བརྒྱུད་ལམ་ཐོག་གི་གྲང་དམག

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༤༤༨ སྟེང་གི་རྩོམ་སྒྲིག་པའི་གཏམ།

གལ་སྲིད་དེ་རིང་བོད་རྒྱ་གཉིས་ཀྱིས་རྒྱལ་སྤྱིའི་སྟེང་དུ་དྲིལ་བསྒྲགས་ཀྱི་དམག་འཁྲུག་ཅིག་རྒྱག་གི་ཡོད་ཚེ། རྒྱ་ནག་གིས་ད་སྐབས་གསུམ་གཉིས་ས་ཡི་ཁྱོན་འདི་དྲིལ་བསྒྲགས་ཀྱིས་དབང་དུ་བསྒྱུར་ནས་ང་ཚོ་སའི་གོ་ལའི་མཐའ་སྣེ་ཆུང་ཆུང་ཞིག་ལ་འདེད་ཀྱིན་ཡོད།

ལོ་འདིའི་ཕྱི་ཟླ་ ༤ པའི་ཚེས་ ༩ ཉིན་རྒྱ་ནག་གིས་ང་ཚོའི་གནས་ཚང་རྒྱལ་ཁབ་ནང་གི་ཧིན་རྡུའི་དུས་བབ་གསར་ཤོག་སྟེ། The Hindustan Times ཞེས་པའི་སྟེང་། ཀྲུང་གོའི་བོད་ཀྱི་འདས་པ་དང་ད་ལྟ་བ། ཞེས་ཁ་བྱང་དུ་བཀོད་དེ་ཤོག་ངོས་བརྒྱད་ཀྱི་གསལ་བསྒྲགས་ཤིག་ཉོས་ཡོད། དེ་བཞིན་དུ། ཟླ་དེའི་ཚེས་ ༦ ཉིན་ཨབ་རི་ཁའི་རྒྱལ་ཁབ་ Malawi ཡི་ཉིན་རེའི་གསར་ཤོག་ Daily Times of Malawi ཞེས་པའི་སྟེང་དུ། བོད་ལ་དམངས་གཙོའི་བཅོས་བསྒྱུར་བྱས་ནས་མི་ལོ་ ༥༠ འཁོར་ཞེས་ཁ་བྱང་དུ་བཀོད་དེ། གསར་ཤོག་དེའི་ཤོག་ངོས་ ༡༨ ཉོས་ཡོད། འདི་ལྟར་གླིང་ཕྲན་དང་མངའ་ཁུལ་འདི་དག་ནང་བོད་དོན་དྲིལ་བསྒྲགས་ཀྱི་འགད་རྫས་ཆེན་པོ་རེ་འཕངས་ཏེ། དམག་འཁྲུག་འདི་གཟབ་ནན་གྱིས་རྒྱག་གིན་ཡོད།

རྒྱ་ནག་གི་དམག་འཁྲུག་ནི་འདི་ཙམ་ག་ལ་ཡིན། ཁོང་ཚོས་ནུབ་ཕྱོགས་སྟོབས་ཆེན་རྒྱལ་ཁབ་ཁག་གི་གསར་འགོད་བརྒྱུད་ལམ་ནི་འདི་ལྟར་ཉོ་ཐུབ་མེད་ནའང་། ཁོང་ཚོས་རང་ཉིད་ཀྱི་བརྒྱུད་ལམ་གསར་གཏོད་བྱས་ཤིང་། ཕྱི་ཟླ་ ༤ པའི་ཚེས་ ༢༠ ཉིན་གུང་ཁྲན་ཏང་གི་མགྲིན་པ་ལྟ་བུའུ་མི་དམངས་ཉིན་རེའི་ཚགས་པར་གྱི་དབྱིན་ཡིག་དཔར་མ་འགྲེམས་མགོ་བརྩམས་ཤིང་། ད་ཆར་གསར་ཤོག་དེར་དྲ་ཐོག་ཏུ་སྐད་ཡིག་ཆེན་པོ་ ༦ ཡོད། འདི་དག་གི་ཀློག་མཁན་ནི་ཨ་རི་དང་ཡུ་རོབ། ར་ཤི་ཡ། ཨ་རབ། ཉི་ཧོང་བཅས་ཡིན། རྒྱ་ནག་གིས་བརྒྱུད་ལམ་རྒྱ་བསྐྱེད་ཀྱི་ཕྱོགས་ལ་རྒྱ་སྒོར་ཐེར་འབུམ་ ༤༥ གཏོང་གི་ཡོད་ལ། ཁོང་ཚོས་ཀྲུང་དབྱང་བརྙན་འཕྲིན་ཁང་གི་རྒྱལ་སྤྱིའི་སྡེ་ཚན་ཞེས་པའི་ལེ་ཚན་དུ་དབྱིན་སྐད་ཐོག་དུས་ཚོད་ཉེར་བཞི་དང་། གཟའ་རེའི་ཉིན་བདུན་ལ་ཆད་མེད་དུ་གནས་ཚུལ་གཏོང་གི་ཡོད། ཞིན་ཧྭ་གསར་འགྱུར་དེ་སྐད་ཡིག་ཆེན་པོ་ ༦ དྲུག་གི་ནང་ཡོད་པའི་ཁྲོད་དབྱིན་ཡིག་དང་ཧྥུ་རན་ཆི། སི་པཱ་ནེ་ཤི ཨ་རབ་སྐད་བཅས་ཚུད་ཡོད། ལོ་སྔོན་མ་ནས་ཞིན་ཧྭ་དྲ་རྒྱ་ལ་བོད་ཡིག་གི་དྲ་ཤོག་ཅིག་ཀྱང་ཡོད། འདི་ལྟར་རྒྱ་ནག་གིས་དྲིལ་བསྒྲགས་ཀྱི་དམག་འཁྲུག་འདིའི་ལམ་ནས་ཁྱོད་ཤི་ང་གསོན་གྱི་དམག་འཁྲུག་ཅིག་རྒྱག་གི་ཡོད།

གསར་འགྱུར་བརྒྱུད་ལམ་གྱི་ཕན་ནས་མཁས་པའི་གཏམ་བཤད་དང་རིག་གཞུང་ཟློས་གར་སོགས་ཀྱི་ཆ་ནས་ཀྱང་ཤུགས་ཆེ་རུ་བཏང་སྟེ། ནུབ་ཕྱོགས་ཀྱི་སློབ་གླིང་ཁག་ཏུ་ཀྲུང་གོའི་བོད་ཀྱི་གནས་སྟངས་དང་ལོ་རྒྱུས་ཀྱི་གནས་བབ། རིག་གཞུང་གི་འབྲེལ་བ་བཅས་དྲིལ་བསྒྲགས་བྱེད་ཀྱིན་ཡོད། ཉེ་ལམ་ཡུ་རོབ་ཀྱི་གྲོགས་པོ་ཞིག་གིས་ང་ལ་བཤད་དོན། རྒྱ་ནག་གི་གཞུང་ཚབ་ཁག་གི་ནང་དུ་རིག་གཞུང་གི་སྡེ་ཚན་རེ་བཙུགས་འདུག་ལ། དེ་དག་གིས་ནུབ་ཕྱོགས་ཀྱི་སློབ་གླིང་སོགས་སུ་རྒྱ་ནག་ངོ་སྤྲོད་དང་བོད་དོན་དྲིལ་བསྒྲགས་ཀྱི་ལས་ཀ་བྱེད་ཀྱིན་འདུག བཙན་བྱོལ་བོད་གཞུང་གིས་ཀྱང་གཞུང་ཚབ་ཁག་ཏུ་བོད་ཀྱི་རིག་གཞུང་གི་སྡེ་ཚན་རེ་འཛུགས་རྒྱུ་ནི་ཁ་ཚ་དགོས་གཏུགས་རེད་ཟེར།

བོད་མི་ཚོ་དྲིལ་བསྒྲགས་ཀྱི་ནུས་པར་ཡིད་ཆེས་བརྟན་པོ་ཡོད་ལ། འདས་པའི་ལོ་ ༥༠ རིང་གི་གྲུབ་འབྲས་ཆེ་ཤོས་ཤིག་ཀྱང་བོད་དོན་དྲིལ་བསྒྲགས་ཡིན། བོད་མི་ཚོའི་བསམ་བློའི་རྨང་རྡོ་ནི་བདེན་པ་ནི་སྔ་ཕྱི་ཙམ་མ་གཏོགས་བདེན་ཐོག་ལ་འཁྱོལ་ཐུབ་པ་དང་། འདི་ལས་ལྡོག་ན་ཕམ་པར་འགྱུར་ངེས་པ་དེ་ཡིན། རྒྱ་ནག་ཀྱང་དྲིལ་བསྒྲགས་ཀྱི་ནུས་པར་ཡིད་ཆེས་ཡོད། ཁོང་ཚོར་འཆར་གཞི་དང་གདེང་ཚོད་ཀྱང་ཡོད། རྒྱ་ནག་གིས་རྫུན་མ་གཅིག་ཐེངས་བརྒྱར་བཤད་ན་བདེན་པར་འགྱུར་བའི་རྩ་དོན་འདི་འཁྱེར་ཡོད།

ང་ཚོའི་འཐབ་རྩོད་འདི་གོ་མཚོན་གྱི་ཁ་ནས་རྒྱལ་མི་ཐུབ་པ་ནི་ང་ཚོས་ལོ་ ༥༠ གོང་ནས་ཤེས་ཡོད། ད་ནི་བརྡ་འཕྲིན་གྱི་ལམ་ནས་ཀྱང་རྒྱལ་ཐུབ་མིན་གྱི་ཐེ་ཚོམ་སྐྱེས་མགོ་ཚུགས། དེའི་ཁར་ང་ཚོས་ད་བར་དུ་བོད་པ་རང་གི་གཞུང་སྒེར་གྱི་གསར་འགོད་བརྒྱུད་ལམ་ཁག་ལ་བསྐྱར་ཞིབ་དང་། ལམ་སྟོན། དཔུང་ཁག་ཧྲག་སྒྲིག་བྱེད་ཐུབ་མེད་པ་ནི་སྐྱོ་གར་གཞན་ཞིག་ཡིན།