ཆུང་ས་ནས་ཁྱིམ་ཚང་ནང་ཁུལ་རྒྱག་རེས་རྒྱག་པ་དང་མི་གསོད་པ། ཆེ་ས་ནས་འཇིགས་སྐུལ་རིང་ལུགས་སོགས་མཐར་གཏུགས་ན། སེམས་འདུལ་མ་ཐུབ་པ་ལས་བྱུང་བ་གསལ་བོ་རེད། སེམས་ཟེར་བ་དེར་སྨན་ཟོས་ཏེ་འདུལ་བ་དང༌། ཁབ་བརྒྱབས་ཏེ་འདུལ་བ་དེ་འདྲ་མེད། ང་ཚོས་འདི་ལྟར་ཚན་རིག་དང་ནང་ཆོས་གོ་བསྡུར་བྱེད་དོན། ཤེས་བྱ་རྒྱ་ཆེ་རུ་གཏོང་རྒྱུ་དང་ཤེས་བྱ་རྒྱ་ཆེ་རུ་བཏང་བའི་གྲུབ་དོན་མི་ལ་བདེ་སྐྱིད་ལྡན་པའི་སྤྱི་ཚོགས་ཤིག་ཡོང་བ་བྱ་རྒྱུ་ང་ཚོའི་དམིགས་ཡུལ་རེད། ཅེས་༧གོང་ས་མཆོག་གིས་གསུངས་ཡོད།
བཞུགས་སྒར་ངྷ་རམ་ས་ལའི་གཟིམ་ཆུང་ཕོ་བྲང་དུ་ཕྱི་ཚེས་ ༦ ཉིན་ནས་མགོ་འཛུགས་ཀྱིས་སེམས་དང་སྲོག་ཅེས་པའི་བརྗོད་གཞིའི་ཐོག ཉིན་གྲངས་ ༥ རིང་གི་ནང་ཆོས་དང་ཚན་རིག་བར་གྱི་བགྲོ་གླེང་གོ་བསྡུར་ཞིག་ཚོགས་མགོ་བརྩམས་ཡོད་པ་དང༌། ཐེངས་འདིའི་ཚོགས་ཐོག་ཏུ་༧གོང་ས་མཆོག་དང་དཔལ་རྒྱལ་བ་ཀརྨ་པ། རྙིང་མའི་བླ་ཆེན་བསོད་རྒྱལ་རིན་པོ་ཆེ། ཨ་རི་དང་ཡུ་རོབ། དབྱིན་ཡུལ། རྒྱ་གར་བཅས་ཀྱི་ཚན་རིག་པ་དང་མཚན་ཉིད་རིག་པ་བ། དེ་བཞིན། གཙུག་ལག་སློབ་གྲྭ་ཁག་གི་ཚན་རིག་སློབ་དཔོན་ཆེན་མོ་དང་ཨ་རིའི་གློག་བརྙན་ཁྲབ་སྟོན་པ་སྐད་གྲགས་ཅན་རེ་ཆར་གྷར། དེ་བཞིན་བོད་པའི་གདན་ས་ཁག་གི་དགེ་བཤེས་བཅས་མཉམ་ཞུགས་གནང་ཡོད། ཚོགས་འདུ་དབུ་འབྱེད་མཛད་སྒོའི་སྟེང་༧གོང་ས་མཆོག་གིས། ང་ཚོས་ལོ་ངོ་ ༢༢ རིང་ལ་ཚན་རིག་དང་ནང་ཆོས་བར་བགྲོ་གླེང་གོ་བསྡུར་དང༌། བརྟག་དཔྱད་ཞིབ་འཇུག་བྱས་པ་བརྒྱུད་དེ། གནད་འགག་ཁག་ཅིག་ལ་གྲུབ་འབྲས་ལྡན་པ་བྱུང་ཡོད་པར་ཡིད་ཆེས་ཡོད། ཕྱི་དངོས་པའི་གནས་ལུགས་དང་རྡུལ་ཕྲན་གྱི་རྣམ་བཞག ནང་སེམས་ཀྱི་ཆོས་ཉིད། ལྷག་པར་དུ་ཚོར་ཤུགས་ཧ་ཅང་རྣོ་བའི་ནང་སེམས་ཀྱི་མྱོང་ཚོར་དང་འགྱུར་འགྲོས་བཅས་ལ། ང་ཚོའི་གྲོས་བསྡུར་རིམ་པ་བྱས་ཏེ་གསལ་བོ་ཆགས་ཡོད། དེར་བརྟེན། ནང་སེམས་ཀྱི་བྱེད་ལས་ལ་དོ་སྣང་མེད་རིགས་ཚོར་ཡང་དོ་སྣང་གསར་དུ་སླེབས་ཡོད།
ད་ལྟའི་བར་ང་ཚོ་ནང་པའི་ཆོས་ལུགས་པ་དང་ཚན་རིག་པའི་བར་བགྲོ་གླེང་ཚོགས་འདུ་ཐེངས་ ༡༨ ཙམ་བྱ་རྒྱུ་བྱུང་ཡོད། ཐོག་མའི་སྐབས་སུ་བོད་པ་ཚོ་དང༌། ལྷག་པར་དུ་ཆོས་ལུགས་པ་ཚོའི་ནང་དུ་དགོས་པ་ཆེར་ཨེ་ཡོད་སྙམ་པའི་མཐོང་ཚུལ་ཡོད་མཁན་བྱུང་ཡོད། བོད་པ་ཙམ་མ་ཡིན་པར་ཕྱི་རྒྱལ་བ་ཚོས་ཀྱང༌། ཆོས་ལུགས་པ་དང་ཚན་རིག་པས་མཉམ་དུ་སྐད་ཆ་བཤད་ན། ཆོས་དད་ལ་གནོད་པ་ཡོང་གི་རེད་ཟེར་མཁན་བྱུང་ཡོད་ཀྱང༌། ང་ཚོས་མུ་མཐུད་དུ་ནང་ཆོས་དང་ཚན་རིག་བར་ཚོགས་འདུ་བསྐངས་ཏེ། རིམ་གྱིས་ཚན་རིག་པ་ཚོར་ཕན་ཐོགས་ཡོད་པ་དང༌། ནང་པ་སངས་རྒྱས་པའི་ཆོས་ལུགས་པ་ཚོར་ཡང་ཕན་ཐོགས་ཡོད་པ་ཞིག་བྱུང་ཡོད། ང་ཚོའི་རྩ་བའི་དམ་བཅའ་དེ་གང་ཡིན་ཟེར་ན། སངས་རྒྱས་པའི་གྲུབ་མཐའ་དེ་བརྟག་དཔྱད་འོས་པ་ཞིག་རེད་དམ་མ་རེད། གྲུབ་མཐའ་བརྟག་དཔྱད་འོས་པ་ཞིག་མིན་པ་ཡིན་ན། ཅི་ཙམ་དཔྱད་པ་བྱས་པ་དེ་ཙམ་གྱིས་ཏོག་ཙམ་གཟབ་གཟབ་བྱ་དགོས་པ་ཆགས་ཀྱིན་ཡོད། བརྟག་པར་འོས་པ་ཞིག་ཡིན་ན། ཅི་ཙམ་དཔྱད་པ་བྱས་ན་དེ་ཙམ་ཁ་ཇེ་གསལ་དང་ངེས་པ་ཇེ་ཆེར་འགྲོ་བ་རེད། དེར་བརྟེན། སངས་རྒྱས་བཅོམ་ལྡན་འདས་ཀྱིས་ཀྱང༌། དགེ་སློང་དག་གམ་མཁས་རྣམས་ཀྱིས།། བསྲེགས་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ།། བླང་བར་བྱ་ཡི་གུས་ཕྱིར་མིན།། ཞེས་སྤོབས་པ་ཆེན་པོས་གསུངས་ཡོད། རང་ཉིད་ཀྱི་ལྟ་གྲུབ་དེ་བརྟག་ཅིང་དཔྱད་པར་འོས་པ་ཞིག་ཡིན་པའི་ཆ་ནས་དེ་ལྟར་གསུངས་པ་རེད། ཚན་རིག་པ་ཡིན་ན་འདྲ་ལ། ཆོས་ལ་དོ་སྣང་མེད་མཁན་ཡིན་ནའང་འདྲ། དེ་བཞིན་ཆོས་ལ་སྐྱོན་འཛུགས་བྱེད་མཁན་ཚོ་ཡིན་ནའང་འདྲ། ག་ཚོད་ཐུག་འཕྲད་མང་པོ་བྱས་ཏེ་སྐད་ཆ་བཤད་པ་ཡིན་ན། དེ་ཙམ་གྱིས་ལེགས་པའི་ཆ་རྐྱེན་དུ་འགྲོ་བ་རེད། འོན་ཀྱང༌། སངས་རྒྱས་པའི་ཆོས་ལ་དད་པ་ཡོད་ཀྱང་ལྟ་གྲུབ་མི་ཤེས་མཁན་ཞིག་ཡིན་ན། དྲི་བ་གསར་པ་འདྲ་མིན་སླེབས་སྐབས་མགོ་འཐོམ་འགྲོ་བ་དེ་འདྲ་ཡོང་སྲིད་མོད། བདེན་བཞིའི་རྣམ་བཞག་དང་དེ་ཉིད་ཀྱི་རྣམ་བཞག་གི་ཐོག་ནས་སངས་རྒྱས་པའི་ཆོས་ཀྱི་རྣམ་བཞག་བཤད་པ་ཡིན་ན། ཕན་ཐོགས་ཆེན་པོ་ཡོད་པ་ཞིག་ཆགས་ཡོད།
གཅིག་ནས་དེ་རིང་འདིར་བོད་པའི་ལྷ་རིམ་དགེ་བཤེས་དགའ་རབ་ཅིག་ཕེབས་འདུག གཉིས་ནས་བོད་པའི་ཕྲུ་གུའི་ནང་ནས་སྨན་ལ་སློབ་སྦྱོང་བྱས་ཡོད་དང་ཚན་རིག་ལ་དོ་སྣང་ཡོད་པ་དང༌། ཚན་རིག་དང་འབྲེལ་བའི་སློབ་སྦྱོང་རག་ཡོད་པ་ཁ་ཤས་སླེབས་ཡོད། དེ་ཚོར་དགེ་མཚན་ཞེ་དྲག་ཆེན་པོ་མཐོང་གིན་འདུག སངས་རྒྱས་པའི་ལྟ་གྲུབ་ཀྱི་ནང་དུ་བཤད་ཡོད་པ་དང༌། ཚན་རིག་གི་ཐོག་ནས་བཙལ་ཏེ་བརྙེད་ཡོད་པ་གཉིས་ཟུང་འབྲེལ་བྱས་ཏེ་མིའི་ཤེས་བྱ་རྒྱ་ཆེ་རུ་གཏོང་རྒྱུ་དང༌། མིའི་སྤྱི་ཚོགས་ནང་བདེ་སྐྱིད་བསྐྲུན་རྒྱུ་དེ་གྲུབ་དོན་རེད། ཆུང་ས་ནས་ཁྱིམ་ཚང་ནང་ཁུལ་ནས་རྒྱག་རེས་རྒྱག་པ་དང་མི་གསོད་པ། ཆེ་ས་ནས་འཇིགས་སྐུལ་རིང་ལུགས་སོགས་ཀྱང་མཐར་གཏུགས་ན། སེམས་འདུལ་མ་ཐུབ་པ་ལས་ཡོང་གིན་ཡོད་པ་གསལ་བོ་རེད། སེམས་ཟེར་བ་དེར་སྨན་ཟོས་ཏེ་འདུལ་བ་དང༌། ཁབ་བརྒྱབས་ཏེ་འདུལ་བ་དེ་འདྲ་ཡོད་པ་མ་རེད། ང་ཚོས་འདི་ལྟར་ཚན་རིག་དང་ནང་ཆོས་གོ་བསྡུར་བྱེད་དོན་ཤེས་བྱ་རྒྱ་ཆེ་རུ་གཏོང་རྒྱུ་དང༌། ཤེས་བྱ་རྒྱ་ཆེ་རུ་བཏང་བའི་གྲུབ་དོན་དེ་མི་ལ་བདེ་སྐྱིད་ལྡན་པའི་སྤྱི་ཚོགས་ཤིག་ཡོང་བ་བྱ་རྒྱུ་ང་ཚོའི་དམིགས་ཡུལ་རེད། དེ་ནི་ཆོས་པ་དང་གྲྭ་ཆས་གྱོན་མཁན་གཅིག་པུའི་འགན་མ་ཡིན་པར། བོད་པའི་སྤྱི་ཚོགས་ནང་ག་ཚོད་མང་པོ་བྱུང་ན་ཡག་པོ་རེད། ང་ཚོའི་ཕ་མེས་ནས་ནང་པ་སངས་རྒྱས་པ་རེད། སངས་རྒྱས་ཆོས་ཀྱི་ལྟ་གྲུབ་རྣམ་བཞག་གཏིང་ཟབ་མོ་ཞིག་ཤེས་པ་ཡིན་ན་ཕན་ཐོག་ཆེན་པོ་ཡོང་གི་རེད། ཅེས་བཀའ་གནང་ཡོད།
ཨོ། ནམ་མཁའ་བསྟན་འཛིན། བདག་དཔེ་ཚོགས་ཀྱིས་ནུབ་བྱང་ཚང་གཡང་ལ་ག་འདྲ་བྱས་ནས་ཁྲིད་ཚུལ་གསལ་ཙམ་གསུང་ཐུབ་ན་ལེགས། དེའི་དོན་དེ་གོ་མ་བྱུང་།
བོད་བཞུགས་རྩོམ་པ་པོ་ཞོགས་དུང་ལགས་ཀྱི་དཔྱོད་ཤེས་རྒྱང་འབོད་ཀྱིས་མདོ་དབུས་ཁམས་གསུམ་འུར་ཟིང་ངེར་བཏང་བ་རེད། འོན་ཀྱང་བདག་དཔེ་ཚོགས་ཀྱིས་ནུབ་བྱང་ཚང་གཡང་ལ་འཁྲིད་ཡོད་པས་འདི་འདྲའི་ཚན་པ་རེ་ཟུང་དྲ་ངོས་སུ་འགོད་ཐུབ་ན་བོད་ཕྱི་ནང་གཉིས་ཀར་ཕན་པས་དཔྱོད་ལྡན་སུས་འབྱོན་ན་ཐུགས་རྗེ་ཆེ།
དེ་སྔོན་བསྟན་འཛིན་རིག་བཟང་ལགས་ཀྱིས་བོད་བསྒྱུར་བྱས་བ་ལས་ནང་ཆོས་དང་ཚན་རིག་གི་བགྲོ་གླེང་བྱས་བའི་སྐོར་ལ་དབྱིན་ཡིག་གི་དེབ་མ་གཏོགས་བོད་བསྒྱུར་བྱས་བ་མང་པོ་མི་འདུག་པས་འདི་ལ་གཞུང་ངོས་ནས་ཐུགས་བསམ་ཞིག་བཞེས་རན་རེད།