༧གོང་ས་སྐྱབས་མགོན་ཆེན་པོ་མཆོག་བདུན་ཕྲག་གཉིིས་ལྷག་གི་རིང་ལ་ཨ་རིའི་ནང་ཆིབས་བསྒྱུར་གྱིས་མི་སྣ་ཁག་དང་ཐུག་འཕྲད་ཀྱིས་བཀའ་སློབ་ལམ་སྟོན་གནང་རྒྱུ་ཡིན་འདུག
ཟླ་འདིའི་ཚེས ༢༤ ཉིན་ནས་ཟླ་ ༥ བའི་ཚེས ༩ བར་༧གོང་ས་སྐྱབས་མགོན་ཆེན་པོ་མཆོག་ཨ་མི་རི་ཀའི་མངའ་སྡེ་ཁ་ལེ་ཧྥོ་ནི་ཡའི་གྲོང་ཁྱེར་སེན་ཊ་བྷིར་བྷ་ར་དང་ལོ་སེ་ཨེན་ཇེ་ལི། བྷོ་སི་ཊོན་དང་ནིའུ་ཡོག་བཅས་སུ་ཆིབས་བསྒྱུར་གྱིས་མཛད་འཕྲིན་བསྐྱང་རྒྱུ་ཡིན་འདུག
ཐེངས་འདིར་ ༧ གོང་ས་མཆོག་གི་མཛད་འཆར་གཙོ་བོ་ནི། རྒྱ་རིགས་ཆེད་མཁས་པ་དང་རྒྱ་རིགས་དམངས་གཙོ་དོན་གཉེར་བ་སོགས་ལ་མཇལ་འཕྲད་གནང་རྒྱུ་དང་། འགྲོ་བ་མིའི་བཟང་སྤྱོད་དང་བྱམས་སྙིང་རྗེའི་སྐོར་གྱི་བཀའ་སློབ་གནང་རྒྱུ་ཡིན་པ་དང་། ཕྱི་ཚེས ༢༤ ནས་ ༢༩ བར་ཨ་མི་རི་ཀའི་མངའ་སྡེ་སེན་ཊ་བྷིར་བྷ་ར་གཙུག་ལག་སློབ་གྲྭ་དང་ཁ་ལེ་ཧྥོ་ནེ་ཡའི་གཙུག་ལག་སློབ་གྲྭ། མེན་ས་ཆུ་སི་ཊ་སི་འཕྲུལ་རིག་སློབ་གཉེར་ཁང་སོགས་ཀྱི་དགེ་སློབ་ཡོངས་ལ་བཀའ་སློབ་དང་འབྲེལ་དྲི་བ་དྲི་ལན་གནང་རྒྱུ་ཡིན་འདུག ཕྱི་ཚེས ༣༠ ཉིན་ཨ་རིའི་ཧ་ཝར་ཊི་གཙུག་ལག་སློབ་གྲྭ་ཆེན་མོའི་ནང་བཟང་སྤྱོད་ཀྱི་ལྟེ་གནས་ཁང་ཞིག་དབུ་འབྱེད་གནང་རྗེས་དེར་ཡོད་གཙུག་ལག་སློབ་གྲྭའི་དགེ་སློབ་ཡོངས་ལ་བཟང་སྤྱོད་སྐོར་གྱི་བཀའ་སློབ་གནང་རྒྱུ་ཡིན་འདུག་ལ། ཟླ་ ༥ བའི་ཚེས་ ༡ ཉིན་ཨ་རིིའི་ཧ་ཝར་ཊི་གཙུག་ལག་སློབ་གྲྭའི་གསོ་རིག་སྡེ་ཚན་གྱི་གོ་སྒྲིག་འོག་སེམས་ཁམས་རིག་པའི་སྐོར་གྱི་བགྲོ་གླེང་ཚོགས་འདུ་གནང་རྗེས་སྨན་རིག་མཁས་དབང་དང་ཆེད་ལས་པ་སོགས་ལ་མཇལ་འཕྲད་གནང་འཆར་ཡོད་པ་དང་། ཕྱི་ཚེས་ ༢ ཉིན་བྷོ་སི་ཊོན་བོད་རིགས་སྤྱི་མཐུན་ཚོགས་པའི་གསོལ་འདེབས་བཞིན་ཁུལ་དེའི་གནས་སྡོད་བོད་མི་ཡོངས་ལ་ལམ་སྟོན་བཀའ་སློབ་དང་། ཕྱི་ཚེས་ ༥ ཉིན་བོད་ཁང་གི་གསོལ་འདེབས་བཞིན་བཀའ་སློབ་གནང་རྗེས་ ༥༩ ལོའི་ཡར་སྔོན་དུ་བོད་ནང་ཕེབས་མྱོང་བའི་ཨ་རི་དང་ཁེ་ན་ཌའི་མི་སྣ་ཁག་ཅིག་དང་མཇལ་འཕྲད་གནང་རྗེས་ཕྱི་ཚེས་ ༦ ཉིན་བྱམས་བརྩེ་ལྡན་པའི་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་པ་མ་ཟད། ཨ་རིའི་སི་ཨེན་ཨེན་བརྙན་འཕྲིན་ཁང་གི་བཅར་འདྲི་དང་ལེན་གནང་འཆར་ཡོད་འདུག
བརྩེ་བའི་ཐུགས་ཀྱི་མི་ལྷོད་འགྲོ་བའི་དོན།།
སྐུ་ན་བགྲེས་ཀྱང་དལ་ལྷོད་མེད་པའི་ངང་།།
བྱམས་དང་བརྩེ་བའི་བསླབ་བྱའི་དོན་སྙིང་དེ།།
འཛམ་གླིང་སྐྱེ་འགྲོའི་ཀུན་གྱིས་རྣ་བར་བསྒྲགས།།
ཁྱེད་ནི་བླ་མ་ཁྱེད་ནི་ཡི་དམ་དེ།།
བསྐལ་བ་ཇི་སྲིད་བར་དུ་ཁྱེད་ཞལ་དང་།།
ཁྱེད་གསུང་ཐོག་མར་ཐོས་པའི་སློབ་བུ་དེ།།
གངས་ཅན་འགྲོ་བ་མི་རྣམས་ཡིན་པར་སྨོན།།