ད་སྐབས་མདོ་སྨད་དྷི་ཚ་དགོན་དུ་རྒྱ་དམག་གིས་དམ་དྲག་དང་དམག་མི་འཕར་བསྣོན་བྱེད་ཀྱིན་འདུག་ཟེར་ལ། གསུམ་བཅུའི་དུས་དྲན་མ་ཡལ་བར་དུ་གང་བྱུང་འགྲོ་རྒྱུག་དང་འདུ་འཛོམས་བྱེད་མི་ཆོག་པའི་བཀའ་རྒྱ་བཏང་འདུག་ཟེར།
བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། མདོ་སྨད་དྷི་ཚ་དགོན་ཆེན་གྱིས་རྒྱ་ནག་ལ་ངོ་རྒོལ་དང་གཞན་ལ་ངན་སྐུལ་ཅི་ཡང་བྱས་མེད་ནའང༌། ཉེ་ལམ་ནས་དགོན་པ་དེའི་ཉེ་འདབས་སུ་རྒྱ་དམག་འཕར་སྣོན་དང་དྲག་ཆས་ཉེན་རྟོག་པས་འཇིགས་སྐུལ་བྱེད་བཞིན་འདུག རྒྱ་ནག་གི་རྫོང་རིམ་པ་དང་ཤང་རིམ་པ་བརྒྱུད་ནས་ལས་དོན་ཚོགས་ཆུང་ཞིག་མཚོ་སྔོན་ཞིང་ཆེན་གྱི་དགོན་སྡེ་ཁག་ལ་འགྲོ་བཞིན་ཡོད་པ་དང༌། ཚོགས་ཆུང་དེས་དགེ་འདུན་པ་ཚོ་གང་འདོད་དུ་འདུ་འཛོམས་དང་ཕར་འགྲོ་ཚུར་འོང་བྱེད་པར་ལྟ་རྟོག་དང་དོགས་ཟོན་བྱེད་ཀྱིན་ཡོད་པ་མ་ཟད། རྣམ་འགྱུར་ཡག་པོ་མི་སྟོན་པའི་དགེ་འདུན་པ་རྣམས་འཛིན་བཟུང་བྱེད་ཀྱི་ཡིན་པའི་བཀའ་རྒྱ་ཞིག་ཀྱང་བཏང་ཡོད་འདུག ཉེ་ལམ་ཚོགས་ཆུང་དེ་མདོ་སྨད་དྷི་ཚ་དགོན་དུ་ཡོང་ནས་གྲྭ་བ་ཚོར་གསུམ་བཅུའི་དུས་དྲན་མ་ཡལ་བར་དུ་དྷི་ཚ་དགོན་ནས་མི་མང་འདུ་འཛོམས་དང་ཆོས་ཕྱོགས་ཀྱི་དུས་དྲན་སྲུང་གཙི་བྱེད་མི་ཆོག་པའི་བཀའ་རྒྱའང་བཏང་ཡོད་འདུག
