རྒྱ་གཞུང་གི་དམ་དྲག་ཤུགས་ཆེན་ཡོད་མེད་ལ་མ་ལྟོས་པར། ང་ཚོའི་འཐབ་རྩོད་ཀྱི་ཕུགས་རྒྱང་རིང་པོའི་ཁེ་ཕན་སྙིང་ལ་བཅངས་ཏེ། མཐའ་གཅིག་ཏུ་འཚེ་མེད་ཞི་བའི་རྒྱ་ལས་མ་འདས་ཤིང༌། ལྷག་པར་དུ་རང་གི་ལུས་སྲོག་ལ་གནོད་འཚེ་ཕོག་པ་དང༌། དོན་མེད་བཙོན་འཇུག མནར་གཅོད་སོགས་ཡོང་གཞིའི་ལས་འགུལ་རིགས་མི་གནང་བར། བཟོད་བསྲན་གྱིས་ཞི་འཇམ་བརྟན་ལྷིང་གང་ཐུབ་དང༌། ལྷག་པར་རྒྱ་མི་རིགས་དང་མཉམ་དུ་ཁ་བྲལ་འཁོན་འཛིན་མི་ཡོང་བའི་ཐབས་ཤེས་གང་ཐུབ་གནང་སྐྱོང་ཡོང་བ་ཞུ། ཞེས་བཀའ་ཤག་གིས་འབོད་སྐུལ་གནང་ཡོད།
དེ་རིང་ཉིན་རྒྱབ་ཆུ་ཚོད་ ༢ དང་ཕྱེད་ཀའི་ཐོག་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་གཉིས་ཀྱིས་ད་ལྟའི་བོད་ནང་གི་གནས་ཚུལ་ཁག་ཅིག་དང་འབྲེལ། རྒྱ་གཞུང་གིས་བོད་ཐོག་བྱེད་སྟངས་སྡུག་ཏུ་འགྲོ་བཞིན་ཡོད་པའི་སྐོར་གྱི་བཀའ་ཤག་གི་གསར་འགོད་གསལ་བསྒྲགས་ཤིག་སྤེལ་སོང་ལ། སྐབས་དེར་རྒྱ་གར་དང་བོད་པ། ཕྱི་རྒྱལ་བཅས་ཀྱི་གསར་འགོད་པའི་དྲི་བ་ཁག་ལ་ལན་འདེབས་ཀྱང་གནང་སོང༌།
བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་ཐེངས་འདིའི་གསར་འགོད་གསལ་བསྒྲགས་དབྱིན་ཡིག་ནང་སྒྲོག་སྦྱོང་གནང་གྲུབ་རྗེས། དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་གསར་འགོད་གསལ་བསྒྲགས་བོད་ཡིག་ནང་སྒྲོག་སྦྱོང་གནང་དོན། སྔར་ལོ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ས་ཡོངས་ཀྱི་བོད་མིའི་ངོ་རྒོལ་དྲག་གནོན་དང༌། ཆེས་དམ་དྲག་ཆེ་བའི་སྲིད་བྱུས་ལག་བསྟར་བྱས་རྗེས། ཕྱི་ལོ་ ༢༠༠༩ ཟླ་ ༡ ཚེས་ ༡༨ ཉིན་བོད་ཀྱི་རྒྱལ་ས་ལྷ་སར་རྒྱ་གཞུང་གི་དབང་འཛིན་པ་ཚོས་ཆབ་སྲིད་ཀྱི་ངོ་རྒོལ་འགོག་ཐབས་དང་བརྟན་ལྷིང་སྲུང་སྐྱོབ་ཟེར་བའི་ཉིན་ ༤༢ རིང་གི་རྡུང་རྡེག་ཚ་ནན་གྱི་ལས་འགུལ་སྤེལ་བའི་གནས་ཚུལ་ཐོན་པར་བློ་ཕམ་ཚད་མེད་བྱུང༌།
ཁུངས་ལྡན་གནས་ཚུལ་འབྱོར་བ་ལྟར་ན། ལྷ་སའི་སྤྱི་ཚོགས་བདེ་འཇགས་ལས་ཁུངས་ཀྱིས་བོད་མིའི་ཁྱིམ་ཚང་དང་ཟ་ཁང་ཁག་བསྔོག་བཤེར་བྱས་ཏེ། དོགས་གཞི་ཅན་གྱི་མི་ ༥༧༦༦ ཙམ་ལ་འདྲི་བརྩད་བྱས་འདུག དེ་བཞིན་ཟླ་ ༡ ཚེས་ ༢༧ ཉིན་སྡེ་དགེ་དགོན་ཆེན་ནང་མཚན་གུང་མེ་མདའ་བརྒྱབས་པའི་གནས་ཚུལ་ཡང་བྱུང་འདུག སྔ་ལོ་ཟླ་ ༣ པའི་ནང་བོད་རྒྱ་ཁྱབ་ཏུ་བྱུང་བའི་གྱེན་ལངས་ཀྱི་རྗེས་སུ་ལས་འགུལ་འདི་ཆབ་སྲིད་ཀྱི་ངོ་བོར་གྱུར་ཟིན་པ་དང༌། ཆབ་སྲིད་ཀྱི་འདོད་ཚུལ་མི་མཐུན་པའི་མི་རྣམས་རྩ་མེད་བཟོ་རྒྱུའི་ལག་ཆར་བེད་སྤྱོད་བྱེད་བཞིན་ཡོད། ཅེས་དང༌།
རྒྱ་གཞུང་དབང་འཛིན་པ་ཚོས་རྡུང་རྡེག་དང་མནར་གཅོད་ཚབས་ཆེན་བཏང་བའི་དབང་གིས་ཟླ་ ༡ ཚེས་ ༢༣ ཉིན་ཆབ་མདོར་བོད་རིགས་ན་གཞོན་པདྨ་ཚེ་དཔག་རྐྱེན་ལམ་དུ་སོང་བའི་གནས་ཚུལ་ཐོས་པར་བློ་ཕམ་ཆེན་པོ་བྱུང༌། དེ་སྔོན་ཟླ་ ༡ ཚེས་ ༢༠ ཉིན་པདྨ་ཚེ་དཔག་གིས་བོད་རིགས་གཞན་གཉིས་དང་མཉམ་དུ་འཚེ་མེད་ཞི་བའི་ལམ་ནས་ངོ་རྒོལ་བྱས་འདུག ད་ལྟའི་ཆར་བོད་རིགས་གཞན་གཉིས་ཀྱི་གནས་སྟངས་ཤེས་རྟོགས་མེད་པར་གྱུར་ཡོད། ཅེས་གསུངས་བྱུང༌།
བཀའ་ཤག་གི་གསལ་བསྒྲགས་ལྟར་ན། སྔར་ལོའི་ཟླ་ ༣ པའི་གྱེན་ལངས་ཁྲོད་བོད་མི་འདས་གྲོངས་ཕྱིན་པ་ཚོར་མྱ་ངན་གུས་འདུད་ཞུ་ཆེད། བོད་མི་ཚོས་འདི་ལོའི་ལོ་གསར་སྲུང་གཙི་ཞུ་འདོད་མེད་བཞིན་དུ་སྲུང་གཙི་ཞུ་དགོས་པའི་གནོན་ཤུགས་སྤྲད་ཅིང༌། སི་ཁྲོན་ཁོངས་གཏོགས་རྔ་བ་བོད་རིགས་རང་སྐྱོང་ཁུལ་དང་དཀར་མཛེས་བོད་རིགས་རང་སྐྱོང་ཁུལ་ཟེར་བའི་ནང་རྒྱ་གཞུང་གི་དབང་འཛིན་པ་ཚོས་ལོ་གསར་སྲུང་གཙི་བྱ་ཆེད། མི་རེར་རྒྱ་སྒོར་ ༥༠༠ རེའི་བརྔན་པ་སྤྲད་ཡོད་ཚོད་འདུག་ཟེར་ལ།
རྡུང་རྡེག་ཚ་ནན་ཟེར་བའི་ལས་འགུལ་ཡང་བསྐྱར་སྤེལ་ཞིང༌། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མཁྲེགས་འཛིན་སྲིད་བྱུས་གཞན་རྣམས་སྤེལ་ཤུགས་ཆེ་རུ་བཏང་བ་འདིས་བོད་མིའི་གཞི་རྩའི་ཐོབ་ཐང་དང་རང་དབང་ལ་བརྡལ་བཤིག་ཚབས་ཆེན་ཕོག་རྒྱུ་རེད། ད་ལྟའི་ཆར་ལྷ་ས་གཙོས་བོད་ཀྱི་ས་ཁུལ་གཞན་ཁག་གི་ནང་འཇིགས་སྣང་དང་དངངས་འཚབ་ཀྱི་གནས་སྟངས་ཇེ་ཆེར་གྱུར་འདུག རྒྱ་གཞུང་གིས་ལས་འགུལ་འདི་ཡང་བསྐྱར་སྤེལ་དགོས་པའི་ཀུན་སློང་ནི་ལས་འགུལ་འདིའི་མཇུག་འབྲས་ཞི་བདེ་ལྷིང་འཇགས་མེད་པ་ཡོང་རྒྱུ་ཁོ་ན་ཡིན་སྟབས། རྒྱ་གཞུང་གི་དབང་འཛིན་པ་ཚོས་དྲག་གནོན་ཇེ་ཆེར་གཏོང་ཐབས་ལ་ཁ་གཡར་ས་ཞིག་བཟོ་བཞིན་མེད་དམ་སྙམ་པའི་དོགས་གཞི་ཆེན་པོ་འདུག་ཟེར།
རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་འཛིན་པ་ཚོས་རྡུང་རྡེག་ཚ་ནན་ཟེར་བའི་ལས་འགུལ་གྱིས་མཚོན་བོད་ནང་ལག་བསྟར་བྱེད་བཞིན་པའི་མཁྲེགས་འཛིན་སྲིད་བྱུས་རྣམས་འཕྲལ་དུ་མཚམས་འཇོག་དགོས་པའི་རེ་འདུན་ནན་པོ་འདོན་རྒྱུ་དང༌། སྔར་ལོའི་ཟླ་ ༣ པའི་ནང་བྱུང་བའི་ཡིད་སྐྱོའི་དོན་རྐྱེན་དེ་རིགས་འདི་ལོ་ཡང་བསྐྱར་མི་ཡོང་ཆེད་འཛམ་གླིང་རྒྱལ་ཁབ་ཡོངས་ཀྱི་གྲོས་ཚོགས་དང༌། གཞུང༌། དེ་བཞིན་གང་ཟག་སྒེར་བཅས་ནས་རྒྱ་ནག་གཞུང་ལ་གོ་བསྐོན་གནང་བའི་འབོད་སྐུལ་ཞུ་རྒྱུ་ཡིན། ཅེས་དང༌།
བོད་མི་ཚོས་དམ་དྲག་དང་དྲག་གནོན་ཤུགས་ཆེན་པོ་ཡོད་མེད་ལ་མ་ལྟོས་པར་ང་ཚོའི་འཐབ་རྩོད་ཀྱི་ཕུགས་རྒྱང་རིང་པོའི་ཁེ་ཕན་སྙིང་ལ་བཅངས་ཏེ། མཐའ་གཅིག་ཏུ་འཚེ་མེད་ཞི་བའི་རྒྱ་ལས་མ་འདས་པ་དང༌། ལྷག་པར་དུ་རང་གི་ལུས་སྲོག་ལ་གནོད་འཚེ་ཕོག་པ་དང༌། དོན་མེད་བཙོན་འཇུག མནར་གཅོད་སོགས་ཡོང་གཞིའི་ལས་འགུལ་རིགས་མ་གནང་བར་བཟོད་བསྲན་གྱིས་ཞི་འཇམ་བརྟན་ལྷིང་གནས་གང་ཐུབ་དང༌། ལྷག་པར་རྒྱ་མི་རིགས་དང་མཉམ་དུ་ཁ་བྲལ་འཁོན་འཛིན་མི་ཡོང་བའི་ཐབས་ཤེས་གང་ཐུབ་གནང་སྐྱོང་ཡོང་བའི་འབོད་ཞུ་རྒྱུ་ཡིན། ཞེས་གསུངས་སོང༌།
ང་ཚོས་ཤེས་དགོས་པ་ནི། བོད་ནང་གི་བོད་མི་དག་གི་ཚེ་སྲོག་ལ་འགན་ཆགས་པའི་ཐབས་ཤེས་ག་འདྲ་ཡོད་མེད་དེ་དག་བརྡ་འཕྲིན་གྱི་རིགས་འདྲ་མིན་བརྒྱུད་དེ་་བོད་ནང་གི་བོད་པ་དེ་དག་གི་ཚེ་སྲོག་རྒྱ་ནག་སྲིད་གཞུང་གི་འདོད་ཧམ་འགྲུབ་ཆེད་དུ་ད་ལོ་ཡང་ཚེ་སྲོག་མང་བོ་ཞིག་ཆུད་ཟོས་སུ་མི་འགྲོ་བ་དེའི་ཕྱོགས་སུ་བསམ་ཚུལ་དང་གྲོས་མོལ་མང་ཞིག་བྱེད་ཐུབ་པ་ཡིན་ན་ཡག་པོ་འདུག་གོ དེ་མིན་ཕྱི་ནས་གང་ཞིག་བཤད་ན་ཡང་རང་དབང་རེད་དེ། བོད་ནང་གི་བོད་མི་དེ་དག་ལ་མནར་གཅོད་མིའི་སེམས་ཁོང་དུ་ཡང་དྲན་མི་ཐུབ་པ་དེ་འདྲ་ཞིག་བྱུང་ན་ནི་དངོས་ནས་འཕོང་བོ་རེད།
ད་ནི་གཏུམ་སྤྱོད་ཁྲག་འཐུང་གི་རྒྱ་དམར་དབང་འཛིན་པ་ཚོས་རུལ་སོངས་ཀྱི་གནོང་ལ་ཐུགས་དེ་རྩ་བ་རུལ་ཡོང་གིན་ཡོད་པས་ ཅི་ཡང་བྱེད་སྲིད་ སྒུག་དང་ཁོ་ཚོས་འུ་ཅག་བོད་པ་ཚང་ལ་གང་བྱས་པ་དང་གང་སྤྲད་པ་དེ་མི་འགྱིངས་པར་ཕྱིར་སློགས་དང་ཁོ་ཚོར་རེག
སྡིག་ཕོང་བསགས་པས་རི་བོ་དང་སྡིག་ཁྲག་བསགས་པས་རྒྱ་མཚོ་ དྲག་སྤྱོད་དང་ཁྲག་སྦྱོར་གྱི་རྗེས་འབྲས་ཅི་ཡོང་ཁོ་ཚོས་མི་རིང་པར་མཐོང་ངེས།
དེ་ཡིན་དུས་ཀྲང་ཆིན་ལི་གཤིན་རྗེ་ཆོས་རྒྱལ་ཡིན་ས་རེད། ཁོ་ལ་ཆོ་ལོ་དེ་སྤྲད་ན་གང་འདྲ་འདུག
བོད་ཡུལ་ནི་ད་ལྟ་གཤིན་རྗེའི་གྲོང་ཁྱེར་ལྟ་བུ་ཡིན།