ས་མཐའི་བསམ་གཞིག

སེར་བྱེས་གྲྭ་བློ་བཟང་དཔལ་ལྡན་ལགས་ཀྱིས་༼ས་མཐའི་བསམ་གཞིག༽ཅེས་པའི་སྤྱི་ཚོགས་དཔྱད་བརྗོད་ཀྱི་དེབ་ཅིག་དཔར་སྐྲུན་འགྲེམས་སྤེལ་གནང་ཡོད་འདུག་ལ། དེབ་དེའི་ནང་དུ་འཛམ་གླིང་ཞི་བདེའི་སྟོན་པ་༸གོང་ས་ཏཱ་ལའི་བླ་མ་དང་སྲོལ་རྒྱུན་རིག་གནས་ཀྱི་བསམ་བློའི་རིན་ཐང་གླེང་བ། དུས་རབས་གསར་བའི་དགོན་སྡེའི་སློབ་གསོའི་ལམ་ཕྱོགས་ལ་ཅུང་ཟད་དཔྱད་པ། སྟོང་ལོ་བརྒྱད་པའི་སེམས་ཁྲལ་གྱི་ཟུར་གཅིག བོད་མི་དམངས་ཚོགས་ཆེན་ལ་ཕུལ་བའི་བསམ་ཚུལ་རགས་བསྡུས། སྲོག་ཉེན་ལ་ཐུག་པའི་བོད་མི་རིགས་ཀྱིས་ཅི་ཞིག་ལ་སྒུག་བཞིན་ཡོད་ཅེས་པ་སོགས་བོད་མི་རིགས་ཀྱི་འདས་མ་ད་གསུམ་གྱི་གནས་བབ་ལ་བསམ་གཞིག་དང་དོ་འཁུར་གནང་བའི་དཔྱད་བརྗོད་རྩོམ་ཡིག་ཉི་ཤུ་ཙམ་བཀོད་འདུག དེབ་ཀྱི་སྔོན་འགྲོའི་གཏམ་དུ། ད་ལྟ་ནི་དུས་རབས་ཀྱི་འགྱུར་བ་གློག་ལྟར་མགྱོགས་ཤིང་འཛམ་གླིང་ཧྲིལ་བོའི་ཤེས་རིག་དང་ཆབ་སྲིད་ཀྱི་རྦ་རླབས་གཅིག་འཕྲོར་གཅིག་མཐུད་པའི་ཡོ་ལང་ཆེ་སྟབས། བོད་མི་རིགས་ཀྱང་རླབས་མཚོ་སྐྱོམས་པ་ལྟ་བུའི་ཟང་ཟིང་འདིའི་ཁྲོད་དུ་རང་ཤུགས་ཀྱིས་དེད་ཡོང་བ་དང་། འདི་འདྲའི་འཕེལ་ཕྱོགས་ཤིག་དང་ལེན་བྱེད་དགོས་པ་ནི་དུས་ཀྱིས་གཏུགས་པའི་གདམ་ཀ་ཉག་གཅིག་ལགས་པས། འདི་ལ་ཕྱིར་སྣུར་དང་གཡོལ་ཐབས་གཏན་ནས་མེད་མོད། འགྱུར་ལྡོག་གི་སྐྱོམས་ཤུགས་ཇི་འདྲ་ཆེ་ནའང་ཡ་ཐོག་གདོད་མ་ནས་རྒྱུན་མཐུད་དེ་ཡོང་བའི་མི་རིགས་རང་ཉིད་ཀྱི་ངོ་གདོང་ནི་དུས་ནམ་ཡང་བོད་པ་ཡིན་དགོས་པའི་བསམ་བློ་འདི་ལ་གཏན་ནས་ཁ་བྲལ་མི་རུང་བར་སེམས་ཞེས་དང་། ད་ལྟ་ང་ཚོའི་ཚེ་སྲོག་གཏའ་མར་བཞག་ནས་འཚོལ་སྙེགས་བྱེད་བཞིན་པ་འདི་ཡང་མཐར་གཏུགས་ན་བོད་པའི་ངོ་གདོང་རྒྱུན་མཐུད་པའི་ཆེད་དུ་ཡིན་འོས། ཞེས་གསལ་ཡོད། ད་དུང་རིག་གནས་དང་ཆབ་སྲིད། དཔལ་འབྱོར་སོགས་རང་ཚུགས་ཐུབ་པའི་རྨང་གཞིའི་སྟེང་། ཕྱིར་ལྡོག་མེད་པའི་འགྲན་རྩོད་ཀྱི་གཡུལ་སར་ཆས་པའི་སྟོབས་ཤུགས་ཤིག་མེད་ན། བོད་པ་བོད་པའི་ངོ་གདོང་ནས་སྡོད་པར་ཧ་ཅང་དཀའ་ངལ་དུ་ཐུག་ཡོད། དེ་འདྲའི་སྟོབས་ཤུགས་འཚོལ་བའི་གོ་རིམ་དུ་གོ་སྒྲིག་དང་ལག་ལེན་ལྷན་དུ་སྤྲེལ་ནས་དུས་ཚོད་སྐར་ཆ་ཙམ་ཡང་སྡོད་དབང་མེད་པར་མདུན་བསྐྱོད་ཐབས་བྱེད་རྒྱུ་ནི་ད་ལྟའི་རང་ཅག་གི་འོས་འགན་ཉག་གཅིག་རེད་ཅེས་སོགས་གསལ་ཡོད་འདུག