ཏཱ་ལའི་བླ་མར་གྲོས་མོལ་གྲ་སྒྲིག་ཨང་གསར་ཡོད།

ཉེ་ཆར་རྒྱ་ནག་གི་སྲིད་བློན་ཝིན་ཅ་པོའོ་ཡིས་གསར་འགོད་པ་ཚོར། ༧ཏཱ་ལའི་བླ་མས་དུས་ནམ་ཡང་རང་བཙན་དང་ཁ་བྲལ་བརྩོན་ལེན་བྱེད་ཀྱིན་ཡོད། ཁོས་བོད་རང་བཙན་གྱི་ལྟ་བ་དོར་བ་ཡིན་ན། རྒྱ་ནག་གཞུང་ཕྱོགས་ནས་གྲོས་མོལ་གྱི་སྒོ་མོ་ཕྱེས་ཡོད་ཚུལ་བརྗོད་པ་དེར། བོད་གཞུང་བཀའ་ཤག་གིས་བཀའ་བློན་ཁྲི་བའི་མཚན་ཐོག་ནས་ལན་འདེབས་གསལ་བཤད་གནང་ཡོད།

བཀའ་ཤག་གི་ལན་འདེབས་དེའི་ནང་བཀོད་དོན། ཕྱི་ལོ་ ༢༠༠༩ ཟླ་ ༣ ཚེས་ ༡༣ ཉིན་གསར་འགོད་གསལ་བསྒྲགས་ཤིག་གི་སྐབས། སྲིད་བློན་ཝུན་ཅ་པོའོ་ཡིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་རྣམ་པས་ྋགོང་ས་མཆོག་གི་སྐུ་ཚབ་དང་ལྷན་དུ་འབྲེལ་གཏུགས་གྲོས་མོལ་མུ་མཐུད་བྱ་འདོད་ཡོད་ཚུལ་གསུངས་པར་ང་ཚོས་དགའ་བསུ་ཡོད།

སྤྱི་ནོར་ྋགོང་ས་མཆོག་ནས་ག་དུས་ཡིན་ནའང་རྒྱ་ནག་གི་དབུ་ཁྲིད་ཚོ་དང་མཉམ་དུ་བོད་ཀྱི་དཀའ་རྙོག་སེལ་རྒྱུར་གཉིས་མོས་ཀྱི་ཐབས་ལམ་འཚོལ་བ་གནང་རྒྱུའི་གྲ་སྒྲིག་ཨང་གསར་ཡིན།

ྋགོང་ས་མཆོག་ནས་གང་ཞིག་རྩོལ་སྒྲུབ་གནང་གིན་ཡོད་པ་ནི། ༢༠༠༨ ཕྱི་ཟླ་ ༡༠ ཚེས་ ༣༡ ཉིན་འབྲེལ་མོལ་ཐེངས་བརྒྱད་པའི་སྐབས་༧གོང་ས་མཆོག་གི་སྐུ་ཚབ་རྣམ་པས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཐོག་ནས་རྒྱ་ནག་གཞུང་ལ་སྤྲད་པའི་ནང་ཁ་གསལ་ཡོད།   

བསམ་འཆར་ཡིག་ཆ་དེའི་ནང་བོད་མིའི་མངོན་འདོད་གང་ཡིན་པ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྙིང་དོན་གཞིར་བཟུང་ཁ་གསལ་བཏོན་ཡོད། སྲིད་བློན་ཝིན་ཅ་པོའོ་ཡིས་བསམ་འཆར་ཡིག་ཆ་དེ་དང་ལེན་བྱེད་རྒྱུར་གཡོལ་ཐབས་ལྟ་བུར་ྋགོང་ས་མཆོག་གི་སྐབས་སྔོན་མའི་གསུང་འཕྲིན་ཁག་ཅིག་ལུང་འདྲེན་བྱས་འདུག

སྐབས་མང་པོར་ྋགོང་ས་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ནས་ཁ་བྲལ་རྩོལ་སྒྲུབ་གནང་གིན་མེད་པ་བསྐྱར་ཟློས་ཡང་ཟློས་གནང་ཡོད།

རྒྱ་ནག་གི་སྲིད་བློན་གྱིས་ྋགོང་ས་མཆོག་ལ་ཁ་བྲལ་རྩོལ་སྒྲུབ་གནང་གིན་ཡོད་པའི་སྐྱོན་འཛུགས་བྱས་པ་དེ་ནི། དྲང་བདེན་གྱི་གནས་ཚུལ་ཞིག་རྩ་བ་ནས་མ་རེད། རྒྱལ་སྤྱིའི་མི་མང་གིས་དངོས་ཡོད་གནས་ཚུལ་དེ་གསལ་པོར་མཁྱེན་གྱིན་ཡོད་སྟབས། གསལ་ཁ་བསྐྱར་སྟོན་གྱི་དགོས་གལ་མ་མཐོང༌། པེ་ཅིང་གཞུང་ནས་ལྷག་བསམ་རྣམ་དག་གིས་བོད་ཀྱི་དཀའ་རྙོག་སེལ་རྒྱུར་རྣམ་འགྱུར་གསལ་སྟོན་བྱེད་པའི་རེ་བ་ཡོད། ཅེས་བཀོད་འདུག