ཕྱི་ཚེས་ ༡༥ ཉིན་གྱི་ཞོགས་པར་སྦེལ་ཀོབ་བདེ་སྐྱིད་སླར་གསོའི་ཚོགས་ཁང་དུ་འོད་དཀར་ www.wokar.net དྲ་ཚིགས་ཀྱི་གོ་སྒྲིག་འོག ༼ བོད་ནང་གི་ཤེས་ཡོན་པའི་བསམ་བློ་དང་ང་ཚོའི་རྒྱབ་རྟེན། ༽ཞེས་པ་དང་ ༼ གསར་འགོད་པའི་རྒྱབ་རྟེན་འོག་བོད་དོན་འཐབ་རྩོད་བྱེད་ཕྱོགས། ༽ ཞེས་པའི་བརྗོད་གཞི་གཉིས་ཀྱི་ཐོག་བགྲོ་གླེང་ཚོགས་འདུ་ཞིག་འཚོགས་པ་དང་། བགྲོ་གླེང་ཚོགས་འདུའི་སྟེང་ལྷོ་ཕྱོགས་ནང་བསྟན་ཤེས་ཡོན་ལྷན་ཚོགས་ཀྱི་སློབ་སྟོན་པ་ཟུར་བ་དང་བོད་རང་བཙན་འཐབ་རྩོད་པ་ཤིང་བཟའ་རིན་པོ་ཆེ་མཆོག་དང་། རྒྱལ་སྤྱིའི་བོད་རང་དབང་སློབ་ཕྲུག་ཚོགས་པའི་ཚོགས་གཞོན་བསྟན་འཛིན་རྡོ་རྗེ་གཉིས་ཕེབས་ཏེ། ཤིང་བཟའ་རིན་པོ་ཆེ་མཆོག་གིས་བོད་ནང་གི་ཤེས་ཡོན་པའི་བསམ་བློ་དང་ང་ཚོའི་རྒྱབ་རྟེན་ཞེས་པའི་བརྗོད་གཞིའི་ཐོག་གསུང་བཤད་གནང་བ་དང་། བསྟན་འཛིན་རྡོ་རྗེས་གསར་འགོད་པའི་རྒྱབ་རྟེན་འོག་བོད་དོན་འཐབ་རྩོད་བྱེད་ཕྱོགས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
བགྲོ་གླེང་ཚོགས་འདུ་དེའི་སྟེང་གཞིས་ཆགས་གསར་རྙིང་གཉིས་ཀྱི་གཞིས་མགོ་གཉིས་དང་གཞོན་ནུ། བུད་མེད། གཞིས་གྲོང་དང་དགོན་སྡེ་ཁག་གི་འགན་འཛིན། སེར་སྐྱ་མི་མང་བཅས་མི་ ༥༠༠ ལྷག་འདུ་འཛོམས་བྱུང་ཡོད།
ཉིན་དེར་ཤིང་བཟའ་རིན་པོ་ཆེ་མཆོག་གིས་གསུངས་དོན། སྔོན་མར་བོད་ནང་གི་ཤེས་ཡོན་པ་ཚོས་ནང་བསྟན་ཆོས་ལུགས་ཀྱིས་བོད་མེད་པར་བཟོས་སོང་ཟེར་བ་ལས་བོད་དོན་ཐོག་སྐད་ཆ་བཤད་མཁན་ཉུང་ཉུང་ཡིན་ནའང་། ཕྱི་ལོ་ ༢༠༠༨ ལོར་བོད་ནང་ཞི་བའི་ངོ་རྒོལ་བྱུང་བ་ནས་བཟུང་། བོད་ནང་གི་ཤེས་ཡོན་པ་ཚོས་སོ་སོའི་མི་རིགས་ཀྱི་ཆེད་དུ་སྲོག་འབུལ་བ་དང་། མི་རིགས་ཀྱི་ཆེད་དུ་སྐད་ཆ་བཤད་ཀྱི་ཡོད་པ་རེད། ང་རང་གི་ངོས་ནས་ཤེས་ཡོན་པ་གལ་ཆེན་པོར་བརྩི་གི་ཡོད་ལ། ཤེས་ཡོན་པས་འཛམ་གླིང་མི་མང་གི་མིག་མདུན་དུ་བོད་རིགས་མི་མང་གི་དཀའ་ངལ་གསལ་བོར་སྟོན་ཐུབ་ཀི་རེད། ཅེས་དང་།
༸གོང་ས་མཆོག་གི་བཀའ་དྲིན་འོག་བཙན་བྱོལ་དུ་ཡོད་པའི་ང་ཚོ་ལྷོད་ལྷོད་བྱས་བསྡད་ཡོད་ནའང་། ང་ཚོ་ཡོང་ས་དེ་བོད་རེད། འདིར་འཚར་ལོངས་བྱུང་བའི་གཞོན་སྐྱེས་དེ་ཚོ་ཡིན་ནའང་། ཁོང་ཚོའི་ཕ་མ་ཚོ་བོད་ནས་འདིར་སླེབས་པ་དེ་འདྲ་རེད། ང་ཚོའི་ལུང་པ་དེ་གང་འདྲ་ཆགས་ཡོད་པ་རེད་ཟེར་ན་སོ་སོའི་སེམས་ནང་གི་དད་པ་བྱེད་སའི་སྐྱབས་མགོན་གཅིག་པུར་ཡང་མིག་གི་མཐོང་ས་ནས་སྐུ་པར་རྡོག་བརྫིས་དང་མེར་སྲེག་གཏོང་གི་ཡོད་པ་རེད། དེར་བརྟེན་བོད་ནང་གི་ཤེས་ཡོན་པ་ཚོས་རྒྱ་ནག་ཁ་བྲལ་གཏོང་མཁན་དེ་རྒྱ་ནག་རང་ཉིད་རེད་ལ། ང་ཚོ་ཡར་སློང་མཁན་ཡང་རྒྱ་ནག་རང་ཉིད་རེད་ཅེས་བརྗོད་ཀྱི་ཡོད་པ་རེད་ཅེས་གསུངས་ཡོད།
བསྟན་འཛིན་རྡོ་རྗེས་སྔོན་མ་ཕྱི་རྒྱལ་དུ་ཡོད་པའི་བོད་རིགས་དེ་ཚོས་ཕྱི་རྒྱལ་གྱི་སྐད་རྒྱག་ཤེས་པ་དེ་སྤོབས་པ་ལྟ་བུར་ངོས་འཛིན་གྱི་ཡོད་པ་རེད་ལ། མི་རིགས་གཞན་གྱི་སྐད་རྒྱག་པར་ཚེར་སྣང་ཡང་ཡོད་པ་མ་རེད། ཡིན་ནའང་། དེང་སྐབས་དེ་ལ་འགྱུར་ལྡོག་ཕྱིན་ཏེ་བོད་མི་རིགས་རང་ཉིད་ཀྱི་སྐད་ཡིག་མ་ཤེས་ན་ངོ་ཚ་བྱེད་ཀྱིན་ཡོད་པ་དང་། ཐབས་ཤེས་གང་ཡོད་བཏོན་ནས་བོད་ནང་དུ་སོང་སྟེ་བོད་སྐད་ཐོག་ཉམས་ཞིབ་བྱེད་པ་དང་། བཙན་བྱོལ་དུ་ཡོད་པའི་སློབ་གྲྭ་ཁག་ཏུ་སོང་ནས་རང་གི་སྐད་ཡིག་ལ་སྦྱང་བརྩོན་བྱེད་ཀྱིན་ཡོད་པ་རེད། ཅེས་དང་། དེ་བཞིན་སྔོན་མར་ཕྱི་རྒྱལ་གྱི་གསར་འགོད་པ་ཚང་མས་ཨེ་རག་དང་ཁ་ཆེ་རྒྱལ་ཁབ་ཁག་ལ་མ་གཏོགས་བོད་དོན་ཐོག་དེ་ཙམ་དོ་སྣང་བྱེད་ཀྱིན་མེད་ནའང་། འགྱུར་ལྡོག་ཤུགས་ཆེ་ཤོས་ ༢༠༠༨ ལོའི་ཞི་བའི་གྱེན་ལངས་བྱུང་བ་ནས་ཕྱིན་ཏེ། བོད་དོན་རྒྱལ་སྤྱིའི་སྟེང་ཁྱབ་བསྒྲགས་ཤུགས་ཆེར་སོང་ཡོད་ལ། ལོ་སྔོན་མ་ནས་བཟུང་གསར་འགོད་པ་ཚང་མ་བོད་ནང་འགྲོ་རྒྱུར་འཚང་ཁ་རྒྱག་གི་ཡོད་ནའང་། རྒྱ་ནག་གཞུང་གིས་ཕྱི་གླིང་བ་དང་གསར་འགོད་པ་བོད་ནས་མར་ཕུད་མ་ཐུབ་པར་དཀའ་ངལ་འཕྲད་ཀྱིན་ཡོད་འདུག
ད་ལོ་ལྟ་བུར་མཚོན་ན་བོད་མི་ཚོས་ལོ་གསར་མ་བཏང་བར་ཁུ་སིམ་མེར་བསྡད་ནའང་གནས་ཚུལ་དེ་འཛམ་གླིང་སྟེང་ཤེས་ཐུབ་ཡོད་པ་རེད་ཅེས་བརྗོད་ཡོད་ལ། ལས་འགུལ་གང་འདྲ་ཞིག་སྤེལ་ནའང་། གསར་འགོད་བརྒྱུད་ལམ་ཁག་ཏུ་གནས་ཚུལ་དེ་སླེབས་ཐུབ་པ་བྱ་རྒྱུ་དེ་གལ་ཆེ་ཤོས་ཡིན་སྐོར་གསུངས་ཡོད།
ཆད་འདུག
བགྲོ་གླེང་གནང་
སྐྱོང་བ་དག་ལ་
བགྲོ་གླེང་འདི་འདྲ་མུ་མཐུད་དུ་བོད་མི་གནས་ཡུལ་གྱི་གཞིས་ཆགས་གང་སར་ཕེབས་ནས་བགྲོ་གནང་བ་གཅིག་བུ་མ་ཡིན་པར་མི་མང་ཁྲོད་དུ་དྲི་བ་དྲི་ལན་ཡང་ཡོད་པ་ཞིག་བྱེད་ཐུབ་པ་ཡིན་ན་དངོས་ནས་ཡག་པོ་ཡོད་ས་རེད། དམིགས་གསལ་གྱིས་ལས་འགུལ་འདི་ཉིད་ནི་གཞོན་སྐྱེས་ཀྱི་ལས་འགུལ་དང་གཞོན་སྐྱེས་ཀྱི་བསམ་བློའི་ནུས་པ་གང་སྤེལ་དང་གཞོན་སྐྱེས་ཀྱི་དུས་རབས་ཤིག་ལ་འགྱུར་ཐུབ་པ་ཡིན་ན་ནི་དངོས་ནས་ཡག་པོ་འདུག བགྲོ་གླེང་འདི་ཉིད་ཀྱི་གཙོ་སྐྱོང་བ་དག་སེམས་གཏིང་ནས་དཀའ་དྲིན་ཆེ་ཞུ་བཞིན་ཡོད།