བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་ཆེད་དུ་མར་མེ་ཁྲོམ་སྐོར་འདི་གོ་སྒྲིག་བྱས་པ་ཡིན་ཟེར།
ཕྱི་ཚེས་ ༨ ཉིན་གྱི་དགོང་མོར་སྦེལ་ཀོབ་ས་གནས་གཞོན་ནུ་དང་བུད་མེད། གངས་ལྗོངས་རང་བདེན་རྩོད་ལེན་མཐུན་ཚོགས་གསུམ་གྱིས་གོ་སྒྲིག་འོག སྦེལ་ཀོབ་ལུགས་བདེ་གཉིས་ཀྱི་སེར་སྐྱ་མི་མང་གིས་གཞིས་གྲོང་དང་པོར་མར་མེ་ཁྲོམ་སྐོར་ཞིག་བྱས་སོང་ལ། དེ་ནི་ཉེ་ཆར་བོད་ནང་གི་གནས་སྟངས་ཧ་ཅང་ཛ་དྲག་ཏུ་གྱུར་དང་འགྱུར་བཞིན་པའི་དབང་གིས་ཡིན་སྐོར་ས་གནས་གཞོན་ནུའི་ཚོགས་གཙོ་པདྨ་ཚེ་དབང་མཆོག་གིས་ངོ་སྤྲོད་གནང་ཡོད། མར་མེ་ཁྲོམ་སྐོར་དེའི་ཐོག་སྦེལ་ཀོབ་ལུགས་ཟུང་བསམ་འགྲུབ་གླིང་གི་གཞིས་མགོ་བཀྲ་ཤིས་དབང་འདུས་ལགས་དང་མཉམ་འབྲེལ་ཚོགས་གཙོ་སྤྱི་ཟུར་པདྨ་བདེ་ལེགས་མཆོག ས་གནས་གཞོན་ནུ་ཚོགས་པའི་སློབ་སྟོན་པ་བློ་བཟང་རྡོ་རྗེ་སོགས་གཙོས་སེར་སྐྱ་སྟོང་ཕྲག་ལྷག་མཉམ་བཞུགས་གནང་ཡོད། གཞོན་ནུ་ཚོགས་པའི་སློབ་སྟོན་པ་བློ་བཟང་རྡོ་རྗེ་ལགས་ཀྱིས་དགོང་མོ་དེར་གསུངས་བཤད་གནང་དོན། ལོ་སྔོན་མའི་ཟླ་གསུམ་པ་ནས་བཟུང་ད་བར་བོད་ཁྱོན་ཡོངས་ཀྱི་གནས་སྟངས་ཧ་ཅང་ཛ་དྲག་ངང་གནས་ཡོད་ནའང་། གཞིས་ལུས་བོད་མི་རྣམས་ཀྱིས་ཞུམ་པ་མེད་པའི་ཐོག་ནས་ད་བར་ལས་འགུལ་རབ་དང་རིམ་པ་སྤེལ་བ་རེད་ལ། ཁོང་ཚོས་བོད་དོན་ལས་འགུལ་སྤེལ་རྒྱུར་དང་ལྷོད་གཏན་ནས་བྱུང་མེད་ནའང་། བཙན་བྱོལ་སྤྱི་ཚོགས་ཀྱི་བོད་མི་རྣམས་ཀྱིས་ལས་འགུལ་སྤེལ་རྒྱུར་དང་ལྷོད་བྱུང་དང་འབྱུང་བཞིན་ཡོད་ལ། ལོ་འདིར་ཁམས་དཀར་མཛེས་ཕྱོགས་ཀྱི་སོ་ནམས་པ་ཚོས་སོ་ནམས་ཞིང་ལས་བྱེད་རྒྱུར་མཚམས་འཇོག་གི་ལས་འགུལ་ཞིག་སྤེལ་གྱིན་པར་རྒྱ་ནག་གིས་བཙན་དབང་ཐོག་ཞིང་ལས་འདེབས་འཛུགས་ཀྱི་ལས་ཀ་བྱེད་འཇུག་གི་ཡོད་ལ། དེ་ནི་ལས་འགུལ་གྱི་རྣམ་པ་གསར་བ་ཞིག་རེད། རྒྱ་གར་གྱིས་སྔོན་མ་དབྱིན་གཞུང་ལ་ངོ་རྒོལ་བྱེད་སྟངས་ལྟ་བུ་རེད། ཡིན་ནའང་། བོད་ནང་དུ་རང་གི་ཞིང་ཁ་རང་གིས་མི་འདེབས་པའི་དབང་ཚད་ཀྱང་མེད་པར་དོན་མེད་གཅར་རྡུང་དང་བཙོན་འཇུག་གི་ཉེས་ཆད་འཁུར་དགོས་ཀྱི་ཡོད་འདུག དེ་བཞིན་རྭ་རྒྱ་གཙོས་བོད་སྟོད་སྨད་བར་གསུམ་གྱི་ས་གནས་མང་དག་ཅིག་ཏུ་ད་དུང་ཡང་གནས་སྟངས་ཧ་ཅང་ཛ་དྲག་ངང་གནས་ཡོད་ཅེས་གསུངས་ཡོད།
དྲ་གྲོགས་ཁ་བ་ལགས་ཀྱིས་བཤད་པ་བཞིན་གདོང་དམར་ཚང་གི་ཆག་སྒོ་འདི་མར་མེ་ཁྲོམ་སྐོར་གྱིས་སྐྱོབས་ཐུབ་རྒྱུ་ཞིག་མིན་པ་ཚང་མས་ཤེས་གསལ་རེད། འོན་ཀྱང་གདུང་སེམས་ཉམས་སྐྱེད་བྱེད་ཀྱིན་ཡོད་པ་རེད། འདི་ལྟ་བུ་ཞིག་ཀྱང་མ་བྱས་ན་གཞིས་ལུས་རྒྱ་ཆེ་མིང་ཚོགས་ལ་ངོ་མི་ཚ་འམ། འདིས་སྐྱོབ་ཐབས་མེད་དེའི་ཀྱང་སྐྱོབ་ཐབས་མེད་ཟེར་ནས་སྡོད་སྐབས་ཞིག་ཡིན་ནམ།
ལས་འགུལ་དེའི་ཕན་འབྲས་མི་གླེང་བར་གཞིས་ལུས་རྒྱ་ཆེའི་མང་ཚོགས་དང་སྡུག་གི་ཁུར་བོ་མཉམ་ཁུར་གྱི་དཔེ་ལྟར་བྱེད་མི་དགོས་སམ།
ཡག་པོ་འདུག རྗེས་སུ་ཡི་རང་ཡོད། འོན་ཀྱང་གདོང་དམར་ཚང་གི་ཆག་སྒོ་འདི་མར་མེ་ཁྲོམ་སྐོར་གྱིས་སྐྱོབ་ཐུབ་རྒྱུ་ཞིག་རེད་མི་འདུག