སྔར་ལོའི་ཞི་རྒོལ་ནང་ཞུགས་པའི་མདོ་སྨད་བླ་བྲང་དགོན་པའི་གྲྭ་བ་ཞིག་ཟླ་ངོ་ ༡༡ ཙམ་ལ་བྲོས་བྱོལ་བྱས་མཐར་ཉེ་ཆར་ཉེན་རྟོག་པས་འཛིན་བཟུང་བྱས་ཡོད་འདུག
འདི་གར་གནས་ཚུལ་འབྱོར་བ་ལྟར་ན། སྤྱི་ཟླ་ ༢ ཚེས་ ༢ ཉིན་གྱི་མཚན་མོ་བླ་བྲང་དགོན་པའི་གྲྭ་འཇམ་དབྱངས་རྒྱ་མཚོ་རྫོང་ཉེན་རྟོག་པས་འཛིན་བཟུང་བཙན་ཁྲིད་བྱས་ཡོད་འདུག་ལ། ད་ཆར་ཁོང་ས་གནས་གང་དུ་ཡོད་པ་དང་གནས་སྟངས་གང་འདྲ་ཆགས་ཡོད་སོགས་ཀྱི་གནས་སྟངས་གང་ཡང་ཤེས་རྟོག་བྱུང་མི་འདུག ཁོང་སྔར་ལོར་བླ་བྲང་གི་ཞི་རྒོལ་ཁྲོད་མཉམ་ཞུགས་བྱས་ཡོད་པ་དང༌། ཞི་རྒོལ་རྗེས་རྫོང་ཉེན་རྟོག་པས་ཉེས་ཅན་མི་སྣ་ཁྲོམ་བསྒྲགས་བྱས་པའི་ཁྲོད། ཁོང་གི་པར་ཡང་ཚུད་ཡོད་སྟབས། ཟླ་ངོ་ ༡༡ ལྷག་ལ་བྲོས་བྱོལ་དང་སྦས་སྐུང་གི་འཚོ་བ་རོལ་དགོས་བྱུང་ཡོད་ཀྱང༌། ཉེ་ཆར་ལོ་གསར་རྗེས་ཀྱི་བླ་བྲང་སྨོན་ལམ་ཆེན་མོའི་སྐབས། ཕྱིར་དགོན་པར་གསང་སྟབས་ཀྱིས་ལོག་ཡོད་ཀྱང༌། བསང་ཆུ་རྫོང་ཉེན་རྟོག་པས་ཤེས་རྟོགས་བྱུང་སྟེ་མཚན་མོ་གྲྭ་ཤག་ནས་འཛིན་བཟུང་བཙན་ཁྲིད་བྱས་ཡོད་འདུག གྲྭ་འཇམ་དབྱངས་རྒྱ་མཚོ་ལགས་ནི། ད་ལོ་རང་ལོ་ ༣༡ ཡིན་ཞིང༌། སྤྱི་ལོ་ ༢༠༠༡ ལོར་ཀན་སུའུ་ཞིང་ཆེན་ནང་བསྟན་སློབ་གླིང་ནས་མཐར་ཕྱིན་པ་ཞིག་ཡིན་འདུག
བོད་པའི་སྤྱི་ཚོགས་ནང་ལྷག་བསམ་འབུར་དུ་ཐོན་པའི་དགེ་འདུན་གྱི་སྡེ་ནི་བོད་ཆོས་སྲིད་གཉིས་ཀྱིས་སྲོག་ཤིང་ལྟ་བུ་ཆགས་ཡོད།