ཉིན་ཤས་གོང་ནས་རྒྱ་གཞུང་གིས་དགུན་དུས་དྲག་རྡུང་གི་ལས་འགུལ་སྤེལ་ཏེ་བདུན་ཕྲག་གཅིག་གི་རིང་ལྷ་ས་གྲོང་ཁྱེར་དུ་མི་ ༨༤༢༤ ལྷག་ལ་ཞིབ་བཤེར་དང་མི་ ༨༡ བཀག་ཉར་བྱས་ཡོད་འདུག ད་དུང་ལྷ་ས་སྤྱི་བདེ་ཁང་གིས་གྲོང་ཁྱེར་ཡོངས་སུ་དམག་མི་ ༦༠༠ དང་དམག་མིའི་རླངས་འཁོར་ ༡༦༠ གསར་དུ་བཀྲམས་ཏེ་གཞིས་གྲོང་ཁག་ ༧ དང་བོགས་གཏོང་མགྲོན་ཁང་ ༡༩༢༢། གསོལ་མགྲོན་ཁང་ ༡༤། དྲ་ཁང་ ༣ བཅས་སུའང་ཞིབ་བཤེར་བྱས་ཡོད་འདུག
ཕྱི་ཚེས་ ༢༩ ཉིན་འདི་གའི་གསར་འགོད་པས་གནས་ཚུལ་འདིའི་སྐོར་འགྲོ་བ་མིའི་ཐོབ་ཐང་གི་འགན་འཛིན་ལས་རོགས་པ་འཇམ་དཔལ་སྨོན་ལམ་ལགས་སུ་དྲིས་པར་ཁོང་གིས། བོད་ནས་གནས་ཚུལ་ཁུངས་ལྡན་འབྱོར་བ་དང་ལྷ་སའི་དགོང་དྲོའི་ཚགས་པར་ནང་ཐོན་པ་ལྟར་ན། ཟླ་འདིའི་ཚེས ༡༨ ནས་དགུན་དུས་ཀྱི་དྲག་རྡུང་ལས་འགུལ་དེ་ལྷ་ས་གྲོང་ཁྱེར་ནང་མགོ་བཙུགས་འདུག ད་ཐེངས་ཀྱི་ལས་འགུལ་འདི་ནི་རྒྱ་ཆེན་པོ་ཞིག་རེད། དཔེར་ན་ལྷ་སའི་དགོང་དྲོའི་ཚགས་པར་ལྟར་་ན་དམག་མིའི་མོ་ཌ ༡༦༠ དང་དམག་མི ༦༠༠ ལྷག་ཅིག་གིས་ལྷ་ས་གྲོང་ཁྱེར་ཁྱོན་ཡོངས་སུ་ཞིབ་བཤེར་བྱེད་པར་མགོ་བརྩམས་ཡོད་པ་རེད། ད་སྐབས་དྲག་རྡུང་ལས་འགུལ་ཟེར་བ་ཞིག་དང༌། ཕྱོགས་ཡོངས་ཀྱི་སྔོག་བཤེར་ལས་འགུལ་ཟེར་བ་གཉིས་འགྲོ་བསྡད་འདུག སྔོག་བཤེར་བྱས་པའི་ལས་འགུལ་དེའི་ནང་མི ༥༧༦༦ ལ་སྔོག་བཤེར་དང༌། དེ་བཞིན་མགྲོན་ཁང་དང་དྲ་ཁང་སོགས་ལའང་སྔོག་བཤེར་བྱེད་བཞིན་ཡོད་པ་རེད། རྒྱ་ནག་གཞུང་གིས་འདི་ནི་ལྷ་སའི་བདེ་འཇགས་ཀྱི་ཆེད་དུ་ཡིན་སྐོར་བཤད་ཀྱིན་ཡོད་པ་རེད་དེ། ང་ཚོས་འདི་ནི་་ཆབ་སྲིད་ཀྱི་གཙང་བཤེར་ཞིག་རེད་ཟེར་གྱིན་ཡོད། དེ་ག་རེ་རེད་ཟེར་ན། ན་ནིང་གི་གསུམ་བཅུའི་དུས་དྲན་ནས་བཟུང་བོད་པར་དོགས་ཟོན་ཆེན་པོ་བྱེད་ཀྱིན་ཡོད་པ་རེད། ༢༠༠༩ ལོར་དེ་འདྲ་ཞིག་མི་ཡོང་བའི་ཆེད་དུ་སྔོན་འགོག་བྱེད་ཀྱིན་ཡོད་པ་རེད། ང་ཚོར་གནས་ཚུལ་ཁུངས་ལྡན་འབྱོར་བ་ལྟར་ན་ལྷ་ས་གྲོང་ཁྱེར་ནང་གཏན་འཇགས་ལས་ཀ་མེད་མཁན་དང་གནས་སྐབས་རིང་བསྡད་ཆོག་པའི་ལག་འཁྱེར་མེད་པ། ད་དུང་སྐྱེས་ཡུལ་ལྷ་ས་ནས་མིན་པ་དེ་ཚོའི་རིགས་དང༌། ནམ་རྒྱུན་བོད་དོན་ཐོག་དོ་སྣང་ཡོད་རིགས་ལ་དཀའ་ངལ་ཆེན་པོ་ཡོང་གི་འདུག་ཟེར། རྒྱ་ནག་གཞུང་གིས་དོགས་པ་ཡོད་རིགས་ཀྱི་མི་རྣམས་ཉེས་པ་མེད་ཀྱང་འཛིན་བཟུང་བྱས་ནས། ཁྱེད་རང་ཟླ་བ་གསུམ་པའི་ཚེས་པ་བཅུ་བཞིའི་ཉིན་མོ་གང་དུ་ཡོད་མེད་དང་དཔང་རྟགས་སུས་བྱེད་མིན་སོགས་འདྲི་གི་འདུག་ཟེར། དེ་དུས་ལན་ཏག་ཏག་བསྐྱོན་མ་ཐུབ་པ་དང་སྐད་ཆ་ཏག་ཏག་མ་བསྡད་པའི་རིགས་ཚང་མ་འཛིན་བཟུང་བྱེད་ཀྱིན་འདུག་ཟེར། དེ་བས་རྒྱ་ནག་གིས་བཤད་པ་ནང་བཞིན་གྲོང་ཁྱེར་གྱི་བདེ་འཇགས་གཅིག་པོ་མ་རེད། ཆབ་སྲིད་ཀྱི་གཙང་བཤེར་ཞིག་རེད་ཟེར་གྱིན་ཡོད་ཅེས་འདི་ག་གསར་ཁང་ལ་བརྗོད་བྱུང༌།
ཕྱི་ཚེས་ ༢༩ ཉིན་གྱི་གནས་ཚུལ་ལྟར་ན། ད་ཐེངས་ཀྱི་དགུན་དུས་དྲག་རྡུང་གི་ལས་འགུལ་འདིའི་ནང་མི ༦༠༠༠ ལ་ཞིབ་བཤེར་དང་མི ༨༡ བཀག་ཉར་བྱས་པའི་ཁྲོད་ཀྱི་མི་གཉིས་ལ་ལག་འཁྱེར་ཁ་པར་ནང་གསར་བརྗེ་ངོ་ལོག་གི་གཞས་ཉར་པའི་ཉེས་མིང་འོག་འཛིན་བཟུང་དང་མི་ ༣༠ སྨད་འཚོང་མ་དང་རྐུན་མ། ཇག་པ་བཅས་ཀྱི་ཉེས་མིང་འོག་བཀག་ཉར་བྱས་འདུག་ལ། མི ༥༡ ལ་ཉེས་མིང་གསལ་མེད་པར་བཀག་ཉར་བྱས་འདུག་འདིའི་ཐད་ཁོང་གིས། གཞས་ག་རེ་ཡིན་མིན་དང་མི་དེ་གཉིས་སུ་ཡིན་མིན་གསལ་ཁ་མེད། སྤྱིར་ལྷ་ས་ནས་དེའི་སྐོར་ལ་དམ་དྲག་ཆེན་པོ་བྱེད་ཀྱིན་ཡོད་པ་རེད། ཉེ་སྔོན་ཡང་མི་ལྔ་ཞིག་གསར་བརྗེ་ངོ་ལོག་གི་གཞས་ཀྱི་ཉེས་མིང་འོག་ལྷ་ས་ནས་འཛིན་བཟུང་བྱས་པའི་གནས་ཚུལ་ཐོན་ཡོད་པ་རེད། བཀག་ཉར་བྱས་པའི་མི ༥༡ དེ་ང་ཚོས་ཚོད་དཔག་བྱས་པ་ལྟར་ན་ཞི་བའི་ངོ་རྒོལ་སྐབས་ཀྱི་མི་དེ་འདྲ་རེད་ཟེར་གྱིན་ཡོད། ཟླ་འདིའི་ཚེས ༢༣ ཉིན་མི་ ༥༧༦༣ ལ་ཞིབ་བཤེར་བྱས་འདུག དེ་ནས་ཉིན་གསུམ་འགོར་རྗེས་ཞིབ་བཤེར་བྱས་པའི་མི་གྲངས་ ༨༠༠༠ ལ་བསླེབས་འདུག དེ་འདྲ་བྱས་ནས་ཉིན་རེ་ཉིན་རེར་མི་གྲངས་འཕར་ནས་འགྲོ་གི་ཡོད་པ་རེད། དེའི་ནང་ནས། ང་རང་གི་བསམ་ཚུལ་ལ་མང་ཤོས་ཤིག་ཆབ་སྲིད་ཀྱི་གནད་དོན་ཐད་ནས་འཛིན་གྱིན་ཡོད་པ་རེད་བསམ་གི་འདུག ད་ཁོ་རང་ཚོས་བཀག་ཉར་བྱས་པ་དེའང་གཤང་བཙོང་མ་དང་རྐུན་མ་དེ་ཚོར་ཁ་གཡར་བ་མ་གཏོགས་དོན་དངོས་སྟེང་ཆབ་སྲིད་ཀྱི་གཙང་བཤེར་ཆེན་པོ་ཞིག་རེད་བསམ་གི་འདུག གང་ཡིན་ཟེར་ན་ཉེ་ཆར་ལྷ་ས་ལྗོངས་ཡོངས་ཀྱི་བདེ་སྲུང་ཉེན་རྟོག་པ་ཚོར་ངོ་རྒོལ་ལ་སྲུང་སྐྱོབས་བྱེད་ཆེད་ཀྱི་གོ་ལག་རྒྱ་སྒོར་ཁྲི་སྟོང་ཕྲག་མང་བོའི་རིན་ཐང་ཅན་གྱི་གོ་ལག་སྤྲད་ཡོད་པ་རེད། ཆེད་དུ་ཞི་བའི་ངོ་རྒོལ་ལ་རྡུང་རྡེག་བྱེད་ཆེད་ཀྱི་ཅ་ལག་དེ་འདྲ་སྤྲད་ཡོད་པ་རེད། མིག་ཆུ་ཡོང་བྱེད་ཀྱི་མེ་མདའི་རྫས་ཤིག་ཡོད་པ་རེད། དེ་སྤྲད་ཡོད་པ་རེད། ཕུབ་འདྲ་མིན་སྣ་ཚོགས་སྤྲད་ཡོད་པ་རེད། དེ་ཚོར་བལྟས་ན་ད་ཐེངས་ཀྱི་ལས་འགུལ་འདིའང་ཞི་རྒོལ་བ་ཚོ་སྔོན་བཀག་གི་ཆེད་དུ་ཡིན་པ་ནི་གསལ་བོ་གསལ་རྐྱང་རེད་ཟེར།
དྲག་རྡུང་ལས་འགུལ་འདི་ནི་ཐོག་མར་ ༡༩༨༣ ནས་མགོ་བཙུགས་པ་ཞིག་རེད། དེར་བརྟེན་ད་ལོ་དང་འདས་པའི་ལོ་ངོ ༢༦ རིང་གི་གནས་སྟངས་འདྲ་མིན་ཐད་ཁོང་གིས། སྔོན་མ་དང་བསྡུར་ན་ད་ཐེངས་རྒྱ་ཆེན་པོ་དང་གཏིང་ཟབ་མོ་འདྲ་བོ་རེད། སྔོན་མ་ཡིན་ན་ཁང་བ་དང་འགྲིམ་འགྲུལ་སྐོར་ཞིབ་བཤེར་བྱེད་ཀྱིན་ཡོད་པ་མ་རེད། རྐུན་མ་དང་ཉེས་ཅན་པ་དེའི་རིགས་མ་གཏོགས་སྔོག་བཤེར་བྱེད་ཀྱིན་ཡོད་པ་མ་རེད། ཡིན་ནའང་ད་ལོར་རྒྱ་ནག་ལ་མཚོན་ན་བློ་འཚབ་ཆེན་པོ་ཡོད་ས་རེད། ལྷག་པར་དུ ༢༠༠༩ ལོ་ནི་ན་ནིང་ལ་བལྟས་ནའང་ཛ་དྲག་གི་ལོ་ཞིག་མཐོང་གི་ཡོད་ས་རེད་ཟེར། ཡང་རྒྱ་ནག་གིས་ཉེས་ཅན་པར་བརྩི་བའི་མི་འདུག་སའི་ས་གནས་ཁག་ཅིག་ལ་སྔོག་བཤེར་བྱས་ནས་མི ༦༠༠༠ བཀག་ཉར་བྱས་ཡོད་པ་དང་ས་ཁུལ་དེ་དག་གང་ཡིན་མིན་གྱི་སྐོར་ནས་དྲིས་པར་ཁོང་གིས་བརྗོད་དོན། དེ་གསལ་བོ་མ་ཤེས་ཏེ་ཕལ་ཆེར་ལྷ་སའི་བར་སྐོར་དང་བོད་མི་གནས་བསྡོད་བྱེད་སའི་ས་ཁུལ་ཚང་མ་འཁེལ་གྱི་ཡོད་པ་རེད་བསམ་གི་འདུག་ཟེར། མཐའ་མཇུག་ད་ལོར་དམིགས་བསལ་གྱིས་དྲག་རྡུང་ལས་འགུལ་འདི་འདྲ་ཞིག་སྤེལ་བའི་ཐོག་ལ་ཁྱེད་རང་གི་ངོས་ནས་ག་རེ་བསམ་གི་ཡོད་མེད་དྲིས་པར་ངས་ད་ཐེངས་ཀྱི་དྲག་རྡུང་ལས་འགུལ་འདི་དམིགས་བསལ་གྱི་ཆབ་སྲིད་གཙང་སེལ་གྱི་ལས་འགུལ་ཞིག་རེད་བསམ་གི་ཡོད། ལྷག་པར་དུ་ལྷ་ས་དེ་བོད་མི་ཚོས་ངོ་རྒོལ་བྱེད་སའི་གཡུལ་ས་ལྟ་བུ་ཞིག་ཆགས་ཡོད་པ་རེད། དེ་བས ༢༠༠༨ ལོའི་གསུམ་བཅུའི་དུས་དྲན་གྱི་གནས་ཚུལ་འདི་འདྲ་ཞིག་གི་སྒང་ན་ཡོད་དུས་ཡང ༢༠༠༩ ལོར་གནས་ཚུལ་གསར་བ་ཞིག་ཁ་སྣོན་བྱེད་ན་ཁོང་ཚོར་ཡང་དཀའ་ངལ་ཡོད་པ་རེད། དེའདྲ་མི་ཡོང་བའི་ཆེད་དུ་སྔོན་འགོག་བྱེད་ཀྱིན་ཡོད་པ་རེད་བསམ་ཡོད་ཅེས་ནས་བརྗོད་སོང༌།
ཟླ་འདིའི་ཚེས་ ༡༩ ཉིན་རྒྱ་ནག་གི་སྐབས་དགུ་བའི་མི་དམངས་ཚོགས་འདུ་ཐེངས་གཉིས་པའི་མཇུག་བསྡོམས་ཐོག དེང་སྐབས་བོད་ལྗོངས་ནི་ཁ་བྲལ་བར་ངོ་རྒོལ་བྱེད་པའི་ཚ་རླབས་ཀྱི་དུས་ཡིན་པ་དང༌། ལངས་ཕྱོགས་བརྟན་པོའི་སྒོ་ནས་ཁ་བྲལ་བར་ངོ་རྒོལ་དང༌། རྒྱལ་ཁབ་ཀྱི་བདེ་འཇགས་སྲུང་སྐྱོང༌། བོད་ལྗོངས་བརྟན་ལྷིང༌། དགྲ་བོའི་གནས་ཚུལ་གྱི་འགྱུར་ལྡོག་ལ་དོགས་ཟོན་གྱིས་མགོ་མཇུག་བར་གསུམ་དུ་དྲག་གནོན་རྒོལ་འཛིངས་ཀྱི་སྟ་གོན་བྱ་རྒྱུ། གཞན་ཡང་བོད་ལྗོངས་ཞིང་བྲན་ཁྲི་བརྒྱ་བཅིངས་འགྲོལ་བྱས་པའི་དུས་དྲན་སྲུང་གཙིའི་ལས་འགུལ་རྒྱུན་སྐྱོང་བྱས་ཏེ། བོད་ལྗོངས་ཡུན་རིང་བརྟན་ལྷིང་བདེ་འཇགས་ཡོང་བར་བསམ་བློའི་རྨང་གཞི་འཛུགས་དགོས་ཞེས་ཀྱང་བརྗོད་ཡོད་འདུག
རྒྱ་ནག་གིས་བོད་ཡུལ་བཙན་འཕྲོག་བྱེད་རྒྱུ་དང་བོད་པར་དྲག་རྡུང་བྱེད་རྒྱུ་དེ་ཁོ་ཚོའི་ཐོབ་ཐང་ཞིག་ཏུ་འགྱུར་བཞིན་ཡོད་པ་རེད་ཟེར། དངོས་གནས་དེ་འདྲ་ཞིག་ཡིན་དེ་ལ་བོད་གཞུང་གི་ངོས་ནས་ག་རེ་བྱེད་དགོས་ཀྱིན་འདུག མི་སྒེར་གྱི་ངོས་ནས་ག་རེ་བྱེད་དགོས་ཀྱིན་འདུག ང་ཚོར་གྲ་སྒྲིག་ཅི་ཡོད། འདིའི་སྐོར་ལ་གླེང་སློང་ཤུགས་ཆེ་ཙམ་བྱས་ན་ལམ་ཀ་ཞིག་རྙེད་ཀྱི་རེད། རྣམ་པ་ཚོས་གཟིགས་ན།
འཕྲོག་བཅོམ་དང་རྐུ་འཁྱེར་ རྡུང་རྡེག་དང་གསོད་གཏུབ་་ དོན་དངོས་ཐོག་རྒྱ་གཞུང་ནི་ དྲག་སྤྱོད་པ་དང་ཇག་རྐུན་ཚོགས་པ་དངོས་ཞིག་རེད།
ད་སྐབས་ཁོ་ཚོས་ཧམ་སེམས་རྐུབ་སྟེགས་དེ་ཆག་ལ་ཉེ་པས་གནོང་ལ་ཐུགས་ཡོང་དུས་ད་སྨྱོ་ལ་ཁད་གྱིས་ཅི་ཡང་བྱེད་གྱིན་ཡོད་པ་རེད།
ད་རྡུང་གཅོག་འཕྲོག་བཅོམ་གྱི་ལས་ཀ་ངོ་མ་བྱེད་མཁན་དེ་ཁོ་རང་ཚང་རེད་མ་སོང་ངམ།