སུད་སིའི་བོད་རིགས་ ༤༠ ཙམ་གྱིས་རྒྱལ་ས་བྷེར་ནས་གྲོང་ཁྱེར་ཇི་ནེ་ཝ་བར་སྤྱི་ལེ་ ༡༦༠ ཙམ་ལ། བོད་དོན་ཞི་བའི་གོལ་བགྲོད་ཅིག་གནང་སྟེ། ཁ་སང་ཕྱི་ཚེས་ ༢ ཉིན་མཉམ་འབྲེལ་རྒྱལ་ཚོགས་ཀྱི་ཚོགས་ཁང་མདུན་དུ་སླེབས་ཡོད་འདུག
སྐབས་བཅུ་གསུམ་པའི་སུད་སི་བོད་རིགས་མི་དམངས་ཀྱི་གོ་སྒྲིག་འོག མི་གྲངས་ ༤༠ ཙམ་གྱིས་ཟླ་སྔོན་མའི་ཕྱི་ཚེས་ ༢༥ ཉིན་སུད་སིའི་རྒྱལ་ས་བྷེར་ནས་མགོ་འཛུགས་ཀྱིས་གྲོང་ཁྱེར་ཇི་ནི་ཝའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་བར། སྤྱི་ལེ་ ༡༦༠ ཙམ་ལ་བོད་དོན་ཞི་བའི་གོམ་བགྲོད་ཐེངས་གཉིས་པ་དེ་གནང་ཡོད་འདུག ཁོང་ཅག་གིས་བོད་པའི་རྩ་དོན་ཆེད་དཀའ་སྡུག་དང་ལྟོགས་སྐོམ་ཁྱད་དུ་བསད་དེ། ཉིན་རེར་སྤྱི་ལེ་ ༢༠ ཙམ་རེར་ཞི་བའི་གོམ་བགྲོད་བྱས་ཏེ་ཉིན་གྲངས་བརྒྱད་པ་སྟེ། ཁ་སང་ཕྱི་ཚེས་ ༢ ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཉིན་དང་པོར་འཁེལ་ཡོད་སྟབས། ཉིན་གུང་ཆུ་ཚོད་ ༡ ཙམ་ལ་གོམ་བགྲོད་པ་རྣམས་མཉམ་འབྲེལ་རྒྱལ་ཚོགས་ཀྱི་ཚོགས་ཁང་མདུན་དུ་སླེབས་ཏེ། ཉེ་ཆར་རྒྱ་གཞུང་གིས་བོད་རིགས་ཁག་ཅིག་ལ་སྲོག་ཁྲིམས་བཅད་པར་ངོ་རྒོལ་དང༌། བོད་ནང་རྒྱལ་སྤྱིའི་རང་དབང་རྟོག་ཞིབ་ཚོགས་པ་གང་མགྱོགས་གཏོང་དགོས་པའི་འབོད་སྐུལ་ཞུས་ཡོད་འདུག
གནས་ཚུལ་དེའི་ཐད་འདི་གའི་གསར་འགོད་པས་སུད་སི་བོད་རིགས་མི་དམངས་ཀྱི་ཚོགས་གཞོན་སྐལ་བཟང་རྣམ་རྒྱལ་ལགས་སུ་བཅར་འདྲི་ཞུས་པར་ཁོང་གིས་ངོ་སྤྲོད་གནང་དོན། ལས་འགུལ་འདི་ཐོག་མར་མགོ་འཛུགས་ཞུ་སྐབས། གོམ་བགྲོད་པ་ ༣༥ ཙམ་ཡོད་ལ། ལམ་བར་ནས་ཁག་ཅིག་འཛུལ་ཞུགས་བྱས་ཏེ། ཕྱི་ཚེས་ ༢ ཉིན་ཇི་ནེ་ཝར་འབྱོར་སྐབས་གོ་སྒྲིག་པ་དང་ཁྱོན་བསྡོམས་མི་གྲངས་ ༥༠ ལྷག་འདུག དེ་དག་ཁྲོད་རྒན་གཞོན་གཉིས་ཀ་ཡོད་སྟབས། ལམ་བར་ནས་རྐང་པ་ན་བ་དང་གནམ་གཤིས་སོགས་ཀྱི་དཀའ་ངལ་མི་ཉུང་བ་ཞིག་འཕྲད་ཡོད་པ་རེད། འོན་ཀྱང༌། སུད་སིའི་མང་ཚོགས་ཀྱི་ངོས་ནས་རྒྱབ་སྐྱོར་དང་གདུང་སེམས་མཉམ་སྐྱེད་གང་ལེགས་གནང་སོང་ལ། ཐེངས་འདིར་བོད་དོན་ཁྱབ་བསྒྲགས་ཀྱང་གང་འཚམ་ཡག་པོ་བྱུང་ཡོད། ཁ་སང་ཉིན་གུང་ཆུ་ཚོད་ ༡ ཙམ་ལ་ཇི་ནེ་ཝའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་སླེབས་ཏེ། རྔམ་སྟོན་ཁྲོམ་སྐོར་བྱས་ཏེ་ཉེ་ཆར་རྒྱ་གཞུང་གིས་བོད་མི་ཁག་ཅིག་ལ་སྲོག་ཁྲིམས་བཅད་པར་ངོ་རྒོལ་ཤུགས་ཆེན་བྱས་སོང༌། སྐབས་དེར་སུད་སི་བོད་རིགས་ཚོགས་གཙོ་དང་དྲིལ་བསྒྲགས་སྐུ་ཚབ། ཚོགས་དྲུང་བཅས་ང་ཚོ་མི་ ༤ འགྲོ་བ་མིའི་ཐོབ་ཐང་ལྷན་ཁང་གི་ཨེ་ཤ་ཡའི་རྟོག་ཞིབ་སྡེ་ཚན་གྱི་ལས་བྱེད་ཁག་ཅིག་དང་ཐུག་འཕྲད་བྱས་ཏེ། ཐེངས་འདིའི་གོམ་བགྲོད་སྐོར་གྱི་སྙན་ཐོ་དང་དགོས་འདུན་ཁག་ཕུལ་བ་ཡིན།
ད་ལོའི་གོམ་བགྲོད་འདི་ཐེངས་གཉིས་པ་དེ་ཆགས་ཡོད། སྔར་ལོ་བོད་ནང་དོན་རྐྱེན་བྱུང་སྐབས་ང་ཚོས་གོམ་བགྲོད་དང་པོ་དེ་བྱས་ཏེ་དགོས་འདུན་དོན་ཚན་དྲུག་བཏོན་ཡོད། དེ་དག་བོད་གཞུང་དམངས་ཛ་དྲག་ལས་འགུལ་ཚོགས་ཆུང་གི་དགོས་འདུན་ཁག་དང་གཅིག་པ་རེད། དོན་ཚན་གཅིག་གི་ནང༌། བོད་ནང་རྒྱལ་སྤྱིའི་རང་དབང་རྟོག་ཞིབ་ཚོགས་པ་གང་མགྱོགས་གཏོང་དགོས། ཞེས་བཀོད་ཡོད། སྐབས་དེར་འགྲོ་བ་མིའི་ཐོབ་ཐང་ཚོགས་ཆུང་གིས། གནད་དོན་གཞན་དག་ཁག་པོ་ཡིན་ནའང་བོད་ནང་རྟོག་ཞིབ་ཚོགས་པ་གཏོང་རྒྱུ་དེ་འགྲོ་བ་མིའི་ཐོབ་ཐང་གི་གནད་དོན་ཆགས་ཡོད་སྟབས། ང་ཚོས་འབད་བརྩོན་ཞུ་རྒྱུ་ཡིན། ཞེས་ཞལ་བཞེས་གནང་ཡོད་པ་རེད། ཐེངས་འདིར་དེའི་ཐད་བསྐྱར་དུ་དྲི་བ་བཏང་བ་ཡིན། ཁོང་ཚོས་ལམ་སང་ཞུ་ཐུབ་མི་འདུག་མོད། ཕྱག་རོགས་ཚོ་དང་བཀའ་མོལ་གནང་སྟེ། གང་མགྱོགས་ཡིག་ཐོག་ནས་ལན་འབུལ་ཆོག་ཟེར། དེ་ནས་ཉིན་རྒྱབ་ཆུ་ཚོད་ ༤ ཙམ་ལ་ལས་འགུལ་ཡོངས་སུ་མཇུག་སྒྲིལ་བ་ཡིན། ཞེས་བརྗོད་བྱུང༌།
མངོན་ནས་བོད་སྤྱི་བའི་དོན་ལ་སེམས་ཤུག་ཡོད་པ་རྣམས་ལ་འགྲིན་ཞིག་མི་འདུག
སྤུན་ཟླ་ཚོ་དགའ་བསུ་དང་འཚམ་འདྲི་ཡོད།