ལོ་ངོ་སུམ་ཅུའི་རིང་ཤེས་ཡོན་འཐུས་ཤོར་ལ་ཕྱིན་པའི་རྒྱུ་རྐྱེན་གཙོ་བོ་འཛིན་སྐྱོང་དང་དགེ་རྒན་ལ་ངོས་འཛིན་བྱེད་མཁན་དང༌། སློབ་ཕྲུག་དང་ཕ་མར་ངོས་འཛིན་བྱེད་མཁན། སྤྱི་ཚོགས་དང་ཁོར་ཡུག་ལ་ངོས་འཛིན་བྱེད་མཁན་འདྲ་མིན་ཡོད་སྟབས། མ་འོངས་པར་དེ་འདྲ་མི་འབྱུང་ཆེད་ད་ལྟ་ནས་འགྱུར་བ་དང་ལེགས་བཅོས་བྱ་ཕྱོགས་ཐད་དགོངས་འཆར་ཅི་ཡོད་བཀའ་འདྲི་ཞུས་པའི་ལན་དུ་ཁོང་གིས་གསུངས་དོན། ༧གོང་ས་མཆོག་གིས་ལོ་སུམ་ཅུའི་རིང་ཤེས་ཡོན་འཐུས་ཤོར་ལ་ཕྱིན་འདུག་གསུངས་པ་དེར། འཐུས་ཤོར་གང་དུ་ཕྱིན་ཡོད་པ་དང་དེ་ལ་ཇི་ལྟར་གུན་གསབ་བྱ་རྒྱུ་དེ་ང་ཚོ་ཤེས་ཡོན་ལ་འགན་ཡོད་པ་ཚོར་ཐུག་ཡོད། སོ་སོའི་འགན་ལ་འབབ་པའི་གྲ་སྒྲིག་ཅིག་ཏན་ཏན་བྱ་དགོས་པ་རེད། འཐུས་ཤོར་གང་ནས་ཕྱིན་ཡོད་པ་དང་ཇི་ལྟར་ཕྱིན་ཡོད་པར་འབྲེལ་ཡོད་མི་རེ་ངོ་རེ་ནས་སོ་སོར་བརྩད་གཅོད་བྱ་དགོས། འཐུས་ཤོར་ཕྱིན་ས་སློབ་ཕྲུག་རེད་ཟེར་ན། དེ་འཐུས་ཤོར་ཅིག་ལ་བསམ་གི་མེད། སློབ་ཕྲུག་ཚོར་ག་རེ་བཤད་ཀྱང་མི་ཉན་མཁན་རྩ་བ་ནས་ཡོད་པ་མ་རེད། བཤད་སྟངས་ཤིག་དང་སྤྱོད་སྟངས་ཤིག་ལ་ཐུག་ཡོད། སློབ་གསོ་རྒྱག་གིན་བསྡད་པ་ལས་མིག་དཔེ་གཅིག་བསྟན་ན་ཕན་གྱིན་ཡོད། འོན་ཀྱང༌། ང་ཚོའི་རྒན་པ་ཚོས་མིག་དཔེ་སྟོན་ཐུབ་ཀྱིན་མེད། ང་ཚོས་ཕྲན་བུ་བློས་གཏོང་བྱ་དགོས་ཀྱང༌། རྒན་པ་ཚོས་བློས་གཏོང་བྱེད་ཀྱིན་མེད། འཛིན་སྐྱོང་བྱེད་མཁན་དང་དགེ་རྒན་ཚོས་བློས་གཏོང་ཆུང་ཆུང་ཞིག་ཀྱང་བྱེད་ཐུབ་ཀྱིན་མེད། གནས་སྟངས་འདིའི་འོག་ནས་བྱིས་པ་ཚོ་བརྒྱ་ཆའི་བརྒྱ་ཡར་རྒྱས་འགྲོ་བར་རེ་བ་བྱེད་པ་ཧམ་པ་རེད། ཕར་ཕྱོགས་བརྒྱ་ཆ་བརྒྱ་ཡར་རྒྱས་འགྲོ་དགོས་ན། ཐོག་མར་ངེས་པར་དུ་སོ་སོར་བརྒྱ་ཆ་གཅིག་འགྱུར་བ་གཏོང་དགོས། ང་རང་ལོ་ཉི་ཤུ་རྩ་གྲངས་ལ་བྱིས་པ་ཚོར་མཉམ་གཤིབ་བྱས་པ་ཡིན། ཕ་མས་བུ་ཕྲུག་མཐོང་གིན་ཡོད་ཀྱང༌། ལྟ་གི་མི་འདུག མཐོང་བ་དང་ལྟ་བ་གཉིས་ཁ་ཁ་རེད། ད་བར་འཐུས་ཤོར་ལ་ཕྱིན་ཡོད་ན་མི་རྒན་པ་ལས་འཐུས་ཤོར་ལ་ཕྱིན་པ་རེད། མི་རྒན་པ་ཚོ་དང་དགེ་རྒན་ཚོའི་བསམ་བློའི་ནང་འགྱུར་བ་ཞིག་བསྐྲུན་དགོས། གལ་སྲིད་བསམ་བློའི་འགྱུར་བ་དེ་མ་བསྐྲུན་ན། ད་དུང་ཡར་རྒྱས་གང་ཡང་འགྲོ་གི་མ་རེད་བསམ་ཡོད། སོ་སོས་ལས་ཀ་དྲང་མོ་བྱེད་ཀྱིན་འདུག་གམ་མི་འདུག སོ་སོར་དྲི་བ་འགོད་དགོས། མི་རིགས་ཤིག་འཚོ་གནས་བྱ་ཐུབ་མིན་ནང་གི་བསམ་བློའི་རིན་ཐང་ལ་རག་ལས་ཡོད། བསམ་བློའི་རིན་ཐང་དེ་ཤེས་ཡོན་སློབ་གསོར་ཐུག་ཡོད། སམ་བྷོ་ཊའི་འོག་སློབ་གྲྭ་ ༡༣ ཡོད། ཐོག་མར་ང་ལ་རྩིས་སྤྲོད་བྱེད་སྐབས། སློབ་གྲྭ་ཁ་ཤས་ཀྱི་སྔོན་འགྲོའི་སློབ་ཁྲིད་བྱེད་སྟངས་མི་འདྲ་བ་རེད། ༢༠༠༡ ལོར་སྔོན་འགྲོ་ཡོངས་རྫོགས་གཅིག་གྱུར་བཟོས་ཤིང༌།
སམ་བྷོ་ཊའི་འོག་གི་སློབ་གྲྭ་ཡོངས་རྫོགས་ཀྱི་སློབ་ཁྲིད་བྱེད་སྟངས་གཅིག་པ་ཆགས་ཡོད། ཐ་ན་སློབ་གྲྭ་ཡོངས་རྫོགས་ལ་གཅིག་གྱུར་གྱིས་ཡིག་སྣོད་ ༣༢ བཟོས་པ་ཡིན། སྒྱུར་བཅོས་དེའི་རྗེས་ནས་སློབ་ཕྲུག་གི་ཤེས་ཡོན་ཐོག་ལ་འབུར་དུ་ཐོན་པ་ཞིག་བྱུང་སོང་བསམ་ཡོད། སློབ་ཕྲུག་གི་ཤེས་ཡོན་དེ་གཙོ་ཆེ་ཤས་འཛིན་སྐྱོང་ལ་ཐུག་ཡོད། ཅེས་གསུངས་བྱུང༌།
ཀིརྟི་བྱེས་པ་གྲྭ་ཚང་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་ཤེས་ཡོན་འགན་འཛིན་བློ་བཟང་ཤེས་རབ་ལགས་སུ། ཉེ་ཆར་༧གོང་ས་མཆོག་གིས་ཤེས་ཡོན་དང་རིགས་གཅིག་རྐང་འཛིན་འཐུས་ཤོར་ཕྱིན་སྐོར་ནན་གྱིས་གསུངས་པ་དེ། དགོན་སྡེ་དང་སློབ་གྲྭ མི་སྒེར་ཚང་མིར་འབྲེལ་བ་ཡོད་པ་ཞིག་ཡིན་སྟབས། འདི་ག་རིག་གནས་སློབ་གཉེར་ཁང་ལ་དགོངས་འཆར་དང་གྲ་སྒྲིག་གང་ཡོད་དྲིས་པའི་ལན་དུ་ཁོང་གིས་གསུངས་དོན། སྤྱི་ཚོགས་ཤིག་གི་ཤེས་ཡོན་ཟེར་བ་དེ་གཞུང་དང་ཚོགས་པ། སློབ་མ་དང་སློབ་གྲྭ ཁོར་ཡུག་དང་ཁྱིམ་ཚང་དམིགས་སུ་བཀར་ཏེ་སྐྱོན་འཛུགས་བྱ་ས་མེད། གཙོ་བོ་བཙན་བྱོལ་བ་ཡིན་པ་དང་དཔལ་འབྱོར་གྱི་དཀའ་ངལ་བཅས་ལ་ཐུག་ཡོད། ད་ལྟའི་བར་གྱི་འཐུས་ཤོར་ལ་གུན་གསབ་ཟེར་ན་ཁག་པོ་རེད་དེ། གཞུང་གིས་འཆར་གཞི་དང་སྒྲིག་འཛུགས་ཡག་པོ་ཞིག་བཟོ་དགོས་པ་རེད་སྙམ། འཆར་གཞི་དང་སྒྲིག་འཛུགས་དེ་ཡང་བཟོས་བ་ཙམ་གྱིས་མི་ཆོག་པར། ལག་བསྟར་དང་སྟངས་འཛིན་མཐའ་འཁྱོངས་བྱ་དགོས། བོད་གཞུང་ཤེས་རིག་ལས་ཁུངས་དེ་སློབ་གྲྭ་ཁ་ཤས་དང༌། ཤེས་ཡོན་ཀྱི་སྡེ་ཚན་ཁག་ལ་འབྲེལ་བ་མེད་པ་དེ་སྐྱོན་ཆེན་པོ་རེད། དེའི་ཐད་ང་རང་སྒེར་ངོས་ནས་ཤེས་རིག་ལ་བསམ་ཚུལ་ཞིག་ཕུལ་ཡོད། དེར་ཤེས་རིག་དང་ཆོས་དོན་གཉིས་ནས་ངེས་པར་དུ་དགོན་སྡེ་ཁག་གི་དགེ་འདུན་པ་ཚོར་དེང་རབས་ཀྱི་ཤེས་ཡོན་སྦྱོང་སའི་ལམ་ཁ་གསར་བ་འཚོལ་དགོས་ཀྱིན་འདུག་ཅེས་བཀོད་ཡོད།
་ ང་ཚོ་ཀིརྟི་བྱེ་བ་གྲྭ་ཚང་ལ་མཚོན་ན། ཐོག་མ་ནས་ཤེས་ཡོན་དམིགས་ཡུལ་གཙོ་བོར་བཟུང་སྟེ་བཙུགས་པ་ཞིག་རེད། ༧གོང་ས་མཆོག་གིས་རིགས་གཅིག་རྐང་འཛིན་དགོས་ཀྱིན་འདུག་གསུངས་སྐབས། གཞི་ནས་བསམ་བློ་གཏོང་དགོས་པ་དང༌། ལས་འཆར་སྒྲིག་དགོས་བར་མཐོང་གི་མེད། གང་ཡིན་ཟེར་ན། ཀིརྟི་བྱེས་པ་གྲྭ་ཚང་གི་ལོ་བཅུ་གྲངས་ཀྱི་གྲུབ་འབྲས་ལ་ཕྱིར་མིག་བལྟས་ན། ལས་འགན་གང་འཚམ་འགྲུབ་འདུག་སྙམ་པའི་སྤོབས་པ་སྐྱེས་བ་ལས། ཤེས་ཡོན་འཐུས་ཤོར་བཏང་འདུག་བསམ་པ་ཞིག་དྲན་གྱིན་མི་འདུག གྲྭ་ཚང་འདི་ལས་ཐོན་པའི་རིག་གནས་རབ་འབྱམས་པ་ ༧༠ ལྷག་བྱུང་ཡོད་ལ། མང་ཆེ་བ་མངོན་གསལ་མ་ཡིན་པའི་ཐོག་ནས། བོད་ནང་གི་སློབ་གྲྭ་ཆེ་འབྲིང་ཆུང་གསུམ་དང་དགོན་པ་ ༤༠ ལྷག་ཏུ་ཤེས་ཡོན་ཐད་ཕྱག་ལས་གནང་མུས་ཡིན། འོན་ཀྱང༌། དེ་ཙམ་གྱིས་འགྲིག་སོང་བ་རེད་བསམ་གི་མེད། ད་དུང་ཧུར་བརྩོན་ཆེར་སྐྱེད་ཀྱིས་རིགས་གཅིག་རྐང་འཛིན་དང་ལས་དོན་འདྲ་མིན་བྱ་རྒྱུ་ལྷག་ཡོད། དགོན་པ་གྲྭ་ཚང་ཁག་རིགས་གཅིག་རྐང་འཛིན་གྱི་སྡེ་ཆགས་ཡོད་སྟབས། ད་ལྟའི་གནས་སྐབས་ལ་ང་ཚོའི་གྲྭ་ཚང་གིས་སློབ་གྲྭ་གཞན་དང་མཉམ་འབྲེལ་བྱ་རྒྱུ་དང། སློབ་མ་ཕྱི་རྒྱལ་དུ་གཏོང་རྒྱུ་སོགས་བྱུང་མེད་ཀྱང༌། མ་འོངས་པར་དེའི་ཐད་བསམ་བློ་གཏོང་དགོས་པ་ཞིག་ཆགས་ཡོད། ཅེས་གསུངས་སོང༌།
ནོར་གླིང་བོད་ཀྱི་མཐོ་རིམ་རིག་གནས་སློབ་གཉེར་ཁང་གི་འགན་འཛིན་སྒྲོན་དཀར་སྐྱབས་ལགས་སུ། བཙན་བྱོལ་བོད་མིའི་ཤེས་ཡོན་ཉམས་ཆག་ཏུ་སོང་བའི་རྒྱུ་རྐྱེན་དང༌། མ་འོངས་པར་སླར་གསོ་བྱ་ཐབས། དེ་བཞིན་རིགས་གཅིག་རྐང་འཛིན་སྐྱེད་སྲིང་བྱེད་ཕྱོགས་བཅས་ཀྱི་ཐད། དགོངས་འཆར་ཅི་ཡོད་དྲིས་པའི་ལན་དུ་ཁོང་གིས་གསུངས་དོན། བཙན་བྱོལ་བོད་པའི་སློབ་གྲྭ་ཁག་འཛིན་སྐྱོང་ཁ་ཤས་ཀྱི་འོག་གནས་ཡོད་སྟབས། བོད་གཞུང་ཤེས་རིག་ལས་ཁུངས་ལ་ཐུགས་ཁག་མེད་མོད། ཤེས་ཡོན་འཐུས་ཤོར་ལ་འགྲོ་ས་གཙོ་བོ་དེ་གཞུང་གིས་སློབ་གྲྭ་ཁག་ལ་སྟངས་འཛིན་བྱེད་སྟངས་དང༌། སློབ་གྲྭ་སོ་སོའི་འཛིན་སྐྱོང་གིས་དགེ་རྒན་ཚོར་སྟངས་འཛིན་བྱེད་ཕྱོགས་ལ་ཐུག་ཡོད། དང་པོ། གཞུང་འཛིན་སྐྱོང་གིས་སློབ་ཚན་གཏན་འབེབས་བྱེད་ཕྱོགས་ཀྱི་ཐད་ནས། བྱིས་པ་ཚོར་འཛིན་གྲྭ་གསུམ་པ་ནས་སུམ་རྟགས་དང༌། ལྔ་བ་ནས་རིགས་ལམ་གྱི་མགོ་བཙུགས་ཡོད། འཛིན་གྲྭ་བདུན་པ་བརྒྱད་པའི་སྐབས་ནང་ཆོས་ཀྱི་དཀའ་གནད་མང་པོ་སྤུངས་ཡོད། སྤྱིའི་ཆ་ནས་ཀྱང་སློབ་དེབ་ཀྱི་ས་མིག་ཆེ་ཤོས་ནང་ཆོས་ཀྱིས་བཟུང་ཡོད། བྱིས་པའི་སེམས་ཁམས་དང་མི་མཐུན་པའི་སློབ་ཚན་ཨུ་ཚུགས་ཀྱིས་ཁྲིད་ན། བྱིས་པ་ཚོས་བོད་ཡིག་ཤེས་རྒྱུ་ཁག་པོ་འདུག་སྙམ་སྟེ། སེམས་ཤུགས་ཆག་པ་དང་བོད་ཡིག་ལ་སུན་སྣང་སྐྱེ་བ་ཡོང་གིན་ཡོད། གཉིས་པ། དགེ་རྒན་གྱི་ལྷག་བསམ་དང་ཡིད་ཆེས། སློབ་ཁྲིད་བྱེད་སྟངས་བཅས་ལ་རག་ལས་ཡོད། སྔོན་མ་དགུ་བཅུ་གོ་གྲངས་ལ་ང་རང་དགེ་རྒན་བྱས་སྐབས། དགེ་རྒན་ཚོས་སློབ་དེབ་ངོས་ཀྱི་ཤེས་བྱ་སློབ་མར་ཀློག་འདོན་བྱས་པ་ཙམ་གྱིས་འགན་འགྲུབ་སོང་བའི་བསམ་ཚུལ་འཛིན་གྱིན་འདུག ནང་སྦྱོང་ལ་དག་བཅོས་ནན་ཏན་དང༌། སློབ་མར་ལྷག་བསམ་རྣམ་དག་གིས་ལྟ་སྐྱོང་རྟིང་སྐུལ་བྱེད་ཀྱིན་མི་འདུག དགེ་རྒན་གྱི་སྤུས་ཚད་སྔར་ལས་ཡག་ཏུ་ཕྱིན་ཡོད་ཀྱང༌། ལྷག་བསམ་དང་འགན་འཁུར་མེད་པའི་སྣང་ཚུལ་སྡུག་ཏུ་ཕྱིན་ཡོད། སློབ་མར་འགན་ལེན་མ་བྱས་ན་ཤེས་ཚད་ཡོད་པས་མི་ཕན། གསུམ་པ། བྱིས་པ་ཚོར་བོད་པའི་སྐད་དང་ཡི་གེ་སྦྱོང་སའི་ཁོར་ཡུག་ངེས་ཅན་སྐྲུན་མ་ཐུབ་སྟབས། གཤིས་ཀའི་རྨང་གཞིར་བོད་པའི་རིག་གཞུང་འཇགས་དཀའ་བ་ཆགས་ཀྱིན་ཡོད། ཐ་ན་ཕ་མ་ཚོས་ཀྱང་བྱིས་པར་བོད་པའི་ཁོར་ཡུག་སྐྲུན་ཐུབ་ཀྱིན་མེད། འཛིན་གྲྭའི་སློབ་སྦྱོང་གི་ཆ་རྐྱེན་དང༌། ཁྱིམ་གྱི་ས྄ློབ་སྦྱོང་གི་ཆ་རྐྱེན་སོགས་ལ་ཞིབ་ཏུ་བལྟས་ན། ཕ་མའི་ངོས་ནས་བྱིས་པ་ཚོར་བོད་ཡིག་དང་དབྱིན་ཡིག་གཉིས་ལས་དབྱིན་ཡིག་གི་མཐུན་རྐྱེན་མང་དུ་སྦྱར་ཡོད། བོད་ཡིག་གི་ཚིག་མཛོད་དང་ཟུར་ལྟའི་དེབ་སོགས་དཀོན་པོ་ཡིན། མ་འོངས་པར་དཀའ་ངལ་དེ་རིགས་སེལ་ཐབས་ལ། གཞུང་གི་ངོས་ནས་སློབ་གྲྭ་ཁག་གཅིག་གྱུར་ཡོང་ཐབས་ལ་འབད་བརྩོན་བྱ་དགོས་པ་རེད། སློབ་ཚན་བསྐྱར་ཞིབ་དང་སྒྲིག་གཞི་བསྐྱར་བཅོས་བྱས་ཏེ། དུས་རབས་དང་མཐུན་ཞིང༌། བྱིས་པའི་སེམས་ཁམས་དང་འཚམ་པའི་ཤེས་བྱ་གཏན་འབེབ། སྟངས་འཛིན་གཅིག་དང་སྒྲིག་གཞི་གཅིག སློབ་ཚན་གཅིག་གྱུར་འོག་འགྲོ་ཐུབ་པ་ཡིན་ན། ཕན་ཐོག་ཆེན་པོ་ཡོང་གི་རད་སྙམ། ཅེས་གསུངས་བྱུང༌།
ཝ་ར་ན་སཱིའི་མཐོ་སློབ་ཀྱི་བོད་ཡིག་དགེ་རྒན་ལྷག་པ་ཚེ་རིང་ལགས་སུ། ༧གོང་ས་མཆོག་གིས་བཙན་བྱོལ་བོད་པའི་ཤེས་ཡོན་འཐུས་ཤོར་ཕྱིན་ཚུལ་ནན་གྱིས་གསུངས་པའི་འཐུས་ཤོར་ངོས་འཛིན་བྱེད་སྟངས་དང༌། ཝ་ར་ན་སཱི་ཡིས་བོད་པའི་ཤེས་ཡོན་ཐད་གོ་གནས་གལ་ཆེན་བཟུང་ཡོད་སྟབས། དམིགས་བསལ་ལས་འཆར་གང་ཡོད་བཀའ་འདྲི་ཞུས་པའི་ལན་དུ་ཁོང་གིས། ཤེས་ཡོན་ཉམས་ཆག་ཆེ་ཤོས་སྐད་ཡིག་རེད། སློབ་ཕྲུག་གི་ཐད་ནས་ཀྱང་ལོ་རབས་བདུན་ཅུ་བརྒྱད་ཅུ་ནས་ཉམས་ཆག་ཏུ་ཕྱིན་ཏེ། དེང་སྐབས་འཛིན་གྲྭ་བཅུ་པ་དང་བཅུ་གཉིས་ཀྱི་སློབ་ཕྲུག་ཚོའི་བོད་པའི་མ་སྐད་ཐད། འཛིན་གྲྭ་ལྔ་བའི་ཤེས་ཚད་ཀྱང་ཨེ་ཡོད་བསམ་པ་འདུག སྤྱིར་སྔོན་མ་དང་བསྡུར་ན་ཆ་རྐྱེན་ཡག་ཏུ་ཕྱིན་ཏེ། ཚང་མར་ཡིག་རྨོངས་སེལ་ཡོད་པ་ལྟ་བུར་སྣང་ཡང༌། ཞིབ་ཏུ་བརྟག་ན། མཐོ་སློབ་ཐོན་མཁན་དང་བོད་ཡིག་དགེ་རྒན། ལས་ཁུངས་ཁག་གི་ལས་བྱེད་ཁྲོད་བོད་སྐད་གཙང་མ་རྒྱག་ཐུབ་མཁན་ཉུང་ཉུང་རེད། དེ་བཞིན་བོད་སྐད་ཀྱི་ཚིག་སྦྱོར་ཉམས་ཆག་ཕྱིན་འདུག དཔེར་ན། མར་རྒྱས་འགྲོ་བཞིན་འདུག དཀར་པོ་གླང་གོག་ལྟ་བུ་ཟེར་གྱིན་ཡོད། དེ་དག་བོད་སྐད་ཡིན་རུང་བོད་པའི་ཚིག་སྦྱོར་མ་རེད། དེ་དང་མཉམ་དུ་སྐད་ཡིག་ནང་འཐིམ་ཡོད་པའི་བོད་པའི་གཤིས་ཀ་དེ་ཡང་རླག་འགྲོ་བཞིན་ཡོད། དེའི་འབྱུང་རྐྱེན་གཙོ་བོ་ལུང་པ་མེད་པས་རེད། བོད་སྐད་གཙང་མའི་ཁོར་ཡུག་མེད་པས་རེད། འོན་ཀྱང༌། ང་ཚོ་སྐྱབས་བཅོལ་བ་ཡིན་བཞིན་དུ་སྐྱབས་བཅོལ་བའི་འདུ་ཤེས་དང་གྲ་སྒྲིག་མེད། སློབ་སྦྱོང་བྱེད་མཁན་ཚོས་ཀྱང་ལག་ཁྱེར་གཙོར་འདོན་བྱས་ཏེ། རྒྱལ་ཁབ་སླར་གསོ་དང་རིག་གཞུང་འཛིན་སྐྱོང༌། མི་རིགས་རྒུད་སྐྱོབ་ཀྱི་བསམ་བློ་མེད། མགོ་བྱེད་མི་སྣ་ཚོས་མང་ཚོགས་མདུན་ནས་བོད་ཡིག་སྦྱོང་དགོས་ཚུལ་ཤུགས་ཆེན་བཤད་དེ། སོ་སོའི་བུ་ཕྲུག་ལ་སློབ་གསོ་གཞན་ཞིག་རྒྱག་གིན་ཡོད།
སྐད་ཡིག་ཉམས་པ་བསྐྱར་གསོ་བྱ་རྒྱུར་བོད་ཁྱིམ་གཉིས་དང་རྒྱ་བལ་འབྲུག་གསུམ་གྱི་སློབ་གྲྭ་གཞན་དག དཔེ་སྟོན་སློབ་གྲྭ་དང་གཅིག་གྱུར་ཡོང་དགོས། གལ་ཏེ་ཅི་བཞིན་མ་བྱུང་ཡང༌། འཛིན་རིམ་དྲུག་པ་བདུན་པའི་བར་དེ་དང་ཉེ་བ་ཞིག་ངེས་པར་དུ་ཡོང་དགོས། ལོ་ཆུང་དུས་བོད་པའི་སྐད་ཡིག་ལ་བག་ཆགས་ཡག་པོ་ཡོད་ན། ཆེན་པོ་ཆགས་སྐབས་མི་རིགས་གཞན་པའི་སྐད་ཡིག་སྦྱོང་བར་དཀའ་ངལ་མེད། རབ་བྱུང་ན་ཕྱི་རྒྱལ་ཁག་ཏུ་ཡོད་རིགས་ཚོས་ཉམས་རུབ་ཐོག་རྒྱ་གར་ནང་ས་ཉོས་ཏེ། མཐུན་རྐྱེན་འདང་ངེས་སྤྲད་དེ་དགེ་རྒན་ཚད་ལྡན་བཙལ་དགོས། ཉུང་མཐར་འཛིན་གྲྭ་དྲུག་བདུན་བར་རྒྱ་བོད་དབྱིན་གསུམ་བོད་པ་ཡོད་ས་ཞིག་ནས་བསླབ་ཐུབ་ན་རབ་རེད། སྤྱི་ཚོགས་ཕྱོགས་ཡོངས་ནས་དོ་སྣང་བྱ་དགོས་པ་ཞིག་ནི། མིའི་ལུང་པ་ནས་ཕྱིའི་ཁོར་ཡུག་བཟོ་བཅོས་རྒྱག་མི་ཐུབ་ཀྱང༌། ཁྱིམ་ཚང་སོ་སོའི་ནང་ནས་བོད་ཁྱིམ་ངོ་མ་ཞིག་བཟོས་ཏེ། བོད་སྐད་གཙང་མར་འབད་བརྩོན་བྱ་དགོས། ཞེས་གསུངས་བྱུང༌།
བོད་གཞུང་སྨན་རྩིས་མཐོ་སློབ་ཀྱི་ཤེས་ཡོན་འགན་འཛིན་བསྟན་པ་ཆོས་འཕེལ་ལགས་སུ།
བོད་གཞུང་སྨན་རྩིས་མཐོ་སློབ་ཀྱི་ངོས་ནས་རིགས་གཅིག་རྐང་འཛིན་དང༌། གསོ་རིག་གི་སློབ་དེབ་དང་དགེ་རྒན་གྱི་ཁྲིད་ཐབས། དེ་བཞིན་སློབ་མ་ཚོར་ཚོད་ལྟ་དང་སྦྱོང་བརྡར་བྱེད་ཕྱོགས་ཐད་གསར་གཏོད་དང་ལེགས་བཅོས་བཏང་ཡོད་མེད་དྲིས་པའི་ལན་དུ་ཁོང་གིས་གསུངས་དོན། སྨན་རྩིས་མཐོ་སློབ་འདི་ལྟ་བུར་མཚོན་ན། ད་བར་སྐབས་ ༡༤ བ་དང་སྨན་པ་ ༢༠༠ ལྷག་སྐྱེད་སྲིང་བྱས་ཡོད། སྔོན་མ་སློབ་མ་བསྡུ་སྟངས་དགེ་འདུན་པར་ས་མིག་ ༣ དང༌། བོད་ནས་འབྱོར་བ་ཚོར་ ༣ ། གཏན་འཇགས་སློབ་གྲྭར་ ༣ ། ཧི་མ་ལ་ཡའི་རི་རྒྱུད་དུ་ ༢ ། ཕྱི་རྒྱལ་ལ་ ༡ བཅས་ཆ་བགོ་བྱས་ཡོད་ཀྱང༌། སློབ་མ་ཚོའི་ཤེས་ཚད་མ་མཉམ་པའི་དཀའ་ངལ་འཕྲད་དེ། ད་ལྟ་འགྱུར་བ་བཏང་སྟེ་འཛིན་གྲྭ་བཅུ་གཉིས་ཐོན་པ་ཚོར་ཡིག་རྩལ་བཏང་སྟེ་རྩེ་བཏོག་བྱེད་ཀྱིན་ཡོད། སོག་པོར་དམིགས་བསལ་རེད། འོན་ཀྱང༌། ཕྱོགས་ཡོང་ནས་བལྟས་ན། རིགས་གཅིག་རྐང་འཛིན་སོགས་ཀྱི་ཐད། ང་ཚོར་འདང་གི་མེད་པའི་ཆ་མང་པོ་འདུག གང་ཡིན་ཟེར་ན། རིགས་གཅིག་གི་སྟེང་ལ་ཆེད་མཁས་པ་ཞིག་སྟོན་རྒྱུ་ཁག་པོ་ཆགས་ཡོད། དེ་ལ་སློབ་གྲྭ་དང་སློབ་མ་སོ་སོའི་ངོས་ནས་ཀྱང་འཐུས་ཤོར་ལ་བཏང་ཡོད། བློ་རྩེ་གཉིས་སྐྱེས་ཏེ་ནུབ་ཕྱོགས་རྒྱལ་ཁབ་ཁག་ཏུ་ཕྱིན་ཏེ་རླག་འགྲོ་བ་མང་པོ་ཞིག་འདུག བོད་པའི་སྨན་པ་ཞིག་ཡིན་ན། མགོ་ནས་རྐང་མཐིལ་བར་གྱི་གནས་ལུགས་ཆགས་སྟངས། སྨན་གྱི་འགྲོ་སྟངས་ཆ་ཚང་ཤེས་དགོས། དཔེར་ན། ཕྱི་རྒྱལ་ལྟ་བུར་མཚོན་ན། སྙིང་གི་མཁས་པ་འདི་རེད་ཅེས་སྟོན་རྒྱུ་ཡོད་ཀྱང་ང་ཚོར་དེ་འདྲ་མེད།
གནད་དོན་འདི་དག་སེལ་ཐབས་ལ། ད་ལོ་ནས་གོམ་པ་དང་པོ་སྤོས་ཏེ་འཆར་གཞི་སྒྲིག་ཡོད། དགེ་རྒན་ལྔ་ལ་ཉིན་གུང་རྒྱབ་ཀྱི་ཆུ་ཚོད་དམིགས་བསལ་སྤྲད་དེ། སྨན་གྱི་ལོ་རྒྱུས་ཆ་ཚང་བ། སྔོ་སྨན་གྱི་སྐྱེ་ལུགས་གནས་སྟངས་ཆ་ཚང་བ། དེ་བཞིན། བོད་ཀྱི་གསོ་རིག་ནང་ཆོས་དང་འབྲེལ་ཏེ། སེམས་དང་སེམས་བྱུང་གི་རྣམ་བཞག་སོགས་ཟུང་འབྲེལ་གྱི་འགྲོ་སྟངས། བོད་སྨན་དང་རྩིས་ལ་འབྲེལ་བ་ཡོད་སྟབས། རྩིས་གཞུང་གི་དགེ་རྒན། བོད་སྨན་ཆོས་དང་འབྲེལ་ཡོད་སྟབས། གཏོ་བཅོས་སྐོར་གྱི་དགེ་རྒན། བོད་དང་རྒྱ་གར་ནུབ་ལུགས་བཅས་ཀྱི་འཁྲུངས་སྨན་བཅས་རིག་ཚན་བྱེ་བྲག་པ་རེ་རེ་ལ་དགེ་རྒན་གོ་སྒྲིག་བྱས་ཡོད། དེ་ནི་ང་ཚོས་སྨན་རྩིས་མཐོ་སློབ་ནས་རིགས་གཅིག་རྐང་འཛིན་འཐོན་རྒྱུར་རེ་བ་བརྒྱབས་པ་ཡིན། བོད་ཀྱི་སྲོལ་རྒྱུན་ལྟར་ངག་རྒྱུགས་མང་དྲགས་ཏེ། སློབ་མར་དཀའ་ངལ་འཕྲད་བཞིན་འདུག དེ་ལ་ཅུང་འགྱུར་བ་གཏོང་རྒྱུར་ཚོད་ལྟ་བྱས་ཀྱང༌། སློབ་སྦྱོང་གཞན་ལ་གཡེངས་ཏེ། སྨན་གྱི་གྲུབ་འབྲས་སྔར་ལས་ཅུང་སྐྱོ་རུ་ཕྱིན་འདུག དེར་བརྟེན། སློབ་སྦྱོང་གི་རྩ་བའི་འགྲོ་སྟངས་རང་སོར་འཇོག་དགོས་པ་ཆགས་སོང༌། ཞེས་གསུངས་སོང༌།
སྒྲོལ་དཀར་སྐྱབས་ཀྱི་བཀའ་མོལ་དེ་སྔོན་མ་དགུ་བཅུ་གོ་གྲངས་ནང་ཁོང་དགེ་རྒན་ཡིན་སྐབས་ཀྱི་བཀའ་མོལ་ཞིག་ཡིན་ན། དགུ་བཅུ་གོ་གྲངས་ནང་ལ་བཙན་བྱོལ་གྱི་སློབ་གྲ་གང་དུ་གཞི་རིམ་འཛིན་གྲ་གསུམ་པ་ནས་སུམ་རྟགས་འཁྲིད་ཀྱི་ཡོད་པ་རེད་དམ།
རིག་འབྱུང་དོན་གྲུབ་བཀྲ་ཤིས་ལགས། ཁོང་ཅག་གི་བཀའ་མོལ་ཡིག་ཐོག་ལ་ཕབས་སྐབས་ངས་ཀྱང་དེ་ལྟར་དྲན་སོང་མོད། སྒྲོན་དཀར་སྐྱབས་ཀྱི་བཀའ་མོལ་དེ་ཁོང་སྔོན་མ་དགུ་བཅུ་གོ་གྲངས་ནང་དགེ་རྒན་ཡིན་སྐབས་ཀྱི་གནས་ཚུལ་ཞིག་གསུང་གིན་ཡོད་པ་མིན་འགྲོ སྤྱིར་ཁོང་གིས་བཙན་བྱོལ་བོད་མིའི་སློབ་གྲྭ་ཡོངས་འཛིན་སྐྱོང་སྟངས་འཛིན་གཅིག་གི་འོག་སྐྱོད་ཐུབ་རྒྱུ་གལ་ཆེན་དུ་གཟིགས་ཀྱིན་འདུག འཛིན་སྐྱོང་མི་འདྲ་བ་དེ་ཁོང་གི་སེམས་འཁྲུལ་ཆེ་ཤོས་རེད།
དྲང་མོར་བཤད་ན་། ཚང་མས་ལག་ལེན་ལ་མ་བཏང་བ་མ་གཏོགས། བཙན་བྱོལ་གྱི་ཤེས་ཡོན་འཐུས་ཤོར་འགྲོ་དགོས་བའི་རྒྱུ་རྐྱེན་དང་དེ་སླར་གསོ་བྱ་ཐབས་ཀྱི་ཕྱོགས་ནས་བསམ་ཚུལ་སྔ་མོ་ནས་ཡོད་པ་འདྲ།
གཞན་ངེད་ལ་འདིར་དོགས་སློང་ཞིག་ཡོད།
ནོར་གླིང་བོད་ཀྱི་མཐོ་སློབ་རིག་གནས་སློབ་གཉེར་ཁང་གི་འགན་འཛིན་སྒྲོལ་དཀར་སྐྱབས་ལགས་ནས་དུས་བབ་གསར་འགོད་པར་འདི་འདྲ་ཞིག་བརྗོད་འདུག
གཞུང་འཛིན་སྐྱོང་གིས་སློབ་ཚན་གཏན་འབེབས་བྱེད་ཕྱོགས་ཐད་ནས་། བྱིས་བ་ཚོར་འཛིན་གྲྭ་གསུམ་པ་ནས་སུམ་རྟགས་དང་ལྔ་བ་ནས་རིགས་ལམ་མགོ་བཙུགས་ཡོད་ཟེར། གཞུང་གི་འཛིན་སྐྱོང་གང་གི་འོག་གི་སྡེ་ཚན་གང་གིས་འདི་གཏན་འབེབས་བྱས་བ་རེད། ད་ལྟ་རྒྱ་བལ་འབྲུག་གསུམ་ཁྱོན་ཡོངས་ལ་བོད་པའི་གཏན་ཉིན་སློབ་གྲྭ་ཁག་བརྒྱད་ཅུ་གྱ་བདུན་ལྷགཡོད་པའི་ཁོངས་ནས་སློབ་གྲ་གང་དུ་གཞི་རིམ་འཛིན་གྲ་གསུམ་པ་ལ་སུམ་རྟགས་འཁྲིད་ཀྱི་འདུག་གམ། ལན་ཞིག་གནང་རོགས།
དྲང་མོར་བཤད་ན་། ཚང་མས་ལག་ལེན་ལ་མ་བཏང་བ་མ་གཏོགས། བཙན་བྱོལ་གྱི་ཤེས་ཡོན་འཐུས་ཤོར་འགྲོ་དགོས་བའི་རྒྱུ་རྐྱེན་དང་དེ་སླར་གསོ་བྱ་ཐབས་ཀྱི་ཕྱོགས་ནས་བསམ་ཚུལ་སྔ་མོ་ནས་ཡོད་པ་འདྲ།
གཞན་ངེད་ལ་འདིར་དོགས་སློང་ཞིག་ཡོད།
ནོར་གླིང་བོད་ཀྱི་མཐོ་སློབ་རིག་གནས་སློབ་གཉེར་ཁང་གི་འགན་འཛིན་སྒྲོལ་དཀར་སྐྱབས་ལགས་ནས་དུས་བབ་གསར་འགོད་པར་འདི་འདྲ་ཞིག་བརྗོད་འདུག
གཞུང་འཛིན་སྐྱོང་གིས་སློབ་ཚན་གཏན་འབེབས་བྱེད་ཕྱོགས་ཐད་ནས་། བྱིས་བ་ཚོར་འཛིན་གྲྭ་གསུམ་པ་ནས་སུམ་རྟགས་དང་ལྔ་བ་ནས་རིགས་ལམ་མགོ་བཙུགས་ཡོད་ཟེར། གཞུང་གི་འཛིན་སྐྱོང་གང་གི་འོག་གི་སྡེ་ཚན་གང་གིས་འདི་གཏན་འབེབས་བྱས་བ་རེད། ད་ལྟ་རྒྱ་བལ་འབྲུག་གསུམ་ཁྱོན་ཡོངས་ལ་བོད་པའི་གཏན་ཉིན་སློབ་གྲྭ་ཁག་བརྒྱད་ཅུ་གྱ་བདུན་ལྷགཡོད་པའི་ཁོངས་ནས་སློབ་གྲ་གང་དུ་གཞི་རིམ་འཛིན་གྲ་གསུམ་པ་ལ་སུམ་རྟགས་འཁྲིད་ཀྱི་འདུག་གམ། ལན་ཞིག་གནང་རོགས།
དྲང་མོར་བཤད་ན་། ཚང་མས་ལག་ལེན་ལ་མ་བཏང་བ་མ་གཏོགས། བཙན་བྱོལ་གྱི་ཤེས་ཡོན་འཐུས་ཤོར་འགྲོ་དགོས་བའི་རྒྱུ་རྐྱེན་དང་དེ་སླར་གསོ་བྱ་ཐབས་ཀྱི་ཕྱོགས་ནས་བསམ་ཚུལ་སྔ་མོ་ནས་ཡོད་པ་འད
ཀརྨ་ཆུང་བདག་ཚིག་ཟུར་མདའ་དང་འདྲ། །མདའ་རྣོན་པོས་ཆེ་རྒུ་ཚང་མ་རྨས།
ལོ་ངོ་སུམ་ཅུ་ལ་གཉིད་ཤོར་བ་འདི་ཅུང་ཙམ་ཡ་མཚན་རེད་འདུག་ག ་འོནཀྱང་། ད་དུང་ཤུགས་བརྒྱབ་ནས་ཧུར་བརྩོན་བསྐྱེད་པ་ཡིན་ན་རེ་བ་མེད་པ་དེ་འདྲ་རེད་མི་འདུག་སྙམ།
གང་ལྟར། ཚང་མས་སོ་སོའི་རྣམ་དཔྱོད་བཏོན། རིག་པ་བརྡར། བརྗེ་རེས་བྱས་ནས་མདུན་བསྐྱོད་བྱེད་དགོས་ཀྱི་གལ་ཆེན་པོ་རེད།