ཉིན་ཤས་གོང་ང་རང་དྲ་ཐོག་ནས་བོད་ནང་གི་སྒྱུ་རྩལ་བ་ཞིག་མཉམ་དུ་གླེང་མོལ་བྱུང་ལ། སྐབས་དེར་ཁོང་གིས་བརྗོད་དོན། ད་ལྟའི་གནས་སྐབས་འདི་འདྲ་ཞིག་ལ་མིག་བཙུམ་ནས་སྡོད་དམ་འུར་བརྒྱབ་ནས་འགྲོ། ཁུ་སུམ་མེར་བསྡད་ན་བོད་མི་ཚོས་བརྡར་མ་ཞེས་འབོད་ཀྱིན་འདུག་ལ། འུར་ལངས་ནས་ཆབ་སྲིད་ཀྱི་མདུང་རྩེར་ལངས་ན་ཁ་བྲལ་བ་ཞེས་ཁྲིམས་འགལ་གྱི་ནག་ཉེས་གཡོག་གིན་འདུག མ་གཞི་བཙོན་དུ་སོང་ནས་ཉི་མ་སྐྱེལ་དགོས་པ་དེ་དཀའ་ཚེགས་ཆེན་པོ་ཞིག་མ་རེད་ལ། མི་རིགས་འདིའི་ཤི་གསོན་གྱི་ཆེད་དུ་དེ་ལྟ་བུའི་བློས་གཏོང་གི་འདུན་པ་ཡང་ཡོད། ཡིན་ན་ཡང་མི་རིགས་ཀྱི་སློབ་གསོའི་ཐད་ལ་ལེགས་སྐྱེས་རེ་འབུལ་རྒྱུ་དང་མི་རིགས་སློབ་གསོའི་བྱ་བཞག་ལ་ཁུར་ལེན་དགོས་པ་ནི་བོད་ཀྱི་ཤེས་ཡོན་པ་ཚོའི་གཡོལ་དུ་མེད་པའི་འགན་འཁྲི་ཞིག་རེད་བསམ་གྱིན་ཡོད། བརྡར་མ་ཞེས་བོས་ན་འགྲིག་ལ་ཁ་བྲལ་བ་ཞེས་བཙོན་དུ་བཅུག་ན་ཡང་འགྲིག ཡིན་ཡང་འདི་དག་ལས་གལ་ཆེ་བའི་ལེགས་སྐྱེས་ནི་འདི་ལྟར་མུ་མཐུད་དུ་འཚོ་དགོས་པ་རེད་བསམ་གྱིན་ཡོད། ཅེས་གསུངས་བྱུང་ལ། ཁོང་གིས་མུ་མཐུད་བརྗོད་དོན། ཉིན་ཤས་སྔོན་ཧྥ་རན་སིའི་བུད་མེད་ཅིག་གིས་བོད་མི་ཤེས་ཡོན་པ་ཚོ་འདི་ལྟ་བུའི་གཉའ་གནོན་དང་མུན་ནག་ཅིག་གི་ནང་དུ་སྨྱོ་མཁན་མེད་པ་ཡ་མཚར་བ་ཞིག་རེད་ཟེར། རང་དབང་དང་འདྲ་མཉམ། དམངས་གཙོ་བཅས་ཀྱི་ཁོར་ཡུག་ནས་འཚར་ལོངས་བྱུང་བའི་མི་ཚོས་བོད་ནང་གི་གནས་སྟངས་ངོ་མ་ཤེས་རྒྱུ་ཧ་ཅང་ཁག་པོ་རེད་ལ། གནས་ཚུལ་ངོ་མ་ཤེས་རྗེས་ཡ་མཚར་གྱིན་འདུག ཅེས་གསུངས་བྱུང་། ཡང་ཁོང་གིས་གྲོང་ཁྱེར་ཟི་ལིང་དུ་ཡོད་པའི་བོད་རིགས་ཚོའི་གནས་སྟངས་སྐོར་ངོ་སྤྲོད་ཞུས་དོན། ཟི་ལིང་གྲོང་ཁྱེར་དུ་མདོ་དབུས་ཁམས་གསུམ་གྱི་ལས་བྱེད་དང་ཚོང་པ་སོགས་ཁྱོན་བསྡོམས་བོད་མི་ཁྲི་གཉིས་ལྷག་ཡོད་ཀྱང་། དེ་དག་གི་བྱིས་པ་རྣམས་ལ་བོད་ཡིག་སྦྱོང་སའི་སློབ་ཆུང་ཞིག་ཀྱང་མེད་པ་མ་ཟད། ཕ་མ་དང་བུ་ཕྲུག་གི་བར་དུ་སྐད་བསྒྱུར་དགོས་པའི་གནས་ཚུལ་ཡང་འབྱུང་གིན་འདུག འདི་ལྟར་བོད་རིགས་ཁྲི་གཉིས་ལྷག་ཡོད་སའི་ཟི་ལིང་གྲོང་ཁྱེར་དུ་བོད་ཡིག་སྦྱོང་སའི་སློབ་ཆུང་ཞིག་ཀྱང་མེད་པ་ནི་ཡིད་སྐྱོ་བ་ཞིག་རེད་ལ། རྒྱ་ནག་གི་གྲོང་ཁྱེར་གཞན་དུ་ཡོད་པའི་བོད་མི་དང་བོད་སྐད་ཡིག་གི་གནས་སྟངས་གང་འདྲ་ཞིག་ཏུ་གྱུར་ཡོད་དམ། འབྱུང་འགྱུར་བོད་མི་རིགས་ཀྱི་མི་རབས་གསར་བ་རྣམས་གང་འདྲ་ཞིག་ཏུ་འགྱུར་སྲིད་དམ། འདི་ནི་དུས་རྒྱུན་དུ་བདག་ལ་མནར་གཅོད་གཏོང་བྱེད་ཅིག་རེད། ཅེས་གསུངས་བྱུང་།
ཁོང་གིས་རང་གི་ཕྱག་ལས་སྐོར་ནས་གསུངས་དོན། བོད་སྐད་བརྙན་འཕྲིན་དག་ནི་མགོ་སྐོར་གཏོང་བྱེད་དང་ས་མིག་མ་སྟོང་ཙམ་རེད། བོད་སྐད་བརྙན་འཕྲིན་སྐད་བསྒྱུར་ལྟེ་གནས་ཁང་སོགས་སུ་གློག་བརྙན་གང་ཞིག་བོད་སྐད་དུ་བསྒྱུར་འདོད་པ་དང་ཡང་ན་གང་ཞིག་རང་མི་རིགས་ཀྱི་འཚོ་བ་དང་བསམ་བློར་ཐག་ཉེ་ཡོད་པ་རྣམས་སྲིད་གཞུང་གི་བཀའ་མེད་པར་བསྒྱུར་མི་ཆོག་པ་མ་ཟད། ལྷ་སྒྲུང་དང་ལོ་རྒྱུས་འཁྱོགས་བརྗོད་སོགས་དུས་རབས་ཉེར་གཅིག་གི་མི་རྣམས་ཀྱིས་ལྟ་མི་འདོད་པ་རྣམས་བོད་སྐད་དུ་བསྒྱུར་ཏེ། བོད་མི་རྣམས་ཀྱི་སེམས་ཁམས་དང་སློབ་གསོ་ལ་དེ་ལྟ་བུའི་འཁྱོགས་བརྗོད་དང་ལྷ་སྒྲུང་གིས་བསླུ་བྲིད་ཐེབས་སུ་བཅུག་ཡོད། ཅེས་གསུངས་བྱུང་།
དེ་བཞིན་ཀྲུང་གོའི་དེང་རབས་སྙན་ངག་གི་ཚབ་མཚོན་མི་སྣ་བཅུའི་ཁྲོད་ཀྱི་བོད་ཀྱི་ན་གཞོན་སྙན་ངག་པ་ཞིག་གིས་བརྗོད་ན། རང་དབང་ལུང་པར་བྲོས་བྱོལ་དུ་ཡོང་འདོད་ནི་སྐར་ཆ་གཅིག་ལ་ཡང་འགོག་ཐབས་ཤིག་མི་འདུག་ཟེར་ལ། ཁོང་གིས་རང་གི་གནས་སྟངས་སྐོར་གསུངས་དོན། ང་ཚོ་ནི་མི་ལུས་བླངས་པ་ཙམ་ལས་དུད་འགྲོ་དང་ཁྱད་མི་འདུག ཐ་ན་རང་གི་སྨྱུག་རྩེ་ནས་ཐོན་པའི་བརྩམས་ཆོས་ཀྱང་རང་ཉིད་ལ་མི་དབང་བས། འདི་ལྟ་བུའི་གནོན་ཤུགས་ཀྱི་འོག་ནས་འཚོ་བ་རོལ་རྒྱུ་ནི་ཧ་ཅང་ཁག་པོ་འདུག སྲིད་གཞུང་གིས་ངའི་གློག་ཀླད་གཏོར་ནས་ནང་དུ་ཡོད་པའི་ཡིག་ཆ་དང་བརྩམས་ཆོས་ཚང་མ་ཁྱེར་སོང་ལ། ཟླ་གཅིག་ལྷག་ལ་བཀག་ཉར་བྱས་རྗེས་གློད་བྱུང་། ཡིན་ན་ཡང་བོད་ཀྱི་ལས་དབང་མཚོན་པའི་བརྩམས་ཆོས་མང་པོ་ཞིག་ཕྱིར་སྤྲད་མ་སོང་ལ། ད་དུང་རྒྱ་ཡིག་གི་ཟིན་བྲིས་ཚང་མ་གསུབ་སོང་བ་མ་ཟད། ད་ནས་བཟུང་རྒྱ་ཡིག་གི་ཟིན་བྲིས་སུ་འཛུལ་མི་ཐུབ་པ་བཟོས་འདུག ཅེས་གསུངས་བྱུང་། ངས་ཁོང་ལ་ཁོང་གི་རྒྱ་ཡིག་ཟིན་བྲིས་མེད་པར་བཏང་བའི་རྒྱུ་མཚན་དྲིས་སྐབས། ཁོང་གིས་བརྗོད་རྒྱུར། རྒྱ་ཡིག་ཟིན་བྲིས་བརྒྱུད་རྒྱ་རིགས་དྲ་གྲོགས་མང་པོར་བོད་ཀྱི་དོན་དངོས་ངོ་སྤྲོད་བྱ་ཐུབ་ལ། རྒྱ་རིགས་ཤེས་ཡོན་པ་དང་སྨྱུག་འཛིན་པ་མང་པོས་བདེན་པ་ཞིག་རྙེད་ཐུབ་གི་ཡོད། ཡིན་ཡང་ད་ནི་འབྲེལ་ལམ་འདི་ཡང་གཏན་དུ་བཅད་སོང་། འདི་ལྟ་བུའི་མཐོང་ཆུང་དང་སེམས་ཁམས་ལ་རྒོལ་བའི་སྲིད་ཇུས་འདིར་ངོ་རྒོལ་གནང་ཐབས་མི་འདུག ཅེས་བརྗོད་བྱུང་།
གསར་འགོད་པ། ཚེ་རིང་སྐྱིད།
སྙིང་རྗེ།
སེམས་བསམ་པའི་ན་ཟུག་ཕྱི་ལ་བསྒྲགས་ཀྱང་། ཕྱི་རང་དབང་ཡུལ་གྱི་བོད་མི་དག་གིས་ཁོང་ཚོས་ཆེད་དུ་ག་རེ་བྱེད་ཐུབ་ཀྱི་ཡོད་མེད་དེའི་ཐད་དུ་འདང་རེ་རྒྱག་དགོས་ཀྱི་ཡོད་པ་མ་རེད་དམ།