མདོ་སྨད་བླ་བྲང་བཀྲ་ཤིས་འཁྱིལ་གྱི་སྨོན་ལམ་ཆེན་མོ་འཚོགས་ལ་ཉེ་བའི་ཉིན་འདི་དག་ལ། བླ་བྲང་རྫོང་ཐོག་ཏུ་དྲག་ཆས་སྤྲས་པའི་དམག་མི་ཇེ་མང་ལ་སོང་ཡོད་པ་དང༌། སྨོན་ལམ་སྐབས་སྲོག་ཤོར་བ་དང་འཇུ་བཟུང་སོགས་ཀྱི་གནས་ཚུལ་ལྷག་ན་ས་གནས་སྲིད་གཞུང་གིས་འགན་གང་ཡང་ལེན་གི་མིན་པ་མང་ཚོགས་ལ་གསལ་བསྒྲགས་བྱས་འདུག
ཕྱི་ཚེས་ ༢ ཉིན་བོད་ནས་གནས་ཚུལ་འབྱོར་བ་ལྟར་ན། མདོ་སྨད་བླ་བྲང་རྫོང་ཐོག་ལ་དམག་མི་མང་པོས་སྐོར་ཞིང༌། སྲང་བར་ཡོངས་རྫོགས་ལ་པར་ལེན་བརྙན་ཆས་འཇོག་བཞིན་པ་དང་དྲ་ཁང་ཚང་མར་དོ་དམ་བྱེད་བཞིན་ཡོད་འདུག ལོ་རྒྱུན་ལྟར་བླ་བྲང་བཀྲ་ཤིས་འཁྱིལ་དུ་སྨོན་ལམ་ཆེན་མོ་འཚོགས་ཀྱིན་ཡོད་པ་དང༌། ད་ལོའི་སྨོན་ལམ་དེ་ཟླ་འདིའི་ཚེས་ ༨ ནས་ ༡༡ བར་གྱི་ཉིན་ ༤ རིང་ལ་འཚོགས་ཀྱིན་ཡོད་པ་རེད། དེར་ཕྱོགས་མཐའ་སོ་སོ་ནས་བོད་མི་དད་ལྡན་སྟོང་ཕྲག་མང་པོ་འཛོམས་ཀྱིན་ཡོད་པས། རྒྱ་ནག་གཞུང་གིས་ལོ་སྔོན་མ་ནས་བོད་ཁུལ་ཡོངས་ཀྱི་ས་གནས་གང་ཡིན་ཡང་བོད་མི་འདུ་འཛོམས་བྱེད་སར་དམ་དྲག་ཤུགས་ཆེན་བྱེད་བཞིན་པ་ལྟར། ཕྱི་ཚེས་ ༡ ཉིན་ནས་བླ་བྲང་རྫོང་ཐོག་ལ་དྲག་ཆས་སྤྲས་པའི་དམག་མི་ཇེ་མང་ལ་སོང་ཡོད་པ་དང༌། བླ་བྲང་མཐའ་འཁཔར་གྱི་ས་ཁུལ་སོ་སོའི་མགོ་གཙོ་ཚོས་མང་ཚོགས་ཀྱི་ཁྲོད་ནས་སྨོན་ལམ་ཆེན་མོར་འགྲོ་མཁན་ཡོད་ན་གཟབ་གཟབ་བྱ་དགོས་ཚུལ་དང༌། གལ་ཏེ་དོན་རྐྱེན་བྱུང་ནས་སྲོག་ཤོར་བ་དང་འཇུ་བཟུང་བྱས་ན་ས་གནས་སྲིད་གཞུང་གིས་འགན་གང་ཡང་ལེན་གི་མིན་པའི་ཉེན་བརྡ་བཏང་ཡོད་འདུག
དེར་བོད་ནང་གི་མིང་དང་པར་དངོས་སུ་ཡོད་པའི་ཟིན་བྲིས་སྤེལ་མཁན་རྒན་པ་ཞིག་གིས་གངས་ལྗོངས་གཞོན་ནུའི་གླེང་སྟེགས་ངོས་སུ་ཟིན་བྲིས་སྤེལ་དོན། ཉིན་མཚན་མེད་པར་བོད་མི་སྤུན་ཟླ་ཚོའི་རིག་ས་མཐོང་ས་ནས་དྲག་སྦྱོང་བྱས་ཏེ་བསམ་བཞིན་དུ་བོད་མི་ལ་ཞེ་སྡང་དང་འཇིགས་སྣང་སློང་གང་ཐུབ་བྱེད་ཀྱིན་འདུག ཁོ་ཚོས་སྐད་ཆེན་པོའི་སྒོ་ནས་འུར་རྒྱག་གིན་འདུག་ལ། རྫིག་རྫིག་རྔམ་རྔམ་གྱིས་དགྲ་བོ་ལ་རྒོལ་རྡུང་བྱེད་ཁུལ་དང༌། འཛིན་བཟུང་བྱེད་ཁུལ། འགོག་རྒོལ་བྱེད་ཁུལ་སོགས་བྱེད་ཀྱིན་འདུག་པ་མ་ཟད། མངོན་སུམ་འཛེམས་མེད་ཀྱིས་ད་ཐེངས་ཀྱི་དགྲ་བོ་ནི་བོད་མི་ཡིན་ཟེར་གྱིན་འདུག ད་ལྟ་བླ་བྲང་གི་ག་ས་གང་དུ་གློག་མིག་གི་བརྙན་འཕྲིན་འཕྲུལ་ཆས་སྒྲིག་འཛུགས་བྱས་ཡོད་པར་མ་ཟད། གློག་ཀླད་དྲ་རྒྱ་སོགས་འཕྲིན་གཏོང་སྒྲིག་ཆས་ཡོད་ཚད་ལ་ཚད་ལས་བརྒལ་བའི་ཚོད་འཛིན་བྱས་ཏེ་དྲ་འབྲེལ་ཁང་གཅིག་ཀྱང་མེད་པར་བྱས་འདུག ཅེས་བྲིས་ཡོད་པ་དང༌། ཡང་ཁོང་གིས། དེའི་རྐྱེན་གྱིས་ངའི་བསམ་ཚུལ་ཡིན་ན་ད་ཐེངས་རྒྱལ་ཁ་མི་ལོན་ཡང་འདི་ལྟར་འདུག་མི་རུང༌། ང་ཚོས་གཞི་རིམ་གནད་སར་བཟུང་སྟེ་མང་ཚོགས་ཁྱོན་ཡོངས་ནས་སྐུལ་སློང་གིས་ཡར་ལངས་བྱ་དགོས་པར་འདོད། རྒྱལ་ལོའི་ཚེས་ ༨ ཉིན་གྱི་དགོང་མོ། བོད་ས་གནས་སོ་སོའི་ལོ་ ༡༨ ཡན་ནས་ལོ་ ༥༥ མན་གྱི་སྐྱེ་ཕོ་མོ་རྒན་གཞོན་ཚང་མ་རང་རང་ས་ཆའི་སྲིད་གཞུང་སྡེ་ཁག་ཏུ་སོང་ནས་བསམ་འཆར་ཡར་ཞུ་བྱ་དགོས། དེའི་བརྒྱུད་རིམ་ཁྲོད་མི་སུ་ཞིག་གིས་ཀྱང་མཚོན་ཆ་འཛིན་མི་ཆོག གང་དུ་ཡང་འཕྲོག་བཅོམ་བྱ་མི་ཆོག རྡུང་རྡེག་བྱ་མི་ཆོག ཁ་ནས་འུར་ཆེན་པོ་རྒྱག་པ་ལས་གཞན་དྲག་སྤྱོད་གང་ཡང་སྤེལ་མི་ཆོག དེ་ལྟར་ཉིན་བདུན་ལ་བསྒུག་དགོས། དེ་རྗེས་རྒྱལ་ཁབ་སྲིད་གཞུང་གིས་ད་དུང་ཞི་བས་གྲོས་མོལ་མི་བྱེད་ན་མི་མང་གི་བསམ་འཆར་ལྟར་གནས་ཚུལ་ལ་འགྱུར་ལྡོག་གཏོང་ཆོག ཚང་མས་རྒྱབ་སྐྱོར་གནང་རོགས་ཞུ། བསམ་ཚུལ་འདི་མི་ཚང་མས་བརྒྱ་འགྱུར་དུ་བརྒྱུད་སྒྲོག་གནང་རྒྱུ་མཁྱེན། བསམ་ཚུལ་འདི་ལག་བསྟར་བྱེད་པའི་བརྒྱུད་རིམ་ཁྲོད་མི་སུས་ཀྱང་གང་འདོད་དུ་གཏོར་བཤིག་བྱ་མི་ཆོག རང་རང་ས་ནས་རྩ་འཛུགས་ཡོད་པ་དང་སྒྲིག་ལམ་ཡོད་པ་བྱ་དགོས། ཅེས་ཀྱང་ཟིན་བྲིས་སུ་བཀོད་འདུག
གངས་ལྗོངས་གཞོན་ནུའི་གླེང་སྟེགས་ཞེས་པའི་དྲ་ཚིགས་འདི་ནི་བོད་མདོ་དབུས་ཁམས་གསུམ་གཙོས་པའི་ཕྱི་རྒྱལ་ཡུལ་གྲུ་ཁག་གི་བོད་རིགས་ཡོངས་ནས་བེད་སྤྱོད་གཏོང་ཐུབ་པའི་བོད་ཡིག་དྲ་ཚིགས་ཤིག་ཡིན་པ་དང༌། བོད་མི་གཞོན་སྐྱེས་ཚོའི་འབྲེལ་འདྲིས་བྱེད་སའི་ཟམ་པ་ལྟ་བུར་ཆགས་ཡོད་པ་རེད།
ཟམ་གདོང་ལ་ག་རེ་བཤད་ནའང་ནོར་ཁྲུལ་ཁས་མི་ལེན་པས་རྡོ་ཡི་མི་ཞིག་ལ་ཐད་ཀར་རེ་འདོད་ཞུ་བ་གླེན་རྟགས་རེད། དེའི་ཕྱིར་གསར་ཤོག་གི་དྲ་རྒྱ་འདི་བརྒྱུད་ནས་སྤྱི་ཚོགས་ནང་ན་གཞོན་གྱི་དཔུང་ཁག་གསར་བ་ཞིག་གིས་རང་ཤེད་ཅན་གྱི་བཀའ་ཤག་གིས་བོད་ནང་གི་བོད་མིའི་སྙིང་སྟོབས་དང་། འཐབ་རྩོད་ལ་ཁྱད་གསོད་བྱས་ཏེ། བོད་དོན་ནི་བླ་མ་ཚོས་ཚན་ཉིད་རྩོད་པ་ལྟར་ལན་ཚ་བོ་འདེབས་ཐུབ་སོང་ན་འགྲིག་པ་ལྟ་བུ་མ་རེད། མ་ཟད་ཆོས་ཕུགས་སྤྲང་ལ་གཏད་ཟེར་བ་ལྟར་ཆོས་ཀྱི་བསམ་བློའི་ངན་ཤུགས་ཀྱིས་བོད་སྤྱི་ཆེས་ཉམས་ང་བའི་གནས་སྟངས་ཤིག་གིས་འཐུས་པར་སེམས་བཞིན་པ་སོགས་ལ་ངོ་རྒོལ་ཡོད་པ་གསལ་སྟོན་བྱས་པ་ཡིན་ལ། མུ་མཐུན་ནས་རྒོལ་ཤུགས་ཆེ་རུ་འགྲོ་གི་རེད།
ས་ཡིག་བསྡུ་རུབ་ཀྱི་ལས་འགུལ་འདིའི་མ་ཕྱི་དེ་སུས་བྲིས་ན་ཡག་པོ་ཡོད་རེད། ཇི་ལྟ་བུ་ཞིག་འབྲི་དགོས་པ་རེད། འདིའི་མ་དཔེ་ཞིག་འབྲི་ཐུབ་ན་ཐུགས་རྗེ་ཆེ།
ཟམ་གདོང་ལ་བཤད་རྒྱུ་ཡོད་ན་ཟམ་གདོང་གི་གོ་ས་ལ་བཤད་དགོས་པ་ལས། དྲ་ཐོག་འདིར་བཤད་མ་བཤད་ཕན་ཐོགས་མེད་རེད། མ་གཞི་ཟམ་གདོང་ལ་རྒྱབ་ནས་འདྲ་མི་འདྲ་བཤད་མཁན་ཡོད་རེད་ཀྱང་ཟམ་གདོང་ཐུག་དུས་ཅི་གསུང་བཀའ་སྒྲུབ་ཞུ་མཁན་རྐྱང་རྐྱང་ལས་དྲ་ཐོག་འདིར་རྫིག་པོ་བཤད་པ་ནང་བཞིན་མཐོང་མ་མྱོང༌།
བོད་གཞུང་གིས་བོད་མིའི་སྙིང་སྟོབས་དང་འཐབ་རྩོད་བེད་སྤྱོད་ཡང་དག་པ་བྱེད་ཤེས་དགོས་པ་ཟམ་གདོང་གི་འོས་འགན་མཐོང་། སྐད་ཆ་རྗིག་པོ་ཁོ་ན་བཤད་ནས་བོད་མིའི་དཀའ་ངལ་ལ་ཕན་ཐོགས་མེད་པ་ཤེས་ཡོད། ཟམ་གདོང་གི་སྐད་ཆ་རྫིག་པོ་དང་ཁྲིམས་འདྲ་མི་འདྲ་བཤད་ནས་མི་དམངས་ལ་ཁྱད་གསོད་མི་བྱེད་པར་ལས་དོན་དངོས་ལ་མཚམས་པའི་ཕྱག་ལས་གནང་རྒྱུ་གལ་ཆེ། མ་འོངས་པ་ལས་ཀྱང་ད་ལྟའི་དཀའ་ངལ་གཙོ་བོ་བྱེད་དགོས། ག་དུས་ཡིན་མ་འོངས་པའི་ཆེད་དུ་སྐད་ཆ་རྫིག་པོ་བཤད་ནས་གང་ལ་མི་ཕན།
ས་གནས་སོ་སོ་ནས་བོད་མི་རང་ལོ་ ༡༨ ཡན་ནས་ ༥༥ མན་བར་འབྲེལ་ཡོད་ལས་ཁུངས་ཀྱི་སྒོ་རྩར་བཅར་ཏེ་ཞུ་གཏུགས་བྱས་ན་ཡག་པོ་རེད། ཡིན་ནའང་། ངའི་ལྟ་ཚུལ་ཡིན་ན་བོད་མིའི་དཀའ་ངལ་འདི་ཡིག་ཐོག་ལ་ཕབ་སྟེ་ཞིང་ཆེན་སོ་སོ་དང་། རིམ་པ་སོ་སོའི་བོད་རིགས་ལས་བྱེད། དགེ་རྒན། སློབ་ཆེན་སློབ་མ། ཡུལ་སྡེ་སོ་སོའི་མགོ་བ། དགོན་སྡེ་ཁག་གི་བླ་མ་མཁན་པོ་རྣམས། དེ་བཞིན་མང་ཚོགས་དཀྱུས་མ་བཅས་ནས་ས་ཡིག་བསྡུ་རུབ་ལྟ་བུའི་ལས་འགུལ་ཞིག་སྤེལ་ཏེ། ཀྲུང་དབྱང་དང་འཐབ་ཕྱོགས་གཅིག་གྱུར་ཁང་། དེ་བཞིན་ཀྲུང་དབྱང་གི་འབྲེལ་ཡོད་བོད་རིགས་དཔོན་པོ་རྣམས་དང་། གྲངས་ཉུང་མི་རིགས་གཞན་རྣམས་ཀྱི་དཔོན་པོ་རྣམས་བཅས་ལ་ཡུལ་སོ་སོའི་སྐད་ཡིག་གི་ནང་དུ་བསྒྱུར་ནས་ཕུལ་ན་དེ་བ་ཀྱང་ལེགས་པོ་ཞིག་ཡོང་བར་འདོད།
ལས་འགུལ་གྱི་རིམ་པ་འདི་ནི་བོད་ནང་ད་བར་བྱུང་མ་མྱོང་བ་དང་། དེང་རབས་ཀྱི་རང་དབང་དང་དམངས་གཙོ། མི་སེར་སྤྱི་ཚོགས་ཀྱི་ལས་འགུལ་ཞིག་ཡིན་སྟབས་ནུས་པ་ཆེ་ཞིང་རྡབ་གསིག་ཆུང་བའི་ལས་འགུལ་གྱི་རིགས་ཤིག་རེད།
ལས་འགུལ་འདི་ནི་ཕྱོགས་གཞན་ནས་བཤད་ན། མང་མོས་འོས་བསྡུ་མ་བྱས་པར་བོད་མི་རིགས་ཀྱི་ཐུན་མོང་གི་མངོན་འདོད་དེ་རྒྱལ་སྤྱིའི་སྒང་ནས་ཤེས་བྱེད་ཀྱི་ཐབས་ལམ་ཞིག་ཀྱང་ཡིན་པར་འདོད།