རྒྱབ་ཤ་དཀར་པོའི་དེབ།

དོན་འགྲུབ་བཀྲ་ཤིས་ལགས།

རྩེད་མཚར་ཞིག་བྱ་འདོད་བྱུང༌། ཞེས་དང༌། བརྒལ་བརྟག་ཅིག་བྱ་འདོད་ཡོད། ཅེས་ཁྱེད་རང་ནས་བཤད་པ་དེ་དང༌། ད་ལྟ་ཁྱེད་རང་དངོས་སུ་སླེབས་ནས་གླེང་སྟངས་འདི་གཉིས་བསྡུར་ནས་བལྟ་སྐབས། ༼མགོ་མ་བརྩམས་གོང་ནས་ང་ཕམ་སོང་བ་ཡིན༽ཅེས་ཞུམ་པའི་སྐད་ཀྱིས་བཤད་ནས་འདུག་སྟེ། ངས་ནི་ད་དུང་ཡང་ཁྱེད་ཀྱི་རྩེད་མཚར་དེ་དང༌། ཁྱེད་རང་གིས་ང་དང་ལྷན་བརྒལ་བརྟག་བྱ་འདོད་ཡོད་ཅེས་བཤད་པ་དེར་དགའ་སྤྲོས་ཤགས་འགྱེད་བྱ་བསམ་པ་རྒྱུུན་མར་ཡོད། ཆུ་ཁར་སླེབས་ནས་རྟ་ཁ་མ་བསྒག་རོགས། ཕ་བཟང་བུ་ཞེས་ཞུ་ཡག་ཡིན།
ཐོག་མར་འདི་ལྟར་ཞུ་འདོད་བྱུང༌། ངས་བསམ་ཚུལ་སྤེལ་བའི་ནང་ནས་ཡིག་ནོར་རེད་ཅེས་མིང་དང་ཚིག་ཁ་ཤས་ཟུར་འདོན་གནངས་འདུག་པ་དེ་དག་བརྡ་སྤྲོད་ཀྱི་གཞུང་དང་བསྟན་བཅོས་ཀྱི་སྲོལ་གང་དང་འགལ་ཡོད་པ་གསལ་བཤད་གནང་རྒྱུ་ཡོད་ན། དེ་དགའ་གུས་ཀྱིས་ངོས་ལེན་ཞུ་འདོད་ཡོད། ཟེར་རྒྱུས་ཕོངས་ནས་རང་གི་དེ་ཉིད་ཕྱིར་ཕྱུངས་པ་ལ་དེ་ཚུལ་གྱི་ལན་སྤྲོ་བ་ངའི་གཤིས་ཀ་དང༌། རིགས་པ་སྨྲ་བ་སྤྱིའི་འགྲོས་ཀྱང་རེད།
དེ་ནས་བསྟན་འཛིན་གྱིས་ཡིག་ནོར་དག་ཐེར་བྱ་འདོད་ཡིན་ནམ། ཡིག་ནོར་ལས་སྣོན་བྱ་འདོད་ཡིན་ཅེས་བཤད་དེ། ངས་སྤེལ་བའི་བསམ་ཚུལ་ནང་ཡིག་ནོར་འདུག་མདོག་མདོག་གི་རྣམ་འགྱུར་མངོན་པ་བྱས་འདུག དེར་ངས་ཁྱེད་དང་ཁྱེད་འདྲ་བ་དག་སྡེབ་ཀྱི་རང་མགོ་མ་ཐོན་པ་དག་གི་ངོར་ཡིག་ནོར་དག་ཐེར་བྱེད་བསམ་པ་དང་དེའི་སྤོབས་པ་སྔོན་དུ་བཏང་ནས་ཡོད་སྟབས། ངས་ནི་ཡིག་ནོར་སྤེལ་གྱི་མེད་ཅེས་སྤོབས་པ་མཐོན་པོས་ཞུ་ཡག་ཡིན། བསམ་ཚུལ་སྤེལ་བའི་ནང་ཡིག་ནོར་སྤེལ་བ་མེད་ཅེས་ཀྱང་ཞུ་ཡག་ཡིན། ཅི་སྟེ་ཡོད་ན་ནི། འདུག་ཅེས་ཤོད་དང་བདེན་པར་འདུག་ན་ངོས་ལེན་ཞུ་བའི་སྤོབས་པ་དང་ཡང་ལྡན་པ་ཞིག་ཡིན་ཅེས་བསྐྱར་དུ་ཞུའོ།། གང་དུའང་ཁྱེད་རང་གིས་བརྒལ་བརྟག་ཅིག་བྱ་འདོད་ཡོད་ཅེས་བཤད་པ་དེ་ག་རང་དགའ་སྤྲོ་ཆེན་པོས་ཁུར་དུ་ལེན་བསམ་པ་ལས། ངའི་ལྗིད་ཁོག་སྟོན་འདོད་པ་གང་ཡང་མིན། ལར་ནས་བརྒལ་བརྟག་གི་མཐའ་འབྲས་འཚོལ་བ་ལ་ཞུགས་པའི་སྐབས་ན། སྔ་རྒོལ་དང་ཕྱི་རྒོལ་གཉིས་ཀྱི་གང་གི་ཤེས་ཡོན་ལྕི་མིན་གྱིས་ཐག་ཆོད་དགོས་པ་རིགས་པ་སྨྲ་བ་སྤྱིའི་ལུགས་རེད།
ཡང་ཁྱེད་རང་ནས་དུས་བབ་ཀྱིས་ཡིག་ནོར་སྤེལ་གྱི་ཡོད་པ་དང༌། བརྒྱུད་ལམ་གཞན་ལས་ཉུང་བའི་ངོས་འཛིན་དང༌། དུས་བབ་ཀྱི་ཡིག་ནོར་ནི་རང་ཉིད་དང་རང་ཉིད་འདྲ་བ་དག་གི་ཤེས་ཚད་ཀྱིས་མ་འཆུན་པ་དང༌། ནན་ཏན་མ་བྱས་པ། དུས་ཚོད་མ་འདང་བ་བཅས་ལ་ཁ་འཕངས་ནས་འདུག དེར་ང་ལ་ཚིག་གཅིག་ཞུ་ཡག་ཡོད། ཤེས་ཚད་ཀྱིས་མ་འཆུན་ནས་ཡིག་ནོར་སྤེལ་གྱི་ཡོད་པར་ངས་ཀྱང་དེ་བཞིན་ངོས་འཛིན་བྱེད་ཀྱིན་ཡོད། ནན་ཏན་མ་བྱས་པ་དང་དུས་ཚོད་མ་འདང་བ་ཟེར་བ་དེ་ཁས་ལེན་ཐུབ་པ་མི་འདུག དེ་གཤམ་ན་བསྟར་བའི་སྒྲུབ་བྱེད་རྣམ་གྲངས་བརྒྱད་དེ་ནི་ཁྱེད་རང་ལྟར་ན་ཡིག་ནོར་མིན་ཅེས་ཨུ་ཚུགས་བྱེད་པའི་གཏན་ཚིགས་སུ་བཀོད་འདུག་ཀྱང༌། ཡིག་ནོར་ཡོད་ཟེར་སྟངས་དང་བསྡུར་ན། རང་མགོ་རྡུང་བྱེད་ཆགས་ནས་འདུག
མཚམས་འདིར་ཁྱེད་ཀྱི་བསམ་ཚུལ་ཐུང་ངུ་འདིའི་ནང་གི་ཡིག་ནོར་ཁག་ཅིག་ཟུར་འདོན་གྱིས་ངོ་སྤྲད་ན། ༼གོ་འཚོལ༽ཞེས་པ་ཁྱེད་ནོར། ཁ་སྐད་ཀྱི་དབང་དུ་བྱས་པ་ཡིན་དུ་ཆུག་ཀྱང་༼མགོ་ཚོས༽ཞེས་འབྲི་བ་འདི་དག ༼ཞི་དག༽ཅེས་བྲིས་པ་ཁྱེད་ནོར། ༼ཞུ་དག༽ཅེས་འབྲི་བ་དག ཡིད་མི་ཆེས་ན། སྒྲ་སྦྱོར་བམ་གཉིས་དང་བྱེ་བྲག་རྟོགས་བྱེད་ཆེན་མོའི་དབུར་གཟིགས་དང༌། གསལ་རྒྱས་བཀོད་ནས་འདུག ཡང༌། དེ་གཤམ་ན། ཀློག་པ་པོས་ཡིག་ནོར་དུ་༼ལྟ་བ༽་ཞེས་པའང་ཁྱེད་ནོར། སྐབས་འདིར་ནི་༼བལྟ་བ༽འབྲི་བ་དག དེ་ནས་ཁྱེད་རང་གིས་ངའི་བསམ་ཚུལ་ལས་ཡིག་ནོར་དུ་བསྟན་པའི་གྲས། ༼གནངས་རོགས།༽ ༼ངོས་ལེན་ཞུ་མཁན་ཅིག་ཡིན།༽ ༼བཤམས་བསམས༽ ༼ཅེས་ཀྱང་སྨྲའོ།།༽ སོགས་འཛེམ་ཟོན་མེད་པར་སྤེལ་བའི་ཡིག་ནོར་དུ་བསྒྲགས་འདུག་པ་ཁྱེད་ཡོངས་སུ་ནོར། ང་ཤིན་ཏུ་ནས་དག་པར་ཡོད་ཅེས་ཞུ་ཡག་ཡིན། རིགས་པས་བརྒལ་བརྟག་བྱ་སྟངས་འདི་འདྲ་མ་རེད་ཅེས་ཀྱང་ཞུ་བར་ཐལ།
བློ་ཕམ་ཅིག་བྱུང་བ་ནི། བརྒྱུད་ལམ་གཞན་ལས་དུས་བབ་ཀྱི་ཡིག་ནོར་ཉུང་བ་ཡོད་ཅེས་བཤད་འདུག་པ་འདི་རེད། བརྒྱུད་ལམ་གང་ལས་ཉུང་བར་ཤོད་ཀྱི་ཡོད་མེད་ནི་ངས་མི་ཤེས། དེ་ཤེས་འདོད་ཀྱང་མེད། ཡིག་ནོར་ཡོད། གཞན་ལས་ཉུང་བ་ཡོད་ཅེས་པ་ནི་དུས་བབ་ཀྱི་རིན་ཐང་སྲུང་སྐྱོབ་བྱེད་པའི་གཏམ་དུ་འགྲོ་དཀའ། དུས་བབ་ཀྱི་དེ་ཉིད་ཕྱིར་སྟོན་གྱི་ཚིག་ཏུ་སོང་ནས་འདུག གོང་དུ་བསམ་ཚུལ་སྤེལ་སྐབས་འགའ་ཞིག་ཏུ། ངས་ཁྱེད་རང་གི་ཡིག་ནོར་ཁག་ཅིག་ཟུར་འདོན་ཞུས་པ་དེ་དག་ཟུར་འདོན་ཞུ་ཉེས་ཞུས་པ་ཡོད་ན་ནི། དེ་དག་ཐེར་འདོན་ནས་མགོ་བཙུགས་ཏེ་བརྒལ་བརྟག་རྩོམ་གནངས་རོགས། འདི་ལྟར་སྡུག་སྐད་བརྒྱབ་པས་གར་ཡང་སླེབས་དཀའ་བར་མཐོང༌། མ་མཐོང་གྲོགས་པོ་ཁྱེད་རང༌། རང་གི་དེ་ཉིད་ཁྲོམ་འགྲེམས་བྱེད་པ་ལའང་ཅི་མི་སྙམ་པ་འདིས། མི་གཤིས་དྲང་ཚུགས་ཤིག་ཡོད་མཆི།
ད་དུང་ཡང༌། བརྒལ་བརྟག་གི་ཨུ་ཚུགས་བྱ་བསམས་ན་ནི། ལུང་རིགས་ཀྱི་འགྲོས་ལ་གཞོལ་བ་གནད། ངའི་ཀུན་སློང་དང་མི་གཤིས་སོགས་ནི། ངེད་གཉིས་ཀྱི་རྩོད་གཞི་མ་རེད། དངོས་འབྲེལ་བརྒལ་བརྟག་བྱ་བསམས་པ་ཡོད་ན། མུ་མཐུད་བགྲོ་གླེང་བར་ཕེབས་པའི་རེ་བ་ཡོད། མ་མཐོང་གྲོགས་པོ་ཁྱེད་དང་བརྒལ་བརྟག་ཅིག་གི་སྤྲོ་བས་ཡོད་དེ། ཁྱེད་འདིས་གཡོལ་ཅི་ཐུབ་བྱས་ཡོང་དུས། ང་ལ་ཐབས་ཤེས་མི་འདུག རེ་བ་ཆེ་ཤོས་ནི། ཡིག་ནོར་མེད་པའི་དུས་བབ་ཅིག་ཏུ་སྨོན་ནས་ཡོད་དོ།།

ལྡབ་ལྡིབ་ཚིག་གི་ཤུན་པ་ཕར་བཤུས་པས།།
བརྗོད་འདོད་དོན་གྱི་ཕྱི་ནང་མངོན་པར་གྱུར།།
རྟ་ཁལ་བོང་བུར་བཀལ་བ་ངེད་རང་ནོར།།
རང་སྐྱོན་འདི་འདྲ་ངོས་འཛིན་མཐོལ་ཞིང་བཤགས།།

མ་མཐོང་གྲོགས་འདི་ལུང་རིགས་ཤགས་འགྱེད་ཀྱིས།།
གཡས་གཅུན་གཡོན་ནས་གཅུན་པའི་བར་གསེང་ནས།།
ཞུམ་འདར་སྐད་གདངས་འཕངས་དམའི་སྟངས་སྟབས་ཀྱི།།
འགྲོས་ལ་བཀོད་པའི་སྡིག་པ་ཅིས་མི་ལྕི།།

དེ་ལྟར་ན་ཡང་ནོར་མེད་དུས་བབ་ཅིག།
ཡང་ཡང་མཇལ་འདོད་སེམས་པའི་མཚོ་ངོགས་ན།།
རེ་འདུན་རྦ་རླབས་འཕྱུར་བའི་སྒྲ་སྐད་འདིས།།
རྣ་བའི་བྲག་ལ་འཁྱུད་པ་འཇགས་ཐབས་བྲལ།།

ཚིག་གི་སྤྲོས་པས་དོན་གྱི་གནད་སྦྲུམ་པའི།།
ལུང་རིགས་རིན་ཆེན་རྒྱན་ལྡན་མིན་མོད་ཀྱང༌།།
རྩོད་པའི་ལམ་ལ་འབོད་པའི་བརྡ་སླེབས་པས།།
ཁོ་བོས་ལམ་འདི་གཏོང་བ་ཅང་མ་ཕོད།།
ཅེས་ཀྱང་ཞུའོ།།

ནམ་མཁའ་བསྟན་འཛིན་ལགས།

ད་ནི་ནམ་ལངས་འགྲོ་བདེ་རང་ཆགས་སོང༌། ང་ཚོ་སུས་ཀྱང་ཕན་ཚུན་བར་གནས་ལུགས་ཤོད་རེས་དང་ཉན་རེས་འདི་དཔེ་མི་སྲིད་པའི་རྩ་ཆེན་པོ་རེད། གྲོགས་པོས་ཟིན་བྲིས་ཤིག་གཉེར་བའི་ཐུགས་རེ་གནངས་པ་ཐུགས་རྗེ་ཆེ། ཡིན་ནའང༌། ང་ནི་རྩོམ་ཡིག་བྲིས་ནས་ཟིན་བྲིས་འགེངས་ཐུབ་པའི་ཤེས་ཚད་ལྡན་པ་མེད། དག་ཆ་ཁོ་ན་ཨོ་ཙམ་ཡོད། ང་ཨ་མདོ་བ་ཞིག་མིན། དེ་གསལ་བཤད་ཅིག་བྱ་འདོད་བྱུང༌།

གྲོགས་ལྷ་ཆབ་ལགས།

ཁྱེད་ཀྱི་གསུང་བ་ལ་མངོན་པར་བསྟོད་དོ།། ཞེས་པ་དེར་ ཁྱེད་ཀྱིས་གསུངས་པ་ལ་མངོན་པར་བསྟོད་དོ།། ཞེས་བྱེད་སྒྲ་སྦྱོར་དགོས་པ་མིན་ནམ། ཁྱོད་འདིས། གཟབ་གཟབ་ཁྱོན་ནས་གནང་གི་མི་འདུག
ཁྱེད་དང་ལྷན་དུ་གུ་ཡངས་པོས་བགྲོ་གླེང་བྱེད་རྒྱུ་བྱུང་བ་འདིར་དགའ་བ་སྒོམ་བཞིན་ཡོད། གྲོགས་པོ་ལགས། ཐུགས་རྗེ་ཆེ།
ངས་ནི་དོན་འགྲུབ་བཀྲ་ཤིས་ཟེར་བ་དེས་བརྒལ་བརྟག་བྱ་འདོད་ཡོད་ཅེས་གསུངས་པ་དེ་ག་རང་ལ་དགའ་གུས་ཚད་མེད་དང་བཅས་ཏེ་སྒུག་ནས་བསྡད་ཡོད། སྟག་གི་རྔ་མས་མི་འཛིན། བཟུང་གི་ནངས་མོ་མི་གཏོང༌། འདི་ཨ་མདོའི་གཏམ་དཔེ་ཞིག་རེད། དབུས་གཙང་སྐད་ལྟར་བྱས་ན། སྤུ་རིས་རིམ་འབྱེད། ལན་དགུ་ཆད་མཐུད་རང་བྱེད་བསམས་ནས་བསྡད་ཡོད། ཡིན་ནའང༌། མི་འདིར་ཁྱོན་ནས་འཕྲད་ཀྱི་མི་འདུག ད་ཁྱོན་ནས་མ་འཕྲད་པ་འདྲ་བྱུང་ན། དུས་ཚོད་ཅིག་བཟོས་ཏེ་གངས་སྐྱིད་ནས་ཤགས་འགྱེད་ཀྱི་འདུ་ར་བཤམས་དགོས་ཀྱང་བཤམས་ཁོ་ཐག་ཡིན། གང་ཡིན་ཟེར་ན། རྒྱལ་ན་ང་རྒྱལ་སོང་ཟེར་བ་ཞིག་དང༌། ཕམ་ན་ང་ཕམ་སོང་ཟེར་བ་ཞིག་བྱ་འདོད་འདི་འདོར་ཐབས་མེད་པར་ཡོད། དེ་དུས་ང་སྟག་ཅིག་རེད་དང༌། སྟག་གི་པགས་པ་གྱོན་པའི་ཝ་མོ་ཞིག་ཡིན་མིན་དེར་གཟིགས་པར་ཕེབས་ཤོག་ཨཱ།

གྲོགས་ལྷ་ཆབ་ལགས།

ཁྱེད་ཀྱིས་ཞིབ་གཟིགས་མ་གནངས་ནས་གསུངས་འདུག ངས་ཡིག་ནོར་ཁོལ་ཕྱུང་གི་ཐོད་དེར། དོན་འགྲུབ་བཀྲ་ཤིས་ལགས་ཞེས་དང༌། ནམ་མཁའ་བསྟན་འཛིན་ལགས་ཞེས་མིང་བཀོད་ཡོད། དེ་གཤམ་དུ་ཡིག་ནོར་རྣམས་བསྟར་ཡོད། མནོད་དང་མནོལ་གཉིས་ཁྱེད་ནོར་བ་འདྲ། མནོད་ནི་དབང་ལུང་ཁྲིད་གསུམ་གཞན་ཞིག་ནས་བདག་གིར་བྱས་པའི་དོན་དང༌། མནོལ་ནི། བཙོག་པ་ཤོར་བ་སོགས་ཀྱི་དོན་སྟོན་བྱེད་དེ། མནོལ་གྲིབ་ཅེས་འབྱུང་བ་ལྟ་བུ་རེད། ད་དུང་ཨ་མདོའི་སྐད་ལ་མནོལ་སྐྲ་ལེན་པ་ཞེས་པ་ཞིག་ཀྱང་ཡོད་འདུག ཡང་ཁྱེད་རང་ནས་གྲགས་ཞེས་བྲིས་པའང་ནོར། དེར་ངེས་པར་གྲག་ཅེས་འབྲི་དགོས་པ་སྟེ། སྒྲ་གྲག སྐད་གྲགས་བཞག་ལྟ་བུའི་ཁྱད་འདུག

དོན་འགྲུབ་བཀྲ་ཤིས་ལགས།

དེ་རིང་གཟའ་སྤེན་པའི་གུང་སེང་ཆུ་ཚོད་སྤྱད་ནས་དྲ་རྒྱ་དག་བསྔོགས་བསྡད་ཡོད། ད་ལྟ་རང་༼ཆོས་ལུགས་ཆོས་བརྒྱུད་ཁག་གི་ཚོགས་འདུ་ཐེངས་བཅུ་བ༽་ཞེས་པའི་གསར་འགྱུར་དེ་བཀླགས་ཚར། ཡིད་ཕངས་པ་ལ། དེ་ཡང་ཁྱེད་རང་གི་མིང་ཐོག་ནས་སྤེལ་ཏེ་འདུག མཛུབ་མོ་རི་སྟོན་ཅིག་མ་བྱས་རང་བྱས་ཆགས་སོང༌། ཚོགས་ནི་མིང་ཚིག་རེད། འཚོགས་ནི་བྱ་ཚིག་རེད། བླ་སྤྲུལ་༼དངོས་འཛིན༽་ཞེས་པ་མ་དག ༼ངོས་འཛིན༽་ཞེས་བྲིས་ན་དག ཆོས་རིག་བཀའ་བློན་གྱི་མཚན་གྱི་དག་ཆ་ནི་ཚེ་རིང་༼འཕུན༽་ཚོགས་མ་རེད། ཚེ་རིང་༼ཕུན༽་ཚོགས་རེད། ༼དབྱིན་༽དཀྲུག་ཅེས་བྲིས་པ་ནོར། ༼དབྱེན༽་དཀྲུག་ཅེས་འབྲི་བ་དག ཕན་བདེ་༼ཀྱི་༽ལས་དོན་ཟེར་བ་བོད་པའི་སྐད་འགྲོས་དང་བརྡ་སྤྲོད་ཀྱི་ལུགས་མིན། རྟ་རྒྱུག་ཞོར་མེ་ཏོག་འཐུ་ཞོར་འདི་ཡང༌། ཁྱེད་ལ་སྨན་དུ་རེ་བས་བསྟབས་པ་ལགས་སོ།། ལུང་རིགས་ཀྱི་བརྒལ་བརྟག་ནི་ཁྱེད་ཀྱིས་ཡོང་བ་མི་འདུག ཡིག་ནོར་བརྡ་ནོར་སྤེལ་མི་དགོས་པ་ཞིག་འབད་འཚལ་ཞུ།

གཞན་གྱི་བརྩམས་ཆོས་ལ་དཔྱད་བརྗོད་བྱེད་ཀྱི་ཡིན་ཟེར་མཁན་ཞིག་གིས་མཐར་གཏུགས་དུས་ཕ་ཡུལ་གཅིག་པའི་རྒྱབ་རྩ་ཡོད་མེད་དང་བུ་སྤུན་གྱི་དཔུང་རོགས་ཡོད་མེད་རྩོད་དགོས་དུས་ལས་ཀྱི་མཐའ་ཟད་འདུག་པས། དྲ་སྡོམ་པ་འདིས་རང་གི་མཆན་གྱི་ནང་ཡིག་ནོར་ཡོད་པ་རང་གིས་མི་མཐོང་ན་གཞན་གྱི་རྩར་བཅར་ནས་འདྲི་རྒྱུ་ལས་ང་ཚོར་དག་བཅོས་བྱེད་པའི་འོས་བབ་མི་འདུག་ལ། ད་སྐྱག་པ་ལ་ལག་པ་འཆང་ན་ལག་པ་ལ་སྐྱག་པ་དྲོ་རྒྱུའི་ཉེན་ཁ་འདུག་པས་དྲ་གྲོགས་ཀུན་གྱིས་མཚམས་འདི་ནས་འཇོག་རོགས་བྱོས་ཞེས་རེ་སྐུལ་ཞུ།

གྲོགས་པོ་བསྟན་འཛིན་ལགས། ཁམས་བཟང༌། དངོས་གནས་བཤད་ན་ཁྱོད་ལ་མཁོ་བ་དེ་ང་རང་རེད་མི་འདུག་ཨང༌། དེའི་བར་ནས་ངས་ཐེ་ཇུས་མེད་སར་བྱུས་གཏོགས་བྱས་པ་དགོངས་དག གཞན་དེ་རིང་ངའི་ཟིན་བྲིས་སུ་འདིའི་སྐོར་གྱི་རྩོམ་ཡིག་ཅིག་སྤེལ་ཡོད། ཁྱེད་ལ་ཁོམ་པ་རེ་ཡོད་ན་ངའི་ཕ་གཞིས་སུ་ཕེབས་ཏེ་བསམ་འཆར་རེ་འདོན་རོགས་ཞུ། ད་དུང་ངའི་རེ་བར་ཁྱེད་ཀྱིས་ཟིན་བྲིས་ཤིག་གཉེར་བར་འོས། འདི་ངའི་སྒེར་གྱི་རེ་བ་ཙམ་ཡིན།

གྲོགས་བསྟན་འཛིན་ལགས། ངས་ཁྱོད་ཀྱི་ལག་ནང་ལ་རྡོ་བཞག་པ་དེ་འདྲ་མིན་ཏེ། བང་ཆེན་ཡིན་ན་དུས་བབ་ཡིན་ན་ཡིག་ནོར་ནི་ཡིག་ནོར་རང་ཡིན་པས། གཅིག་བཞག་ནས་གཅིག་ཁོ་ན་གླེང་དོན་མི་འདུག གྲོགས་པོ། ང་ཚོ་ཕ་ཡུལ་གཅིག་པ་ཚོས་ཁྱོད་ལ་འཇིགས་སྐུལ་འདྲ་བྱས་པ་ཨེ་ཡོད་དམ། རིག་གཞུང་གླེང་སར་དེ་འདྲའི་ཅོལ་ཆུང་གི་སྐད་ཆ་མ་བཤད་རོགས། ད་དུང་གཞན་ཞིག་ནས་བཤད་ན་བསམ་ཚུལ་སྔོན་མ་དག་ལས་འུ་གཉིས་ཅུང་མཐུན་པ་མ་ཡིན་ནམ། གང་ལྟར་ང་ཚོས་དཔུང་སྒྲིག་པའི་དབང་དུ་བཏང་ནའང་ཁྱོད་འདྲ་བ་ཞིག་གི་སྟེང་ལ་ཤིག་གི་སྒང་ལ་སྟ་རེ་རུ་མི་ཆགས་སམ། སྤྱིར་བགྲོ་གླེང་བའི་སྐབས་དེ་འདྲའི་རྩ་མི་ཚང་བའི་སྐད་ཆ་མ་བཤད་རོགས། དེ་འདྲའི་སྦུགས་དོགས་པོ་ཞིག་ཡོད་ན་དེ་རིང་ནས་ང་ལ་ལན་མ་རྒྱབ་ཀྱང་ཆོག

དྲ་གྲོགས་བསྟན་འཛིན་ཟེར་བ་འདིས་རང་གི་མཆན་ཡིག་དག་གི་ནང་ཡིག་ནོར་ག་ཚོད་ཞིག་འདུག་བལྟ་རོགས། ཕར་ལྟོས་ཡོང་ན་ཁྱོས་ཡིག་ནོར་མཐོང་ན་མིག་ཚ་གིན་ཡོད་དམ་ཨ་མདོ་བ་ཚོའི་སྟེང་ལ་མིག་ཚ་གིན་ཡོད་གསལ་བོ་ཤེས་ཀྱི་མི་འདུག དེ་མིན་ཁྱོད་ཀྱིས་དམིགས་ཡུལ་ངེས་ཅན་ཞིག་བཟུང་ནས་དཀྲོགས་གཏམ་བཤད་ཀྱི་མེད་ན་རྗེས་ཕྱོགས་དོན་དག་ཡོད་མེད་གཉིས་ལ་ཆོད་ཁ་དང་ཆོས་བརྒྱུད་སོགས་ཀྱི་མིང་དྲུད་ནས་མ་ཡོང་རོགས།

གྲོགས་ལྷ་ཆབ་ལགས། དེ་འདྲ་ག་རེ་ཟེར་གྱི་རེད། སྙིང་ནད་རྙིང་པ་ཕར་ཞོག དོན་འགྲུབ་བཀྲ་ཤིས་ཟེར་བ་དེ་ངོ་ཁོ་རང་ཤེས་ཀྱི་མེད། རྒྱུ་མ་ཕུ་འདེད་བྱ་རྒྱུ་ཡིན་ལབ་ན། རྙིང་ནད་ཡོད་པ་དང༌། རྙིང་ནད་རྙིང་པ་ཡོད་པ་ཞིག་སྟོན་གྱི་ཡོད་པ་རེད་པས། འདི་འདྲ་ལབ་རྒྱུ་ཨེ་ཡོད། དུས་བབ་ཀྱི་གསར་འགོད་པ་ཡིན་དུས་ཨ་མདོ་བ་ཞིག་ཡིན་ཤག་ཤག་བྱེད་ཀྱི་ཡོད་མ་གཏོགས་གཞན་ནི་ཤེས་ནས་བཤད་པ་མེད་ལ། ཤེས་ནས་རྩོད་དགོས་པའང་ཅི་གང་མེད།
ཡིག་ནོར་སྤེལ་བསྡད་ན་ཡག་པོ་མ་རེད་སྙམ་པ་དེ་ག་རང་ཡིན། སྐད་ཆ་ཐད་ཀར་བཤད་ན། དུས་བབ་ཀྱི་གསར་འགོད་པ་དོན་འགྲུབ་བཀྲ་ཤིས་སོགས་ཀྱིས་ཡིག་ནོར་རྐྱང་སྤེལ་སྟངས་ལ་བལྟས་ན། འདི་ཚོའི་ཤེས་ཚད་དེ་ཡང་ཚོམ་པ་མི་དགོས་པའི་ཚད་དེ་མ་རེད། འདི་ཚོས་ག་དུས་ཡིན་ནའང༌། ཡིག་ནོར་སྤེལ་གྱི་འདུག་ལབ་ཀྱི་ཡོད། ཤེས་ནས་ཡིག་ནོར་སྤེལ་མཁན་ཞིག་ཨེ་ཡོད་ན། ཅི་སྟེ་ཡོད་ན། དེ་ནི་གང་ཞིག་གཏོར་བཤིག་བྱེད་མཁན་ཡིན་པའི་ངོས་འཛིན་བྱེད་ཀྱི་ཡོད།
མི་ཞིག་གི་མིང་ནས་སྨྲོས་པས་བརྩེ་བ་བརླག་འགྲོ་བ་ཞིག་དང༌། ཕོག་ཐུག་གི་རྒྱུར་འགྲོ་བར་བཤད་པ་དེའི་གོ་བ་ནི་ངས་ལོན་མ་སོང༌། ངས་ནི་དོན་འགྲུབ་བཀྲ་ཤིས་ཟེར་བ་འདི་ངོ་ཤེས་ཀྱི་མེད་ལ། བརླག་འགྲོ་རྒྱུའི་བརྩེ་བའང་ཅི་གང་མེད། དུས་བབ་ཀློག་ཐེངས་རེར་སེམས་པ་མ་སྐྱིད་ནས་ཁུ་སིམ་མེར་སྡོད་ཚུགས་པ་མི་འདུག ཁྱེད་རང་ཤིན་ཏུ་ནས་མད། ང་ཚོས་དུས་བབ་ནས་མགོ་བཙུགས་ཏེ་བརྒྱུད་ལམ་ཆ་ཚང་གཙང་ཕྱགས་ཀྱི་སྟ་གོན་བྱ།

གྲོགས་བསྟན་འཛིན་ལགས། ང་ཚོས་ཐད་ཀར་ལག་ལ་སྨྱུ་གུ་དམར་བོ་ཞིག་བཟུང་ནས་ཡིག་ནོར་གྱི་སྟེང་ལ་ཁྲམ་རྟགས་འགོད་ཐུབ་ན་དགའ་བ་ལ། དེ་མིན་ཕར་བཤད་པ་ཙམ་གྱིས་ཕན་ཐོག་གི་མེད་པ་འདྲ། གཞན་ཁྱོད་ཀྱིས་རྒྱུ་མ་ཕུ་འདེད་བྱེད་རྒྱུ་ཡིན་ཟེར་བ་བདེན་ན། རྩོམ་སྒྲིག་པ་མི་འདེད་པར་དོན་འགྲུབ་བཀྲ་ཤིས་འདེད་དོན་མི་འདུག་སྙམ། འདི་ནི་ངའི་སེམས་ཀྱི་སྐད་ཆ་ཅམ་ལས་ཅང་མིན། ངས་མགོ་ནས་བརྗོད་པ་ལྟར་ཡར་རྒྱས་ཀྱི་ཕྱོགས་སུ་གོམ་པ་སྤོ་འདོད་ཡོད་ན་མི་དང་མིའི་བར་གྱི་བརྩེ་བ་ལྷག་མི་ཉན། རྒྱུ་མཚན་དེའི་ཕྱིར་དུ་ང་ཚོས་ཕན་ཚུན་ལ་ཕོག་ཐུག་མི་བཟོ་བར་ཐུན་མོང་གི་སྒོ་ནས་བཙན་འདེད་གནག་འདེད་ཀྱིས་དུས་བབ་གཅིག་བུ་མ་ཡིན་པར་བརྒྱུད་ལམ་ཚང་མ་གཙང་མ་བཟོ་ཨེ་ཐུབ་བལྟ་རྒྱུ་དེ་ཡིན། དེ་ལྟར་མིན་ན་བསྟན་འཛིན་ཟེར་བ་ཁྱོད་རང་སུ་ཡིན་མི་ཤེས་མོད་དེ། དོན་འགྲུབ་བཀྲ་ཤེས་ཟེར་བ་དེའི་སྟེང་ལ་སྙིང་ནད་རྙིང་བ་ཡོད་མཁན་ཞིག་རེད། ངའི་སྐད་ཆ་དག་ནི་བློ་གཟུ་བོར་གནས་པ་ཤ་སྟག་ཡིན།

ངའི་དོན་འགྲུབ་བཀྲ་ཤིས་ཀྱི་མིང་གིས་སྨྲོས་ནས་ ཞེས་པའི་ ངའི་ དེ་ ངས་ ཞེས་བཅོས་རོགས

ངས་དུས་བབ་ཚང་ལ་ཁ་བརྡུང་བཏང་མྱོང་། ཡིན་ནའང་ས་ཆའི་ཚོད་ཀྱི་རི་དྭགས་ཟེར་བ་ལྟར་བཙན་བྱོལ་བོད་མིའི་སྤྱི་ཡོངས་ཀྱི་ཤེས་ཡོན་སྟངས་ལ་དཔག་པའི་དུས་བབ་ཚང་འགྲིག་འདུག་དྲན་སོང་། མ་ཟད་དུས་བབ་ཚང་སྒེར་གྱི་གསར་ཁང་ཞིག་ཡིན་པས་ང་ཚོས་འགན་ཆེན་པོ་གཡོག་ནས་བཙིན་གནོན་ཆེན་པོ་གཏོང་རྒྱུ་ཡོད་པ་མ་རེད། གང་ཡིན་ཟེར་ན་ཁ་ཚོ་ཚང་མ་གཞུང་གི་འགྲོ་སོང་བཏང་ནས་ཆེད་དུ་བསྐྱེད་སྲིང་བྱས་པ་དེ་འདྲ་མ་རེད། སྙིང་རྗེ་གསར་འབྱོར་གྱི་འཚོ་བ་ཁག་པོ་དེ་དང་ཆ་རྒྱུས་མེད་པའི་ཕྱི་ལོག་གི་འཁོར་ཞིག་ཏུ་དང་བླངས་ཀྱི་ལས་ཀ་ལྟ་བུ་བྱེད་ཀྱི་ཡོད་པ་དང་། གྲུབ་འབྲས་ཀྱང་མི་དམན་པ་ཐོབ་ཀི་ཡོད་པ་འདྲ། ལྷག་པར་དུ་དེང་སང་ལས་བྱེད་གསར་བ་ཁ་ཤས་སླེབས་ཡོད་པ་དང་། ཁོ་ཚོ་སྙིང་རྗེ་གཞུང་འགྲོ་སོང་བཏང་ཆེད་དུ་བསྐྱེད་སྲིང་བྱས་མེད་པ་དང་། ཉམས་མྱོང་ཐོབ་རྒྱུར་ཡང་དུས་ཚོད་གང་འཚམ་དགོས་ཀི་རེད་བསམ། གལ་སྲིད་ཁོ་ཚོའི་ཤེས་ཚད་ཀྱི་འདང་གི་མེད་ན་གཞུང་དང་ཚོགས་པ་དེ་འདྲས་འགྲོ་སོང་བཏང་ནས་ཡར་སློབ་སྦྱོང་བྱེད་དུ་གཏོང་དགོས་པ་རེད། དེ་འདྲ་རོགས་པ་བྱེད་བྱེད་མཁན་མེད་པར་རང་རང་གི་ས་ནས་གང་ཐུབ་བྱེད་བཞིན་པའི་བོད་མི་དཀྱུས་མ་ཚོར་ཁ་བརྡུང་གཏོང་རྒྱུ་མང་དྲགས་ན་འོས་པོ་མི་འདུག ཁོ་ཚོས་ཁྱེད་ཅག་གི་ངག་བཞིན་ཉན་དགོས་པའི་རྒྱུ་མཚན་ག་རེ་ཡོད་དམ། ཁྱོད་ཚོས་ཟླ་ཕོག་སྤྲོད་ཀྱི་ཡོད་དམ། གི་དང་གིན་སྤྱོད་སྟངས་ཡག་པོ་མེད་ཀྱང་དེ་ལ་ལོ་དང་ཟླ་བ་བྱས་ནས་ཁ་བརྡུང་གཏོང་འདོད་མི་འདུག

བརྩེ་བའི་གྲོགས་པོ་ལྷ་ཆབ་ལགས། ཁྱེད་རང་དྲ་ཐོག་དུ་ཡོད་ན་ངས་ཁྱེད་རང་ལ་བསྐུར་བས་འཕྲིན་ཡིག་དེར་གཟིགས་རོགས་ཞུ། དེ་ནས་ཡིག་ནོར་དག་ལ་ག་ལེར་གསུང་བཤད་གནང་རོགས་ཞུ། ང་རང་གིས་ཀྱང་ཁྱེད་རང་གི་སྐད་ཆ་འདི་དག་ལ་རྒྱབ་སྐྱོར་ཞུ།

གྲོགས་ལྷ་ཆབ་ལགས། ངས་ཤེས་ཡོད། ཁྱེད་རང་ལྟར་ཐད་ཀར་བཤད་རྒྱུ་དེ་ང་ཡོད་ས་འདི་དང་དུས་བབ་ཀྱི་བར་ཐག་གིས་ཡོང་བ་མི་འདུག ཁྱེད་རང་གིས་ཐད་ཀར་ཞུས་པར་ཡང་ཉན་མཁན་བྱུང་མི་འདུག ང་ལ་ནི་ཐད་ཀར་ཞུ་འདོད་མི་འདུག་ལ། ཞུས་ནས་ཉན་རེའང་མེད། དྲ་སྟེང་རང་ནས་ཨུ་ཚུགས་ཆེ་ཙམ་དང༌། རེ་བ་ཆུང་ཙམ་རྒྱག་རྒྱུ་ཡིན།

ཚང་མ་སྐད་ཤོར་བསྡད་ས་དེ་དུས་བབ་རེད། དུས་བབ་ཀྱི་ཡིག་ནོར་འདི་ནད་ཅིག་ཡིན་ན་བཅོས་སུ་མེད་པའི་སྐྲན་ནད་དུ་འདུག་ཟེར། གྲོགས་ལྷ་ཆབ་ཀྱིས་འདི་ཅི་མ་བདེན། འདི་ཚོར་གཞེན་སྐུལ་ཙམ་ཡང་མི་འགྲོ་བ་འདི་ཅིས་ལན་ནམ། དྲང་མོར་བཤད་ན་མྱི་མི་དགའ།། ཞེས་ཨ་མདོའི་གཏམ་དཔེ་ཞིག་དྲངས་ནས་ཞུས་པ་དེ་ག་རང་བྱུང་སོང་འདུག་པས་ཅི་བྱར་ཡོད། ད་ནི་ཉི་མ་དེ་རིང་ནས་བཟུང་སྟེ། ཁ་ཆེ་ཕ་ལུས་སྙིང་གཏམ་བཤད་ཡོད་དོ།། ཉན་དང་མི་ཉན་རང་རང་ལག་པར་ཡོད།། ཅེས་དང༌། མཁས་གྲུབ་དགེ་ལེགས་དཔལ་བས། སྙན་ངག་སྨྲ་བ་ཀུན་གྱི་མགོ་བོ་ལ།། ཚིག་གི་གོམ་པ་སྤོ་མཁས་དགེ་ལེགས་དཔལ།། ཞེས་གསུངས་པའི་རྗེས་སུ་ཞུགས་ཏེ། དུས་བབ་ཀྱི་གསར་འགོད་པ་དག་གིས་གང་དུ་ཡིག་ནོར་བརྡ་ནོར་སྤེལ་བ་ལ་མཛུབ་འཛུགས་དང་བཅས་ཏེ། ཚིག་འགྲོས་ཚུན་ལ་རྒྱུ་མ་ཕུ་འདེད་ཀྱི་ཤགས་འགྱེད་བྱ་རྒྱུ་ཡིན། དེས་ན།

ལུས་ཀྱི་རྩ་ལ་བ་ཟུར་མེད།།
རྩྭལྡུམ་རྩྭ་ལ་བ་ཟུར་ཡོད།།
ཁ་ནས་བརྗོད་ཅེས་བྱ་ཚིག་སྟེ།།
སྔོན་འཇུག་འ་ཡིས་ཁྱད་འབྱེད་ཅིང༌།།
རྗོད་པ་ཞེས་པ་མིང་ཡིན་ཏེ།།
དཔེར་ན་བརྗོད་བྱ་རྗོད་བྱེད་བཞིན།།
འདི་ཙམ་མ་ཤེས་བོད་ཡིག་གི།
འབྲི་རྩལ་མངོན་དུ་གྱུར་པ་མེད།།
འདི་ཡང་དུས་བབ་གསར་འགོད་པ།།
དོན་བཀྲ་སོགས་ལ་ཕན་པའི་སེམས།།
སྔོན་དུ་བཏང་སྟེ་བྲི་བར་ཐལ།།

ཕ་བཟང་བུ། ལ་མོར་ཕེབས་ཤོག ད་ནི། ལན་ལ་སྒུག་ནས་ཡོད་དོ་ལོ།།

གོང་གི་དཔྱད་གཏམ་དེ་ཡང་དོན་འགྲུབ་བཀྲ་ཤིས་ཀྱིས་བྲིས་པ་ལྟར། གཟབ་གཟབ་ཅིག་གནངས་རོགས། ཟེར་བའི་མིང་གི་དག་ཆ་དང༌། དག་ཆའི་ཁྱད་ཙམ་ཡང་མ་ཤེས་ནས་གནས་ཚུལ་སྤེལ་འདུག་ ཟེར་བའི་ཚིག་གི་བརྗོད་པ་རེ་ཟུང་གོ་ཁག་ཙམ་འདུག སྤྱིར་ལས་ཀར་བྲེལ་ང་ཧ་ཅང་ཆེ་མོད། མཚམས་འདི་ནས་ངལ་གསོའི་ཚུལ་དུ། སྐུ་ཞབས་བསྟན་འཛིན་ལགས་ལ་རྩེད་མཚར་ཞིག་བྱ་འདོད་བྱུང༌།

ངའི་ཕ་ཡུལ་འབྲོག་ཐང་ན་འདི་ལྟ་བུའི་ངག་རྒྱུན་གྱི་ཁ་མཚར་ཞིག་ཡོད། ཉིན་ཞིག་རྒྱ་ཁ་ཆེ་ཚོང་བ་ཞིག་འབྲོག་པའི་རྩ་ཐང་ལ་ཡོང་བ་རེད། ཁོས་བོད་པའི་ཁྱིམ་ཚང་ཞིག་ནས་གུང་ཟས་ཟ་སྐབས། ཁྱིམ་ཚང་དེའི་ཡར་རྒྱུད་ཀྱི་ཚ་ཐབ་སྟེང་དུ། སྐྱ་མིན་སེར་མིན་གྱི་གྲོང་ཆོག་པ་བཞི་ཡིས་སྐད་གཟེངས་མཐོན་པོས་ག་གེ་མོ་ཞིག་འདོན་བཞིན་ཡོད། སྐབས་དེར་ཁ་ཆེ་ཚོང་བ་དེས་ཁྱིམ་བདག་ལ། གྲོང་ཆོག་པ་དེ་ཚོས་ཅི་ཞིག་འདོན་བཞིན་ཡོད། ཅེས་དྲིས་བར་ཁྱིམ་བདག་གིས། སྒྲོལ་མའི་མཎ་ཌལ་བཞི་བ་གསུང་གིན་ཡོད་པ་རེད། ཅེས་ལན་ལན་བཏབ་པར་ཡང་ཚོང་བ་དེས། སྒྲོལ་མའི་མཎ་ཌལ་བཞི་བ་བཏོན་ན་ཅི་ཞིག་ལ་ཕན་པ་རེད། ཅེས་དྲིས། སྒྲོལ་མའི་མཎ་ཌལ་བཞི་བ་བཏོན་ན་ཁྱིམ་ཚང་ཕྱུག་པོར་འགྱུར་བ་རེད། ཅེས་ཁྱིམ་བདག་གིས་ལན་བརྒྱབས། ཚོང་བ་དེས་ཡང་བསྐྱར། འོན་ན། གྲོང་ཆོག་པ་ཁོ་རང་ཚོ་ཕྱུག་པོ་ཡིན་ནམ། ཞེས་དྲིས་པར་ཁྱིམ་བདག་གིས། ཁོང་ཚོ་ཕྱུག་ཡོད་པ་མ་རེད། གྲོང་ཆོག་གི་ཡོན་ཙམ་ལ་བརྟེན་ཡོད་པ་རེད། ཅེས་བརྗོད་པར། ཁ་ཆེ་ཚོང་བ་དེ་གད་མོ་དགོད་བཞིན། ཐོག་མར་སོ་སོ་ཕྱུག་པོ་བཟོས་རྗེས། གཞན་ལ་སྒྲོལ་མའི་མཎ་ཌལ་བཞི་བ་འདོན་དགོས་པ་རེད། ཟེར་བཞིན་བུད་སོང༌།

དེ་རིང༌། དུས་ཚོད་ཀྱི་ཁོམ་པ་ཞིག་བྱུང༌། བོད་ཀྱི་དུས་བབ་ཀྱི་དྲ་རྒྱ་ལ་བལྟས། བལྟས་ཀྱིན་བལྟས་ཀྱིན་སེམས་སྐྱོ་བ་ལ་ཚད་མེད་པ་བྱུང༌། ཀློག་གིན་ཀློག་གིན་ཀློག་མི་འདོད་པར་གྱུར། རྒྱབ་ཤ་དཀར་པོའི་དེབ་ཟེར་བའི་གསར་འགྱུར་དང༌། དུས་བབ་ཀྱི་ལས་བྱེད་དོན་འགྲུབ་བཀྲ་ཤིས་ཀྱི་བོད་ཁུག་ཞི་བདེ་གླིང་གཉིས་བཀླགས་པས་ཀློག་མི་འདོད་པར་གྱུར། བཅངས་དང་བཅིངས། རྟེན་དང་བརྟེན་གྱི་དག་ཆའི་ཁྱད་ཙམ་ཡང་མ་ཤེས་ནས་གནས་ཚུལ་སྤེལ་འདུག ཡིད་སྐྱོ་བ་ལ་ཚད་མེད་པ་ཞིག་བྱུང༌། དཔེར་ན། དོན་འགྲུབ་བཀྲ་ཤིས་ཀྱིས་དགོང་ཁ་ལ་དགུང་ཁ་ཞེས་བྲིས་འདུག་པ་འདི་འདྲ་དག་ཨ་མདོའི་འབྲི་སྟངས་ཡིན་ན་མི་ཤེས། དུས་བབ་རྩོམ་སྒྲིག་པ་ལུང་རིགས་ལགས་སྐད་ཤོར་ནས་བསྡད་ཡོད་སྐད་པ་ཡང་ཡང་གོ་རྒྱུ་འདུག་པའང་འདི་ཚོས་བྱས་པར་འདུག དུས་བབ་ཀྱི་དྲ་རྒྱ་དང་ཚགས་ཤོག་སྟེང་གི་ཡིག་ནོར་དག་འདི་ཚོས་སྤེལ་གྱི་ཡོད་འདྲ། དྲིན་ཆེན་ཚོ། གཟབ་གཟབ་ཅིག་གནངས་རོགས། ང་ནི་དུས་བབ་ཀློག་མཁན་ཕལ་བ་ཞིག་ཡིན། སེམས་ཀྱིས་མ་བཟོད་ནས་ཞུ་བར་ཐལ་སོང༌།

འཁྱོག་བརྗོད་ལམ་ལུགས་ཀྱི་སྲིད་གཞུང་གིས་འཁྱོག་བརྗོད་ཅིག་ལས་འགྲེམ་སྤེལ་བྱེད་མི་སྲིད་ན། བོད་གཞུང་གིས་དེ་ལ་དྲང་བདེན་ལམ་ལུགས་ཀྱིས་དེབ་སྤུས་ལེགས་ཤིག་འདོན་སྤེལ་བྱེད་ཐུབ་རྒྱུ་ནི་དངོས་ནས་གལ་ཆེན་པོ་རེད། ལོ་ཟླ་ག་ཚོད་ཅིག་འདས་ཀྱང་བདེན་པའི་དཔང་བོར་འཇོག་ཆོག་པའི་གནས་ཚུལ་ཁུངས་ལྡན་གྱི་ལོ་རྒྱུས་རང་བཞིན་ལྡན་པ་ཞིག་འདོན་ཐུབ་ན་བཟང་གི དེ་མིན་དུས་ཚོད་ཀྱི་བབ་དང་བསྟུན་ནས་རྒྱ་ནག་སྲིད་གཞུང་གི་དེབ་དཀར་པོ་ལ་ལན་འདེབས་ཙམ་ཞིག་ལས་མ་བྱུང་བ་ཡིན་ན་ནི་དངོས་ནས་འཕོང་པོ་རེད།