བོད་ཀྱི་བླ་མ་ཞིག་ལ་ཨ་རིའི་ནང་ཆེ་བསྟོད་ཀྱི་གཟེངས་རྟགས་ཤིག་འབུལ་གཏན་འཁེལ་ཡོད་འདུག
བོད་མི་མང་སྤྱི་འཐུས་ཚོགས་གཙོ་ཟུར་པ་དང་སྤྱི་འཐུས་ལས་ཐོག་པ་པདྨ་འབྱུང་གནས་ལགས་ཀྱིས་འདི་གར་གནས་ཚུལ་སྤྲད་པ་ལྟར་ན། ཨ་རིར་གནས་སྡོད་དཔལ་ས་སྐྱའི་བླ་མ་པདྨ་དབང་གྲགས་མཆོག་ལ་ཨ་རིའི་ (National Ethnic Coalition Of Organization foundation,Ins)ནས་ཆེ་བསྟོད་གཟེངས་རྟགས་ (Ellis Lsland Medal Of Honor Awards)ཞེས་པ་དེ་འབུལ་རྒྱུ་ཡིན་འདུག
གོང་གསལ་ཚོགས་པ་དེས་ཕྱི་ཚེས་ ༩ ཉིན་བླ་མ་པདྨ་དབང་གྲགས་མཆོག་ལ་གཟེངས་རྟགས་འདི་འབུལ་རྒྱུ་ཡིན་པ་དང་། དེ་ནི་བོད་མི་ཞིག་ལ་ཐོབ་པ་ཐོག་མ་ཡིན་འདུག གཟེངས་རྟགས་འདི་ནི་ཨ་རིའི་ Ellis Lsland ཞེས་པའི་ས་ཁུལ་གྱི་ལོ་རྒྱུས་དང་འབྲེལ་བ་ཡོད་པ་ཞིག་ཡིན་པ་དང་། གཟེངས་རྟགས་འདི་ལོ་ལྟར་སྤྱི་ཚོགས་ལ་སྣེ་ཁྲིད་དེ་ལེགས་སྤེལ་ཉེས་འགོག་གི་ནུས་པ་འདོན་མཁན་དག་ལ་སྤྲོད་ཀྱིན་ཡོད་འདུག བླ་མ་པདྨ་དབང་གྲགས་ལ་ཆེ་བསྟོད་གཟེངས་རྟགས་འབུལ་བར་སྔོན་བརྡའི་ཡི་གེ་ནང་གསལ་དོན། སྐུ་ཉིད་ཀྱི་མཛད་འཕྲིན་གྱིས་ཨ་རིའི་མི་མང་དང་སྤྱི་ཚོགས་ནང་ཕན་པ་རྒྱ་ཆེར་ཐོན་ཡོད་པ་གཞིར་བྱས་ནས། སྤྱི་ལོ་ ༢༠༠༩ ལོའི་(Ellis Lsland Medal Of Honor Awards)གཟེངས་རྟགས་འདི་ཁྱེད་ཉིད་ལ་ཕུལ་བར་ང་ཚོའི་གཟི་བརྗིད་དང་དྲང་བདེན་ཡིན་པས། སྐུ་ཉིད་ཀྱིས་ངོས་ལེན་ཡོང་བའི་རེ་བ་ཡོད། ཅེས་བྲིས་ཡོད་འདུག
བླ་མ་པདྨ་དབང་གྲགས་ནི་སྤྱི་ལོ་ ༡༩༥༤ ལོར་སྤུ་ཧྲེངས་སུ་སྐུ་འཁྲུངས་པ་དང་། ༡༩༥༩ ལོར་ཕ་མ་དང་མཉམ་དུ་བཙན་བྱོལ་ལ་ཕེབས་ཏེ་ལྷོ་ཕྱོགས་མོན་གྷོ་གཞིས་ཆགས་སུ་བཞུགས་ཡོད་འདུག ཁོང་དགུང་ལོ་ ༧ ལ་ཕེབས་སྐབས་རབ་ཏུ་བྱུང་ཞིང་། དེ་ནས་བཟུང་དཔལ་ས་སྐྱ་ཁྲི་འཛིན་རིན་པོ་ཆེ་སོགས་དགེ་བའི་བཤེས་གཉེན་དུ་མའི་ཞབས་ལ་གཏུགས་ནས་སློབ་གཉེར་གནང་འདུག ༡༩༨༢ ལོར་ས་སྐྱ་ཁྲི་འཛིན་རིན་པོ་ཆེ་ཡིས་ཁོང་ཉིད་ཆེད་དུ་ཨ་རིར་ནང་ཆོས་སྤེལ་བར་མངགས་ཡོད་པ་དང་། ད་ལྟ་ཁོང་ཉིད་ཨ་རི་ནིའུ་ཡོག་དཔལ་ས་སྐྱའི་ཆོས་ཚོགས་ཀྱི་ངེས་སྟོན་པ་དང་ཝིག་རམ་ཤཱི་ལ་རྨང་གཛུགས་གནང་མཁན་ཡིན་ལ། ད་དུང་བལ་ཡུལ་དང་རྒྱ་གར་ལྷོ་ཕྱོགས་མོན་གྷོ་བཅས་སུ་དགོན་པ་དང་སློབ་གྲྭ་སོགས་ཀྱང་གསར་འཛུགས་གནང་ཡོད་འདུག
བོད་ཕྲུག་ཁྱེད་ཀྱི་སྐུ་ཚེར་བ་ཆད་མེད་པར་ཤོག།ཁྱེད་ཀྱི་མཛད་འཕྲིན་མཁའ་དང་མཉམ་པར་ཤོག།
རྟེན་འབྲེལ་ཞུ། ཕྱི་རྒྱལ་ན་ཡོད་པའི་བོད་ཀྱི་བླ་མ་དགེ་བཤེས་རྣམས་ཀྱི་ངོ་སོ་ཡར་ལ་བསྟོད་སོང།
ཆོས་ཚོང་བརྒྱབ་ནི་མ་ཡིན་པར་ལྷག་བསམ་དངོས་གནས་དེ་ཡིན་ན་རྗེས་སུ་ཡི་རང་ཡོད།
དངོས་གནས་དགའ་འོས་པ་ཞིག་རེད། རྟེན་འབྲེལ་ཞུ།
ཁོང་ལ་གཟེངས་རྟགས་ཐོབ་པ་དངོས་གནས་དགའ་འོས་པ་ཞིག་རེད། ང་ཚོའི་སྤྱི་ཚོགས་ནང་བླ་སྤྲུལ་དང་མཁན་པོ་དགེ་བཤེས་སོགས་མང་དག་ཡོད་པས། ཁོང་ལྟ་བུ་མཛད་རྗེས་ཅན་བྱུང་ན་ཅི་མ་རུང་སྙམ། ད་རུང་བསམ་ཚུལ་གཞན་ཞིག་ཞུ་འདོད་པ་ནི་འབྱོར་ལྡན་བླ་སྤྲུལ་ཚོས་ང་ཚོའི་སྤྱི་ཚོགས་ནང་གི་གནས་སྟངས་ལ་མང་ཙམ་གཟིགས་ཐུབ་དགོས་ཤིང༌། དགོན་པ་གྲྭ་ཚང་གཅིག་པུར་ཡར་རྒྱས་དང་ཧིན་སྒོར་དང་ཨ་སྒོར་ས་ཡ་མང་པོ་འགྲོ་སོང་བཏང་ནས་མི་ཡུལ་ལུང་པ་འདུ་ཁང་རྫིག་པོ་རེ་གསར་བཞེངས་བྱས་ན་མ་འོངས་བོད་ལ་ལོག་དུས་མཉམ་དུ་ཁྱེར་མི་ཐུབ་པ་ཧ་གོ་དོན་གསལ་རེ་ལ། དེ་ལས་སྤྱི་ཚོགས་ནང་གི་ཉམས་ཐག་རིགས་ཀྱི་བུ་ཕྲུག་སློབ་ཡོན་སོགས་རོགས་རམ་བྱས་ན་མ་འོངས་བོད་ཀྱི་སོན་རྩ་འགྱུར་ངེས་རེད་ལ། སྐུ་ཞྂབས་པདྨ་དབང་གྲགས་མཆོག་གིས་གཟེངས་རྟགས་ཐོབ་རྗེས་དེ་ལྟར་དགོངས་བཞེད་ཡོང་བ་ཞུའོ།
ཨོ་རེད་མོ། གདོང་དམར་བོད་པ་ཚང་གི་བྱས་རྗེས་ཅན་འདི་ལ་ཆེ་བསྟོད་གསོལ་བ་ནི་འོས་ཤིང་མཚམས་པ་ཞིག་རེད། ངོ་མ་དགའ་དགོས་པ་རེད། འདི་བུ་མིག་བལྟས་སུ་བཞག་ནས་བོད་པ་ཚང་གི་ཆེར་མཐོང་བརླགས་ཡོད་པ་མ་རེད གོང་ས་མཆོག་གི་བཀའ་གསུང་ཅི་སྒྲུབ་ཁ་སེམས་གཉིས་ཀ་མཐུན་མཁན་ཞིག་ཡིན་ས་རེད
ངས་ཁོང་ཞལ་ཚོར་གི་ཡོད། གྲྭ་པ་ཉམ་ཆུང་ཡོན་ཏན་ཆེན་པོ་ཅན་ཞིག་དང་བོད་དོན་ལ་ལྷག་བསམ་ཆེན་པོ་ཡོད་མཁན་ཞིག་ཀྱང་རེད། དེ་བཞིན་བརྡ་སྤྲོད་བསྟན་བཅོས་ལ་ནང་བྱན་ཆུད་དེ་བོད་ཀྱི་ལོང་ཡིག་གམ་འབུར་ཡིག་གསར་བཟོ་དང་འབྲེལ་བརྡ་སྤྲོད་པའི་བསྟན་བཅོས་གསར་བ་ཞིག་རྩོམ་སྒྲིག་གནང་བཞིན་པའི་སྒང་རེད། དབྱིན་ཡིག་དབྱིན་སྐད་ནི་ཆུ་རྒྱུགས་རྒྱུགས་རེད།
བོད་ཀྱི་བླ་མ་དང་དགེ་བཤེས་རྣམས་པ་ཕྱི་རྒྱལ་ཁག་ཕེབས་ནས་འདི་འདྲའི་རླབས་ཆེན་གྱི་མཛད་རྗེས་བཞག་པ་ཡིན་ན་དངོས་གནས་གཟི་བརྗིད་རེད།
བོད་ཀྱི་བླ་མ་དང་དགེ་བཤེས་རྣམས་པ་ཕྱི་རྒྱལ་ཁག་ཕེབས་ནས་འདི་འདྲའི་རླབས་ཆེན་གྱི་མཛད་རྗེས་བཞག་པ་ཡིན་ན་དངོས་གནས་གཟི་བརྗིད་རེད།
བཀྲ་ཤིས་བདེ་ལེཊ་ཞུ། གཟེངས་རྟགས་ཀྱི་མཛད་སྒོ་དངོས་གཞི་སྐབས་གོ་སྐབས་ལེན་ཏེ་བོད་ནང་གི་དཀའ་སྡུག་གསལ་བཤད་གནང་བར་བསྐུལ་འདེབས་ཞུ་རྒྱུ་ཡིན། ཐུགས་རྗེ་ཆེ།
དངོས་གནས་བཟང་ངོ་
ཨོ་ངོ་མ་དགའ་ནི་ཟི་རེད། གནས་ཚུལ་ཡག་པོ་འདུག་
རྟེན་འབྲེལ་ཞུ། དངོས་ནས་ཡག་པོ་རེད། བོད་པ་གཅིག་གི་མིང་བཟང་དོན་བཟང་ས་གནས་གང་སར་གྲགས་པ་ཡིན་ན། བོད་པ་སྤྱི་ལ་ཕན་ངེས་རེད།
དགའ་བྱུང་ཡག་པོ་འདུག