ཕུར་བུ་ཚེ་རིང་རིན་པོ་ཆེ་མཆོག་ལ་ཚེས་ ༢༨ ཉིན་ཁྲིམས་ཐག་གཅོད་རྒྱུ་ཡིན་པའི་གསལ་བསྒྲགས་བྱས་ཡོད་ཀྱང་། ཚེས་ ༢༧ ཉིན་གློ་བུར་དུ་ཁྲིམས་ཁང་གིས་དུས་ཚོད་ཕྱིར་འགྱངས་བྱ་རྒྱུ་ཡིན་པའི་བརྡ་བཏང་ཡོད་འདུག
ཁམས་དཀར་མཛེས་རྫོང་སྤང་རི་བཙུན་དགོན་གྱི་དགོན་བདག་ཕུར་བུ་ཚེ་རིང་རིན་པོ་ཆེ་མཆོག་ལ་ཐུང་མདའ་བཀག་ཉར་གྱི་ཉེས་འཛུགས་འོག་ཚེས་ ༢༨ ཉིན་ཁམས་དར་རྩེ་མདོ་མི་དམངས་ཁྲིམས་ཁང་གིས་ལོ་ ༡༥ རིང་ལ་བཙོན་མཇུག་ཁྲིམས་ཐག་གཅོད་རྒྱུ་ཡིན་པ་གསལ་བསྒྲགས་བྱས་ཡོད་ཀྱང་། ཚེས་ ༢༧ ཉིན་ཁྲིམས་ཁང་གིས་གྱོད་དོན་ཁྲིམས་གཅོད་ཀྱི་དུས་ཚོད་ཕྱིར་འགྱངས་བྱས་ཡོད་པ་ཕུར་བུ་ཚེ་རིང་གི་ཁྲིམས་རྩོད་པ་གཉིས་ལ་ཁ་པར་ལམ་ནས་བརྡ་བཏང་ཡོད་འདུག ཕུར་བུ་ཚེ་རིང་རིན་པོ་ཆེ་མཆོག་གི་ཁྲིམས་རྩོད་པ་ཅཱང་ཐེན་ཡོན་དང་ལཱི་ཧྤང་པཱང་གཉིས་ཀྱིས་ཁྲིམས་ཁང་གི་གཏན་འབེབས་གཞིར་བཟུང་ཚེས་ ༢༨ ཉིན་ཁྲིམས་རྭར་བཅར་རྒྱུའི་གྲ་སྒྲིག་བྱས་ཡོད་ཀྱང་། ཁྲིམས་ཁང་ནས་ཁ་པར་བཏང་སྟེ་བཙོན་འཇུག་ཁྲིམས་གཅོད་ཀྱི་དུས་ཚོད་གློ་བུར་དུ་ཕྱིར་འགྱངས་བྱས་ཡོད་ཚུལ་བརྗོད་ཡོད་འདུག
ཁྲིམས་རྩོད་པ་ལཱི་ཧྥང་པཱང་གིས་བརྗོད་དོན། ཁྲིམས་ཁང་གིས་ང་ལ་ཁ་པར་གྱི་ལམ་ནས་གྱོད་དོན་ཐག་གཅོད་གྱི་དུས་ཚོད་ཕྱིར་འགྱངས་བྱས་ཡོད་ཟེར་ཡང་། གྱོད་དོན་ཐག་གཅོད་ཀྱི་ཉིན་གསར་བ་གཏན་འབེབས་བྱས་མ་བྱུང་ལ། དགོས་མཁོ་བྱུང་ན་དེ་དུས་བརྡ་གཏོང་ཆོག་ཟེར། ཞེས་དང་། དེ་བཞིན་ཁྲིམས་རྩོད་པ་ཅཱང་ཐེན་ཡོན་གྱིས། རིན་པོ་ཆེ་ལ་དངོས་སུ་ཁྲིམས་ཐག་གཅོད་རྒྱུ་ཡིན་མིན་བཤད་ཚོད་མི་ཟིན་ཡང། གལ་ཏེ་རིན་པོ་ཆེ་ལ་བཙོན་འཇུག་གི་ཁྲིམས་ཐག་བཅད་དེ་ས་གནས་མི་མང་གིས་ངོ་རྒོལ་གནང་བ་ཡིན་ན་ཆག་སྒོ་ཆེན་པོ་འབྱུང་སྲིད་ལ། ས་གནས་གྲངས་ཉུང་མི་རིགས་ལ་ཆག་སྒོ་མི་འབྱུང་རྒྱུ་ནི་རིན་པོ་ཆེ་ཡི་དགོངས་པ་ཡིན་མ་ཟད། རིན་པོ་ཆེ་ཞིག་གི་སྡོད་གནས་ལ་མཇལ་བ་མང་པོ་ཡར་ཡོང་མར་འགྲོ་བྱ་རྒྱུ་རྒྱུན་ཆད་མེད་ལ། གལ་ཏེ་ཐུང་མདའ་དེ་དངོས་སུ་རིན་པོ་ཆེ་ཡི་སྡོད་གནས་ནས་རྙེད་པ་ཡིན་ཚེ། མི་གཞན་ཞིག་གིས་དེར་བཞག་པ་ཡིན་ཡང་སྲིད། རིན་པོ་ཆེ་ཡི་རིག་མས་བརྗོད་པ་ལྟར་ན། ཁོ་མོས་རིན་པོ་ཆེ་ཡི་སྡོད་གནས་ལ་གཙང་མ་བཟོ་སྐབས་ཐུང་མདའ་དེ་འདྲ་གཏན་ནས་མཐོང་མྱོང་མེད་ཟེར། ཞེས་གསར་ལམ་ཁག་ལ་བརྗོད་ཡོད་འདུག གོང་གི་ཁྲིམས་རྩོད་པ་དེ་གཉིས་ཀྱིས་ཁྲིམས་ཁང་ལ་ཡིག་ཆ་ཞིག་སྤྲད་ཡོད་པའི་ནང་ཕུར་བུ་ཚེ་རིང་རིན་པོ་ཆེ་ཡི་གྱོད་དོན་ཞིབ་བཤེར་གསལ་བོ་མ་བྱས་པར་ཁྲིམས་འགལ་གྱིས་གྱོད་དོན་ཐག་གཅོད་བྱས་ཚེ། ཕུར་བུ་ཚེ་རིང་རིན་པོ་ཆེ་མཆོག་ནི་ས་གནས་མི་མང་གི་ཆེས་བརྩི་བཀུར་དང་དད་པ་བྱེད་སའི་བླ་མ་ཞིག་ཡིན་པས་མི་རིགས་ཁག་གི་མཐུན་སྒྲིལ་ལ་གནོད་སྐྱོན་བཟོ་རྒྱུའི་ཉེན་ཁ་ཡོད་ཅེས་བཀོད་ཡོད་འདུག དེ་བཞིན་ཁྲིམས་རྩོད་པ་དེ་གཉིས་ཀྱིས་གསར་ལམ་ཁག་ལ། ཕུར་བུ་ཚེ་རིང་རིན་པོ་ཆེ་ནི་རྒྱུན་དུ་མི་མང་གི་དཀའ་ངལ་གཙིགས་སུ་འཛིན་མཁན་ཞིག་དང་ཆོས་ལ་དགའ་བའི་བླ་མ་ཞིག་ཡིན། ཁོང་གིས་དཀར་མཛེས་ས་ཁུལ་གྱི་མང་ཚོགས་ཀྱི་འཚོ་བ་ཇི་ལྟར་ཡར་རྒྱས་འགྲོ་བའི་ཕྱོགས་ལ་བསམ་བློ་གཏོང་གིན་འདུག་ལ། མི་མང་ཁྲོད་ཀྱི་དཀའ་ངལ་ཅན་སོགས་ལ་བྱམས་བརྩེ་ཆེན་པོས་རོགས་སྐྱོར་གནང་མཁན་ཞིག་ཡིན་པ་མ་ཟད། རང་གི་རྒྱལ་ཁབ་དང་མི་རིགས་ལ་དགའ་བའི་བླ་མ་ཞིག་རེད། ཅེས་འགྲེལ་བརྗོད་གནང་ཡོད་འདུག
གོང་གི་ཁྲིམས་རྩོད་པ་གཉིས་ཀྱིས་བཤད་པ་ལྟར་ན། ཁོང་ཉིད་བཀག་ཉར་བྱས་ཡུན་རིང་མནར་གཅོད་ཚད་ལས་འདས་པ་བྱས་འདུག ཡིན་ཡང་། ཁོང་གིས་རང་ཉིད་ལ་བཙུགས་པའི་ཉེས་པ་ངོས་ལེན་བྱས་ཡོད་མི་འདུག
ཕུར་བུ་ཚེ་རིང་རིན་པོ་ཆེ་མཆོག་ལ་སྔར་ལོ་སྤྱི་ཟླ་ ༥ བའི་ནང་དུ་ཁམས་དཀར་མཛེས་རྫོང་ཐོག་ཏུ་བཙུན་མ་ཚོས་རྒྱ་གཞུང་ལ་ཞི་རྒོལ་སྐད་འབོད་གནང་བར་འབྲེལ་བ་ཡོད་པའི་ཉེས་འཛུགས་འོག་ཟླ་ ༥ ཚེས་ ༡༨ ཉིན་འཛིན་བཟུང་བཙན་ཁྲིད་བྱས་ཡོད་འདུག་ལ། ཁོང་བཙན་ཁྲིད་བྱས་རྗེས་སྤང་རི་བཙུན་དགོན་གྱི་བཙུན་མ་ ༨༠ ལྷག་གིས་ཞི་བའི་ངོ་རྒོལ་གནང་ཡོད་འདུག དཀར་མཛེས་ཁུལ་དུ་ཕུར་བུ་ཚེ་རིང་རིན་པོ་ཆེ་ཡིས་རྒན་གསོ་ཁང་ཞིག་དང་སྨན་ཁང་གཉིས། བཙུན་དགོན་གཅིག་བཅས་བརྒྱབ་ཡོད་འདུག
