ཕྱི་ཚེས་ ༡༤ ཉིན་གྱི་དགོང་དྲོ་རྒྱ་བོད་གྲོགས་པོའི་མཐུན་ཚོགས་ཞེས་པ་ཞིག་ཐེངས་དང་པོར་ཉི་ཧོང་དུ་འཚོགས་ཡོད་པ་རེད།
ཉི་ཧོང་བོད་རིགས་ཚོགས་པའི་གོ་སྒྲིག་འོག་རྒྱ་བོད་གྲོགས་པོའི་མཐུན་ཚོགས་ཤིག་ཕྱི་ཚེས་ ༡༤ ཉིན་ཉི་ཧོང་རྒྱལ་ས་ཊོག་ཀྱོ་རུ་འཚོགས་ཡོད་པ་དང་། དེར་ཉི་ཧོང་དང་རྒྱལ་སའི་ཉེ་འཁོར་གྱི་བོད་རིགས་དང་རྒྱ་རིགས་ ༡༠༠ སྐོར་ཞིག་འཛོམས་ཏེ་དུས་ཚོད་གཉིས་རིང་མཛད་སྒོ་འཚོགས་དང་མཉམ་དུ་དགོང་མོའི་གསོལ་ཚིགས་ལ་རོལ་ཡོད་པ་རེད། ཉི་ཧོང་བོད་རིགས་ཚོགས་པའི་ཚོགས་གཙོ་སྐུ་ཞབས་སྐལ་བཟང་དོན་གྲུབ་ལགས་ཀྱིས་མཛད་སྒོའི་སྟེང་། དེར་འཛོམས་རྒྱ་བོད་གྲོགས་པོ་རྣམས་ལ་འཚམས་འདྲི་དང་སྦྲགས། མཐུན་ཚོགས་འདི་བཙུགས་པ་དེར་དགའ་སྤོབས་བྱེད་ཀྱི་ཡོད་ལ། མཐུན་ཚོགས་འདི་བརྒྱུད་འཛམ་གླིང་མི་དམངས་ལ་ང་ཚོའི་སྤྱི་ཚོགས་གཉིས་ནི་ཕན་ཚུན་ལ་དགྲར་ལངས་མེད་པར། ཕན་ཚུལ་ལ་མཛའ་བརྩེ་དང་བརྩི་བཀུར་བརྒྱུད་ཞི་བདེའི་སྒོ་ནས་མཉམ་དུ་འཚོ་ཐུབ་པ་བསྟན་ཡོད་པ་རེད་ཅེས་གསུངས་ཡོད་པ་རེད།
༧གོང་ས་མཆོག་གི་ཉི་ཧོང་དང་ཤར་ཨེ་ཤ་ཡའི་སྐུ་ཚབ་ལྷག་པ་མཚོ་ཁོ་ལགས་ཀྱིས་མཐུན་ཚོགས་འདིའི་མཛད་སྒོའི་སྟེང་གསུངས་དོན། ཚོགས་པ་འདི་འདྲ་ཞིག་བཙུགས་པ་དེ་ནི་རྒྱལ་བ་རིན་པོ་ཆེ་མཆོག་གིས་ནམ་རྒྱུན་མཛའ་བརྩེ་དང་སྙིང་རྗེ། ཞི་བདེ། ཡོངས་ཁྱབ་མཐུན་སྒྲིལ་བཅས་གསུང་བཞིན་པའི་དགོངས་གཞི་དང་མཐུན་ལ། མཐུན་ཚོགས་འདིས་ང་ཚོའི་སྤྱི་ཚོགས་གཉིས་བར་དུ་ཡོད་པའི་དོགས་པ་རྣམ་རྟོག་རིགས་སེལ་ཐུབ་པའི་རེ་བ་ཡོད་ཅེས་དང་། འདི་ནི་ཆབ་སྲིད་ཀྱི་ཚོགས་པ་མ་རེད། འདི་ནི་སྤྱི་ཚོགས་ཤིག་གི་རིམ་པ་ནས་བཙུགས་པའི་མཐུན་གྲོགས་ཀྱི་ཚོགས་པ་ཞིག་རེད། འདིས་བོད་དང་རྒྱ་ནག་གི་ནང་དུ་ཞི་བདེ་དང་བརྟན་ལྷིང་ཡོང་བར་ནུས་པ་འདོན་ཐུབ་གི་རེད་ཅེས་གསུངས་ཡོད་པ་རེད།
