ཀུ་རིང་བོ་ཞིག་རྒྱང་རིང་ནས་གྲགས་དེ་འོང་དུས
ཁ་བརྡ་ལས་ཅི་ཡང་མི་ཤེས་པར་བསྡོད་མཁན་དག་རྒས་ཁོག་ཡིན་མིན
ག་ནས་བཟུང་དེ དུས་རབས་གང་ཞིག་ནས
ང་ཚོས་ངོས་འཛིན་བྱེད་ཤེས་པ་རེད་དམ
ཅ་ཅོ་འདོན་པར་རྒྱུན་གོམ་དུ་གྱུར་བ་དེ་དག་ནི
ཆ་རྒྱུས་མེད་པའི་བུད་མེད་གཅིག་བུ་ལས་མེད་པར་གླེང་ན
ཇ་ཁང་དུ་གཏན་འཛོམ་བྱེད་བཞིན་པའི་ཕོ་གསར་ལས་མེད་དེ་དག་གིས
ཉ་ཉོག་རྫོགས་རྒྱུ་མེད་པ་ཞིག་རྒྱུན་དུ་བཤད་བཞིན་པ་དེ་དག་བུད་མེད་རེད་དམ
ཏ་ལེན་འཁུར་ནས་རི་ལུང་མང་བོ་ཞིག་འགྲིམ་མྱོང་བ་ལས
ཐ་ན་ཉེ་འདབས་ཀྱི་གྲོང་བརྡལ་ཞིག་ལ་ཡང་རྒྱུས་མངའ་མེད་མཁན་དེ་ཚོས
ད་དུང་ རང་རློམ་གྱི་མགོ་བོ་སྟག་བརྗེ་བྱེད་ཞོར་དུ
ན་ཆུང་བུ་མོ་དེང་རབས་ཀྱི་མཛེས་ཉམས་ལྡན་པ་དག་ལ་འཕྱ་དམོད་བྱེད་དོན་གང་རེད
པ་སངས་ལྟ་བུའི་ལྷག་བསམ་མེད་ན་ཡང་
ཕ་རོལ་ལ་རྒྱུས་མངའ་དང་ཉམ་མྱོང་མེད་པ་དག་གིས་ལོ་རྒྱུས་རྟོགས་བཟོའི་ལམ་ནས
བ་གླང་དུད་འགྲོ་ལས་ཀྱང་དམའ་བར་བརྩིས་དེ་སྨད་པ་དེ་ནི
མ་དྲིན་མོ་ཆེ་གཙོ་བའི་བུད་མེད་རིགས་ལ་ངོ་མི་གནོང་ངམ
ཙ་རི་གནས་ཆེན་སོགས་ལ་འགྲིམ་མྱོང་བ་ཞིག་ཕར་ཞོག
ཚ་བའི་ལུང་དུ་བསྡད་ནས་རྒྱག་གཏམ་ཆེས་མང་བོ་ཞིག སྨྱུག་རྩེ་རུ་བླངས་དེ
ཛ་དྲག་གི་གནས་སྟངས་འོག་གནས་པའི་རང་རིགས་སྤུན་ཟླའི་བསྐོར་མི་གླེང་བར
ཝ་མ་ཝོལ་དུ་རང་ཁ་སྐྱག་ལང་དུ་བཏང་དོན་ཡང་བོད་དོན་རེད་དམ
ཞ་ཞོར་དུ ཐག་རིང་ས་ནས ཉེན་ཁ་མེད་ས་ནས ལས་ཀ་མེད་ས་ནས
ཟ་ཁང་དང་ཇ་ཁང་ ཡང་ན་གསར་བུ་ཚོ་ཆང་ཁང་དུ་འཛོམ་དུས
འུ་ཅག་གི་རིགས་ཀྱི་ནང་གི་ཆེས་རླབས་ཆེན་རང་བཞིན་གྱི་མ་མ་ཚོ་ལ
ཡ་རབ་ལུགས་སྲོལ་དང་བྲལ་བའི་སྐད་ཆ་འདི་དག་བཤད་དེ་བསྡོད་པ་ནི་གང་རེད
ར་རོ་ཆང་གི་བཟི་ན ར་བཟི་བ་ཞེས་བཤད་པའི་སྐད་ཆ་ལ་སྙིང་བོ་མེད་པ་ཤེས་ཀྱི་ཡོད
ལ་རྒྱ་དང་རིགས་ཞེན་གྱི་བཟི་བའི་དྲ་གྲོགས་ཁྱེད་ཅག་ལ་ག་རེ་བྱུང་བ་ཡིན་ནམ་སྙམ་ནས
ཤ་དང་རུས་པའི་གསེང་ནས་གཞུར་ནས་འོང་བའི་སྐད་ཆ་འདི
ས་མཐའ་ནས་ ལས་དབང་སྐྱིད་སྡུག་གཅིག་འཁྲི་བའི་བོད་མིང་བས
ཧ་ཧ་ཧ ད་ནི་ཕོ་གསར་འདིས་དངོས་ནས་དགོད་སྤྲོ་བོ་ཞིག་བྲིས་འདུག་སྙམ་ན
ཨ་མའི་བུ ཁྱེད་ཅག་གིས་རང་གི་དྲིན་ཆེན་ཨ་མ་ལྟ་བའི་བུད་མེད་དག་ལ་བྲིས་པ་དེར
ཧ་ཧ་ཧ་ཟེར་ནས་དགོད་རྒྱུ་འདུག་གམ་བསམ་བློ་བཏང་ནས
ཨ་མའི་བུ་ལོ་ང་ལ་ལན་རེ་བྲིས་ན་འགྲིག་གི་རེད
