སྤྲུལ་སྐུ་ངོས་འཛིན་གྱི་ལམ་སྲོལ་དེ་ཡང་དག་རེད་དམ།

ང་ལྟ་བུར་ཆ་བཞག་ན་སྟབས་ཡག་ཉེས་ཇི་ལྟར་ཡང་སྤྲུལ་སྐུའི་མིང་ཞིག་འཁྱེར་ཡོད། འོན་ཀྱང་སྤྲུལ་སྐུ་ངོས་འཛིན་གྱི་ལམ་སྲོལ་དེ་ཡང་དག་པ་དང་ཡག་པོ་ཞིག་ཡིན་པའི་བསམ་ཚུལ་མེད། གང་ཡིན་ཟེར་ན། ང་རང་གང་གི་ཡང་སྲིད་དུ་ངོས་འཛིན་བྱས་པ་དེའི་རྒྱུད་གཅིག་པའི་ཡང་སྲིད་ཅིག་མིན་པ་ངས་ཤེས་ཀྱི་ཡོད། དེར་བརྟེན་ང་ལྟ་བུ་རྒྱུད་མི་གཅིག་པའི་ཡང་སྲིད་མང་པོ་ཞིག་ཡོད་སྲིད་སྟབས། ངས་ནམ་རྒྱུན་ཡང་སྲིད་ངོས་འཛིན་གནང་སྲོལ་དེ་རྩ་བ་ཆེན་པོ་དང་། རྒྱུན་འཛིན་བྱེད་དགོས་པ་ཞིག་ཡིན་པར་མཐོང་གི་མེད།

བཀའ་བློན་ཁྲི་བ་ཟམ་གདོང་རིན་པོ་ཆེ་མཆོག་གིས་ཐེངས་བཅུ་བའི་ཆོས་ཚོགས་སྟེང༌། བཀའ་ཤག་གི་དགོངས་གཞི་དོན་ཚན་གསུམ་སྙན་སྒྲོན་ཞུས་དོན། ཆོས་ཚོགས་ཐེངས་ ༡༠ འདི་བོད་མི་རྣམས་སྐྱབས་བཅོལ་དུ་འབྱོར་ཏེ་མི་ལོ་ ༥༠ འཁོར་བ་དང༌། བོད་ས་ཡོངས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཁྱབ་ཁོངས་སུ་ཚུད་དེ་མི་ལོ་ ༥༨ འཁོར་བའི་རྗེས་དྲན་དང་བསྟུན་ཏེ་ཚོགས་པ་རེད། བོད་རྒྱལ་ཁབ་དང་མི་རིགས་ཆགས་ནས་ད་ལྟའི་བར་ཆོས་སྲིད་ཟུང་འབྲེལ་གྱི་ལམ་ནས་འཇིག་རྟེན་སྤྱི་ཡོངས་ལ་ཕན་བདེ་སྒྲུབ་མཁན་ཞིག་བྱས་བསྡད་པ་རེད། བོད་དུ་ནང་ཆོས་མ་དར་བའི་སྔོན་ནས། གཡུང་དྲུང་བོན་སོགས་ནང་བསྟན་རིག་པའི་གཞུང་ལུགས་རྒྱ་ཆེན་དར་ཡོད། ནང་ཆོས་དར་རྗེས་ད་ལྟའི་བར་ཆོས་བོན་གཉིས་ཀྱིས་མཚོན་པའི་ནང་དོན་རིག་པའི་གཞུང་ལུགས་ཀྱི་འཛིན་སྐྱོང་དེ། འཛམ་གླིང་རྒྱལ་ཁབ་གཞན་ན་མེད་པའི་ཚུལ་མཐུན་ཞིག་གནང་ཡོད། བོད་པའི་ངོ་བོ་དང་དེ་ལ་ངོས་འཛིན་བྱ་དགོས་བྱུང་ན། བོད་དུ་དར་བའི་ཆོས་བོན་ནང་དོན་རིག་པའི་རིག་གནས་མ་གཏོགས་གཞན་ལས་བོད་པ་ངོས་འཛིན་བྱ་ཐབས་ཁག་པོ་རེད།

བོད་ནང་ཡོད་སྐབས་ཆོས་སྲིད་ཟུང་འབྲེལ་ལ་གོ་བ་གཏིང་ཟབ་ཅིག་ལོན་མེད། ད་ལྟ་ང་ཚོས་ཆོས་སྲིད་ཟུང་འབྲེལ་དེར་གོ་བ་གསར་བ་གང་ཞིག་རྙེད་ཡོད་ཟེར་ན། འདས་བའི་བྱུང་རབས་ནང་བོད་མི་རིགས་ཀྱི་ཆབ་སྲིད་དེ་ཆོས་ལུགས་ཀྱི་རྒྱབ་སྐྱོར་ལ་བརྟེན་ནས་འཚོ་ཡོད་པ་གསལ་བོ་ཆགས་ཡོད། བོད་མི་རིགས་ཀྱི་འཇིག་རྟེན་སྤྱི་ཡོངས་ལ་འཁྲི་བའི་ལས་འགན་རླབས་པོ་ཆེ་ཞིག་ང་ཚོའི་ད་ཕན་བསྒྲུབས་ཡོད། རང་སྲིད་རང་སྐྱོང་གི་གནས་བབ་ཚད་ལྡན་ཞིག་ལ་འབད་བརྩོན་བྱེད་དོན་ཡང༌། འཇིག་རྟེན་སྤྱི་ཡོངས་ལ་ཕན་བདེ་སྒྲུབ་བྱེད་དེ་མི་ཉམས་རྒྱུན་འཛིན་བྱེད་པའི་ཆེད་དུ་དམིགས་པ་རེད་མ་གཏོགས། ཆབ་སྲིད་ཀྱི་རང་སྐྱོང་དེ་ང་ཚོའི་དམིགས་ཡུལ་མཐར་ཐུག་མིན། ང་ཚོའི་ཕུགས་ཀྱི་དམིགས་ཡུལ་བོད་མི་རིགས་ལ་འཁྲི་བའི་འཇིག་རྟེན་སྤྱི་ཡོངས་ཀྱི་ལས་འགན་དང༌། མི་རབས་ནས་མི་རབས་ལ་སྲོག་ལས་གཅེས་བར་བཟུང་སྟེ། འཛིན་སྐྱོང་སྤེལ་གསུམ་བྱས་པའི་ཆོས་བོན་བསྟན་པའི་སྲོལ་ཡང་དག་པ་ཅིག་འཛིན་སྐྱོང་བྱ་རྒྱུ་དེ་ཡིན། ཐེངས་འདིར་བཀའ་ཤག་གི་རེ་འདུན་ཁ་ཤས་ཞུ་རྒྱུ་ཡོད།

དང་པོ། ཆོས་ཀྱི་སྡེ་ཚན་ཁག་དངོས་ཤུགས་བརྒྱུད་གསུམ་ནས་ཆབ་སྲིད་སྒྲིག་འཛུགས་ཤིག་ལ་བརྟེན་དགོས་པ་ཆགས་ཡོད་སྟབས། ཆོས་ཀྱི་སྡེ་དང་སྲིད་ཀྱི་སྒྲིག་འཛུགས་བར་གྱི་འབྲེལ་བ་ཡང་དག་པར་གནས་རྒྱུ་གལ་ཆེ། འབྲེལ་བ་ཡང་དག་པར་གནས་མིན་དེ་ཆོས་སྡེ་ཁག་གི་དབུ་ཁྲིད་ཚོས་གཞུང་ལ་འབྲེལ་བ་གནང་ཕྱོགས་དང༌། གཞུང་གི་ལས་ཀྱི་སྣེ་མོ་བ་ཚོས་བསྟན་པ་དང་བསྟན་འཛིན་གྱི་སྡེ་ལ་འབྲེལ་བ་ཞུ་སྟངས་ལ་ཐུག་ཡོད། བློན་ཆེན་ལས་ཁུངས་བདུན་གྱི་གྲས་སུ་གཏོགས་པའི་ཆོས་རིག་ལས་ཁུངས་དེ། ད་ལྟའི་གནས་སྐབས་སུ་གཞུང་གི་བཀའ་བློན་ལས་ཁུངས་ཀྱི་ངོ་བོར་བསྡད་ཡོད་སྟབས། ཆོས་བརྒྱུད་ཁག་ལ་དུས་ནས་དུས་སུ་ལམ་སྟོན་དང༌། འཛིན་སྐྱོང་སྟངས་འཛིན་གནང་རྒྱུར་ཆ་རྐྱེན་ཚང་གིན་མེད། སྤྱི་འཐུས་ལྷན་ཚོགས་སུ་ཆོས་བརྒྱུད་ཁག་གི་སྐུ་ཚབ་ཡོད་ཀྱང༌། སྐུ་ཚབ་དེ་ཚོ་ཐད་ཀར་འཛིན་སྐྱོང་ལ་འབྲེལ་བ་ཆགས་མེད། དམངས་གཙོའི་དཀའ་བ་གསུམ་གྱི་དབང་ཚད་དང་ཁྱབ་ཁོངས་ལ་དབྱེ་བ་ཕྱེས་ཡོད། དེར་བརྟེན། ཆོས་རིག་ལྷན་ཁང་དེ་ཆོས་རིག་ལྷན་ཚོགས་སུ་བསྒྱུར་ཏེ། འཛིན་སྐྱོང་གི་སྒྲོམ་གཞིའི་ནང་ཆོས་བརྒྱུད་ཁག་གི་སྐུ་ཚབ་མཚོན་པའི་སྒྲིག་འཛུགས་ཀྱི་གནས་བབ་བྱུང་བ་ཡིན་ན། གཞུང་ལ་ཐུགས་ཕན་གསོས་པ་དང༌། ཆོས་ལུགས་ཆོས་བརྒྱུད་ཁག་ལའང་ནུས་པ་འཐོན་པ་ཞིག་ཡོང་གི་རེད་སྙམ་པའི་འཆར་སྣང་ཡོད།

གཉིས་པ་ནི། རྒྱ་གཞུང་གིས་བོད་བརྒྱུད་ནང་བསྟན་རིག་པའི་སྲོལ་རྒྱུན་དེ་ཆབ་སྲིད་ཀྱི་དབང་ཤུགས་ལ་འགལ་རྐྱེན་ཆེ་ཤོས་སུ་མཐོང་གིན་ཡོད། ཆོས་འཁོར་རྩ་རླུང་དང་བོད་བརྒྱུད་ནང་བསྟན་གཉིས་བསྡུར་ན། མི་འབོར་གྱི་ཆ་ནས་ཆོས་འཁོར་རྩ་རླུང་མང་ཡང༌། བོད་བརྒྱུད་ནང་བསྟན་གཏིང་ཟབ་པ་དང༌། རྒྱལ་སྤྱིའི་ནང་གི་ཆེ་མཐོང་སོགས་ཀྱི་དབང་གིས་ཉེན་ཁར་མཐོང་སྟེ། རྩ་མེད་གཏོང་རྒྱུར་ཐབས་ཤེས་འདྲ་མིན་བྱེད་ཀྱིན་ཡོད། རྒྱ་ནག་གིས་སྤྲུལ་སྐུ་ངོས་འཛིན་བྱེད་ཕྱོགས་སྐོར་གྱི་ཆབ་སྲིད་ཀྱི་ཡིག་ཆ་ཞིག་སྔར་ལོ་གཏན་འབེབས་བྱས་ཡོད། སྐབས་དེར་ངྷ་རམ་ས་ལར་ཆོས་ཚོགས་འཚོགས་ཏེ། རྒྱ་ནག་གི་ཡིག་ཆ་དེར་ངོས་ལེན་མེད་པ་དང༌། མ་འོངས་པར་ཆོས་བརྒྱུད་སོ་སོའི་དབུ་འཛིན་རྣམ་པའི་ཆོག་མཆན་མེད་ན། སྤྲུལ་སྐུ་ཚད་ལྡན་དུ་ངོས་ལེན་མེད་པ་གསལ་བསྒྲགས་བྱས་ཡོད། དེ་འཛམ་གླིང་ཡོངས་གྲགས་སུ་གསལ་བོ་བཟོ་ཐབས་ལ་དགོངས་པ་བཞེས་དགོས། རྒྱ་ནག་གི་བཀའ་རྒྱ་གཞིར་བཟུང་འགྲོ་མཁན་དེ་དག བོད་བརྒྱུད་ནང་བསྟན་སྤྱིའི་ཆ་ནས་ངོས་ལེན་མེད་པ་ཞིག་བཟོ་ཐུབ་ན། དེ་ཆགས་སྡང་འཐབ་རྩོད་ཀྱི་ངོ་བོ་ཞིག་ལ་ངོས་འཛིན་བྱེད་ཀྱིན་མེད། སྤྲུལ་སྐུ་ངོས་འཛིན་དེ་ཆབ་སྲིད་དབང་འཛིན་པ་ཚོའི་བློ་ལ་འབབ་མིན་ཚད་འཛིན་བྱས་ཏེ་ཆབ་སྲིད་ཀྱི་ལག་ཆར་གྱུར་ན། བསྟན་པ་དང་སྐྱེས་འགྲོར་གནོད་ཚབས་ཆེན་པོ་ཡོང་གི་རེད། པན་ཆེན་ཡང་སྲིད་གཉིས་བྱུང་བ་དེས་འབྱུང་འགྱུར་ཧ་ཅང་གསལ་བོ་བསྟན་ཚར་བ་རེད།

ང་ལྟ་བུར་ཆ་བཞག་ན་སྟབས་ཡག་ཉེས་ཇི་ལྟར་ཡང་སྤྲུལ་སྐུའི་མིང་ཞིག་འཁྱེར་ཡོད། འོན་ཀྱང་སྤྲུལ་སྐུ་ངོས་འཛིན་གྱི་ལམ་སྲོལ་དེ་ཡང་དག་པ་དང་ཡག་པོ་ཞིག་ཡིན་པའི་བསམ་ཚུལ་མེད། གང་ཡིན་ཟེར་ན། ང་རང་གང་གི་ཡང་སྲིད་དུ་ངོས་འཛིན་བྱས་པ་དེའི་རྒྱུད་གཅིག་པའི་ཡང་སྲིད་ཅིག་མིན་པ་ངས་ཤེས་ཀྱི་ཡོད། དེར་བརྟེན་ང་ལྟ་བུ་རྒྱུད་མི་གཅིག་པའི་ཡང་སྲིད་མང་པོ་ཞིག་ཡོད་སྲིད་སྟབས། ངས་ནམ་རྒྱུན་ཡང་སྲིད་ངོས་འཛིན་གནང་སྲོལ་དེ་རྩ་བ་ཆེན་པོ་དང་། རྒྱུན་འཛིན་བྱེད་དགོས་པ་ཞིག་ཡིན་པར་མཐོང་གི་མེད། འོན་ཀྱང༌། བོད་བརྒྱུད་ནང་བསྟན་ནང༌། དེ་རིང་གི་བླ་ཆེན་རྣམ་པ་ཚོས་མཚོན་པའི་བླ་སྤྲུལ་མང་པོ་ཡང་སྲིད་ངོས་འཛིན་ཐོག་ནས་འགྲོ་བསྡད་ཡོད། དེར་བརྟེན། ཡང་སྲིད་ངོན་འཛིན་གྱི་ལམ་སྲོལ་དེ་གཙང་མ་ཞིག་མ་ཡོང་བར་དུ་བདག་པོ་མི་རྒྱག་ཐབས་མེད་ཆགས་ཡོད། རྦད་དེ་ཉུང་དུ་གཏོང་ཐུབ་ན་ཡག་པོ་ཡིན་མོད། ལམ་སྲོལ་དེ་མེད་པ་བཟོ་ཐབས་མེད་པ་ཞིག་ཆགས་ཡོད། རང་དབང་ལུང་པར་ཡོད་པའི་ཆོས་བརྒྱུད་ཁག་གི་དབུ་ཁྲིད་རྣམ་པས་ལམ་སྟོན་གསལ་བོ་ཞིག་བྱུང་ན། ཕན་ཐོག་ཆེན་པོ་ཡོང་ས་རེད།

གསུམ་པ། ཕྱོགས་གཅིག་ནས་བོད་བརྒྱུད་ནང་བསྟན་དེ་ཁྱབ་ཆེན་པོ་ཆགས་ཡོད་ཀྱང༌། ཕྱོགས་གཞན་ཞིག་ནས་ཚད་ལྡན་མ་ཡིན་པའི་བླ་མ་སློབ་དཔོན་མང་པོ་འབྱུང་གིན་ཡོད། བསྟན་པ་ལ་ཞབས་འདྲེན་ཞུ་མཁན་གང་འཚམ་ཞིག་ཡོང་གིན་ཡོད། ལྷག་པར་དུ་ཁ་སང་དེ་རིང་བསྟན་པ་དང་དཔལ་འབྱོར་ཉོ་ཚོང་གི་གོ་སྐབས་ཤིག་སླེབས་ཏེ། གོ་ལ་གཅིག་གྱུར་གྱི་དུས་རབས་འདིར་ནང་ཆོས་ཀྱི་ཚོང་བ་དང་ནང་ཆོས་ཀྱི་ཚོང་ཁང་མང་པོ་ཆགས་ཀྱིན་ཡོད། བསྟན་པ་རྨ་མེད་པ་ཞིག་འཛིན་སྐྱོང་བྱེད་པའི་ཕྱིར་དུ་དེ་ཚོའི་ཐོག་ལ་ཞི་དག་གནང་རྒྱུ་དང༌། བསྟན་པ་བཤད་སྒྲུབ་གཉིས་ཀྱིས་འཛིན་པར། སྒྲུབ་པ་དེ་གང་ཟག་རང་རང་ལ་རག་ལས་པ་ཞིག་དང༌། འཆད་ཉན་དེ་དགོན་པ་དང་ཆོས་ཀྱི་སྡེ་ལ་རག་ལས་བ་ཞིག་ཡིན་སྟབས། དེ་དག་ཉམས་ཆག་ཏུ་མི་འགྲོ་བའི་ཆེད་དུ་ཆོས་བརྒྱུད་ཁག་གིས་སྒྲུག་འཛུགས་དང་ལྡན་པའི་ཐོག་ནས་དགོངས་པ་བཞེས་དགོས། ཞེས་གསུངས་བྱུང༌།

གསར་འགོད་པ་དོན་འགྲུབ་བཀྲ་ཤིས།