དཀར་ནག་ལས་འབྲས་འཐག་པའི་སེམས་ཁོང་དུ།།
མཛེས་གཟུགས་ལྷ་ལ་དད་ཞེན་མངར་མོ་དང་།།
མི་སྡུག་གདོན་གྱི་གཤིས་ལ་སྡང་ལུགས་འདི།།
མགོ་ནག་བོད་པའི་བག་ཆགས་ཟབ་མོ་ཞིག།
དར་དཀར་ཡུག་གཅིག་སྣེ་རུ་འཁྱིད་པའི་སེམས།།
སྒོར་མོ་རྨི་ལམ་རྨིས་པའི་སྟོང་འདང་རིགས།།
རྩིས་ཀྱང་ཚར་བ་མེད་པའི་འགྱུར་བ་འདི།།
མགོ་ནག་བོད་ལ་དྲངས་པས་གཡུལ་འཐབ་ཡིན།།
རྒྱང་རིང་ཡུལ་ནས་ཞེ་མདངས་ཆེ་རབས་མོད།།
ཉེ་སར་བཅར་དུས་སྐྱོན་ཆ་མང་རབས་བཤད།།
ཚོན་འདོག་སྣ་དགུའི་བསླུས་པའི་ཚོར་བ་འདི།།
མགོ་ནག་བོད་པའི་ནད་ཡམ་ལྕི་མོ་རེད།།
ཁ་ཕོ་སྟོང་གིས་རང་རིགས་ནང་དུ་མཁས།།
སྡར་མའི་ངང་ཚུལ་ཕྱི་རོལ་དགྲ་ལ་སྟོན།།
ཕྱི་ནང་ཁ་ཁ་མི་ཤེས་རྨོངས་ཞེན་འདི།།
མགོ་ནག་བོད་པ་ཚང་གི་གཤིས་ལ་འབྱར།།
རང་རིགས་ཡི་གེ་རྗེས་ལུས་བེད་མེད་འདོད།།
གཞན་གྱིས་སྐད་ཡིག་རང་གི་འཚོ་བརྟེན་བསམ།།
རིགས་ཀྱི་དངས་ཞེན་མེད་པའི་འཚོ་བ་འདི།།
མགོ་ནག་བོད་ཀྱི་མི་རབས་བཙོང་ལུགས་རེད།།
ཨ་ཅེ་ཆུ་སྐྱེས་སྒྲོལ་མ་ལགས། འདི་རུ་ཕེབས་ནས་བསམ་ཚུལ་ཞིག་བྲིས་དེ་ཕེབས་ཟིན་པ་དེ་ཐུགས་རྗེ་ཆེ་ཞུ་བ་དང་ཆབས་ཅིག་སླར་ཡང་དུས་ཚོད་ཀྱི་ཁོམ་ལོངས་བར་ནས་བསྐོར་རེ་རྒྱག་རྒྱུ་མ་བརྗེད་རོགས། ཉིད་ཀྱིས་སྐད་ཆ་སེམས་ལ་བཟུང་ཡོད།
བོད་སྐད་དྭངས་མ་རྒྱག་པར་ངོ་ཚས་སྒྲིབ།།
ཕ་སྐད་རིག་གཞུང་སྦྱོང་བར་ལེ་ལོ་ཆེ།།_
ཚང་མས་སྤྱི་དང་བོད་དོན་གླེན་མོད་ཀྱང༌།།
ཁ་བཤད་ལག་ལེན་མི་མཚུངས་ཤིན་ཏུ་མང༌།།
ཚང་མས་སྤྱི་དོན་ལ་དོན་དངོས་ཀྱི་འགན་ཞིག་དང་མཉམ་དུ་བཅོས་མིན་གྱི་ལྷག་བསམ་ཞིག་ཀྱང་འཁྱེར་བར་སྨོན།
དྲ་གྲོགས་བོན་རྒྱ་ལགས་བསྟོད་བསྔགས་གནང་བ་དེར་རྗེས་སུ་ཡི་རུང་ཡོད། རྗེས་ཕྱོགས་ཞན་ཆའི་ཕྱོགས་ཀྱང་གང་ཐུབ་ཀྱིས་གསུང་རོགས་ཞུ། འདི་ལྟར་ཡང་ཡང་ཕེབས་ཐུབ་པར་ཤོག
ཤ་ཁྲག་ལགས། སྙན་ངག་འདི་ལ་ལྷོད་ཉམས་ཆེན་པོ་འདུག འདི་སྙན་ངག་གི་གལ་ཆེའི་ཁྱད་ཆོས་ཤིག་རེད། འདི་འདྲ་བྱུང་ན་ད་གཟོད་རྡོ་ཆག་བཙན་སྒྲིག་གི་སྙན་ངག་ཟེར་བ་དེ་ལས་བརྒལ་ཏེ་ཚད་མཐོ་བའི་སྙན་ངག་གི་གྲས་ལ་འགྲོ་བཞིན་ཡོད་པ་འདྲ།
བདེན་ནོ་བདེན་ནོ་དྲ་གྲོགས་བློ་དབང་བདེན།།
བོད་ཀྱི་མི་ལ་ཞན་ཆ་ཆེ་ཤོས་དེ།།
ཁ་ངོ་ནང་ལ་བསྐོར་ནས་བདེན་གཏམ་ནི།།
བཤད་མཁན་དངོས་ནས་དེང་སང་དཀོན་པོ་འདུག།།
རེ་གཉིས་དྲང་གཏམ་བཤད་པར་ཕྱོགས་ན་ཡང་།།
དྲང་བོ་གཏམ་ལ་འགུ་བའི་མི་ཚོགས་ཉུང་།།
ཀུ་རེ་ཆལ་གཏམ་གླེང་དུས་འདུ་ར་ཆེ།།
དེ་འདྲ་དེ་ནི་ད་ལྟའི་བོད་པ་རེད།།
འདི་འདྲ་ཨེ་རེད་གྲོགས་པོ་བློ་དབང་ལགས།།
དེ་འདྲ་ཡིན་སྙམ་ཉིད་ཀྱིས་ཨེ་དྲན་ནམ།།
ང་ཡིས་མཐོང་བའི་མིག་ལ་སྐྱོན་ཆ་མོད།།
དེ་དག་ཉིད་ཀྱི་དྲུང་དུ་འཐོལ་ལོ་གཤེགས།།
རྒྱང་ནས་བལྟས་ན་བོད་པ་དེ་འདྲ་རེད། །
ཞིབ་ཏུ་བསམས་ན་འཛམ་གླིང་དེ་འདྲ་རེད། །
འཇིག་རྟེན་མི་ཡི་ཐུན་མོང་གཤིས་སྤྱོད་ལས། །
བོད་ལ་དམིགས་བསལ་སྤྱོད་ངན་ཅང་མ་མཐོང་། །
འོན་ཀྱང་འཛམ་གླིང་མི་ལ་ཡོད་ངེས་པའི། །
རང་རྟོག་ཡར་ཐོན་བརྩོན་སེམས་བོད་ལ་མེད། །
སྤྱི་དོན་ལྷག་བསམ་ཡོད་ཀྱང་ཆུང་ཆུང་ཡིན། །
དྲང་གཏམ་སྨྲ་བ་བོད་ལ་ལྷག་ཏུ་དཀོན། །