དུས་བཅད་བྱས་པ་ལྟར་ཕྱི་ཚེས་ ༢༧ ཉིན་གྱི་ཕྱི་དྲོའི་ཆུ་ཚོད་ ༣ དང་སྐར་མ་ ༣༠ ཡས་མས་སུ་ང་སྦེལ་ཀོབ་ལུགས་ཟུང་བསམ་འགྲུབ་གླིང་གཞིས་ལས་ཁང་གི་གཞིས་མགོ་རྙིང་བ་བཀྲ་ཤིས་དབང་འདུས་སར་བཅར་ཡང་། ཁོང་ལས་བྲེལ་གཞན་ཞིག་གི་དབང་གིས་ཕྱི་ལ་ཕེབས་དགོས་བྱུང་འདུག་པས། མི་མང་ཚོགས་ཁང་ནང་འཚོགས་བཞིན་པའི་རིག་གནས་འཆད་ཁྲིད་ཀྱི་འཛིན་གྲྭར་བསྐྱོད། སྐབས་དེར་དགེ་རྒན་བློ་བཟང་བསྟན་དར་ལགས་དང་། གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་རྒྱུན་ལས་གྲྭ་ཚེ་དབང་རྣམ་གཉིས་ཀྱིས་སློབ་ཕྲུག་ཚོར་ཚོད་ལྟའི་ཡིག་རྒྱུགས་ཤིག་གཏོང་མགོ་བརྩམས་སོང་ལ། ངས་ཀྱང་རྐང་བཙུགས་ནས་སློབ་ཕྲུག་ཚོའི་ཤེས་ཚད་ཅིག་གཞལ་དགོས་བསམ་ནས་བསྡད་པ་ཡིན། ཡིན་ནའང་། སློབ་ཕྲུག་འདི་ཚོས་ང་གང་ནས་ཡོང་དང་ཅི་ཞིག་བྱེད་དུ་ཡོང་མིན་མི་ཤེས་སྟབས། ཁོང་ཚོས་ངའི་མིག་མདུན་དང་རྒན་བློ་བཟང་བསྟན་དར་གྱི་རྒྱབ་ཕྱོགས་ནས་ཡིག་རྒྱུགས་ཕབ་བཤུ་བྱེད་མགོ་བརྩམས་སོང་། རྒན་ཁོང་གིས་སློབ་མ་ཚོས་ཕན་ཚུན་ལ་ཕབ་བཤུ་མི་བྱེད་ཆེད་སློབ་ཕྲུག་བུ་དང་བུ་མོ་རྣམས་ཕྱོགས་གཉིས་ལ་བགོས་ཤིང་། སློབ་ཕྲུག་བུ་ཚོ་ཡང་འཛིན་ཁང་ནང་དང་ཕྱི་ལོག་གཉིས་སུ་བཀྲམས་སོང་།
སྐབས་དེར་ང་འཛིན་ཁང་ནང་དུ་ཡོད་ལ། རྒན་ཁོང་གིས་སློབ་ཕྲུག་སྐོར་ཞིག་ལ་ཕྱི་ལོག་ནས་འདུག་ས་གོ་སྒྲིག་བྱེད་པར་བྲེལ་འདུག ངའི་མདུན་དུ་ཡོད་པའི་སློབ་ཕྲུག་དེས་དྲི་ཤོག་ཟུར་དུ་བཞག་སྟེ་འབྲི་དེབ་ཅིག་སྔོག་བཞིན་འདུག་ལ། ངས་ཁོས་བྲིས་པའི་ཡིག་གཟུགས་མི་ལེགས་ཤིང་། ཡིག་གཟུགས་ལས་ཁོའི་བོད་ཡིག་གི་གནས་སྟངས་ཞན་པ་ཚོར་རྗེས། ཁོའི་ལག་ནས་འབྲི་དེབ་བླངས་ནས་ཞིབ་ལྟ་བྱེད་མགོ་བརྩམས། ཅུང་མ་འགོར་བར་རྒན་ཁོང་ཕྱིར་ནང་དུ་ཕེབས་སོང་ལ། ཁོང་གིས་ངའི་ལག་གི་འབྲི་དེབ་དེ་སློབ་ཕྲུག་དེའི་ཡིན་པ་རྟོགས་རྗེས་ཡིག་རྒྱུགས་གཏོང་སར་འབྲི་དེབ་ཉར་ཆོག་གི་མ་རེད་ཟེར་ནས་སློབ་ཕྲུག་དེར་གཤེ་ཞོར་ཕར་བཞག་སོང་།
དེ་རྗེས་ངས་སློབ་ཕྲུག་རེ་རེའི་སར་ཉུལ་ཏེ་ཁོང་ཚོས་ཡིག་རྒྱུགས་ཇི་ལྟར་འབྲི་བཞིན་པར་ཞིབ་ལྟ་བྱས། ཡིན་ནའང་། སློབ་ཕྲུག་འདི་ཚོའི་ཤེས་ཡོན་གནས་ཚུལ་བཟང་ངན་ལ་མ་ལྟོས་པར་ཀུན་སྤྱོད་དེས་ང་ལ་སྐྱོ་སྣང་ཞིག་འགོག་མེད་དུ་བྱིན། རྒན་ཕྱི་ལོག་ཏུ་སོང་ཐེངས་རེར་ཁོང་ཚོས་ཕན་ཚུན་ལ་ལབ་རེས་བྱེད་པ་དང་དེབ་ལས་ཕབ་བཤུ་བྱེད་པ་མ་ཟད། སློབ་ཕྲུག་མིག་ཤེལ་ཅན་ཞིག་གིས་དེབ་ལ་བལྟས་ཏེ་སྒེའུ་ཁུང་ཕྱི་ལོག་གི་སློབ་ཕྲུག་དེར་བར་སྟོང་གང་དང་གང་དུ་ཅི་ཞིག་འབྲི་དགོས་མིན་ལབ་མགོ་བརྩམས་སོང་། ཁོང་ཚོས་ཡིག་རྒྱུགས་གཏོང་སྟངས་འདིས་ང་ལ་ཁོང་ཚོའི་ཉིན་རེའི་བྱེད་སྒོ་ཀུན་འགྲེལ་གྱིན་འདུག་ལ། དེ་བས་ཀྱང་ནང་བསམ་པའི་འཁྱེར་ཕྱོགས་ཤིག་སྟོན་གྱིན་འདུག ཚོད་ལྟའི་ཡིག་རྒྱུགས་ནི་སྦྱངས་ཟིན་པའི་ཤེས་བྱར་ཚད་འཇལ་ཙམ་བྱེད་པ་ལས་ཅི་ཡང་མིན་མོད། ཁོང་ཚོས་དེ་ཡང་ཕབ་བཤུ་བྱས་པ་དེས་ཁོང་ཚོའི་ཡ་རབས་དང་གཞུང་དྲང་གི་སྤྱོད་སྒོའི་ཚད་གཞི་ལྷང་ལ་བུད་སོང་།
མཐར་ང་འུ་ཐུག་སྟེ་ངའི་མདུན་གྱི་སློབ་ཕྲུག་དེའི་ལག་གི་འབྲི་དེབ་བླངས་པ་ཡིན། ཁོས། ཁྱེད་རང་ང་ཚོ་ལ་ལྟ་མཁན་རེད་དམ། ཞེས་ཧང་སང་བའི་ཉམས་ཀྱིས་དྲིས་མོད། ངས་ལན་བཏབས་མེད།
དེ་རྗེས་ངས་བུ་མོ་ཚོས་ཡིག་རྒྱུགས་འབྲི་སར་སྐོར་ཡང་བྱས། ཡིག་རྒྱུགས་གཏོང་མཁན་བུ་ལས་བུ་མོ་མང་བ་འདུག་ལ། ཚང་མས་རང་ནུས་གང་ཡོད་ཀྱིས་འབྲི་བཞིན་པ་ལས་ཕར་ཚུར་ལབ་རེས་དང་ཕབ་བཤུ་བྱེད་པ་མཐོང་མ་སོང་། ཡིན་ནའང་། བུ་མོ་ལྔ་དྲུག་ཅིག་ལས་སྤྱིའི་ཆ་ནས་འཛིན་རིམ་བདུན་པ་ནས་བཅུ་བ་བར་གྱི་སློབ་ཕྲུག་ཚོའི་བོད་ཡིག་གི་ཤེས་ཚད་སྐྱོ་བོ་ཡིན་པ་མ་ཟད། ཧ་ཅང་གི་སྐྱོ་བོ་རེད། སྔོན་འགྲོ་ནས་འཛིན་རིམ་བདུན་པ་དང་བརྒྱད་པ། དགུ་བ། བཅུ་བ། ཁོང་ཚོས་མི་ལོ་བཅུ་ཕྲག་ཙམ་ལ་ནང་སྔ་ལངས་དང་དགོང་འཕྱི་ཉལ་གྱིས་སྦྱངས་པའི་འབྲས་བུ་དེ་རིང་ཤོག་ངོས་སྟེང་བཤམས་འདུག
དེ་རྗེས་ང་ཕྱི་ལོགས་སུ་ཡོང་ནས་ཅུང་ཙམ་བསྡད་རིང་རྒན་ཁོང་གིས་སློབ་ཕྲུག་བུ་ཞིག་གི་ལག་ནས་ཤོག་བུ་ཞིག་འཕྲོག་སོང་ལ། དེའི་སྟེང་དུ་ཡིག་རྒྱུགས་སྐོར་ཞིག་བྲིས་འདུག མཐར་ཡིག་རྒྱུགས་ཚར་ལ་ཉེ་སྐབས་བུ་མོ་ཚོས་ཀྱང་གྲྭ་ཚེ་དབང་གིས་མི་ཐོས་ས་དང་མི་མཐོང་ས་ནས་ཕན་ཚུན་ལ་ལབ་རེས་བྱས་སོང་། ང་སྒོའི་གམ་དུ་ཡོད་ལ་དེར་འཛིན་རིམ་བཅུ་བའི་བུ་མོ་ཞིག་འདུག ཁོ་མོས་ང་ལ་ཁྱོད་ཀྱིས་བོད་ཡིག་ཤེས་སམ་ཟེར། ངས་མི་ཤེས་ཞེས་ལན་བཏབས། དབྱིན་ཡིག་ཤེས་སམ་ཟེར། ངས་ཡང་བསྐྱར་མི་ཤེས་ལབ་པ་ཡིན། ཁྱེད་ཀྱི་ཀླད་པ་སྟོང་པ་ཡིན་ནམ། ཡི་གེ་མི་ཤེས་ན་ག་རེ་བྱས་ནས་སྦྱོང་གི་ཡོང་གི་མེད་ཟེར་ལ། གལ་སྲིད་ཁྱེད་ཀྱིས་ཡི་གེ་མི་ཤེས་ན་ང་ཚོས་འབྲི་བཞིན་པ་འདི་དགོད་བྲོ་བོར་མཐོང་གི་རེད་ཅེས་བརྗོད་སོང་ལ། ཁོ་མོའི་བོད་ཡིག་གི་ཤེས་ཚད་གང་འཚམ་ཡག་པོ་འདུག་པ་མ་ཟད། ནང་ལོག་གི་སློབ་ཕྲུག་འགའ་བར་སྟོང་གན་དང་འདི་ལ་ལན་དེ་དང་ཕ་གི་འབྲི་དགོས་ཚུལ་ལབ་ཀྱིན་འདུག
འདི་ནི་དུས་ཡུན་ཐུང་ནའང་ངས་གསར་དུ་འཚར་ལོངས་འབྱུང་བཞིན་པའི་མི་རབས་གསར་བའི་སློབ་ཕྲུག་ཁྱུ་ཞིག་གི་སྒོ་གསུམ་གྱི་སྤྱོད་པ་མཐོང་བའི་དུས་ཡུན་ཡིན། ཁོ་ཚོ་འདི་ལྟར་ཁ་ལག་པའི་བར་ནས་ཡིག་རྒྱུགས་ཕབ་བཤུ་ལས་རྒྱུན་ལྡན་གྱི་སློབ་སྦྱོང་ལ་མི་བརྩོན་པའི་སོན་རྩ་ཁྱུ་ཞིག་ཏུ་འཚར་ལོངས་འབྱུང་བཞིན་འདུག
ཏག་ཏག་ཞོགས་པ་དེར་ངས་རྒན་བློ་བཟང་བསྟན་དར་ལགས་སུ་བཅར་འདྲི་ཞིག་ཞུས་སྐབས་ཁོང་གིས་གསུངས་དོན། འདས་པའི་ཟླ་གཅིག་ཙམ་གྱི་རིང་གི་དགེ་སློབ་ཚོའི་གྲུབ་འབྲས་ཡག་པོ་བྱུང་ལ། མུ་མཐུད་འབད་བརྩོན་བྱས་ཏེ་ཡར་རྒྱས་བཏང་ཚེ་སློབ་ཕྲུག་འདི་དག་ད་དུང་རྦད་དེ་འཕྲོ་བརླག་ཏུ་སོང་མེད་པའི་ཚོར་སྣང་འདུག་ལ། ཡར་རྒྱས་གཏོང་རྒྱུ་འདུག་བསམ་བསམ་ཞིག་འདུག ཡིན་ནའང་སྤྱིར་བཏང་སློབ་ཕྲུག་ཚོའི་ད་ལྟའི་ལོ་ཚད་དང་བསྡུར་ན་ཁོང་ཚོའི་ཤེས་ཡོན་གནས་ཚུལ་ལ་འདོད་པ་མ་ཁེངས་པ་ཏོག་ཙམ་འདུག་མོད། ཁོང་ཚོའི་ཕ་མ་ཚོས་ཁོང་ཚོའི་སློབ་སྦྱོང་ཐད་ཅུང་ཙམ་འཐུས་ཤོར་ཕྱིན་པ་ཚོར་ཡོད་ས་རེད་ལ། ཕ་མའི་ངོས་ནས་ཟླ་གཅིག་ལ་ཉེ་བའི་རིང་གི་ཟུར་ཁྲིད་འདིར་རྒྱབ་སྐྱོར་དང་འགན་ལེན་ཡག་པོ་གནང་བཞིན་པ་མ་ཟད། རེ་བ་ཆེན་པོ་ཞིག་བརྒྱབས་ཏེ་འཛིན་གྲྭར་གཏོང་གི་འདུག་ལ། སྤྱི་མི་ཚོས་ཀྱང་འགན་བཞེས་ཡོང་གི་འདུག ཅེས་དང་ཡང་ཁོང་གིས། དང་ཐོག་སློབ་ཕྲུག་ཚོའི་ནང་དུ་སོ་སོའི་མིང་འབྲི་མི་ཤེས་མཁན་མང་དག་ཅིག་འདུག་ནའང་། ཟླ་གཅིག་མ་ཟིན་ཙམ་རིང་ཁོང་ཚོས་སུམ་ཅུ་བའི་ཕྲད་དང་རྣམ་དབྱེ་གང་འཚམ་ཡག་པོ་ཤེས་པས་མི་ཚད། རྟགས་འཇུག་གི་བདག་གཞན་དུས་གསུམ་ཡང་གང་འཚམ་ཡག་པོ་ཤེས་ཡོང་གི་འདུག་ལ། སྤྱིར་བཏང་ཐེངས་འདིའི་རིག་གནས་ཟུར་ཁྲིད་འདིར་བསམ་ཤོག་ཅིག་བསྡུ་རྒྱུ་ཡིན་པས་སློབ་ཕྲུག་ཚོར་ཕན་མ་ཕན་གྱི་གནས་སྟངས་ངོ་མ་དེ་འགྲེལ་རྒྱག་གི་རེད་ཅེས་གསུངས།
ཡང་ཁོང་ལ་བོད་ཁྱིམ་སློབ་ཕྲུག་དང་ཉིན་སློབ་བར་ཁག་གི་སློབ་ཕྲུག་ཚོའི་བོད་ཡིག་གནས་ཚུལ་སྐོར་དྲིས་པར་ཁོང་གིས། དྲང་མོར་ཞུས་ན་བོད་ཁྱིམ་གྱི་སློབ་ཕྲུག་ལས་ཉིན་སློབ་ཁག་གི་སློབ་ཕྲུག་ཚོའི་བོད་ཡིག་གི་གནས་སྟངས་ཏོག་ཙམ་སྐྱོ་བ་ཡོད་པ་དེ་ཡོངས་གྲགས་རེད། དེ་ཕལ་ཆེར་བོད་ཁྱིམ་སློབ་ཕྲུག་ཕལ་ཆེ་བ་བོད་ནས་ཡོང་སྟབས་མིན་འགྲོ། ཞེས་གསུངས་སོང་ལ། དེ་བཞིན་བོད་ཕྱི་ནང་གི་སློབ་ཕྲུག་ལས་བོད་ནང་གི་སློབ་ཕྲུག་ཚོར་བོད་ཡིག་གི་ཤེས་ཚད་ཡག་པོ་འདུག་ལ། དེ་ནི་རྒྱ་ནག་གི་བཙན་གནོན་འོག་ཡོད་ཀྱང་བོད་ཡིག་གི་ཁོར་ཡུག་དེ་བོད་དུ་ཡག་པོ་ཡོད་སྟབས་བོད་ནང་གི་སློབ་ཕྲུག་དང་བཙན་བྱོལ་གྱི་སློབ་ཕྲུག་ཚོའི་བོད་ཡིག་ཤེས་ཚད་ལ་གནམ་ས་ལྟ་བུའི་ཁྱད་པར་ཤོར་ཡོང་གི་འདུག་ཅེས་གསུངས་སོང་།
གྲྭ་ཚེ་དབང་ལགས་ཀྱིས་རྒན་ཁོང་གིས་ཞོགས་པའི་ཆུ་ཚོད་ ༩ ནས་ ༡༢ བར་དང་ཉིན་རྒྱབ་ཆུ་ཚོད་ ༡ ནས་ཕྱི་དྲོའི་ཆུ་ཚོད་ ༥ པ་བར་འཛིན་གྲྭ་འཚོགས་རྗེས། དགོང་མོ་སློབ་ཕྲུག་ཚོའི་ནང་སྦྱོང་ལ་གཟིགས་ཞིབ་མཛད་དེ་མཚན་གྱི་ཆུ་ཚོད་ ༡༡ བར་དུ་ལྷག་འགྲོ་གི་འདུག་ལ། སྐུ་ངལ་ཧ་ཅང་བསྐྱོན་དགོས་ཀྱི་འདུག་ཅེས་རྒན་བློ་བཟང་བསྟན་དར་ལགས་ཀྱིས་ཐེངས་འདིའི་རིག་གནས་འཆད་ཁྲིད་སྐབས་སྐུ་ངལ་བསྐྱོན་སྟངས་འགྲེལ་མོད། སློབ་ཕྲུག་ཚོས་ཡིག་རྒྱུགས་རང་ནུས་གང་ཡོད་དང་ཤེས་བྱས་ལྕོགས་ཚོད་ཀྱིས་མ་བཏང་བ་དེས། འབྲེལ་ཡོད་མང་བོ་ཞིག་དང་སློབ་ཕྲུག་རང་ཉིད་ཚོས་དབྱར་གནང་གི་གུང་སེང་བེད་སྤྱད་པའི་དུས་ཚོད་དག་དོན་མེད་ཆུད་ཟོས་སུ་སོང་བ་མ་ཡིན་ནམ་སྙམ་པ་ཞིག་གིས་བདག་ལ་སྐྱོ་སྣང་ཚད་མེད་སྦྱིན་ཡོང་ལ། ཁོང་ཚོའི་མ་འོངས་པའི་མདུན་ལམ་དང་བོད་ཀྱི་མ་འོངས་པའི་མདུན་ལམ་ཡང་རབ་རིབ་དང་མག་མོག་ཅིག་ཏུ་འགྱུར་བཞིན་པ་ལྟ་བུའི་ཚོར་བ་ཞིག་འགོག་མེད་དུ་སྐྱེས་འོང་།
རྒན་བློ་བཟང་བསྟར་དར་དང་ངེད་གཉིས་ལ་མཐུན་སྣང་གི་དོགས་གཞི་འགའ་ཡོད་པ་ནི། སློབ་ཕྲུག་འདི་ཚོ་འཕྲོ་བརླག་ཏུ་འགྲོ་བཞིན་པའི་ཁོར་ཡུག་ན་ཕ་མ་དང་དགེ་རྒན། སློབ་སྤྱི་དང་གཞིས་མགོ་སོགས་ཀྱིས་ཁོང་ཚོར་འགན་ལེན་དང་ཁོར་ཡུག་གང་འདྲ་ཞིག་བསྐྲུན་གྱིན་ཡོད་དམ་ཟེར་བ་དེ་རེད།
གསར་འགོད་པ། ཨ་རིག་འགྱུར་མེད།
