ང་ཚོ་ནམ་ཡང་ས་འགུལ་གཉིས་ཀྱི་བར་དུ་གནས་ཡོད། འདས་པའི་ས་འགུལ་དང་བར་ཐག་རིང་དུ་ཕྱིན་ཡོད་ཀྱང༌། མ་འོངས་པའི་ས་འགུལ་དང་བར་ཐག་ཉེ་རུ་འགྲོ་བཞིན་ཡོད། འདས་པའི་ས་འགུལ་བྱུང་སྟེ་མི་ལོ་ ༡༠༤ སོང་ཡོད་ཀྱང༌། མ་འོངས་པའི་ས་འགུལ་ཉེན་སྐྱོབ་ལ་ང་ཚོར་སྔ་མོ་ནས་གྲ་སྒྲིག་དགོས་ཟེར།
ངྷ་སྟེང་བོད་ཁྱིམ་དང་བོད་གཞུང་དཔེ་མཛོད་ཁང་གཉིས་ཀྱི་གོ་སྒྲིག་འོག དེ་རིང་ཞོགས་པའི་ཆུ་ཚོད་ ༡༠ བའི་ཐོག་ངྷ་སྟེང་བོད་ཁྱིམ་སློབ་གྲྭའི་རྐང་རྩལ་སྤོ་ལོ་རྩེད་ཐང་དུ། བོད་ཁྱིམ་སློབ་གྲྭའི་དགེ་སློབ་ཡོངས་ལ་ས་འགུལ་ཉེན་སྐྱོབ་དང་སྔོན་འགོག་བྱེད་ཕྱོགས་བཅས་ཀྱི་སྐོར་ལ་སྦྱོང་བརྡར་ཞིག་སྤྲད་ཡོད་པ་དང༌། དེ་ནི་ཧི་མ་ཅལ་མངའ་སྡེ་ཀང་ར་རྫོང་དུ་སྤྱི་ལོ་ ༡༩༠༥ ལོར་ས་འགུལ་ཤུགས་ཆེན་བྱུང་སྟེ་མི་ལོ་ཧྲིལ་བོ་ ༡༠༤ འཁོར་བའི་དུས་དང་སྟབས་བསྟུན་ཏེ། ཧི་མ་ཅལ་མངའ་སྡེ་དང་ལྡི་ལི་སོགས་སློབ་གྲྭ་ཁག ༡༨ ཙམ་གྱི་དགེ་སློབ་ཡོངས་ལ་དུས་གཅིག་ཏུ་ས་འགུལ་ཉེན་སྐྱོབ་ཀྱི་སྦྱོར་བརྡར་དེ་གོ་སྒྲིག་བྱས་པ་ཞིག་ཡིན་འདུག ལས་འགུལ་འདིར་རྒྱབ་སྐྱོར་དང་མཐུན་འགྱུར་གནང་མཁན་གྱི་གྲས་སུ་ཨ་རིའི་ GeoHazards international ,GeoHazards sociey ཚོགས་པ་དང་བོད་གཞུང་དཔེ་མཛོད་ཁང༌། དབུས་བོད་སློབ་འཛིན་ཚོགས། སམ་བྷོ་ཊ་བཅས་ཡོད་འདུག
ཐེངས་འདིའི་ས་འགུལ་ཉེན་སྐྱོབ་ཀྱི་ཆེད་མཁས་པ་དང་བོད་གཞུང་དཔེ་མཛོད་ཀྱི་ལས་བྱེད་ཚེ་རིང་དོན་འགྲུབ་ལགས་འདི་གའི་གསར་ཁང་ལ་ཆེད་དུ་བཅར་ཏེ། ས་འགུལ་ཉེན་སྐྱོབ་ཀྱི་སྦྱོང་བརྡར་འདི་གལ་ཆེན་ཡིན་སྐོར་དང་མི་དམངས་བྱིངས་ལ་ཁྱབ་བསྒྲགས་དང་ཉེན་བརྡ་གཏོང་གལ་ཆེ་སྐོར་བརྗོད་དོན། ཉེ་བའི་ཆར་བྱུང་བའི་འཛམ་གླིང་གི་ས་འགུལ་མང་ཆེ་བའི་གནོད་སྐྱོན་ཚབས་ཆེ་ཤོས་དེ་སློབ་ཕྲུག་ཚོར་བྱུང་གི་ཡོད་པ་དང༌། དེ་ལྟར་བྱུང་བའི་རྒྱུ་མཚན་གཙོ་བོ་ནི། སློབ་གྲྭའི་ནང་ས་འགུལ་ཉེན་སྐྱོབ་ཀྱི་གོ་རྟོགས་ཞན་པ་དང་གྲ་སྒྲིག་མེད་པའི་དབང་གིས་རེད། སློབ་གྲྭའི་
འཛིན་སྐྱོང་དང༌། དགེ་སློབ་ཚང་མར་ས་འགུལ་གྱི་ཉེན་ཁ་སྔོན་འགོག་དང༌། ས་འགུལ་བྱུང་བའི་རྗེས་ཀྱི་མྱུར་སྐྱོབ་སྐོར་ལ་མཁྱེན་རྟོགས་ཉུང་བ། འདས་པའི་ལོ་རྒྱུས་ནང་ས་འགུལ་ལས་ཐར་ཐབས་ཀྱི་ཉམས་མྱོང་མེད་པ་བཅས་ལ་བརྟེན་ཏེ་སློབ་ཕྲུག་མང་པོའི་ཚེ་སྲོག་ཤོར་ཡོད།
ང་ཚོས་ཐེངས་འདིར་ས་འགུལ་ཉེན་སྐྱོབ་ཀྱི་སྦྱོང་བརྡར་སྤྲོད་དོན་ནི། བོད་པའི་སློབ་ཕྲུག་རྣམས་ས་འགུལ་སྐོར་ལ་ཤེས་རྟོགས་ཡོང་རྒྱུ་དང༌། ས་འགུལ་བྱུང་སྐབས་སོ་སོར་ཉེན་སྲུང་ཡོང་ཐབས་བཅས་ལ་དམིགས་པ་ཡིན། སྤྱིར་ས་འགུལ་སྦྱོང་བརྡར་འདི་ས་འགུལ་བྱུང་རྐྱེན་གྱི་མཚོན་དོན་ཙམ་ཡིན་ཡང༌། ངྷ་ས་གཡས་གཡོན་འདི་ས་འགུལ་གྱི་ཉེན་ཁ་ཆེ་ཤོས་ཀྱི་རྭ་བར་གནས་ཡོད་སྟབས། འདས་པའི་དུས་སུ་ས་འགུལ་གྱི་གནོད་ཚབས་མང་པོ་བྱུང་མྱོང་ལ། མ་འོངས་པར་ཡང་འབྱུང་སྲིད་པ་ཞིག་རེད། ཚན་རིག་པས། ང་ཚོ་ནམ་ཡང་ས་འགུལ་གཉིས་ཀྱི་བར་དུ་གནས་ཡོད། ཅེས་གསུངས་བ་ལྟར། འདས་པའི་ས་འགུལ་དང་བར་ཐག་རིང་དུ་ཕྱིན་ཡོད་ཀྱང༌། མ་འོངས་པའི་ས་འགུལ་དང་ཉེ་རུ་འགྲོ་བཞིན་ཡོད། འདས་པའི་ས་འགུལ་བྱུང་སྟེ་མི་ལོ་ ༡༠༤ སོང་ཕྱིན་ཡང༌། མ་འོངས་པའི་ས་འགུལ་ཉེན་སྐྱོབ་ཐད་ང་ཚོར་སྔ་མོ་ནས་གྲ་སྒྲིག་དགོས་པ་རེད། ཅེས་བརྗོད་བྱུང༌།
ས་འགུལ་ཉེན་སྐྱོབ་སྐོར་གྱི་གསལ་བསྒྲགས་ཤིག་བཀྲམས་ཡོད་པའི་ནང༌། རྒྱ་གར་ནང་ཕྱི་ལོ་ ༡༩༠༥ ལོའི་ཟླ་ ༤ ཚེས་ ༤ ཉིན་ས་འགུལ་ཚད་རིམ་ ༧་༨ ཅན་ཞིག་བྱུང་སྟེ། ཀང་རཱ་རྫོང་དང་ངྷ་ས་གཡས་གཡོན་གྱི་གྲོང་ཁྱེར་དང་གྲོང་གསེབ་ཁག་ཏུ་ཁྱོན་བསྡོམས་མི་གྲངས་ཆིག་ཁྲི་དགུ་སྟོང་ ༡༩༧༢༧ ལྷག་གི་ཚེ་སྲོག་ཤོར་ཡོད་པ་དང༌། ཁང་པ་འབུམ་གཅིག་ ༡༠༠༠༠༠ ལྷག་གཏོར་སྐྱོན་བྱུང་སྟེ། རྒྱ་གར་གྱི་ལོ་རྒྱུས་ནང་སྲོག་སྐྱོན་ཆེ་ཤོས་ཀྱི་ས་འགུལ་ཞིག་ཏུ་ངོས་འཛིན་བྱས་ཡོད། རྒྱ་གར་ནང་ས་འགུལ་གྱི་ཉེན་ཁ་ཆེ་བའི་ས་ཁུལ་ཁག་ལས་ཅམ་བཱ་དང་ཀུ་ལུ། ཀང་རཱ། ཨཱ་ནཱ། ཧ་མིའར་པུར། མན་ཌི། སྤི་ལཱས་པུར་རྫོང་བཅས་ནི་ས་ཁུལ་སྡེ་ཚན་ལྔ་པ། ས་འགུལ་ཉེན་ཁ་ཆེ་གྲས་དང༌། ཧི་མཱ་ཅལ་མངའ་སྡེ་རྫོང་གཞན་རྣམས་ནི་ས་ཁུལ་སྡེ་ཚན་བཞི་པ། ཉེན་ཁ་འབྲིང་གྲས་བཅས་སུ་ངོས་འཛིན་བྱས་ཡོད་ལ།
ཧི་མཱ་ཅལ་མངའ་སྡེའི་ནང་ཡོད་པའི་བོད་པའི་སློབ་གྲྭ་བརྒྱ་ཆ་ ༦༠ ཙམ་སྡེ་ཚན་ལྔ་བ། ས་འགུལ་ཉེན་ཁ་ཆེ་གྲས་ཀྱི་ནང་དུ་ཚུད་ཡོད་ལ། སློབ་གྲྭ་གཞན་རྣམས་སྡེ་ཚན་བཞི་པ། ཉེན་ཁ་འབྲིང་གྲས་ཀྱི་ནང་ཚུད་ཡོད། རྒྱ་ས་ལྡི་ལི་ས་ཁུལ་སྡེ་ཚན་བཞི་པ། ཉེན་ཁ་ཆུང་གྲས་ཆགས་ཡོད། ཚན་རིག་མཁས་པ་རྣམས་ཀྱི་མ་འོངས་པར་ཧི་མ་ལ་ཡའི་རི་རྒྱུད་དུ་ས་འགུལ་གྱི་ཉེན་ཁ་ཆེན་པོ་ཡོད་པ་དང་། གལ་སྲིད་ས་འགུལ་ཤུགས་ཆེན་ཞིག་བྱུང་བ་ཡིན་ན། རྒྱ་གར་བྱང་ཕྱོགས་ཀྱི་ས་ཁུལ་ཡོངས་རྫོགས་ལ་གནོད་སྐྱོན་འབྱུང་སྲིད། ཅེས་བཀོད་འདུག
