོ་སྒྲིག་བྱས་ཡོད་སྐོར་གསལ་བསྒྲགས་བཀྲམས་ཡོད། དེ་ལ་བརྟེན་བོད་མི་ཚོའི་ཁྲོད་དུ་བོད་ཀྱི་ཐབ་ཚང་ལ་མི་དགའ་བའི་སྐད་ཆ་བཤད་མཁན་དང་། དྲ་ཐོག་ཏུ་དེའི་ཐད་ངོ་རྒོལ་གྱི་རྣམ་འགྱུར་སྟོན་མཁན་མང་དུ་བྱུང་ཡོད། འདི་ལ་བསྟེན་ནས་ཡིན་མིན་གང་ལྟར། བོད་ཀྱི་ཐབ་ཚང་གིས་དེ་རིང་ཕ་ཡུལ་དྲ་རྒྱའི་སྟེང་དུ་ད་ལོ་བོད་ལུགས་ལོ་གསར་གྱི་བྱེད་སྒོ་ཕྱིར་འཐེན་བྱས་སྐོར་གསལ་བསྒྲགས་སྤེལ་ཡོད་པ་རེད།