ཁ་བྲལ་བ་མཐོང་ཚད་ཕམ་པར་རྒྱོབ་ཟེར།

རྒྱ་གཞུང་གིས་བོད་ཀྱི་ས་གནས་སྲིད་གཞུང་དང་། ཉེན་རྟོག་པ། སྤྱི་བདེ་མི་སྣ། དམག་མི་བཅས་ཀྱི་མི་སྣ་བསྡུས་ཏེ། བོད་ནང་དུ་ཏཱ་ལའི་རུ་ཚོགས་ལ་རྒྱབ་སྐྱོར་གྱི་རྟགས་ཙམ་མཐོང་ན་ཕམ་པར་རྒྱོབས་ཞེས་བཀའ་རྒྱ་བཏང་ཡོད་འདུག

ཚེས་ ༡༨ ཉིན་བོད་ལྗོངས་དམར་ཤོག་མགོ་ཁྲིད་ཚན་པའི་ཚོགས་འདུ་ཞིག་ལྷ་སར་འཚོགས་ཡོད་ལ། ཚོགས་ཐོག་ཏུ་བོད་ལྗོངས་བརྟན་ལྷིང་གི་ལས་དོན་ལ་སྐུལ་སློང་དང་ཁྱོན་ཡོངས་ནས་གོ་སྒྲིག་བྱས་པ་གསལ་བསྒྲགས་བྱས་ཡོད་པ་དང༌། བོད་ཀྱི་ལོ་སར་ལ་དགའ་སྟོན་རྟེན་འབྲེལ་ཞུ་ཆེད་ལས་ཁུངས་སོ་སོའི་ལས་བྱེད་ཚོར་ཉིན་བདུན་གྱི་གུང་གསེང་བཏང་ཡོད་པ་རེད། ལྷ་སར་འཚོགས་པའི་དམར་ཤོག་མགོ་ཁྲིད་ཚོའི་ཚོགས་འདུའི་ཐོག གུང་ཁྲན་ཏང་ཡོན་དང་ཉེན་རྟོག་པ། སྤྱི་བདེ་མི་སྣ། དམག་མི། ས་གནས་སྲིད་གཞུང་བཅས་ཀྱིས་འཕྲལ་དུ་ལས་འགུལ་སྤེལ་ཏེ། ཁ་བྲལ་ལ་གཏོར་བཤིག་དང་གདུང་རྩེ་ཁ་སྤྲོད་བྱས་ཏེ་མེས་རྒྱལ་ལ་བྱས་རྗེས་འཇོག་དགོས་པ་དང༌། བོད་ཀྱི་ཡར་རྒྱས་དང་བསྒྱུར་བཅོས་སྒོ་འབྱེད་ཀྱི་ཆེད་དུ་སྤྱི་ཚོགས་བརྟན་ལྷིང་ལ་ནུས་པ་འདོན་དགོས།  རྒྱ་ཆེའི་མི་མང་ཚོས་ངེས་པར་དུ་ཏང་གི་བཀའ་ལ་ཉན་དགོས་པ་སོགས་བཤད་འདུག་ལ། དམར་ཤོག་ཚོགས་པའི་ཚོགས་འདུ་གཙོ་བོ་དེ་ལྷ་སར་འཚོགས་ཡོད་ཀྱང༌། ས་ཁུལ་དང་རྫོང་ཁག་ཏུ་ཡན་ལག་ཚོགས་འདུ་འཚོགས་ཡོད་པ་བོད་ལྗོངས་ཉིན་རེའི་ཚགས་པར་སྟེང་བཀོད་ཡོད་འདུག 

གཞན་ཡང་ཉིན་ཤས་རྗེས་བོད་ཀྱི་ལོ་གསར་ཚེས་ཀྱིན་ཡོད་སྟབས། བོད་མི་ཚོས་ལོ་གསར་བར་དགའ་སྟོན་རྟེན་འབྲེལ་བྱ་རྒྱུ་མིན་པའི་རྣམ་འགྱུར་བསྟན་པ་དེ་ནི་ཏཱ་ལའི་རུ་ཚོགས་ཀྱིས་ངན་སྐུལ་བྱས་པ་ཡིན་པ་དང༌། བོད་རང་བཙན་གྱི་ལྟ་བ་འཛིན་མཁན་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས་གཉིས་ཀྱིས་ལོ་སར་རྒྱུ་མིན་པ་གསལ་བསྒྲགས་བྱས་རྗེས། ཁྲིམས་འགལ་གྱིས་བཙུགས་པའི་ཡུལ་གྱར་སྲིད་གཞུང་གིས་ཀྱང་དེ་ལ་རྒྱབ་སྐྱོར་གྱི་རྣམ་པ་བསྟན་ནས་ལོ་སར་རྒྱུ་མིན་པ་གསལ་བསྒྲགས་བྱས་པ་རེད་ཅེས་བོད་ལྗོངས་ཉིན་རེའི་ཚགས་པར་དུ་བཀོད་ཡོད་འདུག་ལ། ལོ་སར་སྐབས་མྱ་ངན་ཞུ་མཁན་དང་ལོ་སར་མི་གཏོང་མཁན་ཡོད་ན་དེ་ནི་ཏཱ་ལའི་རུ་ཚོགས་ཀྱི་རྒྱབ་སྐྱོར་བ་དང་ཁ་བྲལ་རིང་ལུགས་པར་ངོས་འཛིན་བྱ་རྒྱུ་ཡིན་པ་དང་། དེ་དག་མཐའ་གཅིག་ཏུ་ཕམ་པར་རྒྱོབ་ཅེས་བཀའ་རྒྱ་བཏང་ཡོད་འདུག