༄༅།། དཔལ་ལྡན་རང་གཞུང་ཤེས་རིག་ལྷན་ཁང་དབུ་ལས་རྣམ་པ་དང་ཤེས་ཡོན་སྲིད་བྱུས་ཚོགས་མི་བཅས་པའི་སྙན་ལམ་དུ།
བར་སྐབས་ལོ་རྒྱུན་མང་སོང་རིང་རང་རེའི་སློབ་ཕྲུག་ཁག་གི་ཤེས་ཡོན་གནས་ཚད་དང་། ཡ་རབས་སྤྱོད་བཟང། སྨྲ་བརྗོད་བྱེད་སྟངས་སོགས་སྐྱོ་ཐོག་སྐྱོ་རྩེག་སྦས་བསྐུངས་བྲལ་བའི་ཡོངས་གྲགས་གནས་བབས་ཐོག་འབྲེལ་ཆགས་རྣམ་པས་སྐྱོན་སེལ་གང་དགའ་ཅི་ལེགས་གྲོས་གཤོམ་གོ་བསྡུར་གནང་བཞིན་པ་གོ་ཐོས་བྱུང་བར་ཐུགས་རྗེ་ཆེ་ཞུ་བ་དང་ཆབས་ཅིག་ཕྲན་ལ་ལས་དོན་འགན་འཁྲི་མེད་ན་ཡང་འདས་པའི་ལས་འབྲེལ་བག་ཆགས་དབང་གིས་རི་བོང་རྡོ་རྫུས་འདུག་ཐབས་བྲལ་བས་སྔོན་ཆད་རང་བྱས་མྱོང་སྒྲུབ་གཞི་རྩར་བྱས་ཏེ་ཟོལ་མེད་དཔྱད་བརྗོད་ལེ་ཚན་ཁག་གསུམ་གྲོས་འདེབས་འབུལ་འདོད་བྱུང་བ་ནི།
གཅིག༽ སྐྱོན་གནད་ཐུག་ས་གང་ཡིན།
གཉིས༽དཔྱད་གཞིའི་ཆེད་དུ་སྔོན་བྱུང་ལོ་རྒྱུས་ངོ་སྤྲོད།
གསུམ༽སློབ་དགེ་དང་། མ་ཚབ་ཀྱི་འོས་ཆོས་ཅི་འདྲ་དགོས་པ་བཅས་ཡིན།
སྐྱོན་གནད་ཐུག་ས་གང་ཡིན།
༡༽གཏན་སློབ་ཁག་གི་དབྱིན་ཧིན་སློབ་དགེ་རྣམས་ཕུད་དེ་བྱིངས་སློབ་དགེ་ཕལ་ཆེ་བར་དབྱིན་བོད་ཤེས་ཚད་ཡོད་པ་ཙམ་གྱི་མ་འགྲིག་པར་རྩ་འཛུགས་སློབ་ཁྲིད་བྱེད་སྟངས་ཚན་རིག་དང་འབྲེལ་བའི་རིག་གཞུང་མན་ངག་དམིགས་བསལ་སྦྱོང་བརྡར་ཚད་ལྡན་ཐོབ་མྱོང་མེད་པ་དང་། གཞན་ཕན་ཤ་ཚ་རྣམ་དག་ཞན་དབང་དགེ་སློབ་དབར་ཕན་ཚུན་བརྩེ་སེམས་བར་ཐག་རིང་འགྱངས་ཆེ་སྐྱོན།
༢༽སློབ་ཕྲུག་དང་རྒྱུན་གཏན་འདྲིས་གཤིབ་ཆེ་བའི་ཁྱིམ་ཚང་མ་ཚབ་ཕལ་ཆེ་བའི་ལས་ཀའི་འགྲོ་འདུག་བཀོལ་ནུས་འཇོན་ཐང་གང་ཅི་དང་། སྒྲིག་སྤྱོད་སློབ་གསོ་བྱེད་པའི་ཤེས་ཚད་དམན་པའི་སྐྱོན་ཆ།
༣༽སློབ་གྲྭ་ཡོངས་ཀྱི་སྒྲིག་ལམ་བཀོད་འཆུན་ལ་རང་ཟོན་དབང་གིས་ཐུགས་སྣང་ཆུང་བ་དང་། སློབ་གསོའི་ལས་འཆར་ཡོངས་རྫོགས་གཏན་འབེབས་རྒྱུན་འཁྱོངས་མེད་སྐྱོན།
༤༽ཤེས་ཡོན་དང་འབྲེལ་བའི་འགན་ཡོད་རྣམ་པས་ལས་བྱེད་སོ་སོ་དང་། ལྷག་དོན་དུ་དགོས་ངེས་སློབ་དགེའི་ཤེས་འཇོན་དང་། སློབ་ཁྲིད་བྱེད་ཚུལ། སློབ་འཆར་སྒྲིག་སྟངས། ཀུན་སྤྱོད་འཁྱེར་སོ་སོགས་ལ་ཚད་གཞི་ལྡན་མིན་ཞིབ་དཔྱད་བཏང་འཛིན་དམ་ཚགས་མེད་པའི་སྐྱོན་ཆེ་བཅས། གཞི་རྐང་ཁྱེད་རྣམ་པ་ཕལ་ཆེ་བ་དགུང་ན་ཆུང་ཆུང་ཡིན་སྟབས་ཁ་ཉིན་གྱི་ཡག་ཡག་དེ་རིང་མི་དྲན་པ་ཐུགས་ཁག་ལར་ནས་མེད་པར་བརྟེན་དེ་སྔའི་སློབ་གྲྭའི་རྩ་འཛུགས་འགྲོ་སྟངས་བྱུང་ལུགས་གང་ཡིན་པ་ངོ་སྤྲོད་སྙིང་བསྡུས་ཤིག་ཞུ་ན་གཞི་རྩ་དེ་ལས་སྐྱོན་ངོ་ཆ་གསལ་ཙམ་འཕྲོད་པའི་རེ་བ་ཡིན།
དཔྱད་གཞིའི་ཆེད་དུ་སྔོན་བྱུང་ལོ་རྒྱུས་ངོ་སྤྲོད།
༡༽ཕྱི་ལོ་ ༡༩༦༠ ཐམ་པའི་ལོ་འགོར་བཞུགས་སྒར་མ་སུ་རི་ལ་ཐོག་མར་སློབ་གྲངས་ ༥༠ ཡོད་པའི་སློབ་གྲྭ་གསར་འཛུགས་གྲས་སུ་ང་རང་ཡང་ཡོད། ཡང་ཕྱི་ལོ་ ༡༩༦༡ ལོ་འགོར་ངྷ་རམ་ས་ལ་ནས་བོད་ཕྲུག་ཆུང་གྲས་གྲངས་ ༢༦༥ དུས་གཅིག་ཏུ་འབྱོར་རྐྱེན་ང་ཚོ་ཁག་གཅིག་གི་རང་ངོས་སློབ་སྦྱོང་ཚ་འཐོར་ཏེ་བོད་རང་ནས་ཡིག་རྩིས་ཤེས་པའི་སློབ་ཕྲུག་རྒན་པ་གྲངས་ ༡༢ དང་ལ་སྦུག་ནས་ ༢ བཅས་རྒྱ་གར་ཡུ་སྦི་གྲོང་ཁྱེར་ལག་ནའུ་ཨི་ཀྲར་སི་ཞེས་པའི་མཐོ་སློབ་ཁང་དུ་དགེ་རྒན་འོས་སྦྱོང་ཟླ་དྲུག་རིང་བྱས། མ་སུ་རི་སློབ་གྲྭར་ཕྱིར་འཁོར་མཚམས་ཡང་བསྐྱར་མ་སུ་རིར་ཨ་མི་རི་ཀའི་༼འོལ་སི་ཀྲོབ༽སློབ་གྲྭའི་དགེ་ཆེ་གཞོན་པ་མི་སི་འོས་གར་ཞུ་བ་ཁོང་ནས་རེ་གཟའ་སྤེན་པ་དགོང་དྲོ་ནམ་ཡིན་ལ་ང་ཚོ་སློབ་ཕྲུག་ཉི་ཤུ་སྐོར་ལ་དགེ་རྒན་གྱི་སློབ་ཁྲིད་བྱེད་ཐབས་ཚན་རིག་དང་འབྲེལ་བའི་གསར་གཏོད་མན་ངག་སྦྱོང་བརྡར་ཟླ་གྲངས་མང་པོར་གནང་བ་རེད། སྐབས་དེར་སྐད་སྒྱུར་དང་ཕྱག་རོགས་ཕྲེང་རིང་ཨ་མ་ལགས་རེད། ང་ཚོ་སློབ་དགེ་མིང་འཛིན་པ་རྣམས་ལ་ཟླ་རེ་སོ་ཁྲུ་སོ་སྨན་ཉོད་དོད་ཡིན་ཞེས་ཟླ་རེ་ཧིན་སྒོར་ ༡༠།༠༠རེ་གནང་མུས་ལ་ད་དུང་དེ་ལས་མང་ཙམ་གནང་རེ་བྱེད་མཁན་སུ་ཞིག་མེད་བརྗོད་ན་རྫུན་དུ་མ་འགྲོ།
༢༽ང་ཚོས་དགེ་རྒན་སྦྱོང་བརྡར་གྱི་ནང་དོན་མཚན་ཉིད་ཐབས་བེད་བཅད་ནས་སློབ་ཕྲུག་རྣམས་ལ་ཤ་ཚ་བརྩེ་སེམས་ཀྱི་ལམ་ནས་སློབ་ཁྲིད་བྱས་པ་ཡིན་ཙང་སློབ་ཕྲུག་ཚོས་ཀྱང་དེ་བཞིན་དུ་དགེ་རྒན་ལ་གུས་བཀུར་སེམས་འཁྲི་དང་། ཡིད་ཆེས་བློ་གཏད་ངང་ནས་སློབ་ཁྲིད་བྱས་ཚད་རིག་པ་རྩལ་སྟོན་གྱིས་ཤེས་ཡོན་སྦྱང་འབྲས་ཁྱད་འཕགས་ལྡན་པ་བྱུང་བ་རེད།
༣༽ཕྲན་ཚོར་དགེ་རྒན་གྱི་ལས་འགན་ཡོད་པ་ཙམ་དུ་མ་ཚད། བཅུ་དཔོན་ལས་ཁུར་ཡང་ཡོད་པ་ཡིན། གང་ཡིན་ཟེར་ན་ཕ་ཚབ་མ་ཚབ་མང་པོ་བསྐོ་འཇོག་བྱས་པར་སློབ་གཞུང་ལ་ཕོགས་གྲོན་དང་སྡོད་གནས་ཆ་རྐྱེན་མེད་སྟབས་ང་ཚོ་སློབ་དགེ་ཡིན་མིན་ལ་མ་ལྟོས་པར་ཕྲུ་གུ་ཆུང་བ་བཅུ་རེ་རྩིས་སྤྲོད་ཡོད་པ་རྣམས་མཚན་མོ་བཅུ་ཤོག་མལ་ཁང་འབྲེལ་མཚུངས་བཅུ་དཔོན་འགྲོ་རེས་བྱས་ཏེ་ཕྲུ་གུ་ཆབ་གསང་ལ་ཁྲིད་ཞོར་མལ་ཆས་འགེབས་གཡོག་དང་། ཉིན་མོ་བཅུ་ཤོག་ཞོག་ཇ་དང་། སྔ་དགོང་ལྟོ་ཟས་སྐབས་སུ་ཟ་སྟངས་འགྲོ་ལུགས་དང་། ཡ་རབས་སྤྱོད་བཟང་བསྟེན་ཚུལ་སློབ་གསོ་རྒྱུན་གཏན་བྱེད། དེ་བཞིན་ནད་བྱུང་ན་སྨན་ཁང་བསྟེན་གཏུགས། རེས་གཟའ་སྤེན་པ་ཉིན་ཕྱེད་དང་། ཉི་མའི་གུང་གསེང་གང་རུང་ཐོག་བཅུ་ཤོག་ཕྲུ་གུའི་གཟུགས་པོ་དང་། གྱོན་གོས་ཁྲུ་རོགས་བྱེད་དགོས་སོགས་སློབ་སྤྱིའི་བཀའ་ཁྱབ་སྒྲིག་སྲོལ་ལ་མ་ལྟོས་པར་ཕ་མ་དང་སྤུན་མཆེད་ཡུན་རིང་མཐོང་ཐོས་བྲལ་བའི་ཉམ་ཐག་དྭ་ཕྲུག་ལྟ་བུའི་བུ་ཕྲུག་ཆུང་ཆུང་དེ་ཚོར་རང་གི་བུ་ཕྲུག་དང་ཁྱད་མེད་ཤ་ཚ་སེམས་ཁུར་གཅེས་སྐྱོང་གང་ཡོང་བྱས་པའི་ཉེར་ལེན་ལ་བརྟེན་ནས་ཆུང་བས་ཆེ་བར་སེམས་ཁྲི་ཡིད་ཆེས་བྱས་པ་བརྒྱུད་ཡ་རབས་འགྲོ་འདུག་སྤྱོད་གསུམ་མིག་ལྟོས་བཟང་འགྲན་རྒྱུད་འཇགས་ཐུབ་པ་བྱུང་བ་རེད།
༤༽གཞན་ཡང་གོང་དང་མཚུངས་པའི་ལོ་རྒྱུས་ཤིག་ལ་ཕྱི་ལོ་ ༡༩༦༢ ལོ་མཇུག་ཏུ་ངྷ་རམ་ས་ལའི་ཀང་ར་རྫོང་ཁུལ་ས་གནས་ཤིག་ལ་མི་གྲངས་ ༤༠ སྐོར་ཡོད་པའི་དགེ་འོས་སྦྱོང་བརྡར་ཐེངས་གཉིས་ཚུགས་པའི་སློབ་ཡུན་ལོ་གཉིས་རེ་ཡིན་འདུག་ཅིང། སློབ་མིའི་ཡོང་ཁུངས་ནི་གདན་ས་གྲྭ་ཚང་ནས་ནང་ཆོས་བོད་ཡིག་ཤེས་ཚད་ལྡན་པའི་ན་གཞོན་བླ་མ་དང་སྤྲུལ་སྐུ། དགེེ་བཤེས། དགེ་སློབ། མི་སྐྱ་གང་ཙམ་བཅས་དྲག་འདེམས་གནང་བའི་དགེ་འོས་སྦྱོང་བརྡར་སློབ་གྲྭ་དེའི་སློབ་སྤྱི་དང་། སྙན་ངག་སུམ་རྟགས་སློབ་དཔོན་གཅིག་ལྕོགས་དགའ་ལྡན་འཛིན་སྨད་རིན་པོ་ཆེ་དང་། རྒྱལ་རབས་ཆོས་འབྱུང་སློབ་དགེ་རྒྱུད་སྨད་མཁན་ཟུར་ངག་དབང་ལེགས་ལྡན་རིན་པོ་ཆེ། གཞུང་སྲོལ་ཡིག་ལམ་འགྲོ་སྟངས་དང་། ཡིག་གཟུགས་དགེ་རྒན་ཤེས་རིག་བློ་བཟང་དོན་ལྡན། དབྱིན་ཡིག་དང་།གཞི་རྩའི་དགེ་འོས་སློབ་ཁྲིད་བྱེད་སྟངས་དེང་གི་རིག་པའི་གཞུང་ལུགས་གཏོད་ཚུལ་ལམ་ནས་མན་ངག་སྟོན་པའི་ཟབ་ཁྲིད་སློབ་དགེ་ཁེ་ཎ་ཌ་མི་རིགས་ཡིན་པ་བཀྲས་མཐོང་བཀའ་ཟུར་ཚེ་དབང་ཆོས་རྒྱལ་ལགས་ཀྱི་སྐུ་ཟླ་༼མི་སི་འཇུ་ཀྲི༽ཞུ་བ་ཁོང་དང་། ཕྱི་རྒྱལ་དེ་འདྲ་ཡང་ཡོད་བཟོ་འདུག སྐད་སྒྱུར་བོད་རིགས་བུ་མོ་ཞིག་ཡོད་འདུག་པའི་མིང་མ་ཤེས། ཡང་དཔེ་མཚོན་ཞིག་ལ་དེ་གའི་དགེ་འོས་གྲས་སུ་བཀའ་ཁྲི་ཟུར་པ་སྐལ་བཟང་ཡེ་ཤེས་མཆོག་དང་། བཀའ་ཟུར་ཀིརྟི་རིན་པོ་ཆེ་མཆོག་ཀྱང་ཡོད་པ་རེད།
གོང་ཞུས་དགེ་འོས་སྦྱོང་བརྡར་ཐོན་རིམ་སློབ་གྲྭ་ཁག་ལ་ལས་བགོས་གཏོང་གནང་མཛད། ཁོང་རྣམ་པ་མང་ཆེ་བ་བླ་མ་བླ་རྐྱང་གྲ་པ་གྲ་རྐྱང་རང་དོན་བློས་བཏང་སྤྱི་ཕན་དང་དུ་བླངས། ཡ་རབས་སྤྱོད་བཟང་ཀུན་དང་མཐུན། མིག་དཔེར་འོས་པའི་སྒྲིག་དང་འདོམས་པ་རང་སྲུང། སློབ་ཕྲུག་ལ་ཤ་ཚ་རྣམ་དག་གཅེས་སྐྱོང་དང་། བྱམས་བརྩེའི་ཐབས་མཁས་སློབ་ཁྲིད་གནང་བ་བརྒྱུད་བོད་ཕྲུག་ཚོའི་ཤེས་ཡོན་ཀུན་སྤྱོད། བསམ་པའི་དཔལ་ཡོན་མེ་ཏོག་བཞད་པ་ལྟར་ཡར་རྒྱས་གོང་འཕེལ་གྱིས་མདོ་དོན་ངོ་མ་ནི་ཕ་རྗེས་བུ་འཛིན་ཐུབ་པའི་བུ་གཅེས་མང་པོ་སྐྱེད་སྲིང་གྲུབ་འབྲས་ཐོན་པ་ནི་མི་རབས་རྙིང་པ་ཚོས་སྔོན་ཐོན་མི་རིགས་ཀྱི་ཚོགས་གྲལ་དུ་ཚུད་པའི་ལག་རྗེས་གཟི་བརྗིད་ལྡན་པ་ཞིག་བཞག་པ་ལོས་ཡིན།
༥༽ཡིན་ན་ཡང་། སྟབས་མ་ལེགས་པ་ཞིག་ལ་ཕྱི་ལོ་ ༡༩༨༧ ཡས་མས་ཙམ་ལ་ཀང་རའི་དགེ་འོས་སློབ་དགེ་དང་མ་སུ་རི་ནས་ཐོན་པའི་སློབ་དགེ་རྣམས་རང་རང་ལོ་ན་རྒན་འགོ་ནས་རིམ་བཞིན་བགྲེས་ཡོད་དུ་ཕེབས་པའི་རྗེས་མཐུད་རྐང་འཛིན་སློབ་དགེའི་སྦྱོང་བརྡར་སྐྱེད་སྲིང་གོ་སྒྲིག་ལས་འཆར་ཐབས་ཤེས་མ་སྒྲུབ་པའི་སྐྱོན་ཆ་འདི་བྱུང་བ་རེད། ཡང་ཁ་གཡོག་ཙམ་གྱི་ཆེད་དུ་དགེ་རྒན་འོས་སྦྱོང་བཏང་ཡོད་བཙུགས་ཡོད་གསུངས་སྲིད་ཀྱང། དགེ་འོས་པར་སློབ་ཁྲིད་གནང་མཁན་ཁོ་རང་ལ་དམིགས་བསལ་རྐང་འཛིན་པའི་རིག་གཞུང་མན་ངག་སྦྱོང་བརྡར་དེ་དང་། ངས་དམིགས་བསལ་ཡུལ་བཟུང་བའི་སྦྱོར་བརྡར་དེ་གཉིས་སློབ་ཚན་དང་བཅས་པ་རྦད་དེ་ཁ་ཁ་ཡིན་པ་མཁྱེན་དགོས།
༦༽སྔོན་དུས་སློབ་གྲྭའི་ཕ་ཚབ་མ་ཚབ་ལ་མཚོན་ན་ཡིག་རྩིས་ཤེས་ན་རབ་དང་། མ་ཤེས་ཀྱང་ལོ་ན་དར་ཡོད་སྤྱི་ཚོགས་ཀྱི་ནང་འགྲོ་ལུགས་འདུག་ལུགས་མྱོང་བ་ཆོད་ཅིང། སྒྲིག་ལམ་ཀུན་སྤྱོད་ཉེས་སྐྱོན་མེད་པ། རྣམ་ཀུན་རང་ཁོངས་སློབ་ཕྲུག་རྣམས་ལ་གཤིས་འཇམ་ངང་རིང་ཐོག་ནས་ལྟོ་ཟས་བཟོ་སྤྱོད་དང་། གཙང་སྦྲ་འཕྲོད་བསྟེན། སྒྲིག་སྤྱོད་འགྲོ་སྟངས་སོགས་ལ་ཀ་བརྡ་བསླབ་འདོམས་ཐུབ་པའི་མི་འགྲོ་འདེམས་སྒྲུག་གནང་ལམ་ཡོད་ཀྱང་ཕྱིས་སུ་ཁྱིམ་ཚང་ཨ་མ་ལགས་མང་ཆེ་བ་ལོ་ན་ཆུང་ཞིང་རང་ཕྲུག་གཉིས་གསུམ་གྱི་ཨ་མ་ཡིན་ཁར། རང་ཉིད་མི་ཚེ་སྐྱེད་སྟངས་དང་ལྟོ་བཟོ་ཁྲུས་བཤལ། འགྲོ་འདུག་སྤྱོད་གསུམ་ཤེས་མྱོང་གང་ཡང་མེད་བཞིན་དུ་གཞན་ལ་ལྟ་སྐྱོང་ཇི་ལྟར་ཐུབ། ཡིན་ན་ཡང་ཤེས་བཀའ་མཆོག་དང་སློབ་དགེ་འགའ་ཤས་ནས་སློབ་ཕྲུག་ཚོའི་ཕ་མ་སོ་སོར་རང་ཕྲུག་ལ་སློབ་གསོ་ཡག་པོ་མི་བྱེད་པ་དང་། ཀུན་སྤྱོད་བཏང་འཛིན་ཟབ་ནན་མ་བྱས་པའི་འཐུས་ཤོར་བཏང་བ་འགྲིན་གིན་མི་འདུག ཡོང་གིན་མི་འདུག་ཅེས་གསུངས་པ་ཡང་ཡང་གོ་ཐོས་བྱུང་། གལ་ཏེ་དེ་ལྟར་ཡིན་ན་གཏན་སློབ་དང་བུ་ཁྱིམ་ནང་ཡོད་པའི་སློབ་ཕྲུག་ཁག་གཅིག་ལོ་འཁོར་གཅིག་ནས་ཟླ་བ་གཉིས་ཕ་མའི་སར་འགྲོ་ས་ཡོད་ན་དགུང་སེང་འགྲོ་བ་ཕུད་དེ་བྱིངས་ཟླ་བ་བཅུ་ཐམ་པ་སློབ་གྲྭར་དུས་ཚོད་སྐྱེལ་གྱིན་ཡོད་ལ། ཡིན་ཙང་ཟླ་བ་བཅུ་བསྐྱལ་བའི་རིང་གི་འཐུས་ཤོར་དང་མ་འགྲིག་པ་དེ་ཟླ་བ་གཉིས་ཀྱི་མགོ་ལ་གཡོག་ན་དེ་ནི་འོས་མཚམས་ག་ལ་ཡིན།
སློབ་དགེ་དང་མ་ཚབ་ལ་འོས་ཆོས་ཅི་འདྲ་དགོས།
༡༽ བོད་མི་སུ་རུང་སློབ་དགེ་ཞིག་ཡིན་ན་ཁོང་ལ་བོད་ཀྱི་ནང་ཆོས་རིག་གཞུང་དང་། བོད་ཀྱི་ས་ཁམས་གནས་ལུགས། རྒྱལ་རབས་མཚོན་པའི་བྱུང་རིམ་ལོ་རྒྱུས་སོགས་ཀྱི་མྱོང་བ་གང་ཙམ་ཡོད་པ་རྨང་གཞིའི་ཐོག་དེང་སྐབས་རང་རེའི་བོད་རྒྱལ་ཁབ་དང་། བོད་མི་རིགས་སྣོད་བཅུད་བཅས་པ་ཆགས་འཇིག་ཀྱི་དུས་མཚམས་གནས་བབས་ཉེས་ཅན་འདི་ལས་འགྲོལ་ཐབས་མཚོན་ཆེད་དུ་རང་ཚོའི་བུ་ཕྲུག་གཞོན་སྐྱེས་རྣམས་བོད་རྒྱལ་ཁབ་དང་། བོད་མི་རིགས་ལ་ཞབས་འདེགས་ཚད་ཐུབ་ཞུ་བའི་ན་གཞོན་མང་དག་སྐྱེད་སྲིང་ཐུབ་པ་ཡོང་ཆེད་རང་ངོས་ནས་ངལ་བར་ལྟོས་མེད་སློབ་དགེའི་འགན་ཁུར་བླངས་རྒྱུའི་ཆོད་སེམས་གཏན་ཚུགས་སུ་བཅངས་བ་ཞིག་དགོས་ངེས་དེ་ནི་སློབ་དགེའི་རྨང་གཞིའི་ཆ་རྐྱེན་ཡིན་པ་རེད།
༢༽ རང་ཉིད་སློབ་དགེ་བྱེད་མོས་ཡོད་པ་དེ་ལྟར་ཡང་སློབ་གྲྭའི་འཛིན་གྲྭ་གོང་འོག་གང་རུང་ཐོག་སློབ་དེབ་ཚན་པའི་དངོས་དོན་འཕྲུལ་མེད་སློབ་ཁྲིད་འགན་ཁུར་ཐུབ་མིན་རང་གིས་རང་ལ་ཞུ་དག་བྱེད་གལ་ཆེ། གལ་སྲིད་གདེང་སྤོབས་དེ་ཙམ་མེད་ན་བསྐྱར་སྦྱོང་གོ་སྐབས་འཚོལ་དགོས།
༣༽ དེ་ནས་རྨང་གཞིའི་དབྱིན་བོད་གང་རུང་གི་ཤེས་ཡོན་ཚད་ལྡན་ཡོད་པ་ཡིན་ན་གཞི་ནས་རྩ་འཛུགས་ཀྱི་ཤེས་ཡོན་སློབ་ཁྲིད་བྱེད་པ་ལ་མཐོ་སློབ་ཚད་ལོང་ཞིག་ནས་སློབ་གཞིའི་རྣམ་བཞག་གཏོད་ཚུལ་ཐ་དག་བསམ་བློའི་མཚན་རིག་གམ་རིགས་པའི་གཞུང་ལུགས་དང་འབྲེལ་བའི་དགེ་འོས་སློབ་ཚན་ཚད་འཕེར་གྱི་སྦྱོང་བརྡར་ངེས་འདྲོངས་ཤིག་ཐོབ་གལ་ཆེ། དེ་ལྟ་བྱུང་ན་སློབ་དགེའི་མཚན་ཉིད་ལྡན་པ་རེད།
༤༽ དེ་ནས་སློབ་དགེ་ནི་སློབ་ཕྲུག་ལ་མིག་དཔེ་སྟོན་མཁན་ཡིན་པ་དེའི་ཆ་ནས་དུས་དང་རྣམ་པ་ཀུན་ཏུ་ལུས་ཀྱི་ཆ་ནས་ཕྱི་ནང་གང་ལའང་ཡ་རབས་སྤྱོད་བཟང་གི་རྒྱ་ལས་མ་འདས་པའི་རྣམ་འགྱུར་ཐོན་པ་དང་། ངག་གི་ཆ་ནས་ཞི་འཇམ་བག་ཡོད་སེམས་ལ་འཐད་པའི་སྨྲ་བརྗོད་རྣམ་པར་ཐོན་པ། ཡིད་ཀྱི་ཆ་ནས་སློབ་ཁྲིད་གང་ཡོང་ཅི་ཕན་ངལ་བ་འཛེམས་མེད་ཤ་ཚ་སེམས་ཁུར་དང་ལེན་གྱིས་མདོ་དོན་སྙིང་པོ་ལུས་ངག་ཡིད་གསུམ་གྱི་བྱ་བཞག་མཐའ་དག་བཅོས་མ་མིན་པ་སྒྲིག་རང་ཁུར་སྡོམ་པ་རང་སྲུང་གནང་བ་ཡིན་ཚེ་སློབ་ཕྲུག་ཚོའི་ངོས་ནས་ཀྱང་བསམ་བློའི་འདུ་ཤེས་འཛིན་སྟངས་ཐད་ངམ་ངམ་ཤུགས་ཀྱིས་དགེ་རྒན་ལ་གུས་བཀུར་ཆ་འཇོག་དང་། སེམས་ཀྱི་དགའ་ཞེན་ཡོང་བ་འདོན་མི་ཟ་བ་ཡིན་ཞིང་། དེ་ནི་སློབ་དགེ་དང་སློབ་ཕྲུག་དབར་ཕན་ཚུན་བརྩེ་སེམས་བར་ཐག་ཆུ་དང་ཉ་མོའམ། འོ་ཆུ་མཉམ་བསྲེ་ལྟར་གཙོ་དོན་སློབ་ཁྲིད་སྦྱང་འབྲས་ཁྱད་འཕགས་ཡོང་བར་སོམ་ཉི་མ་དགོས།
༥༽ སློབ་དགེ་ནི་ར་ལུག་འཚོ་བའི་རྫི་བོ་དང་མཚུངས་ཞིང་། དཔེར་ན། ཞོགས་པ་ར་ལུག་རྣམས་རྩ་ཆུ་གང་བཟང་ལ་འཚོལ་སྐྱེལ་དང་། དགོང་དྲོ་ལྷས་རར་གྲངས་ཚང་བསྡུ་དེད་བྱེད་པ་དེ་ནི་རྒྱུན་གཏན་གྱི་འགན་ཁུར་ཡིན་ཞིང་། ཡང་ར་ལུག་ཆུང་གྲས་དང་། རྐང་ལག་སྐྱོན་ཤོར། ན་ནད་ཕོག་པ་གང་ལྟར་ར་ལུག་གཞན་གྱི་འགྲོ་རྗེས་མ་ཟིན་པ་བྱུང་སྐབས་རྫི་བོ་དེས་ཐབས་ཤེས་གང་ཡང་བྱས་ཏེ་ལྷས་རར་ཚུད་པ་བྱེད་དགོས་ལས་རང་འགར་བསྐྱུར་འཇོག་བྱེད་ལུགས་མེད་པ་དེ་བཞིན་དུ་སློབ་དགེ་རྣམ་པས་ཀྱང་རང་ཁོངས་འཛིན་གྲྭའི་ནང་སློབ་ཕྲུག་ཇི་ཡོད་ཚང་མ་རྗེས་ལོར་ཡིག་རྒྱུགས་ལམ་ལྷོང་འཛིན་གྲྭ་གོང་མར་འགྲོ་ཐུབ་པ་བཟོ་རྒྱུ་དེ་སློབ་དགེའི་ལས་འགན་ངོ་མ་ཉག་གཅིག་ཡིན་པ་རེད། འོན་ཀྱང་དེ་འདྲའི་སྐབས་སུ་སློབ་ཕྲུག་ཉུང་ཤས་ཤིག་གི་སློབ་སྦྱོང་ཞན་པའི་གནས་ཚུལ་ཐོན་ཚེ་སློབ་ཕྲུག་སོ་སོས་སློབ་སྦྱོང་ལ་རིག་པ་གཏད་མ་ཐུབ་པའི་རྒྱུ་རྐྱེན་མི་འདྲ་བ་རེ་ཡོད་ངེས། དཔེར་ན། འགའ་ཤས་ལ་གཞི་རྩའི་བློ་རིག་སྐྱོ་བོ་ཡིན་པ་དང་། འགའ་ཤས་གཟུགས་ཁམས་མ་བདེ་བ་ཡོད་པ། འགའ་ཤས་ཕ་མ་ནང་ཁྱིམ་ཀྱི་དཀའ་གནད་ལ་སེམས་ཁྲལ་བྱེད་པ། ཡང་ཕ་མ་ཡ་བྲལ་ལྟ་རྟོག་མ་བྱུང་བར་སེམས་ཁོང་དུ་ཆུད་པ། དེ་བཞིན་སེམས་སྤོབས་ཆུང་རིགས་ལ་གཞན་ནས་དབང་ཤེད་ཐུབ་ཚོད་ཀྱིས་སེམས་གཅོང་ཆགས་པ། འགའ་ཤས་ལ་སྣང་ཚུལ་གཞན་ཞིག་ཡོད་དབང་སློབ་སྦྱོང་ལ་དོ་སྣང་མི་གཏད་པ། འགའ་ཤས་རང་གཤིས་ལངས་ཤོར་སློབ་སྦྱོང་བྱེད་ཚུལ་ངོ་ལྐོག་རྣམ་གཡེང་རྒྱུན་འཇགས་སོང་བ་སོགས་འདི་དང་འདི་འདྲའི་རྐྱེན་དབང་ཅི་རིགས་ཡོད་པར་དགེ་རྒན་ནས་སློབ་ཕྲུག་དེ་ཚོ་མི་རེ་ངོ་རེའི་གནས་བབས་ལ་བརྟག་དཔྱད་དོ་སྣང་ཕྲ་ཞིབ་བྱས་ཐོག ཁུངས་སོ་སོའི་རྐྱེན་རྩ་ངོས་འཛིན་ཐུབ་མཚམས་དེ་ནས་གང་ལ་དེ་འཚམས་དམིགས་སུ་དགར་ཏེ་ཞར་དང་ཞོར་ལ་སློབ་གསོ་དམ་གཉེར་ཅི་ནས་གནང་དགོས། མདོ་དོན་རང་ཁོངས་སློབ་ཕྲུག་ཚང་མ་ཡིག་རྒྱུགས་འཕྲོད་ངེས་ཤ་སྟག་བཟོ་བ་ལས་གཅིག་འཛར་གཉིས་ལུས་སོང་ན་མ་འགྲིག་པ་རེད།
༦༽ སློབ་གྲྭའི་མ་མའམ་མ་ཚབ་ནི་སློབ་ཕྲུག་དང་རྒྱུན་གཏན་འདྲིས་གཤིབ་ཕ་མ་ལས་རིང་བ་བྱེད་མཁན་ཡིན་གཤིས་ཁོ་མོའི་ལས་འགན་གལ་གནད་ཧ་ཅང་ཆེ་ཞིང་། མི་འགྲོའི་ཐད་ལོ་ན་དར་ཡོལ་དང་། ཀུན་སྤྱོད་ཚུལ་ལྡན་ཡིན་ལ་དམའ་མཐར་འཛིན་གྲྭ་བརྒྱད་པ་ཐོན་གྲས་དགོས་པའི་ཐོག མ་ཚབ་རྣམས་ལ་གཞི་རིམ་ཆ་རྐྱེན་ཆེད་དུ་ལྟོ་ཟས་བཟོ་སྤྱོད་ཀྱི་སྦྱོང་བརྡར་དང་། སློབ་ཕྲུག་ལ་གཅེས་སྐྱོང་བྱེད་སྟངས་ཀྱི་སྦྱོང་བརྡར། གཙང་འཕྲོད་དང་སྒྲིག་སྤྱོད་སློབ་སྟོན་བྱེད་ཐབས་ཀྱི་ཟབ་སྦྱོང་སོགས་ངེས་པར་ཐོབ་པའི་ཆ་རྐྱེན་སྐྲུན་དགོས་པ་ནི་དེང་སང་ཡར་ཐོན་གྱི་བྱེད་ལམ་འདིར་ང་ཚོས་ཟུར་མིག་ཅིག་ལྟ་དགོས་པ་མ་ཟད། མ་ཚབ་རྣམས་དང་། སློབ་དགེ་རྣམ་པར་ལས་གནས་དང་ཤེས་འཇོན་ཡུལ་དུས་ལ་གཞིགས་པས་ཕོགས་འབབ་དང་ཆ་རྐྱེན་གཞན་དག་བཅས་སེམས་ལ་འགུལ་ངེས་ཐོབ་དགོས། ལྷག་དོན་དུ་སློབ་དགེ་རྣམས་ལ་སྤྱི་ཚོགས་ནང་མཐོང་དང་ཆ་འཇོག་མཚོན་པ་གལ་ཆེ། སྔ་དུས་བོད་གཞུང་གི་མཛད་ཆེན་ཁག་ལ་སློབ་དགེར་གཞུང་ཞབས་རྒན་དྲུང་དང་འདྲ་བའི་གདན་ཐོབ་གནང་ཡོད་པ་ཡིན།
༧༽ ༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་དང་། ད་ལྟའི་སྤྱི་ཚོགས་ཀྱི་གནས་བབ་བཅས་ལ་གཞིགས་པས་འཛིན་གྲྭ་དྲུག་པ་བདུན་པ་གང་རུང་གི་སློབ་དེབ་ནང་ལེ་ཚན་གསར་བ་ཞིག་ཁ་སྣོན་དགོས་གལ་ཆེ་བར་མཐོང་། དེ་ཡང་སྤྱིར་བཏང་སློབ་ཕྲུག་སོ་སོའི་འདོད་མོས་ཡོད་ན་རིགས་གཅིག་རྐང་འཛིན་ཁེ་ལས་ལག་ཤེས་དང་ཁྱད་མཁས་ལས་རིགས་སྦྱོང་བརྡར་འདི་དང་འདི་འདྲ་བྱེད་རྒྱུ་ཡོད་པ་རེད་ཅེས་མདུན་ལམ་སློབ་སྟོན་པས་ལས་རིགས་སྣ་ཚོགས་ཀྱི་རེའུ་མིག་གསལ་པོ་སྔོན་ཚུད་ནས་ར་སྤྲོད་དགོས་གལ་ཆེ། གང་ཡིན་ཟེར་ན། སློབ་ཕྲུག་སོ་སོའི་ངོས་ནས་རང་ཉིས་སློབ་གྲྭ་ཐར་སོན་ཐུབ་མིན་ལམ་ཙམ་ཚོད་དཔག་ཐུབ་རྒྱུ་དེ་མཚམས་ཁེ་ལས་ལག་ཤེས་འདི་འདྲ་ཞིག་བྱེད་སྙམ་པ་བསམ་བློའི་ནང་སྔོན་འཆར་གྲ་སྒྲིག་ཡོད་དགོས། ཡང་རིགས་གཅིག་རྐང་འཛིན་བཟོ་ལས་དང་ཁྱད་མཁས་བྱེད་མཁན་ཇི་ཡོད་ལ་འགྲོ་ཡུལ་ཐབས་འཚོལ་གནང་རྒྱུ་བོད་གཞུང་གི་འགན་འཁུར་གལ་ཆེ་ཞིག་ཡིན་པ་ད་གཟོད་ཤེས་ཐུབ་པ་འདི་རེད། ཐབས་ཤེས་ཟུང་འཇུག་རླབས་ཆེ་ཙམ་མེད་རྐྱེན་མཛེས་བཟོ་སྐྲ་གཞར་སོགས་ཙག་ཙིག་དེ་འདྲ་ལའང་མི་རག་གིན་མི་འདུག་ཟེར་རྒྱུ་དེ་འདྲ་རྒྱུན་དུ་ཡོང་མུས།
དེ་སྔོན་བཀའ་ཤག་རྙིང་པའི་སྐབས་ཕྱི་ལོ་ ༡༩༩༦ ནང་སློབ་ཕྲུག་ཁོངས་ནས་གཞི་རིམ་དང་། འབྲིང་རིམ། མཐོ་སློབ་འཛིན་གྲྭ་ཐོན་པ་ཁག་དང་། སྤྱི་ཚོགས་ནང་ལས་མེད་ཕོ་མོ་བཅས་ཀྱི་ཆེད་དུ་རྒྱ་གར་ནང་བཟོ་ལས་འདྲ་མིན་ཁག་ལ་ལག་ཤེས་སྦྱོང་བརྡར་འགྲོ་ཡུལ་དམིགས་འཚོལ་ཞིབ་ལས་དོན་ཆེན་དུ་ཤེས་རིག་ལས་ཁུངས་ནས་ལས་བྱེད་མི་གཉིས་ཀྱི་ས་མིག་ཞུས་འཁྲོལ་ལྡི་ལི་དོན་གཅོད་ཁང་དུ་ལས་ཁང་གསར་སྐྱེད་གནང་སོང་ཡང་རྗེས་སུ་ལས་བྱེད་གཉིས་པོ་ཤེས་རིག་ལས་འཛིན་ཁུངས་སུ་ལས་བསྒྱུར་བཏང་སྟེ་ཐོག་མའི་དམིགས་ཡུལ་ལྟར་བྱུང་མི་འདུག་ཀྱང་ད་ཆ་བསྐྱར་གསོ་གནང་རྒྱུ་དུས་ལ་བབ་འདུག་པ་བཅས་ཀྱི་ཐད་ཞེན་བསྐུལ་དུ་བཀའ་ཟུར་མདོ་སྔགས་བསྟན་འཛིན་ནས་ཕྱི་ལོ་ ༢༠༠༩ ཟླ་ ༤ ཚེས་ ༢༨ ལ།
དྲ་གྲོགས་ཚོ། བཀའ་ཟུར་ཁོང་སྐབས་དུས་ནམ་ཞིག་གི་བཀའ་བློན་རེད་དམ། དེང་སང་བཞུགས་ཡུལ་དང་འཚོ་གནས་ཅི་ཞིག་རེད། གནས་ཚུལ་གསལ་བོ་མཁྱེན་མཁན་ཞིག་གིས་ཁོང་གི་ལོ་རྒྱུས་མདོ་བསྡུས་ཞིག་མཚམས་སྦྱོར་ཞུ་རོགས་མཁྱེན།
བཀའ་ཟུར་ཁྱེད་ཀྱིས་བཏོན་པའི་མ་འོངས་བཀའ་ཁྲི་འོས་དམིགས་ནས་སུ་ཞིག་ཁྲིར་འཛེགས་ཀྱང་དེར་སྙན་ཞུ་འདི་འདྲ་ཞིག་ཕུལ་ན་བདག་སྤྲོད་བྱེད་འགྲོ། ཡང་ན་ཨ་མ་རྗེ་བཙུན་པདྨ་ལགས་ལ་སློབ་ཕྲུག་སྤྱོད་ངན་དེ་ཚོར་རྒྱུག་རྡུང་བཏང་ཆོག་པའི་སྙན་ཞུ་ཞིག་ཕུལ་ན་གང་འདྲ་འདུག ཁྱོད་ཚོ་དགེ་རྒན་བྱེད་སྐབས་སློབ་ཕྲུག་ལ་ཉེས་བརྡུང་ག་ཚོད་བཏང་གི་ཡོད། “ཇ་དང་དགེ་རྒན་ཚ་ན་དགའ། རྔ་དང་སྐྱེས་དམན་བརྡུང་ན་དགའ།” (ཇ་ཚ་པོ་འཐུངས་ན་ཡག་པ་དང་། དགེ་རྒན་ཚ་ན་ལེགས་པ། རྔ་ཇི་ཙམ་བརྡུང་བ་དེའི་ཚོད་ཀྱི་སྐད་ལེགས་སུ་འགྲོ་བ། སྐྱེས་དམན་ག་ཚོད་བརྡུང་བ་དེའི་ཚོད་ཀྱི་ཞབས་ཕྱི་ལེགས་པ་ཞུ་བ།་)ཟེར་གཏམ་དཔེ་དྲངས་བཞིན་ཟྭ་པོ་བཙུགས་མཁན་ཁྱེད་ཚོ་མིན་ནམ། ད་རེས་འདི་སྐོར་མ་འཁོད་པ་གང་ཡིན་ནམ།
རྒྱལ་ཁབ་བམ་མི་རིགས་རིགས་གཞུང་གོམས་ཤེས་སྐད་ཡིག་མཚོན་པའི་གལ་ཆེའི་གྲུབ་ཆ་དག་གནས་དགོས་ན་ཤེས་ཡོན་སྲིད་ཇུས་ཚད་ལྡན་ཞིག་ཡོད་དགོས་པ་དེ་གལ་གནད་རང་བཞིན་ཆགས་ཡོད། ད་སྐབས་ང་ཚོ་བཙན་བྱོལ་ནང་བསྡད་པའི་རིང་གལ་ཆེའི་རང་བཞིན་ཞིག་ཆགས་ཡོད་པ་སྨོན་མེད་རེད། ཡིན་ན་ནའང༌། ཤེས་ཡོན་སྲིད་ཇུས་ལ་བསམ་ཚུལ་སྟོན་མཁན་བཀའ་ཟུར་རྣམ་པ་འོས་བབས་རྩ་བ་ནས་མེད། གང་ཡིན་ཟེར་ན། ཁོང་ཚོར་རང་ཉིད་ལ་གོ་སྐབས་ཆ་ཚང་ཡོད་དུས་གང་ཡང་བྱེད་ཐུབ་མེད་པ་ཀུན་གྱིས་མཁྱེན་གསལ་རེད། ད་ལྟའི་སྐབས་རིན་པོ་ཆེ་མཆོག་གིས་གཟེངས་ཐོན་གདེང་འཇོག་འཕེར་བའི་ཕྱག་ལས་གནང་ཡོང་ཕྲག་དོག་དང་འགྲན་སེམས་ཀྱིས་མ་བཟོད་པར། བཀའ་ཟུར་ལྷན་ཚོགས་ཟེར་ཚོགས་འདུ་མང་པོ་སྐོང་འཚོགས་བྱས་ཏེ་ཁོང་ཚོས་དངོས་ཤུགས་བརྒྱུད་གསུམ་ནས་གནོད་ཤུགས་དང༌། ཀུན་སློང༌། འཆལ་གཏམ་སོགས་རིན་པོ་ཆེའི་ཕྱག་ལས་གནང་བ་ཁག་ལ་དཀའ་ངལ་དང་འགོག་རྐྱེན་རབ་དང་རིམ་པ་མང་པོ་བཟོས་ཡོད་པས། བཀའ་ཟུར་ཚོའི་ཐོགས་མའི་འཆར་གཞི་ལྟར་ལམ་སློང་བྱུང་མེད། ཡིན་ནའང་ཁོང་བྱེད་ཐུབ་པ་ནི་དཔེར་རྗེ་བཙུན་པདྨས་ཤེས་ཡོན་སྲིད་ཇུས་ལ་སྔ་ཕྱིར་གེ་ལེན་བྱེད་མེད་པ་མ་ཟད། བཀའ་ཤག་གི་ལས་དོན་བྱེད་ཕྱོགས་འགོག་རྐྱེན་མང་པོ་བཟོས་ཡོད། དེ་བཞིན་སྐལ་བཟང་ཡེ་ཤེས་ནས་ནོར་གླིང་གི་ལས་མི་བུ་ཕྲུག་ཚོ་དཔེ་སྟོན་སློབ་གྲྭར་གཏོང་རྒྱུ་བཀག་འགོག་བྱས་པ། མདོ་སྔགས་བསྟན་འཛིན་ནས་རིན་པོ་ཆེ་སྐོར་ལ་སྔ་ཕྱིར་སྤྱི་ཚོགས་ནང་རང་ཉིད་ཀྱི་འཇོན་ཐང་ཡོད་ཚད་སྟོན་ཏེ་ཡིག་འཁྱམ་བཟོས་ནས་ངན་སྐུལ་སྣ་ཚོགས་བྱས་ཡོད་པས།་ གྲུབ་འབྲས་གང་ཡང་ཐོན་མེད། སྤྱིར་མདོ་སྔགས་ཁོ་རང་འཇོན་ཐང་ཡོད་མཁན་ཞིག་མིན་ལ། དེ་ལས་རང་འདོད་ཚ་བའི་མི་ཞིག་ཡིན་པ་དང༌། སྤྱིར་གཞུང་གི་རྒས་གསོ་ཁང་པ་བཟོ་བཅོས་བྱེད་ཆོག་གི་མེད་ནའང༌། བདེ་སྐྱིད་གླིང་དུ་ཡོད་པའི་ཁོའི་རྒས་གསོ་ཁང་པ་དེ་བཟོས་བཅོས་བརྒྱབ་ནས་གཞིས་ཆགས་དེའི་ནང་ཁང་པ་དེ་ལས་རྫིག་པ་མེད་པ་ཞིག་བཟོས་ཡོད། བོད་གཞུང་ས་ཁང་སྒྲིག་གཞི་ལ་བརྩི་་བཀུར་དང་ལག་བསྟར་བྱས་མེད་པའི་ཁོ་བཀའ་ཟུར་མིང་གནས་ཡོད་པའི་མི་ཞིག་བྱེད་སྟངས་དེ་ལྟར་ཡིན་ནམ། ཁོའི་ལྷག་བསམ་དང་བྱེད་སྟངས་ག་འདྲ་ཡོད་མེད་དེ་ཐོག་ནས་རང་གསལ་པོ་ཧ་གོས་ངེས་རེད། མདོ་སྔགས་བསྟན་འཛིན་ཁོ་རང་བཀའ་བློན་སྐབས་ཤེས་ཡོན་སྲིད་ཇུས་ཤིག་དགོས་པའི་བློ་ངོར་ཤར་མྱོང་ཡོད་ཀྱི་མ་རེད། ད་དུང་གཞན་གྱི་ལས་ཀ་བྱེད་པར་འགོག་རྐྱེན་བཟོ་དགོས་དོན་ཅི་ཡིན། མི་འདི་ལྟ་བུ་དངོས་གནས་སྤྱི་ཚོགས་ནང་མང་མ་གྲག་ནས་ཉུང་རྩ་བ་ཡོད་པ་མ་རེད།
བཀའ་ཟུར་མཆོག་གི་ཞུ་སྙན་འདིར་དོན་སྙིང་ལྡན།