སྦེལ་ཀོབ་ས་གནས་ཀྱི་གཞུང་འབྲེལ་མ་ཡིན་པའི་ཚོགས་པ་གསུམ་གྱིས་རྒྱ་ནག་གི་དྲུག་བཞིའི་དོན་རྐྱེན་ཉིན་མོ་སྲུང་གཙི་བྱས་པ།
ཕྱི་ཚེས་ ༤ ཉིན་གྱི་དགོང་མོར་སྦེལ་ཀོབ་ས་གནས་བུད་མེད་དང་གཞོན་ནུ། དབུས་གངས་ལྗོངས་རང་བདེན་རྩོད་ལེན་མཐུན་ཚོགས་བཅས་ཀྱིས་གོ་སྒྲིག་འོག་སྦེལ་ཀོབ་སེར་སྐྱ་མི་མང་གིས་མར་མེ་ཁྲོམ་སྐོར་ཞིག་བྱས་ཡོད་ལ། དེ་ནི་པེ་ཅིན་དུ་དྲུག་བཞིའི་དོན་རྐྱེན་བྱུང་ནས་མི་ལོ་ཉི་ཤུ་ཧྲིལ་བོ་འཁོར་བར་དུས་དྲན་སྲུང་གཙི་དང་རྒྱ་ནག་གི་མཐོ་རིམ་སློབ་མ་གཙོས་ཤེས་ལྡན་མི་སྣ་དང་། མི་མང་ཡོངས་ལ་གདུང་སེམས་མཉམ་སྐྱེད་ཀྱི་ཆེད་དུ་ཡིན་འདུག
དགོང་མོ་དེར་དབུས་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་བློ་བཟང་དཔལ་ལྡན་གྱིས་གསུང་བཤད་གནང་དོན། རྒྱ་ནག་གི་དྲུག་བཞིའི་དོན་རྐྱེན་གྱི་ཉིན་མོ་འདི་སྲུང་གཙི་བྱེད་དོན། ང་ཚོས་འདྲ་ཆགས་ཆགས་དང་འཁྲབ་སྟོན་ཙམ། ཡང་ན་སྲོལ་རྒྱུན་ལྟ་བུ་ཞིག་སྲུང་གཙི་བྱེད་ཀྱིན་མེད་པར། ༸གོང་ས་མཆོག་གིས་སྔ་ཕྱི་བར་གསུམ་དུ་རྒྱ་ནག་གཞུང་ལ་ཡིད་ཆེས་བརླག་གྲབས་བྱེད་ཀྱིན་འདུག་ནའང་། རྒྱ་ནག་མང་ཚོགས་ལ་ཡིད་ཆེས་བརླག་མེད་གསུངས་པ་ལྟར། རྒྱ་ནག་མང་ཚོགས་དཀྱུས་མར་ཡིད་ཆེས་བརླག་མེད་ན། རྒྱ་ནག་གི་མཐོ་རིམ་སློབ་མ་གཙོས་ཤེས་ལྡན་མི་དང་མང་ཚོགས་ཁྲི་སྟོང་མང་བོས། ང་ཚོར་འགྲོ་བ་མིའི་ཐོབ་ཐང་དགོས་ཀྱི་འདུག མང་གཙོ་དགོས་ཀྱི་འདུག རང་དབང་དགོས་ཀྱི་འདུག་ཟེར་ནས་སྐད་འབོད་བྱེད་སྐབས། རྒྱ་གཞུང་གིས་རྒྱ་ནག་མགོ་སྟེང་སློག་མཁན་གྱི་ཉེས་མིང་འོག་མི་སྟོང་ཕྲག་དང་ཁྲི་ཕྲག་བསད་ཡོད་པ་རེད། དེས་རྒྱ་ནག་མང་ཚོགས་ཀྱི་སེམས་ལ་བཟོད་དུ་མེད་པའི་ན་ཟུག་ཅིག་དང་རྨ་ཁ་ཞིག་བཞག་ཡོད་པ་རེད་ལ། ང་ཚོར་མཚོན་ན་དེ་དང་ཆ་འདྲ་བའི་སྡུག་བསྔལ་ཞིག་མྱངས་པ་ཡིན་སྟབས། ང་ཚོས་ཁོང་ཚོར་གདུང་སེམས་མཉམ་སྐྱེད་བྱེད་དགོས་པ་ཞིག་དང་བྱེད་འོས་ཤིག་རེད། ལོ་སྔོན་མར་བོད་ནང་ཞི་བའི་ངོ་རྒོལ་བྱུང་སྐབས་རྒྱ་ནག་གི་ཤེས་ལྡན་མི་སྣ་དང་ཁྲིམས་རྩོད་པ་མང་བོས་མཚན་རྟགས་བསྡུ་རུབ་ཀྱིས་རྒྱབ་སྐྱོར་གནང་བ་དང་། ད་ལོར་ཡང་བོད་ནང་ཟིང་འཁྲུག་འབྱུང་བཞིན་པའི་ཐད་རྒྱ་གཞུང་ལ་སྙན་ཞུ་ཕུལ་བ་བཅས་བྱུང་ཡོད་པས་ང་ཚོས་ཀྱང་མང་ཚོགས་དང་ཟླ་སྒྲིལ་གྱིས་ལས་འགུལ་སྤེལ་དགོས་ཞེས་ཐེངས་འདིའི་ལས་འགུལ་འདི་སྤེལ་དགོས། འདིས་བོད་རྒྱའི་མང་ཚོགས་ཕན་ཚུན་བར་མཐུན་སྒྲིལ་དང་ཡིད་ཆེས་འཕེར་གི་རེད་ཅེས་གསུངས་ཡོད། 
ཡིན་ནའང་། དགོང་མོ་དེར་ནམ་རྒྱུན་ལྟར་སེར་སྐྱ་མི་མང་མང་བོ་ཕེབས་མེད་པ་མ་ཟད། བཀྲ་ཤིས་ལྷུན་པོ་དགོན་གྱི་གྲྭ་བ་མ་གཏོགས་སེ་ར་བྱེས་སྨད་གཉིས་དང་རྣམ་གྲོལ་གླིང་བཅས་ཀྱིས་གྲྭ་བ་སུམ་ཅུ་ཙམ་ལས་གྲྭ་མང་ལ་དགོངས་འཁྲོལ་གནང་མེད་པར་བརྟེན། ཁོང་གིས་འདིའི་ཐད་གསུངས་དོན། སྦེལ་ཀོབ་ས་གནས་འདིར་སེར་སྐྱ་མི་མང་ག་ཚོད་མང་བོ་ཡོད་པ་རེད། ཡིན་ནའང་། རེ་ཟུང་རང་ངོས་ནས་ཕེབས་ཀྱི་ཡོད་པ་མ་རེད་ལ། རེ་ཟུང་སྒྲིག་གཞིའི་འོག་ནས་གཏོང་གི་ཡོད་པ་མ་རེད། སེ་ར་བྱེས་སྨད་དང་རྣམ་གྲོལ་གླིང་ལྟ་བུར་མཚོན་ན་གྲྭ་མང་སྟོང་ཕྲག་མང་བོའི་ནང་ནས་གྲྭ་བ་ལྔ་དྲུག་རེ་མ་གཏོགས་མ་ཕེབས་ན་མ་ཕེབས་པ་འདྲ་བོ་རེད། ང་ཚོ་ཆབ་སྲིད་ཀྱི་སྐྱབས་བཅོལ་བ་ཞིག་རེད། མི་གཅིག་རེ་གཉིས་རེ་གཏོང་ལ་མི་གཏོང་ལ་བྱ་དགོས་ཀྱི་མ་རེད། མི་ལོ་ལྔ་བཅུའི་རིང་འདིར་ཆབ་སྲིད་ཀྱི་སྐྱབས་བཅོལ་བ་བྱས་ནས་བསྡད་པ་རེད་མ་གཏོགས། ང་ཚོ་ལ་འགྲོ་འདུག་རང་དབང་གི་ས་ཆ་གང་ཡང་ཡོད་པ་མ་རེད། ༸གོང་ས་མཆོག་དགུང་ལོ་ག་ཚོད་ལ་སླེབས་ཡོད་པ་རེད། ལོ་གཅིག་གཉིས་ལ་ཁོངས་འཁྱོལ་ཙམ་འཁྱོལ་ཙམ་བྱས་བསྡད་ནའང་། ༸གོང་ས་མཆོག་སྐུ་མི་བཞུགས་པའི་སྐབས་འགྱོད་པ་བློས་མི་ཤོང་བ་ཞིག་ཡོང་གི་རེད་ལ་ད་སྐབས་ཉིན་རེ་བྱེད་སྒོ་ལས་ཀྱང་བོད་གྱི་རྩ་དོན་ཆེད་ཤུགས་རྒྱག་དགོས་པ་རེད་ཅེས་དང་། གྲྭ་ཚང་ཁག་ནས་གྲྭ་མང་ལ་དགོངས་འཁྲོལ་མ་གནང་བར་ཚོགས་པ་གསུམ་གྱིས་བློ་ཕམ་བྱེད་བཞིན་ཡོད་སྐོར་ཡང་གསུངས་ཡོད། 
