ཟླ་འདིའི་ཚེས་ ༡༩ ཉིན་༧གོང་ས་མཆོག་ལ་དྭགས་ཏོག་ཡུལ་གྱི་ཐུབ་དབང་སྐུ་བརྙན་ཆེན་མོར་མཆོད་མཇལ་དུ་ཕེབས་ཏེ། ལ་དྭགས་དམག་སྡེའི་ཁྲོད་ཀྱི་ཏོག་གི་སྐོར་སྲུང་དམག་མི་ཟུར་པ་གཙོས་དད་ལྡན་མི་མང་ལ་བཀའ་སློབ་དང་ཆོས་འབྲེལ་མཛད།
ཟླ་འདིའི་ཕྱི་ཚེས་ ༡༩ ཉིན་གྱི་སྔ་དྲོའི་ཆུ་ཚོད་ ༧།༣༠ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་ཤེལ་གྱི་ཕོ་བྲང་དགེ་འཕེལ་གླིང་ནས་ཆིབས་འཁོར་དུ་བཞུགས་ཏེ་ཏོག་ཡུལ་དུ་ཆིབས་བསྒྱུར་བསྐྱངས་པ་དང་། ལ་དྭགས་བསོད་གླིང་བོད་མིའི་གཞིས་ཆགས་ཀྱི་མི་མང་དང་ལ་དྭགས་ཡུལ་མི། ཕྱོགས་མཐའ་ཁག་ནས་ཕེབས་པའི་དད་ལྡན་སྟོང་ཕྲག་མང་པོས་བདུག་སྤོས་དང་ཁ་བཏགས། མེ་ཏོག་སོགས་བཟུང་ནས་ཞལ་མཇལ་ཞུས་པ་དང་། ཏོག་དགོན་པའི་དགེ་འདུན་པ་རྣམ་པས་སེར་སྦྲེང་བསྒྲིགས་པ་དང་། ཏོག་གི་སྐོར་སྲུང་དམག་མི་ཟུར་པ་ཚོས་ཕེབས་བསུའི་གུས་འདུད་དང་བཅས་ཕེབས་བསུ་ཞུས། སྐབས་དེར་༧གོང་ས་མཆོག་གིས་སངས་རྒྱས་པའི་ཆོས་ཟེར་དུས་ཕྱི་ལོགས་ལ་ལྷ་ཁང་རྫིག་པོ་ཡོད་པའི་སྐད་ཆ་མ་ཡིན་པར་སེམས་རྒྱུད་འདུལ་དགོས་ཀྱི་ཡོད་པའི་བཀའ་སློབ་བསྩལ།
མགོན་པོ་གང་ཉིད་མཆོག་གིས། དེ་རིང་ང་ཚོ་འདིར་འཛོམས་ནས་ལས་འགན་ནི། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་པ་འདི་རེད། སྟོན་པ་བཅོམ་ལྡན་འདས་ཀྱིས་ལོ་ ༢༥༠༠ གོང་དུ་ཆོས་འཁོར་རིམ་པ་གསུམ་ལ་སོགས་པ་བསྐོར་བར་མཛད་ནས་དུས་ད་ལྟའི་བར་དུ་འཛམ་བུ་གླིང་ལ་སངས་རྒྱས་ཀྱི་ཆོས་ཟེར་དུས་གང་ལྟར་ཤར་ཕྱོགས་ལུང་པར་དད་པ་རྩེ་གཅིག་ཏུ་ཡོད་པ་རེད། དེ་ནས་ནུབ་ཕྱོགས་ལུང་པར་ཡང་སངས་རྒྱས་པའི་ཆོས་ལ་དོ་སྣང་གསར་པ་ཞིག་སླེབས་ཡོང་གི་འདུག དེར་བརྟེན། འཛམ་བུ་གླིང་གི་བདེ་བ་འདོད་ཅིང་། སྡུག་བསྔལ་མི་འདོད་པའི་མི་ཚང་མར་སེམས་ཀྱི་ཞི་བདེ་ཡོང་བར་སྟོན་པའི་བྱིན་རླབས་ནམ་ཡང་བསླུ་བ་མེད་པར་ཡོད་པ་རེད། སྟོན་པ་སངས་རྒྱས་བཅོམ་ལྡན་འདས་ཀྱི་བསྟན་པ་འདིས་ཆོས་ཡོད་པ་དང་མེད་པ་ཚང་མར་སེམས་རྒྱུད་ཞི་བདེ་དང་། འཛམ་གླིང་སྤྱི་ལ་བསམ་བློ་གཏོང་བ་ཞིག་ཡོང་བསྡད་ཡོད། གང་ལྟར་སངས་རྒྱས་ཀྱི་འཕྲིན་ལས་དུས་ད་ལྟ་ཡིན་ནའང་། བསྟན་པ་རིན་ཆེན་མཆོག་གིས་མ་ཁྱབ་པའམ།། ཞེས་སོགས་གསུངས་པ་བཞིན། དུས་ཀྱི་མཐའ་ལ་སངས་རྒྱས་པའི་ཆོས་འདི་ལ་འཛམ་གླིང་གང་སར་དམིགས་བསལ་གྱིས་དོ་སྣང་ཞིག་བྱེད་བཞིན་འདུག
ངོས་ལ་ཆ་བཞག་ན་ཞོགས་པ་ཡར་ལངས་པ་དང་། སངས་རྒྱས་ཀྱི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་ཡོང་བ་དང་། འགྲོ་བ་མང་པོར་ཕན་ཐོགས་པར་རྟག་ཏུ་སྨོན་ལམ་རྒྱག་བཞིན་ཡོད། དེ་རིང་འདིར་སྟོན་པའི་སྣང་བརྙན་ཁྱད་པ་འདིའི་མདུན་དུ་ང་ཚོ་རུབ་རུབ་བྱེད་རྒྱུ་བྱུང་བ་རེད། སངས་རྒྱས་པའི་ཆོས་འདི་སེམས་འདུལ་དགོས་པའི་སྐོར་རེད། སེམས་བཏུལ་བའི་ཐོག་ནས་ལུས་དང་ངག་གི་སྤྱོད་ལམ་ཚང་མ་ཞི་ཞིང་དུལ་བ་ཞིག་ཡོང་བ། གང་ལྟར་སངས་རྒྱས་བཅོམ་ལྡན་འདས་བཞུགས་པའི་སྐབས་སུ་སེམས་རྒྱུད་དུལ་བ་ཞིག་དགོས་ཞེས་བཀའ་སློབ་གནང་བ་བཞིན་དུས་ད་ལྟའི་བར་དུ་ང་ཚོ་ཚང་མས་སངས་རྒྱས་ཀྱི་དགོངས་པ་བཞིན་སེམས་རྒྱུད་ཞི་ཞིང་དུལ་བ་ཞིག་བྱས་ཏེ། འགྲོ་བ་མང་པོར་ཕན་ཐོགས་པ་དང་། རྒྱུན་དུ་བསྟན་པ་རིན་པོ་ཆེས་མ་ཁྱབ་པའི་སར་ཁྱབ་པ་དང་། ཉམས་པའི་སར་སྙིང་རྗེ་ཆེན་པོས་སོར་ཆུད་པ་ལ་སྨོན་ལམ་རྒྱག་པ་བཞིན་རེད།
འཛམ་བུ་གླིང་འདིར་ཆོས་ལུགས་མང་པོ་ཡོད་པ་དང་། བྱེ་བྲག་ཏུ་སངས་རྒྱས་པའི་ཆོས་འདི་ནི་སེམས་རྒྱུད་ཞི་ཞིང་བཏུལ་བ་ཞིག་དང་། ཀུན་ལ་ཕན་པ་སྒྲུབ་པ་ཞིག་མ་གཏོགས་ཕྱོགས་ལྷུང་བྱས་ཏེ་ང་ཚོ་དང་ཁྱོད་ཚོ་ཟེར་བའི་སྐད་ཆ་མེད་པ་རེད། གང་ལྟར་ཀུན་ལ་ཕན་པ་སྒྲུབ་པ་ཞིག་ཡིན། ངོས་ལ་མཚོན་ན་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་བྱས་ཏེ། ཆུང་ཆུང་སྐབས་ནས་རྩ་བ་ཤེས་རབ་དང་དབུ་མ་འཇུག་པ་སོགས་གཞུང་རྣམས་བློ་ལ་བཟུང་ནས་དུས་རྒྱུན་དུ་བཅོམ་ལྡན་འདས་ཀྱི་གསུང་གི་འཕྲིན་ལས་ཐུན་མོང་མ་ཡིན་པར་བློ་སྦྱངས་པ་ཡིན།
དེང་སང་སངས་རྒྱས་པའི་ཆོས་ཀྱིས་སེམས་ཞི་ཞིང་བཏུལ་བར་བྱེད་པ་ལ་ས་ཕྱོགས་གང་ས་གང་དུ་དོ་སྣང་གསར་པ་ཞིག་སླེབས་བཞིན་འདུག ངོས་ནས་ཀྱང་སྟོན་པའི་བསྟན་པ་ལ་ཞབས་འདེགས་གང་ཡོང་ཅི་ཡོང་གིས་སྒྲུབ་བཞིན་ཡོད། དེ་རིང་འདིར་འདུས་པའི་ཆོས་གྲོགས་ཚོ་ཡིན་ནའང་། སངས་རྒྱས་པའི་ཆོས་ཟེར་དུས་ཕྱི་ལོགས་ལ་ལྷ་ཁང་རྫིག་པོ་ཡོད་པའི་སྐད་ཆ་མ་ཡིན་པར་སེམས་རྒྱུད་འདུལ་དགོས་ཀྱི་ཡོད། དེར་བརྟེན། ཚང་མས་ཧུར་ཐག་བྱེད་རོགས། ཞེས་གསུངས།
དེ་བཞིན་མགོན་པོ་མཆོག་གིས། སངས་རྒྱས་པའི་ཆོས་འདི་ལ་ནུབ་ཕྱོགས་སོགས་འཛམ་གླིང་ཁྱོན་ཡོངས་དོ་སྣང་བྱེད་བཞིན་པ་ཡོད་པ་དང་། ང་རང་ཚོ་ཕ་མེས་ནས་བཅོམ་ལྡན་འདས་ཀྱི་རྗེས་འབྲང་ཆགས་ཡོད། དེར་བརྟེན། སངས་རྒྱས་པའི་ཆོས་ལ་དད་པ་ཙམ་མ་ཡིན་པར་ཆོས་ཀྱི་གནད་འགག་གང་འདྲ་ཡིན་པར་སློབ་སྦྱོང་དང་། དོ་སྣང་བྱས་ཏེ་སེམས་རྒྱུད་འདུལ་ཐབས་བྱ་རྒྱུ་ང་ཚོ་ཚང་མའི་ལས་འགན་རེད། ཧུར་ཐག་གནོངས། ཆོས་ཀྱི་སྙིང་པོ་ནི། སེམས་པ་བཟང་པོ་བྱ་རྒྱུ་དེ་རེད། དེར་བརྟེན། ངོས་རང་ཞོགས་པ་གཉིད་སད་པ་དང་སེམས་ཅན་ཐམས་ཅད། བྱེ་བྲག་ཏུ་མི་རིགས་ཀྱི་དབྱེ་བ་མེད་པར་བཅོམ་ལྡན་འདས་ཀྱི་རྗེས་འབྲང་ཚང་མའི་སེམས་རྒྱུད་ཞི་བདེའི་ཐོག་ནས་སྒོ་གསུམ་གྱི་སྤྱོད་ལམ་གང་གི་ཐོག་ནས་ཡིན་ཡང་གཞན་ཕན་སྒྲུབ་པ་ཞིག་ལ་སྨོན་ལམ་རྒྱག་བཞིན་ཡོད། ཅེས་དང་། ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲང་ཡིན་པས་སེམས་པ་བཟང་པོ་དང་། གཞན་ཕན་གྱི་བློ་རྩ་ཆེན་པོ་བྱས་ཏེ་བསྡད་ཡོད། དེང་སང་འཛམ་གླིང་འདིར་སངས་རྒྱས་པའི་ཆོས་ལ་དམིགས་བསལ་དོ་སྣང་དང་། ལྷག་པར་རྒྱ་ནག་ཏུ་སངས་རྒྱས་པའི་ཆོས་ལ་དམིགས་བསལ་གྱིས་དོ་སྣང་བྱེད་བཞིན་པའི་སྐབས་འདིར་ང་ཚོ་ཕ་མེས་ནས་སངས་རྒྱས་པའི་ཆོས་བྱེད་བཞིན་ཡོད་པས་ང་ཚོས་སངས་རྒྱས་པའི་ཆོས་ལ་སློབ་སྦྱོང་དང་། སེམས་རྒྱུད་ལ་སྦྱར། གཞན་ཕན་རྒྱ་ཆེན་པོ་ཡོང་བར་འབད་བརྩོན་བྱེད་དགོས། ཚན་རིག་པའི་ནང་ནས་ཀྱང་སངས་རྒྱས་པའི་ཆོས་ཀྱི་ལྟ་གྲུབ་ལ་དོ་སྣང་གིས་ངོས་ལ་ཐུག་འཕྲད་དུ་སླེབས་ནས་གོ་བསྡུར་བྱ་རྒྱུ་བྱུང་། སངས་རྒྱས་པའི་ཆོས་ཀྱི་སེམས་བཟང་པོ་བྱེད་པ་ནི་འཛམ་གླིང་འདིར་ཕན་ཐོགས་ཡོད་པ་ཞིག་ཡིན་པས་ཚང་མས་ཧུར་ཐག་བྱོས། ཅེས་གསུངས།
གསར་འགོད་པ་སྐལ་བཟང་སྦྱིན་པས་༧རྒྱལ་བ་རིན་པོ་ཆེ་དྲ་རྒྱ་ནས་བཏུས།
