རྒྱ་ནག་དབུས་ཁྲིམས་དཔོན་ཝུ་ཨེ་ཡཱེན་མཆོག་ལ་ཞུ་རྒྱུར།

བོད་ཀྱི་གཞུང་འབྲེལ་མིན་པའི་ཚོགས་པ་ཁག་གིས་རྒྱ་ནག་དབུས་གཞུང་གི་ཁྲིམས་དཔོན་ཝུ་ཨེ་ཡཱེན་ཞུ་བའི་མཚན་ཐོག་ཏུ། ཉེ་ཆར་ལྷ་ས་འབྲིང་རིམ་མི་དམངས་ཁྲིམས་ཁང་གིས་བོད་མི་ཁག་ཅིག་ལ་སྲོག་ཁྲིམས་དང་ཚེ་བཙོན་བཅད་ཡོད་པ་དེར་རང་དབང་ཐོག་ནས་བསྐྱར་ཞིབ་དགོས་པའི་འབོད་སྐུལ་ཞུས་ཡོད།

དེ་རིང་སྔ་དྲོའི་ཆུ་ཚོད་ ༡༡ དང་ཕྱེད་ཀའི་སྟེང། མེགྷ་ལོར་རྒྱ་གར་གསོལ་མགྲོན་ཁང་ཞིག་ཏུ། བོད་ཀྱི་བུད་མེད་ལྷན་ཚོགས་དང་བོད་རྒྱལ་ཡོངས་མང་གཙོ་ཚོགས་པ། དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མིན་པའི་ཚོགས་པ་བཞི་ཐུན་མོང་ཐོག རྒྱ་ནག་དབུས་ཁྲིམས་འཛིན་ལྷན་ཁང་གི་ཁྲིམས་དཔོན་ཝུ་ཨེ་ཡཱེན་ཟེར་བའི་མཚན་ཐོག་ཏུ། ཉེ་ཆེར་ལྷ་སའི་འབྲིང་རིམ་མི་དམངས་ཁྲིམས་ཁང་གིས་བོད་མི་ཁག་ཅིག་ལ་སྲོག་ཁྲིམས་དང་ཚེ་བཙོན་གྱི་ཁྲིམས་ཐག་བཅད་ཡོད་པ་དེ་དྲང་བདེན་མིན་པ་དང། རྒྱལ་སྤྱིའི་ཁྲིམས་ཐོག་ནས་བསྐྱར་དུ་དཔྱད་ཞིབ་དགོས་པའི་འབོད་སྐུལ་ཞུས་སོང།

སྐབས་དེར་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་དབང་འོད་འབར་ལགས་ཀྱིས་གསར་འགོད་གསལ་བསྒྲགས་སྒྲོག་སྦྱོང་གནང་དོན། ཁྲིམས་དཔོན་ཝུ་ཨེ་ཡཱེན་མཆོག་ལ། ང་ཚོས་སྐུ་ཉིད་ཀྱི་ལས་ཁུངས་ལ་གུས་བརྩི་ལྡན་པའི་སྒོ་ནས་རེ་འདུན་ཞུ་རྒྱུར། ལྷ་ས་འབྲིང་རིམ་མི་དམངས་ཁྲིམས་ཁང་གིས་ ༢༠༠༩ ཟླ་ ༤ ཚེས་ ༨ ཉིན་བོད་མི་བློ་བཟང་རྒྱལ་མཚན་དང་ལོ་ཡག་ལ་སྲོག་ཁྲིམས་དང། བསྟན་འཛིན་ཕུན་ཚོགས་དང་རྐང་གཙུག་ལ་ལོ་གཉིས་ཕྱིར་འགྱངས་ཀྱི་སྲོག་ཁྲིམས། ཟླ་བ་བཟང་པོར་ཚེ་བཙོན་བཅད་པ་སོགས་ལ་ངེས་པར་དུ་དོ་སྣང་དགོས་ཀྱིན་འདུག ང་ཚོས་ཁྲིམས་བཅད་དེ་རིགས་རྒྱལ་སྤྱིའི་ཁྲིམས་ལུགས་ཀྱི་འགྲོ་སྟངས་ཤིག་མིན་པར་ཡིད་ཆེས་བྱེད་ཀྱིན་ཡོད།

ང་ཚོས་རེ་བ་ནན་གྱིས་ཞུ་རྒྱུར་སྲོག་ཁྲིམས་ཀྱི་ཉེས་པ་དེར་གང་མགྱོགས་གྲུབ་འབྲས་སོན་པ་དང། དབྱེ་འབྱེད་མེད་པའི་དཔྱད་ཞིབ་ཀྱིས་ཁོང་ཚོར་རྒྱལ་སྤྱིའི་ཁྲིམས་མཐུན་གྱི་གྱོད་ཞིབ་བྱེད་དགོས་ཀྱིན་འདུག དེར་མ་ཟད་ ༢༠༠༨ ཟླ་ ༣ དང་ ༤ ནང་བྱུང་བའི་གནས་ཚུལ་ཚང་མ་ཆེས་རང་དབང་ལྡན་པའི་སྒོ་ནས་བསྐྱར་ཞིབ་མ་བྱས་བར་དུ་གནས་སྐབས་མཚམས་འཇོགས་བྱ་དགོས་ལ། གར་སོང་ཆ་མེད་དུ་གྱུར་བའི་མི་གྲངས་ ༡༢༠༠ ལྷག་གི་མིང་གཞུང་དང་དེ་དག་གང་དུ་ཡོད་མེད། ལྷག་པར་སྔ་ལོའི་གནས་ཚུལ་འོག་བཀག་ཉར་བྱས་པ་སོགས་ཀྱི་མིང་གཞུང་གསལ་བརྗོད་བྱ་དགོས།

རྒྱ་གཞུང་གིས་སྔ་ལོའི་ཞི་རྒོལ་ལ་ཆེས་དྲག་སྤྱོད་དང་གདུག་རྩུབ་ཀྱི་བརྡ་ལན་སྤྲད་ཡོད་པ་དེ་ནི། བོད་མི་རྣམས་རྒྱ་མིའི་སྲིད་དབང་འོག་ཁ་གྲགས་མི་ཕོད་པ་བཟོ་བའི་བྱ་ཐབས་ཤིག་རེད། ང་ཚོས་འབོད་སྐུལ་ཞུ་རྒྱུ་གཅིག་ནི་བཙོན་པ་མི་གཅིག་ལའང་དྲག་རྡུང་མི་བྱ་རྒྱུ་དང། ཁོང་ཚོའི་ནང་མི་ཐུག་འཕྲད་ཀྱི་ཐོབ་ཐང་ཚུལ་བཞིན་སྤྲོད་པ། ཁྲིམས་རྩོད་པ་དང་འབྲེལ་གཏུགས་བྱེད་ཆོག་པ་མ་ཟད། དུས་ཐོག་སྨན་བཅོས་བྱེད་དུ་འཇུག་དགོས། ཞེས་སྒྲོག་སྦྱོང་གནང་སོང།

ཁོང་གིས་མུ་མཐུད་དུ་གོང་གི་གནད་དུ་དེ་དག་ཐད་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་ཞུས་དོན། རྒྱལ་སྤྱིའི་ཉེ་ཡངས་ཚོགས་པ་དང་རྒྱལ་སྤྱིའི་འགྲོ་བ་མིའི་ཐོང་ཐང་ལྟ་རྟོགས་ཚོགས་པ། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་དོན་ཚོགས་པ་བཅས་ཀྱི་དབུ་ཁྲིད་རྣམས་ལ། རྒྱ་གཞུང་གིས་བོད་མི་གཉིས་ལ་སྲོག་ཁྲིམས་བཅད་པ་དེ་སྐྱོབས་རོགས། ཞེས་ང་ཚོས་གུས་ཞབས་ཆེན་པོས་རེ་འདུན་ཞུ་བཞིན་ཡོད། ༢༠༠༩ ཟླ་ ༤ ཚེས་ ༨ ཉིན་ལྷ་ས་འབྲིང་རིམ་མི་དམངས་ཁྲིམས་ཁང་ནས་བོད་མི་ལྔ་ལ་ཉེས་པ་ཁག་མི་འདྲ་བ་ ༣ གྱི་ཐོག་ནས་ཁྲིམས་ཆད་བཅད་ཡོད་ལས་གཙོ་བོ་ ༢༠༠༨ ཟླ་ ༣ ནང་ལྷ་སར་མེར་བསྲེགས་ཀྱི་དོན་རྐྱེན་བཟོས་པའི་ཉེས་འཛུགས་བྱས་ཡོད། བློ་བཟང་རྒྱལ་མཚན་དང་ལོ་ཡག་ལ་སྲོག་ཁྲིམས་དང། བསྟན་འཛིན་ཕུན་ཚོགས་དང་རྐང་གཙུག་ལ་ལོ་གཉིས་ཕྱིར་འགྱངས་ཀྱི་སྲོག་ཁྲིམས། དེ་བཟིན་ཟླ་བ་བཟང་པོར་ཚེ་བཙོན་བཅས་ཀྱི་ཁྲིམས་ཐད་བཅད་ཡོད་ལ། ཞིན་ཧྭ་གསར་སྤེལ་ཁང་གི་གནས་ཚུལ་ལྟར་ན། གྱོད་དོན་དེ་དང་འདྲ་བ་ད་དུང་ལྷག་ཡོད་ཚུལ་འདུག

འགྲོ་བ་མིའི་ཐོབ་ཐང་བལྟ་ཞིབ་ཚོགས་པའི་ ༢༠༠༩ ཟླ་ ༣ སྙན་ཐོའི་ནང་ཕྱོགས་བསྡོམས་བྱས་པ་ལྟར་ན། འདས་ལོའི་བོད་ནང་གི་ཁྲིམས་ཐག་གཅོད་སྟངས་དང། བཙོན་བཅུག་བྱེད་སྟངས་རྣམས་ཆབ་སྲིད་ཀྱི་སྐུལ་སློང་གཙོར་བཟུང་ཐོག ཁྲིམས་ལུགས་ཀྱི་ལྟ་གྲུབ་དང་རང་དབང་ལ་དབང་འཛིན་པ་འགའ་རེ་ཡིས་ཁྱད་གསོད་བྱས་ཡོད་སྟབས། ཁྲིམས་ཁང་དང་ཉེན་རྟོག་པས་ཀྱང། ཁོ་ཚོའི་ཆབ་སྲིད་ཀྱི་དགོས་མཁོ་བཞིན་བསྒྲུབས་ཡོད། ཁྲིམས་ཐག་བཅད་ཟིན་པ་ཚོར་ཁྲིམས་ཞིབ་གཙང་མ་ཞིག་གཏན་ནས་བྱས་མེད། ཅེས་བོད་རང་དབང་ལས་འགུལ་ཁང་གིས་བརྗོད་ཡོད་པ་དང། ཉེ་ཆར་ཁྲིམས་ཐག་བཅད་པའི་བོད་མི་ཚོར་གསང་བའི་ཐོག་ནས་ཁྲིམས་ཐག་བཅད་ཡོད་པ་དང། ཁྲིམས་ལུགས་ཀྱི་གཞི་རྩའི་རྒྱུད་རིམ་གང་ཡང་བརྒྱུད་མེད་པ་མ་ཟད། རྒྱ་གཞུང་གི་སྲོག་ཁྲིམས་ཀྱི་ཉེས་པ་དེར་དཔང་རྟགས་ཙམ་མ་ཡིན་པར་ཁྲིམས་ལུགས་དེའི་ལྟ་གྲུབ་ཐོག་ལ་ང་ཚོས་ངོ་རྒོལ་བྱེད་ཀྱིན་ཡོད།

སྔ་ལོའི་ཟླ་ ༣ ནང་བྱུང་བའི་དོན་རྐྱེན་དེར་རྒྱ་ནག་གིས་རང་དབང་ངང་རྟོགས་ཞིབ་བྱེད་པའི་ལམ་ཁ་གང་ཡང་སྤྲད་མེད་ལ། ཟླ་ ༣ ཚེས་ ༡༠ ནས་ ༡༤ བར་གྱི་ལྷ་སའི་ཞི་རྒོལ་དེ་གློ་བུར་དུ་རྣམ་པ་དྲག་པོར་གྱུར་བ་དང། དེར་རྒྱ་དམག་གིས་དྲག་གནོན་ཚབས་ཆེན་བྱས་མཐར། དོན་རྐྱེན་དེ་བོད་ཀྱི་ས་ཁུལ་གང་སར་ཁྱབ་གདལ་དུ་སོང་ཡོད་ཀྱང། རྒྱ་གཞུང་གིས་དེའི་འབྱུང་རྐྱེན་ལ་བསམ་གཞིགས་གང་ཡང་བྱས་མེད།

ཟླ་བ་ ༡༣ ལྷག་རིང་བསྟུད་མར་བྱུང་བའི་བོད་མིའི་རླབས་ཆེན་གྱི་ལས་འགུལ་རྣམས། འཆེ་མེད་ཞི་བ་ཁོ་ན་ཡིན་རུང། དེར་རྒྱ་གཞུང་གི་དྲག་རྩུབ་དང་འཇིགས་བསྐུལ་ཁོ་ནས་ལན་འདེབས་བྱེད་ཀྱིན་ཡོད། ས་ཁུལ་མི་འདྲ་བ་ ༥༠ ལྷག་ལ་དོན་རྐྱེན་ ༡༥༠ ལས་བརྒལ་བ་བྱུང་ཡོད།

རྒྱ་གཞུང་གིས་མངོན་གསལ་མེད་པའི་ཐོག་ནས་མུ་མཐུད་བོད་ནང་དྲག་པོས་བཀའ་རྒྱ་སྡོམ་གྱིན་ཡོད་པ་དང། བོད་མི་ ༢༠༠ ལྷག་དམར་གསོད། ༢༣༠ ལྷག་ཟླ་ ༦ ནས་ཚེ་བཙོན་བར་གྱི་ཁྲིམས་ཐག་བཅད་པ། དེ་བཞིན། བོད་མི་ ༦༠༠༠ ལྷག་བཙོན་འཇུག་བྱས་པ། ༡༢༠༠ ལྷག་གར་སོང་ཆ་མེད་དུ་གྱུར་བ་སོགས་བྱུང་ཡོད་མོད། ད་དུང་ཡང་བོད་ནང་བོད་མི་ཚོས་ཞི་རྒོལ་མཚམས་འཇོག་བྱས་མེད། དེར་བརྟེན། ང་ཚོ་བོད་པའི་གཞུང་འབྲེལ་མིན་པའི་ཚོགས་པ་རྣམས་ཀྱིས་ཁྱེད་རྣམས་ཀྱི་གུས་བརྩི་འོས་པའི་ལས་ཁུངས་ལ་རེ་འདུན་ཞུ་རྒྱུ་ནི། རྒྱ་གཞུང་གི་ཁྲིམས་ཐག་གཅོད་སྟངས་དེར་ཁྱེད་རྣམས་ཀྱིས་རྒྱ་མིའི་དབུ་ཁྲིད་ཚོར་འབོད་སྐུལ་ཞུས་ཏེ། རྒྱལ་སྤྱིའི་ཁྲིམས་ལུགས་དང་རྦད་དེ་རྒྱབ་འགལ་བྱས་པར་དོ་ཁུར་བྱ་དགོས། ཞེས་འབོད་སྐུལ་ཞུ་གིན་ཡོད། ཅེས་སྒྲོག་སྦྱོང་གནང་སོང།