ཉིན་ཤས་སྔོན་བོད་མདོ་སྨད་མང་ར་རྫོང་སུམ་མདོ་ཞིང་སྲིད་གཞུང་གི་བོད་རིགས་ལས་བྱེད་རང་ལོ་ ༢༧ ཡིན་པའི་གཡོན་གཞིས་སྡེ་བའི་བཀྲ་ཤིས་དོན་འགྲུབའམ། མིང་གཞན་ལ་དོ་ལ་ཞུ་བར་ཆབ་སྲིད་ཀྱི་དོགས་གཞིའི་འོག མང་ར་རྫོང་ཉེན་རྟོག་པས་རང་ཁྱིམ་ནས་འཛིན་བཟུང་བྱས་ཡོད་པ་དང༌། སྐབས་དེར་ཁོང་གི་གློག་ཀླད་དང་ལག་ཁྱེར་ཁ་པར་སོགས་ཀྱང་བཙན་འཕྲོག་བྱས་ཡོད་འདུག ད་ལྟ་ཁོང་མང་ར་རྫོང་སྤྱི་བདེ་ལས་ཁུངས་སུ་བཀག་ཉར་བྱས་ཡོད་འདུག
གཞན། ཉེ་ཆར་མང་ར་ཀླུ་ཚང་དགོན་པའི་དགེ་འདུན་པ་ཚོས་ཞི་རྒོལ་བྱས་པ་དང༌། གྲྭ་བ་བརྒྱ་ལྷག་འཛིན་བཟུང་བྱས་པ་སོགས་དོན་རྐྱེན་བསྟུད་མུར་བྱུང་ཡོད་པའི་དབང་གིས་ཉིན་འདི་འགར་མང་ར་རྫོང་ཐོག་ཏུ་དམག་མི་ཕོན་ཆེན་འགྲེམས་འཇོག་བྱས་ཡོད་པ་མ་ཟད། གློག་ཀླད་དྲ་ཁང་དང་ལག་ཁྱེར་ཁ་པར་སོགས་ལ་གསང་ཉན་བྱེད་པ་དང༌། དགེ་འདུན་པ་དང་བོད་རིགས་ལས་བྱེད་ཚོར་གསང་སྟབས་ཀྱིས་འདྲི་བརྩད་དང་འཛིན་བཟུང་བཙན་ཁྲིད་བྱེད་པ། དེ་བཞིན་རླངས་འཁོར་རིགས་གང་བྱུང་དུ་རྫོང་ཐོག་ལ་འགྲོ་སྐྱོད་བྱེད་དུ་མི་འཇུག་པར་འགྲིམ་མགྲུལ་བཀག་སྡོམ་བྱེད་པ་སོགས་གནས་སྟངས་ཧ་ཅང་ཐབས་རྡུགས་ཆགས་ཡོད་འདུག
