རྒྱུགས རང་ལུས་ཀྱི་ནུས་པ་ཡོད་ཚད་བཏོན་ནས
རྒྱུགས ཕྱུག་པོ་དག་གི་རྗེས་སུ་ལས་ཀ་བྱེད་དུ
རྒྱུགས མེད་པོ་དག་གི་སྔུན་ནས་ཉམས་ཆེན་བྱེད་བཞིན
རྒྱུགས བར་མ་དག་གི་མཉམ་དུ་འགྲན་སེམས་བྱེད་ཞོར་དུ
རྒྱུགས སྐད་གྲགས་དང་སྒོར་མོའི་ཆེད་དུ
རྒྱུགས དྲང་བདེན་ཁ་ལ་འཁྱེར་ནས་བརྙས་བཅོས་བྱེད་དུ
རྒྱུགས ཕ་མ་དང་ཉེ་དུ་རྒྱང་རིང་དུ་བཞག་ནས་རང་དབང་ཆེད
རྒྱུགས ཁང་ཁྱིམ་དང་བཟའ་ཚང་གི་འཚོ་བ་དྲོན་མོ་དེའི་དོན་དུ
རྒྱུགས མི་རིགས་དང་འདྲ་མཉམ་གྱི་ཐོབ་ཐང་ལེན་པའི་འབོད་ཚིགས་བསྒྲགས
རྒྱུགས རྒྱུས་ཡོད་དང་རྒྱུས་མེད་ཀྱི་མི་སྡེ་འདྲ་མིན་སྣ་ཚོགས་འགྲིམ་ནས
རྒྱུགས ངོ་གསོ་དང་བཅོས་མའི་སྐྱི་འབག་ལ་མགོ་བོ་བསྒུར་ཞོར
རྒྱུགས གཏད་སོ་དང་དམིགས་ཡུལ་མེད་པའི་རི་གྲོང་དེའི་བདག་པོ་བྱེད་ཆེད
རྒྱུགས འཆི་བདག་གི་བཙན་ས་རུ་རུས་སྒྲོམ་དེ་དག་རླུང་གི་བརྫུ་རོགས་བར
རྒྱུགས མཐའ་མཇུག་དུ་ཐོབ་བྱ་གང་ཡང་མེད་པའི་ལག་སྟོང་གི་ཉིན་མོ
རྒྱུགས རྒྱུགས རྒྱུགས མཁས་བླུན དབུལ་ཕྱུག མཐོ་དམན ཆེ་ཆུང་
རྒྱུགས རྒྱུགས་རྒྱུགས་ནས་ ངལ་གསོ་ཡོད་པ་ནས་མེད་པར་ཆགས་དེ
རྒྱུགས་ཐུབ་པ་ནི་བྱས་རྗེས་དང་རླབས་ཆེན་དུ་འབོད་པའི་མི་ཡུལ་ཁམས་ནས
རྒྱུགས ཤུ་རེ་བྱོས་དེ མགོ་ལ་མ་སླེབས་ཀྱང་ གཞུག་ནས་འདུག་མི་རུང་
རྒྱུགས་མ་གཏོགས སྡར་མ་ཟེར་ནས་མི་ཚེ་འཕྱ་དམོད་ཀྱི་འཚོ་དགོས་ཉིན
རྒྱུགས་འདོད་ཀྱང་ ལུས་ཟུངས་ཉམས་ཚར་བ་ཡིན་ངེས
༢༨།༡།༠༩ དགོང་མོ་མཚོ་འགྲམ་ནས་བྲིས།
དྲ་གྲོགས་བསེ་རུ་ལགས། ཉིན་མ་ཁ་ཤས་རིང་དུ་ཟིན་བྲིས་ཀློག་རྒྱུ་མ་བྱུང་སྟབས། ཉིད་ཀྱིས་ལྗགས་རྩོམ་ཐོལ་བྱུང་འདི་ཡང་འཇལ་ཐུབ་མ་སོང་། དེ་རིང་དུས་ཚོད་ཀྱི་བར་གསེང་ཕྲན་བུ་ཞིག་ནས་ཉིད་ཀྱིས་ལྗགས་རྩོམ་ཐོལ་བྱུང་འདི་ཀློག་པའི་སྐལ་བ་བྱུང་སོང་། དངོས་ནས་ཁྱེད་རང་གི་བཤད་པ་དེ་དག་ལ་རྒྱུ་མཚན་འདུག རྒྱུ་མཚན་ལ་བརྟེན་ནས་མི་དག་གི་སེམས་ཁོང་དུ་བག་ཆགས་རེ་འཇོག་ཐུབ་ངེས་རེད།
འགྲོ་མ་གཏོགས།
༼ཡི་ཐང་མ་ཆད་པར་རྒྱུགས།
ཡི་ཐང་ཆད་ཀྱང་འགྲོ་དགོས།༽
དཀའ་སྡུག་གི་རི་མོ་ཐོད་པར་བརྩེགས་ཀྱང་།
བརྙས་སྨོད་ཀྱི་ཟུར་མདའ་ཡང་ཡང་འཕངས་ཀྱང་།
ལུས་སེམས་ལ་མནར་གཅོད་ཇི་ལྟར་རྩུབ་ཀྱང་།
འགྲོ་མ་གཏོགས།
ད་དུང་རྗེས་ལུས་ཀྱི་ཞྭ་མོ་ལྗིད་ཏིག་ཏིག་འདི་ཇི་ལྟར་ཕུད་ཐུབ་བམ།
དུས་རབས་ཀྱི་ཚོན་མདོག་འགྱུར་ཡང་།
མི་རིགས་ཀྱི་ངོ་བོ་འགྱུར་ཡང་།
རང་ཡུལ་གྱི་གནམ་ས་འགྱུར་ཡང་།
འགྲོ་མ་གཏོགས།
ད་དུང་བཙན་དབང་གི་ཞགས་པ་ནག་པོ་འདི་ཇི་ལྟར་འགྲོལ་ཐུབ་བམ།
ས་གཞི་འདི་ཟུངས་ཁྲག་གིས་ཚོས་ཀྱང་།
འཇིག་རྟེན་འདི་བེམ་རོས་གཏམས་ཀྱང་།
གོ་ལ་འདི་ངུ་འབོད་ཀྱིས་ཁེངས་ཀྱང་།
འགྲོ་མ་གཏོགས།
ད་དུང་རྣམ་ཤེས་འབུམ་ཕྲག་གི་རེ་འདོད་དེ་ཇི་ལྟར་བསྐང་ཐུབ་བམ།
ཁམས་གསུམ་གྱི་གནས་ལུགས་རྟོགས་ཀྱང་།
འདི་ཕྱི་ཡི་རྒྱུ་འབྲས་རྟོགས་ཀྱང་།
ཆོས་སྲིད་ཀྱི་མངའ་བདག་ཡིན་ཀྱང་།
འགྲོ་མ་གཏོགས།
ད་དུང་གཤིན་རྗེའི་རྒྱལ་པོའི་ལམ་ཡིག་དེ་ཇི་ལྟར་ལེན་ཐུབ་བམ།
ལུས་པོ་འདི་ལག་ཟད་དཔུང་པར་ཐུག་ཀྱང་།
སེམས་པ་འདི་རྒྱ་མཚོའི་རླབས་ལྟར་འཁྲུགས་ཀྱང་།
ལུས་སེམས་གཉིས་ཐོར་ཤིག་ཏུ་སོང་ཡང་།
འགྲོ་མ་གཏོགས།
ད་དུང་གཞན་དབང་གི་མཚོན་ཁ་ནས་ཇི་ལྟར་ཐར་ཐུབ་བམ།
རང་དབང་གི་ལྷ་མོ་རྣམས་དང་།
བདེན་དོན་གྱི་ཕོ་ཉ་ཡོད་ཚད།
སྐྱེ་འགྲོའི་མགོན་སྐྱབས་སུ་མཆིས།
འགྲོ་མ་གཏོགས།
མདུན་ནས་བསུ་མཁན་མང་ལ།
རྒྱབ་ནས་དེད་མཁན་མང་།
མ་གཞི་ནས་མ་ཕྱིན་པར་བསྡད་ན་ཡང་འགྲིག
རྒྱུགས་ཟེར་མི་དགོས་པར་འགྲོ་དགོས་པའི་ཉིན་ནི།
ཉམ་ཆུང་གི་སྐྱེ་འགྲོ་ལྷན་དུ།
དལ་བུར་འགྲོ་མ་གཏོགས།
བསམ་བཞིན་དུ་འགྲོ་མ་གཏོགས།
གནས་ལུགས་རྟོགས་བཞིན་དུ་འགྲོ་མ་གཏོགས།
སང་ཉིན།
གནངས་ཉིན་་་་་་་་་