བོད་མི་ཞི་རྒོལ་བ་དེ་དག་མྱུར་དུ་གློད་གྲོལ་མི་གཏོང་ན། སྡེ་དཔོན་གྱིས་མི་མང་གི་འགན་ལེན་ཐུབ་ཀྱིན་མེད་ལ། མི་མང་གིས་བཙོན་ཁང་མདུན་སྒོ་ནས་ཟས་བཅད་ངོ་རྒོལ་བྱ་རྒྱུ་ཡིན་པ་སོགས་ཀྱི་གནས་ཚུལ་ཞུས་པར་བརྟེན་བོད་མི་ ༧ གློད་ཡོད་འདུག
དེ་རིང་དགའ་ལྡན་བྱང་རྩེ་གྲྭ་ཚང་ཕ་ར་ཁང་ཚན་གྱི་གྲྭ་བློ་བཟང་ཆོས་སྐྱབས་ལགས་ཀྱིས་གནས་ཚུལ་བརྗོད་པ་ལྟར་ན། ཚེས་ ༡༥ དང་ ༡༦ ཉིན་གཉིས་ཀྱི་རིང་ལི་ཐང་རྫོང་ཐོག་ཏུ་བོད་མི་ཚོས་ཞི་རྒོལ་བྱས་རྗེས། འབའ་ཐང་རྫོང་ནས་ལི་ཐང་ས་ཁུལ་ལ་གནས་སྤོར་བའི་གད་མོ་གྲོང་སྡེ་ཡི་བོད་མི་ ༡༦ དང་ལི་ཐང་རྫོང་དང་བར་ཐག་ཉེ་བའི་འབྲོག་སྡེ་ཁག་ནས་བོད་མི་ ༥ བཅས་ཁྱོན་བོད་མི་ ༢༡ བཟུང་བའི་ནང་ནས། འབའ་ཐང་རྫོང་ནས་ལི་ཐང་ལ་གནས་སྤོར་བའི་བོད་མི་ ༧ འབའ་ཐང་རྫོང་ཉེན་རྟོག་པས་གློད་གྲོལ་བཏང་ཡོད་འདུག བོད་མི་དེ་དག་གི་མིང་དང་བཙོན་ཁང་དུ་གནད་དོན་ག་རེ་བྱུང་མིན་སོགས་ཤེས་རྟོགས་བྱུང་མེད་པ་དང༌། གནས་ཚུལ་མཁོ་འདོན་པས་བརྗོད་པ་ལྟར་ན། བོད་མི་དེ་དག་ལ་རྨས་སྐྱོན་ཚབས་ཆེན་ཕོག་ཡོད་པས་སྐད་ཆ་བཤད་ཐུབ་ཀྱིན་མི་འདུག་ཟེར།
ཚེས་ ༢༠ ཉིན་འབའ་ཐང་རྫོང་ནས་དམག་མི་ ༤༠༠༠ ལྷག་ལི་ཐང་ལ་ཡོང་ཡོད་པ་དང༌། འབའ་ཐང་རྫོང་ཁོངས་ནས་གནས་སྤོར་མཁན་གྱི་གད་མོ་གྲོང་སྡེའི་མི་མང་རྣམས་ཚོགས་འདུ་འཚོགས་དགོས་པའི་བཀའ་བཏང་བ་ལྟར་མི་མང་རྣམས་ཚོགས་འདུར་ཞུགས་ཡོད་འདུག་ལ། ཚོགས་ཐོག་ཏུ་འབའ་ཐང་རྫོང་ཁོངས་ནས་གནས་སྤོར་བའི་བོད་མི་ཚོར་འབའ་ཐང་རྫོང་གི་ཉེན་རྟོག་པ་དང་སྤྱི་བདེ་ལས་ཁུངས་ལ་འགན་ཡོད་པ་དང༌། དེ་བཞིན་གནས་སྤོར་བའི་བོད་མི་ཚོའི་དགོན་པ་གནས་སྒོ་གྲྭ་ཚང་གིས་སྔོན་ཆད་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་སྐབས། གནས་སྒོ་དགོན་པའི་གྲྭ་བ་ཚོ་ཚོགས་མི་འཚོགས་དོན་ག་རེ་ཡིན་མིན་སོགས་ཀྱི་ཐད་ལ་དྲི་བ་དྲིས་ཡོད་འདུག དེར་གྲྭ་བ་ཚོས། ང་ཚོ་ཚོགས་འཚོགས་ཚེ་རང་གི་རྩ་བའི་བླ་མར་མཚན་སྨད་ཞུ་དགོས་ཀྱིན་འདུག་ལ། རང་གི་མཆོད་བཤམ་ནང་གི་༧གོང་ས་མཆོག་གི་སྐུ་འདྲ་སོགས་མར་བླངས་ནས་མའོ་ཙེ་ཏུང་གི་འདྲ་པར་ཡར་འཇོག་དགོས་ཀྱིན་འདུག དེ་འདྲ་ང་ཚོས་རྩ་བ་ནས་ཞུ་ཐུབ་པ་མི་འདུག་ཅེས་བརྗོད་ཡོད་འདུག དེ་བཞིན་གད་མོ་གྲོང་སྡེ་ཡི་མི་མང་ཚོས་གལ་ཏེ་ཚེས་ ༡༥ དང་ ༡༦ ཉིན་བཟུང་བའི་བོད་མི་ཞི་རྒོལ་བ་དེ་དག་མྱུར་དུ་གློད་གྲོལ་གཏོང་གི་མིན་ན། ང་ཚོས་མུ་མཐུད་ནས་ཞི་རྒོལ་དང་ཟས་བཅད་ངོ་རྒོལ་བྱ་རྒྱུ་ཡིན་པའི་བསམ་ཚུལ་བཤད་འདུག་ལ། ད་དུང་གད་མོ་གྲོང་སྡེ་ཡི་སྡེ་དཔོན་གྱི་མིང་ཐོག་ནས་བོད་མི་ཞི་རྒོལ་བ་དེ་དག་མྱུར་དུ་གློད་གྲོལ་མི་གཏོང་ན། སྡེ་དཔོན་གྱིས་མི་མང་གི་འགན་ལེན་ཐུབ་ཀྱིན་མེད་པ་དང༌། མི་མང་གིས་བཙོན་ཁང་གི་མདུན་སྒོ་ནས་ཟས་བཅད་ངོ་རྒོལ་བྱ་རྒྱུ་ཡིན་པ་སོགས་ཀྱི་གནས་སྟངས་བཤད་ཡོད་འདུག
ཚེས་ ༢༢ ཉིན་འབའ་ཐང་རྫོང་གི་ཉེན་རྟོག་པས་ཞི་རྒོལ་བ་དེ་དག་ལི་ཐང་གི་ས་ཁུལ་གཞན་ཞིག་ཏུ་ཁྲིད་ཡོད་འདུག་ལ། དེའི་ནང་གི་བོད་མི་བདུན་འབའ་ཐང་རྫོང་ཐོག་ནས་གློད་གྲོལ་བཏང་ཡོད་འདུག་ཀྱང༌། རྨས་སྐྱོན་ལྕི་མོ་ཕོག་སྟེ་སྐད་ཆ་བཤད་ཐུབ་ཀྱི་ཡོད་མི་འདུག
