ལོ་ ༢༠ རྗེས་ཀྱི་གནམ་བདེ་སྒོ་མོ་ཆེའི་ཐང་ཆེན།

སང་ཉིན་གཟའ་ཕུར་བུའི་ཉིན་ནི་གནམ་བདེ་སྒོ་མོ་ཆེ་ཐང་ཆེན་གྱི་དྲུག་བཞིའི་དོན་རྐྱེན་བྱུང་ནས་ལོ་ ༢༠ འགོར་བའི་ཉིན་མོ་ཡིན། ལོ་ ༢༠ རྗེས་ལ་རྒྱ་ནག་གིས་སྐབས་དེའི་དོན་རྐྱེན་སྐོར་མུ་མཐུད་ནས་གླེང་འཇུག་གི་མེད་ལ། དེའི་སྐོར་གྱི་གནས་ཚུལ་གྱི་ཁ་ཤོར་ཏེ་སླར་ཡང་དོན་རྐྱེན་དེ་ཕྱིར་ལོག་ཡོང་བར་འདོད་དེ། དྲ་རྒྱ་རྣམས་བཀག དོགས་ཡོད་ཀྱི་མི་སྣ་ཁག་འཇུས། སྲང་ལམ་མཐའ་དག་ལ་ཉེན་སྲུང་གི་སོ་ལྟ་བྱས་ཡོད།

རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། གཟའ་མིག་དམར་གྱི་ཉིན་ནས་བཟུང་པེ་ཅིན་དུ་དྲ་རྒྱ་རྣམས་འགག་འགྲོ་གི་འདུག་ལ། དྲ་རྒྱ་གང་ཞིག་ཁ་ཕྱེ་བར་འགྲོ་སྐབས། དྲ་རྒྱ་འདིའི་ཞབས་ཞུའི་འབྲེལ་ཐག་གློ་བུར་དུ་ཆད་སོང་། ཞེས་བརྡ་ལན་ཞིག་ཤར་གྱི་འདུག་ཟེར། བདུན་ཕྲག་འགའི་ཡར་སྔོན་ནས་རྒྱ་ནག་ནང་དུ་ཡུ་ཊོབ་བརྙན་འཕྲིན་བཀག་འདུག་ལ། ཉིན་ཤས་གོང་ནས་བྷེ་བྷེ་སི་བརྙན་འཕྲིན་ནང་གི་དྲུག་བཞིའི་དོན་རྐྱེན་དང་འབྲེལ་བའི་བརྙན་འཕྲིན་མཐའ་དག་ཁ་མདོག་ནག་པོར་བསྒྱུར་ནས་ལྟ་ཐུབ་ཀྱི་མི་འདུག་ཟེར།

རྒྱ་ནག་གིས་བརྒྱུད་ལམ་ཁག་བཀག་འགོག་བྱས་པ་ཙམ་མིན་པར། དྲུག་བཞིའི་དོན་རྐྱེན་ལ་འབྲེལ་བའི་མི་དང་། དམངས་གཙོ་དོན་གཉེར་བ་སོགས་བཀག་ཉར་བྱེད་ཀྱིན་ཡོད། བདུན་ཕྲག་སྔོན་མའི་གཟའ་སྤེན་པའི་དགོང་མོར་རྒྱ་ནག་གཞུང་དང་ཆབ་སྲིད་ལྟ་བ་ལོག་པར་འཛིན་མཁན་སྐུ་ཞབས་ ཝུ་ཀའོ་ཞིན་ ཞུ་བ་ཧྲང་ཧེ་གྲོང་ཁྱེར་གྱི་ལྷོ་ཕྱོགས་སུ་ཡོད་པའི་ཁོང་གི་རང་ཁྱིམ་ནས་འཛིན་བཟུང་བྱས་ཡོད་འདུག སྐུ་ཞབས་ཝུ་ཡིས་ཁོང་གི་ཕ་ཡུལ་ཀྲེ་ཅིང་ཞིང་ཆེན་ནས་དྲུག་བཞིའི་ལས་འགུལ་སྐབས་སློབ་མར་དྲག་གནོན་བྱས་པའི་སྐབས་ངོ་རྒོལ་ནང་ཞུགས་སྟབས་ ༡༩༨༩ ལོར་འཛིན་བཟུང་གིས་ལོ་གཉིས་རིང་བཙོན་འཇུག་བྱས་པ་རེད།

ཧྥ་རན་སིར་རྟེན་གཞི་བྱས་པའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཕྱི་ཚེས་ ༢ ཉིན་གནས་ཚུལ་སྤེལ་དོན། ལོ་ངོ་ ༢༠ རྗེས་ལའང་རྒྱ་ནག་གི་གསར་འགོད་པ་རྣམས་ལ་མཚོན་ན་ ༡༩༨༩ ལོའི་དམངས་གཙོའི་ལས་འགུལ་ལ་དྲག་གནོན་བྱས་པའི་གནས་ཚུལ་རིགས་འགོད་རྒྱུ་ནི་མི་སྲིད་པ་ཞིག་རེད། སྐབས་དེའི་བདུན་ཕྲག་འགའི་རིང་གི་ལས་འགུལ་དང་སློབ་ཕྲུག་དམར་གསོད་བྱས་པའི་དོན་རྐྱེན་སྐོར་གྱི་གནས་ཚུལ་ནི་གསར་འགོད་བརྒྱུད་ལམ་དང་དྲ་ཐོག་གང་དུའང་མུ་མཐུད་ནས་དམ་དྲག་བྱས་ཡོད་པ་རེད་ཟེར།

རྒྱ་ནག་གི་འཚོལ་བཤེར་དྲ་ཚིགས་གྲགས་ཅན་ Baidu ཞེས་པའི་ནང་དུ་ དྲུག་པའི་ཚེས་ ༤ བཀོད་ནས་འཚོལ་སྐབས་དྲ་ངོས་ནས་ཕྱིར་ལན་ཡོང་བ་ནི། འཚོལ་བཤེར་དེ་ཁྲིམས་དང་སྒྲིག་གཞི། སྲིད་བྱུས་བཅས་ལ་འགལ་འདུག་ཅེས་ཤར་ཡོང་གི་ཡོད་འདུག དྲ་ཐོག་དེར་དེའི་སྐོར་གྱི་གློག་བརྙན་འཚོལ་སྐབས། དགོངས་དག འཚོལ་བཤེར་གྱི་གློག་བརྙན་དེ་འདྲ་མི་འདུག ཅེས་ལན་རྒྱག་གི་ཡོད་འདུག གལ་སྲིད་འཚོལ་བཤེར་གྱི་དྲ་ཚིགས་དཀྱིས་མ་ཞིག་ནས་དྲུག་བཞིའི་སྐོར་འཚོལ་སྐབས། དོན་རྐྱེན་དེའི་སྐོར་གྱི་རྒྱ་ནག་གཞུང་གི་འགྲེལ་བཤད་ཤར་ཡོང་གི་ཡོད་འདུག འདི་ལྟར། དྲུག་བཞིའི་དོན་རྐྱེན་ནི་ལོ་ ༢༠ རྗེས་སུ་མུ་མཐུད་ནས་དམ་དྲག་བྱས་སྟབས། རྒྱ་ནག་ནང་གི་གཞོན་སྐྱེས་ཕལ་ཆེ་བ་ཞིག་ལ་རྒྱུས་མངའ་མེད་པར་གྱུར་ཡོད་འདུག

༢༠༠༤ ལོར་དྲུག་བཞིའི་དོན་རྐྱེན་སྐོར་གྱི་གནས་ཚུལ་ཞིག་གློག་འཕྲིན་བརྒྱུད་ཕྱི་ལོག་ལ་གཏོང་མཁན་རྒྱ་ནག་གི་གསར་འགོད་པ་ ཧྲི་ཐའོ་ཞུ་བ་དེར་ལོ་ ༡༠ བཙོན་འཇུག་ཁྲིམས་ཐག་བཅད་དེ་ད་ཆར་མུ་མཐུད་དུ་བཙོན་ཁང་ནང་ལྷག་ཡོད། དྲུག་བཞིའི་ལས་འགུལ་གྱི་མགོ་འཁྲིད་མཁན་གཙོ་གྲས་ ལུའུ་ཞའོ་པའོ་ནི་ཉེ་ཆར་བསྐྱར་དུ་འཛིན་བཟུང་བྱས་ཡོད་འདུག དྲུག་བཞིའི་དོན་རྐྱེན་སྐབས་ཆག་སྒོ་ཐེབས་མཁན་རྣམས་ལ་གཞུང་གིས་ངོས་འཛིན་ཡོད་ཐབས་ཀྱི་ལས་འགུལ་སྤེལ་མཁན་ ཧྭོང་ཆི་ ཞུ་བ་ ༢༠༠༨ ལོའི་ཕྱི་ཟླ་ ༦ པ་ནས་འཇུས་ཏེ་མུ་མཐུད་ཁྲིན་ཏུའུ་གྲོང་ཁྱེར་དུ་བཀག་ཉར་བྱས་ཡོད།

རྒྱ་ནག་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་གནང་མཁན་ རེ་ནེ་ཤ་ ཞུ་བས་བཤད་དོན། རྒྱ་ནག་གི་དཔོན་རིགས་ཚོས་ཁོ་ཚོའི་ལག་མགོ་ན་ཁྲག་ཡོད་པ་ཤེས་ནས་ཞེད་ཀྱིན་ཡོད་པ་རེད། ཁོང་ཚོས་གལ་སྲིད་བདེན་པ་ལྷང་ལ་བུད་ཚེ། སྐབས་དེའི་འགན་ཡོད་མི་སྣ་དག་ཉེས་ཁྲིམས་ལ་འགེལ་བར་ཞེད་ཀྱི་ཡོད་པ་རེད། ཟེར།

ཡིན་ཡང་། ལོ་ ༢༠ རྗེས་ཀྱི་རྒྱ་ནག་གི་ད་ལྟའི་སློབ་ཆེན་སློབ་མ་རྣམས་ཀྱིས་དྲུག་བཞིའི་དོན་རྐྱེན་ཐད་དེ་ཙམ་གྱི་དོ་སྣང་སྤྲོད་ཀྱིན་མེད། ཉེ་ཆར་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་བཀོད་པ་ལྟར་ན། ད་ལྟའི་སློབ་ཆེན་པ་རྣམས་ནི་དམངས་གཙོ་ལ་དགའ་མོས་ཡོད་ནའང་། ཁོང་ཚོས་ལོ་ ༢༠ ཡར་སྔོན་ཇི་བཞིན་གྱི་བློས་གཏོང་ཞིག་བྱེད་འདོད་མེད་པར་བརྗོད་ལ། རྒྱུ་རྐྱེན་སྣ་ཚོགས་ནང་གི་གཅིག་ནི། ལས་ཀའི་གོ་སྐབས་ཤོར་བར་དོགས་པ་དང་། གཉིས་ནས། རྒྱ་ནག་གཞུང་གི་དམ་དྲག་ལ་ཞེད་པ། གསུམ་ནས། མ་གཞི་ནས་དཔལ་འབྱོར་མ་གཏོགས་ཆབ་སྲིད་ལ་དོ་སྣང་དང་དབྱིངས་མེད་པ། བཞི་ནས། ཁོང་ཚོས་རྒྱ་ནག་གི་འཕེལ་རྒྱས་ལ་བསྒུག་རྒྱུ་ལས་འོལ་ཚོད་ཀྱིས་དམངས་གཙོའི་ལམ་དུ་འདེད་པར་འདོད་མོས་མེད་པ་བཅས་ཡིན་པར་བཤད།