ད་ལོ་བོད་ཡུལ་སྟོད་སྨད་བར་གསུམ་དུ་ལོ་གསར་གཏོང་རྒྱུ་མིན་པའི་གནས་ཚུལ་ཁྱབ་མ་ཐག ས་གནས་འབྲེལ་ཡོད་ཚན་པ་ཨུ་ཐུག་སྟེ། མང་ཚོགས་ཚོར་ལོ་གསར་ལ་ཤོག་སྦག་དང་བཟའ་བཅའ་རིན་མེད་དུ་སྤྲོད་རྒྱུ་ཡིན་པ་མ་ཟད། རྒྱན་ཆས་དང་ གླུ་གཞས་འཁྲབ་སྟོན་བྱ་དགོས་པའི་བཙན་བཀའ་ཡང་གཏོང་བཞིན་ཡོད་འདུག
གནས་ཚུལ་ཐོན་གསལ་ལྟར་ན། ཟླ་འདིའི་ཕྱི་ཚེས་ ༡༥ ཉིན་གྱི་ཕྱི་དྲོ་རྔ་པ་རྨེའུ་རུ་མའི་རུ་ཆེན་དང་པོའི་ཀིརྟི་དགོན་གྱི་རང་ལོ་༢༧ ཡིན་པའི་གྲྭ་བློ་བཟང་ཀིརྟི་ལགས། རྔ་བ་རྫོང་ཐོག་གི་པར་སློག་རྒྱག་ས་ཞིག་ནས་འཛིན་བཟུང་བྱས་ཡོད་འདུག དེ་ནི་ཉེ་ཆར་སྨོན་ལམ་དང་ལོ་གསར་སོགས་ཀྱི་སྐོར་ལ་སྦྱར་ཡིག་བཀྲམས་མཁན་ཡིན་པའི་དོགས་གཞིའི་འོག་འཛིན་བཟུང་བྱས་པ་ཞིག་ཡིན་འདུག གྲྭ་བློ་བཟང་ཀིརྟི་ལགས་ནི་སྔོན་རྔ་པ་ཀིརྟི་དགོན་པའི་ནང་བསྟན་གཞོན་ནུའི་རིགས་སློབ་ཁང་དུ་སློབ་གཉེར་གནང་མྱོང་བ་དང༌། དུས་དེབ་དང་ཚགས་པར་སོགས་ཀྱི་སྟེང་རྩོམ་ཡིག་ཁ་ཤས་སྤེལ་མྱོང་ཡོད་པ་མ་ཟད། ཀིརྟི་དགོན་པའི་ལོ་དེབ་གངས་རྩེའི་མེ་ཏོགཅེས་པའི་རྩོམ་སྒྲིག་ཚོགས་མི་ཡང་ཡིན་འདུག
དེང་སྐབས་རྔ་པ་རྫོང་གི་དགོན་པ་རེ་རེ་བཞིན་ཁུལ་གྱི་བཀའ་རྒྱ་ཡིན་ཟེར་བའི་བསྒྲགས་གཏམ་ཞིག་སྤེལ་གྱིན་ཡོད་འདུག་ལ། དེར་རྔ་པ་ཁུལ་འོག་གི་དགོན་པ་ཡོངས་ལ་ཕྱི་ཟླ་ ༣ ནང་གི་སྨོན་ལམ་སོགས་འཆར་ཅན་གྱི་བྱེད་སྒོ་གཅིག་ཀྱང་སྤེལ་མི་ཆོག་པ་དང༌། དེ་བཞིན་ཞང་རེ་རེ་བཞིན་དུ་ལོ་གསར་སྐབས་གཞས་དང་ཞབས་བྲོ་སོགས་ཀྱི་དུས་སྟོན་རྒྱ་ཆེན་འཚོགས་དགོས་པ། སྐབས་དེར་ཤོག་སྦག་དང་བཟའ་བཅའི་རིགས་རིན་མེད་དུ་སྤྲོད་རྒྱུ་མ་ཟད། ཀིརྟི་དགོན་པའི་མདུན་རི་དཔལ་རི་དུང་སྐྱོང་ངོས་ནས་ཚུར་རྫོང་ལ་ཁ་ཕྱོགས་ཏེ། ཤོག་སྦག་མང་པོ་སྒྲོན་མཁན་ལ་རྒྱ་སྒོར་ལྔ་ཁྲི་ ༥༠༠༠༠ རྔན་པར་སྤྲོད་རྒྱུ་ཡིན་ཚུལ་སོགས་ཡིན་འདུག
རྔ་པ་མཁར་སར་དགོན་པའི་བོད་ཟླ་ ༡༡ པའི་ཚེས་ ༩ ཉིན་གྱི་དགུ་གཏོར་དེ་འཚོགས་བཅུག་མེད་པ་དང༌། དགོན་པའི་ཉེ་འཁྲིས་ཀྱི་ལམ་ཆེན་སྟེང་དམག་མི་བཅུ་གྲངས་རེ་རྒྱུན་འདུག་གིས་ཕར་འགྲོ་ཚུར་འོང་བྱེད་མཁན་ཚང་མར་སྔོག་བཤེར་བྱས་ཏེ། གང་བྱུང་དུ་དངུལ་ཆད་གཅོད་པ་སོགས་ཁྲིམས་འགལ་གྱི་བྱ་སྤྱོད་མང་དུ་སྤེལ་གྱིན་ཡོད་འདུག འོན་ཀྱང༌། མང་ཚོགས་ངོས་ནས་རྒྱ་གཞུང་གི་བཀའ་ལ་དང་ལེན་བྱེད་ཀྱིན་མེད་པ་མ་ཟད། ལོ་གསར་ལ་ཤོག་སྦག་སྒྲོན་ཏེ་རྒྱ་གཞུང་གི་གླ་རྔན་ལེན་མཁན་གཅིག་ཀྱང་འབྱུང་མི་ཆོག་པ་དང༌། གལ་ཏེ་དེ་རིགས་བྱུང་ན་སྡེ་བའི་སྐྱིད་སྡུག་ནས་འཕུད་རྒྱུ་མ་ཟད། ཞིང་ཁ་དང་ཁང་པ་སོགས་བདག་དབང་མེད་ཚུལ་བརྗོད་ཡོད་འདུག ལོ་གསར་སྐབས་གྱོན་ཆས་ནག་པོ་གྱོན་ནས་མྱ་ངན་བྱ་དགོས་ཚུལ་གྱི་སྐད་ཆ་ཞིག་མང་ཚོགས་ཁྲོད་ཁྱབ་བཞིན་ཡོད་འདུག
ཕྱི་ཟླ་ ༩ ཚེས་ ༦ ཡས་མས་ཤིག་ལ་རྔ་པ་ཀིརྟི་དགོན་པའི་རང་ལོ་ ༢༣ ཡིན་པའི་གྲྭ་རྡོ་རྗེ་དང་ཀུན་དགའ་གཉིས་ལ། རྒྱལ་གཅེས་ཆོས་གཅེས་ཀྱི་སློབ་གསོ་དང་ལེན་མ་བྱས་པའི་ཉེས་མིང་འོག ལོ་ ༢ རེ་ཡི་ཁྲིམས་ཐག་བཅད་ཡོད་པ་དང༌། མི་འགྱངས་པར་མེན་ཡང་ཟེར་བའི་ས་གནས་སུ་འཁྲིད་རྒྱུ་ཡིན་འདུག དེ་བཞིན་རྔ་པ་རྨེའུ་རུ་མའི་དབུར་འཇམ་ཚང་གི་ཆོས་འཕེལ། དེ་སྔོན་ལོ་བཞིའི་ཁྲིམས་ཐག་བཅད་དེ་དེང་སྐབས་ཁྲིན་ཏུའུ་ནས་ལེ་བར་ ༢༠༠ སར་ཡོད་པའི་མེན་ཡང་གི་བཙོན་ཁང་ཞིག་ཏུ་བཅུག་ཡོད་པ་དང༌། འབྲེལ་ཡོད་ཐུག་འཕྲད་དུ་སྐྱོད་སྐབས། དངོས་སུ་ཐུག་བཅུག་མེད་པར་ཕན་ཚུན་མཐོང་སའི་ཁང་པ་ཞིག་ནས་ཁ་པར་བརྒྱུད་རྒྱ་སྐད་ཐོག ཁ་བརྡ་ཉུང་ཙམ་བྱེད་བཅུག་ཡོད་ཀྱང༌། ཐུག་འཕྲད་བྱེད་མཁན་གྱིས་རྒྱ་སྐད་ཡག་པོ་མི་ཤེས་སྟབས། གནས་སྟངས་རྒྱུས་ལོན་ཐུབ་མེད་པ་དང༌། ཆོས་འཕེལ་གྱི་མིག་གཡོན་པར་ལིང་ཏོག་ཆེན་པོ་ཞིག་གིས་བསྒྲིབས་ཏེ་མི་མཐོང་བ་ཆགས་ཡོད་འདུག ད་དུང་བཙོན་པར་ཐུག་འཕྲད་བྱེད་མཁན་ལ་མི་སེར་ལག་འཁྱེར་དང་ཞིང་གི་ཆོག་མཆན་མེད་པར་ཐུག་འཕྲད་བྱ་དབང་མེད་འདུག
