རང་ལོ་ ༨༡ ལ་སོན་པའི་ཆབ་སྲིད་བཙོན་པ་དཔལ་འབྱོར་ནོར་བུ་ལགས་ལ་ཨ་རིའི་དཔར་སྐྲུན་མཐུན་ཚོགས་ཀྱི་གཟེངས་རྟགས། རྒྱལ་སྤྱིའི་དཔར་སྐྲུན་རང་དབང་། ཞེས་པ་དེ་ཐོབ་ཡོད་ཅིང་། གཟེངས་རྟགས་དེ་ཟླ་འདིའི་ཚེས་ ༢༨ ཉིན་ནེའུ་ཡོག་གྲོང་ཁྱེར་གྱི་རང་བྱུང་ལོ་རྒྱུས་འགྲེམས་སྟོན་ཁང་དུ་སྨྱུག་ཚོགས་ཀྱི་ལོ་འཁོར་དུས་སྟོན་སྐབས་འབུལ་རྒྱུ་ཡིན་འདུག
དེ་བཞིན་རྒྱ་ནག་གི་རྩ་ཁྲིམས་ ༠༨ ལ་མཚན་རྟགས་འགོད་མཁན་རྒྱ་རིགས་ལོའུ་ཞའོ་པོ་ལ་སྨྱུག་ཚོགས་ཀྱི་རྩོམ་པ་པོ་ཆེན་མོའི་གཟེངས་རྟགས་ཕུལ་ཡོད་པ་རེད།
རྒྱ་ནག་གཞུང་གིས་ལོ་སྔོན་མའི་ཕྱི་ཟླ་ ༡༠ པའི་ཚེས་ ༣༡ ཉིན་བོད་ཀྱི་སྲོལ་རྒྱུན་དཔར་སྐྲུན་པ་དཔལ་འབྱོར་ནོར་བུ་ལགས་ལྷ་སར་ཡོད་པའི་ཁོང་གི་རང་ཁྱིམ་ནས་གསང་སྟབས་ཀྱིས་འཇུས་ཤིང་། རྒྱ་གཞུང་གིས་རྒན་དཔལ་འབྱོར་ནོར་བུ་ལགས་ཀྱིས་ལོ་འདིར་བོད་ཀྱི་རྒྱལ་དར་དང་དེ་བཞིན་ཁྲིམས་འགལ་གྱི་རྒྱུ་ཆ་དག་དཔར་སྐྲུན་བྱས་ཡོད་པའི་དོགས་གཞིའི་འོག་ཁོང་ཉིད་འཇུས་ཤིང་། ཁོང་ལ་ལ་ལོ་བདུན་གྱི་ཁྲིམས་ཐག་བཅད་ཡོད་པ་རེད།
པར་པ་དཔལ་འབྱོར་ནོར་བུས་ཕྱི་ལོ་ ༡༩༨༠ གྱ་གྲངས་ནང་ནས་བཟུང་རང་འགུལ་གྱི་སྒོ་ནས་གསུང་རབ་ཧ་ཅང་མང་པོ་པར་སྐྲུན་གནང་ཡོད་སྟབས། སྐབས་དེའི་རྒྱ་གཞུང་གི་སྲིད་བྱུས་གུ་ཡངས་ཞེས་པའི་གོ་སྐབས་འོག་དཔེ་ཆ་དེ་ཚོ་བོད་ཆོལ་ཁ་གསུམ་དང། བཙན་བྱོལ་ནང་ཤུགས་ཆེ་ཁྱབ་ཡོད།
ཁོང་གིས་དཔར་བ་རྣམས་དག་པོ་དང་ཡིག་འབྲུ་གསལ་པོ་འདུག་པར་མ་ཟད། དཔར་གཞི་རྣམས་ཁུངས་བཙན་པོ་ཡོད། དོལ་རྒྱལ་སྐོར་ནས་བཤད་ནའང་། རྒྱ་གར་ནང་དཔར་བའི་ཕ་བོང་ཁའི་རྣམ་ཐར་ནང་གོང་ས་བཅུ་གསུམ་པ་ཆེན་པོས་ཕ་བོང་ཁ་བཀའ་འགུག་གིས་བཀའ་བཀྱོན་ཕེབས་པ་དེ་ཚོ་བསུབ་ཡོད་ཀྱང། ལྷ་ས་ནས་དཔལ་འབྱོར་ནོར་བུས་དཔར་པ་དེའི་ནང་ཆ་ཚང་གསལ་པོ་འདུག
ཁོང་གིས་དཔེ་ཆ་དཔར་སྐྲུན་གྱིས་ལྷ་སའི་བར་སྐོར་ནང་ཚོང་གཉེར་བྱས་པ་ཙམ་མ་ཡིན་པར། གདན་ས་ཁག་ལ་ལོ་ལྟར་དཔེ་ཆ་མང་པོ་ཞལ་འདེབས་སུ་ཕུལ་བ་དང་། གྲྭ་བཙུན་མཐུན་རྐྱེན་ཞན་པ་ཚོར་དཔེ་ཆ་རིན་མེད་དུ་གནང་འདུག
དཔལ་འབྱོར་ནོར་བུ་ལགས་ཀྱིས་གསར་བརྐོ་གནང་བའི་ཕྱག་དཔེ་ཁག་གི་མཇུག་ཏུ་༼དཔལ་དང་འབྱོར་བས་ནོར་བུའི་མཛོད་འདི་བསྐྲུན་༽ཞེས་ཁོ་རང་གི་མིང་ཡིག་གསལ་བའི་ཚིག་བཅད་རྐང་པ་གཅིག་རེ་འདུག
ཁོང་གིས་བློ་ཁོག་ཆེན་པོས་བོད་སྤྱི་དོན་དང་འབྲེལ་བའི་ཕྱག་དཔེ་དཔར་བ་རྣམས་འདིར་དགོས་དབང་གིས་གླེང་མ་དགོས་པ་བྱས།
རྒན་དཔལ་འབྱོར་ནོར་བུ་ལགས་ལ་བཅོས་མིན་རྟེན་འབྲེལ་ཞུ།
རྒན་དཔལ་འབྱོར་ལགས་ལ་རྟེན་འབྲེལ་ཞུ །