རྔ་བའི་དགོན་པ་ཁག་ཏུ་དམག་དཔུང་འབོར་ཆེན་བཀྲམ་སྟེ། སྔར་ལས་ཀྱང་དམ་དྲག་བྱེད་ཤུགས་ཆེ་རུ་བཏང་བའི་དབང་གིས་གནས་ཚུལ་ཤེས་རྟོགས་ཐུབ་ཀྱི་མི་འདུག་ཟེར།
ཚེས་ ༡༣ ཉིན་བཞུགས་སྒར་ཀིརྟི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་གིས་འདི་ག་གསར་ཁང་ལ་གནས་ཚུལ་མཁོ་སྤྲད་གནང་བ་ལྟར་ན། ཟླ་འདིའི་ཚེས་ ༡༠ མཚན་མོར་མཛོད་དགེ་འབྲིང་བ་སུམ་མདོ་དགོན་པའི་ནང་བོད་རང་བཙན་ཡིན། ྋགོང་ས་མཆོག་བོད་ལ་གདན་འདྲེན་བྱ་དགོས་སོགས་ཀྱི་ནང་དོན་འཁོད་པའི་ཡི་གེ་མང་པོ་ཞིག་སྦྱར་འགྲེམ་བྱས་པར་བརྟེན། རྒྱ་གཞུང་གི་འབྲེལ་ཡོད་མི་སྣས་དགོན་པའི་གྲྭ་པ་རྣམས་ལ་འདྲི་རྩད་བྱས་ཏེ། ཡི་གེ་སྦྱོར་མཁན་སུ་ཡིན་ཐད་རྩད་གཅོད་བྱེད་མུས་ཡིན་པ་དང༌། སྟག་ཚང་ལྷ་མོ་ཀིརྟི་དགོན་པ་སོགས་མཛོད་དགེ་ཕྱོགས་ཀྱི་དགོན་པ་ཁག་ཏུ་དམག་དཔུང་མང་བོ་བཀྲམ་ནས་དམ་དྲག་བྱེད་ཤུགས་ཆ་རུ་བཏང་སྟེ། དགེ་འདུན་པ་དགོན་པའི་ཕྱི་ལ་འགྲོ་བསྐྱོད་བྱེད་མི་ཆོག་པ་དང༌། མི་མང་དགོན་པའི་ནང་ཡོང་འཇུག་གི་མི་འདུག
ཕྱི་ཚེས་ ༥ ཡས་མས་ཤིག་ལ་རྔ་པ་ཀིརྟི་དགོན་པའི་གྲྭ་རྒྱ་མཚོ་སྒུར་ལི་འབོད་པ་དང་འཇམ་དབྱངས། འོད་ཟེར་གསུམ་འཛིན་བཟུང་བྱས་ཡོད་པ་དང༌། ཕྱི་ཟླ་ ༣ ཚེས་ ༣ ནས་ཚེས་ ༩ བར་གྲྭ་པ་ ༩ ཙམ་བཟུང་འདུག་ཀྱང་དགོན་པའི་ཕྱི་ནང་གི་འགྲུལ་བཞུད་ཡོངས་སུ་བཀག་སྡོམ་བྱས་ཡོད་སྟབས། གནས་ཚུལ་གསལ་བོར་ཤེས་རྟོགས་བྱུང་ཐུབ་མེད་པ་མ་ཟད། རྔ་པ་སྒོ་མང་དགོན་པའི་དགེ་འདུན་པ་རྣམས་ཀྱིས་ཀྱང་ཞི་བའི་ངོ་རྒོལ་བྱས་པར་བརྟེན། དགེ་འདུན་པ་གསུམ་འཛིན་བཟུང་དང་། རྔ་པ་བསྭེ་དགོན་པའི་དགེ་འདུན་པ་རེ་ཟུང་ཡང་བཟུང་ཡོད་ཚུལ་འདུག་ནའང༌། བཀག་སྡོམ་གྱི་དབང་གིས་མིང་སོགས་གསལ་པོ་ཤེས་རྟོགས་བྱུང༌ཐུབ་ཀྱི་མི་འདུག་ཅེས་འགྲེལ་བརྗོད་གནང་ཡོད།
དེ་ལ་ཁྱོད་ཀྱིས་ཇུས་གཏོགས་བྱེད་མི་དགོས། གནས་ཚུལ་བདེན་པ་བདེན་རྐྱང་རེད། ཡོངས་ཁུངས་གཙང་མ་གཙང་རྐྱང་རེད།
གནས་ཚུལ་འདི་དག་གི་ཡོངས་ཁུངས་གསལ་བོ་ཇི་ལྟར་ལེན་གྱི་ཡོད་པ་རེད་དམ། ཁ་པར་དང་གློག་འཕྲིན། ཡང་ན། མི་ཁ་བརྒྱུད་དམ།