དྲ་གྲོགས་ཁང་རྡོར་ལགས། ཉིད་ཀྱིས་ལན་ལྷུག་པོ་གནང་བར་ཐུགས་རྗེ་ཆེ། ཡིན་ནའང་ངས་རྗེ་བཙུན་པདྨ་མཆོག་ལ་མཛད་རྗེས་མི་འདུག་ཅེས་ལབ་རྒྱུ་མ་བྱུང་ལ་དེ་འདྲ་ཞིག་སེམས་ལའང་དྲན་མ་མྱོང། མོའི་འཇོན་ཐང་གི་ཆ་ནས་བཀའ་ཁྲི་དང་གཏན་ནས་བསྡུར་ཐབས་མེད་ཟེར་གྱིན་ཡོད། ཁྱེད་ཀྱིས་མོ་བཀའ་ཁྲི་ལས་འཇོན་ཐང་ཆེ་བའི་སྒྲུབ་བྱེད་ལ་མོའི་བསྟོད་གླུ་ཞིག་གཞིས་བྱེས་གཉིས་ལ་ཁྱབ་པ་དང། མོ་ལ་བསྟོད་པའི་རྩོམ་ཡིག་ཆིག་སྟོང་ལྔ་བརྒྱ་ཁྱོད་ཀྱི་ལག་ཏུ་ཡོད་པ་དེ་བཀོད་ན་དེ་ནི་གནད་ལ་མ་རེག་པའི་རྒྱུ་མཚན་ཕྱོགས་རེ་བ་ཞིག་རེད། དུང་ཞེན་གྱིས་བཟི་བའི་སློབ་བུ་འགས་བསྟོད་རྩོམ་ཐར་ཐོར་རེ་ཡོད་པ་དང་། ཅལ་འགྲོག་ལ་དགའ་བའི་གཞས་པ་འགས་བསྟོད་གླུ་རེ་བླངས་པས་འཇོན་ཐང་ཅན་ཞིག་དང་བྱས་རྗེས་ཅན་ཞིག་ཏུ་སྒྲུབ་མི་ཐུབ་པ་མ་ཟད བླུན་པོ་ངོ་མཚར་སྐྱེ་བ་ལ་ཧང་སང་ན་གླེན་རྟགས་དང་། མཁས་པ་མགུ་བ་སྐྱེད་པ་ལ་ཆ་བཞག་ན་དཔྱོད་ལྡན་གྱི་རྟགས་མཚན་ལ་བརྩི་འོས་པར་སྣང་བས་༸གོང་ས་མཆོག་གིས་ཛ་དྲག་གི་དུས་སྐབས་འདི་འདྲར་ང་ཕྱི་ལོག་ལ་འགྲོ་བསྐྱོད་བྱས་ནས་བསྡད་ཆོག་པ་དེ་བླ་རྒན་མགོ་དཀར་བོ་དེའི་བཀའ་དྲིན་ཡིན་གསུངས་པ་དེར་བསྟོད་རྩོམ་དང་བསྟོད་གླུ་འབུམ་ཕྲག་གིས་ཀྱང་མི་འགྲན་པ་དེ་མཁྱེན་དགོས། ཕྱོགས་གཅིག་ནས་བཤད་ན་ང་ཚོའི་མི་རིགས་འདི་རྨོངས་དད་ཀྱིས་བཟི་བའི་མི་རིགས་ཁྱད་མཚར་ཞིག་ཡིན་པས་ཀྱང་རེད། ཅིའི་ཕྱིར་ཞེ་ན། ༸གོང་ས་མཆོག་གི་གཅུང་མོ་ཡིན་པས་གཞས་པ་ཞིག་ཡིན་ནའང་མོ་ལ་བསྟོད་གླུ་ལེན་འདོད་དང་། རྩོམ་པ་པོ་ཞིག་ཡིན་ན་ཡང་མོ་ལ་བསྟོད་པ་འབྲི་འདུན་ཟབ་མོ་ཡོད། དཔེར་ན་མོ་སྔོན་མ་བོད་གཞུང་གི་སྐུ་ཚབ་བྱས་ནས་བོད་ལ་ཕེབས་དུས་ས་གནས་མང་ཆེ་བར་མང་ཚོགས་ཀྱིས་ཁ བཏགས་བཟུང་། ཕྱག་འཚལ། ངུ་འབོད་བྱས་ཏེ། རླངས་འཁོར་ལ་མཇལ་ནས་ཕེབས་ལམ་མ་རེག་པ་དེ་འདྲ་མང་བོ་བྱུང་བ་རེད། དེ་ནི་གཞིས་ལུས་རྒྱ་ཆེས་མི་མང་གི་འདི་ཕྱིའི་སྐྱབས་གནས་ངོ་མ་དེ་༸གོང་ས་མཆོག་ཡིན་པ་དང་། ཁོང་ཚོ་ལ་༸གོང་ས་མཆོག་དྲན་པའི་གདུང་བ་དང་། ཁོང་ལ་མཇལ་འདོད་ཀྱི་འདུན་པ་མེ་རི་ལྟར་འཕྱུར་གྱིན་ཡོད་པས། ཁོང་གི་གཅུང་མོ་ཕེབས་དུས་དེ་ལྟར་བྱས་པ་ལས་དེ་མོའི་འཇོན་ཐང་ལ་བརྩིས་ན་རྩ་ནས་མི་འགྲིག འོན་ཀྱང་མོས་བོད་ཕྲུག་མང་པོ་ཞིག་སྐྱེད་སྲིང་བྱས་པ་བདེན་ཡང་དེ་ཚོར་ཝ་ན་མཐོ་སློབ་སོགས་ནས་ཟབ་སྦྱོང་མ་རེག་ན་རང་གི་སྐད་ཡིག་གི་ཐོག་ནས་རྒྱུན་སྤྱོད་ཀྱི་འཕྲིན་ཡིག་དང་དགོངས་ཤོག་ཙམ་ཡང་དག་གཙང་ཞིག་འབྲི་མི་ཐུབ། དེ་ལས་གཞན་པའི་སྲོལ་རྒྱུན་རིག་གཞུང་གི་རྨང་གཞི་ལྟ་ཅི་སྨོས། ཁོང་ཚོ་ལ་ཡོད་པ་ནི་དབྱིན་ཅིའི་སྐད་ཡིག་གི་ཐོག་ནས་ཟ་སྐོར་འཐུང་སྐོར་ཅིག་ཤེས་པ་དེ་རེད། དེའི་ཐོག་ལའང་འབུར་ཐོན་གྱི་བྱས་རྗེས་ཅན་ཞིག་ཡོད་པ་གོ་མ་མྱོང། སློབ་གསོ་ཁ་ཕྱོགས་ནོར་འཁྲུལ་ཅན་དུ་སོང་བས་ཁོང་ཚོ་ལ་རང་གི་རིག་གཞུང་ལ་དུང་བ་མེད་པ་མ་ཟད་ད་ལྟའི་མི་རིགས་ཀྱི་ཛ་དྲག་གི་གནས་སྟངས་ལ་བསམ་བློ་གཏོང་ཤེས་མཁན་ཡང་སྲིད་མཐའ་ཙམ་དུ་སྣང། བཙན་བྱོལ་བོད་གཞུང་གི་སློབ་ཕྲུག་ཚོའི་སློབ་སྦྱོང་གི་ཁ་སྟབས་འདི་ལྟར་ཞན་པ་དང་། རང་གི་སྐད་ཡིག་གི་ཤེས་ཚད་བཙན་འོག་གི་བོད་ཕྲུག་ཚོ་ལས་ཀྱང་ལྡབ་འགྱུར་གྱིས་སྐྱོ་བ་འདི་བོད་ཁྱིམ་སློབ་གྲྭ་ཁག་དང་ཐད་ཀར་འབྲེལ་བ་ཡོད་བས། དེའི་སྐོར་དེ་བཟང་ངན་ཆ་འདྲེས་སུ་གནས་པའི་གྲུབ་འབྲས་སྤྱིར་བཏང་བ་ཞིག་ལས་ཁྱད་འཕགས་ཀྱི་བྱས་རྗེས་ཞིག་ལ་ངོས་འཛིན་བྱས་ན་མི་འོས། ཤེས་ཡོན་སྲིད་ཇུས་དེ་ལམ་ལ་མ་སོང་ཟེར་བ་དེ་ཡང་ཤེས་ཡོན་སྲིད་ཇུས་མ་འགྲིག་པ་མིན་པར་དེ་བེད་སྤྱོད་གཏོང་སའི་ཁོར་ཡུག་སློབ་གྲྭ་ཁག་དང་། མོ་ལྟ་བུའི་འགན་འཛིན་ཚོས་དབུ་འོག་དཔུང་འདེགས་མ་བྱས་པས་སྐྱོན་རེད། བཀའ་ཁྲི་མཆོག་གི་ཟླ་མེད་ཀྱི་མཁྱེན་དཔྱོད་དང་། ཁྱད་འཕགས་ཀྱི་གཤིས་སྤྱོད་ལ་བཙན་བྱོལ་བོད་མི་སུས་ཀྱང་འགྲན་མི་ཐུབ་པ་ཁྱོད་ཀྱིས་ཀྱང་ཤེས། མཛད་རྗེས་ཀྱི་ཆ་ནས་བཤད་ནའང་དངོས་གནས་ཧང་སང་དགོས་ཡག་རེད། རྒྱལ་ཁབ་གཞན་གྱི་ལས་གནས་དང་གོ་ཐོབ་དེ་འདྲའི་ཡག་པོ་ཞིག་རེག་མཁན་གྱི་མི་གཞན་ཞིག་ཡིན་ན་དེ་ནས་བསྡད་ན་ཕན་ཐོག་ཆེ་རབས་བཤད་དེ་འུ་ཚང་ལ་ཁ་ཡ་མི་བྱེད་པ་ལྟ་ཅི་སྨོས། ཁོའི་ལས་གནས་དེ་བཞག་ནས་རྡ་སར་སླེབས་པ་ནི་ཁོས་རྟ་བཞག་ནས་བོང་བུ་ཞོན་པ་དང་མཚུངས་ཞེས་གསུང་སྐད་ཤོར་ཡོད་ཁག་ཅི་ཡོད་བདེན་པ་རེད། ཡིན་ནའང་བཙན་བྱོལ་བོད་གཞུང་བརྩེ་བས་མ་དོར་ནས་བཞུགས་པ་རེད། འདི་ཧ་ཅང་གི་བཀའ་དྲིན་ཆེན་པོ་རེད། ཁོང་གིས་སྐུ་སྲོག་གཏའ་མར་བཞག་སྟེ། མིའི་ཚེ་སྲོག་ལ་རྩེད་ཆས་ཀྱི་འདུ་ཤེས་ལས་མེད་པའི་དོལ་རྒྱལ་ཚོགས་པ་དང་། མི་ལ་ཚེ་སྲོག་གིས་འཇིགས་སྣང་བསྐུལ་ཏེ་ལྐོག་ཟ་རུལ་སོང་ལ་གོམས་པའི་ཟ་འདྲེ་ཚོའི་ཁ་གཏད་དུ་ལངས་པ་རེད། བློ་གླིང་ཚོགས་ཁང་སྒོ་འབྱེད་སྐབས་སུ་དོལ་རྒྱལ་སྐོར་ལ་བཀའ་སློབ་དོན་སྙིང་ལྡན་པ་གང་འདྲ་ཞིག་གནང་སོང་མི་ཚང་མ་མིག་ཆུ་ཤོར་དགོས་པའི་བཀའ་སློབ་དེ་འདྲ་གནང་སོང་། དེའི་སྐོར་དེ་དངོས་གནས་བྱས་ན་གདན་སའི་མཁན་པོ་མཁན་ཟུར་ཚོའི་བགོ་སྐལ་དུ་ལུས་ཡོད་ན་ཡང་ཁོང་ཚོའི་ནང་ན་དེ་འདྲ་གསུངས་མཁན་སུ་འདུག མང་ཆེ་བས་མགོ་བདེ་འཁྲབ་ནས་བསྡད་ཡོད་པ་ཨེ་ཤེས། བོད་གཞུང་གི་གཞུང་ཞབས་མང་ཆེ་བ་ཡང་དེ་ལྟར་རེད། ཁོང་ཚོའི་ནང་ན་དེ་འདྲ་བཤད་ཐུབ་མཁན་སུ་འདུག ཁོང་ཚོས་བཤད་མ་ཤེས་བ་མ་རེད། འདི་ཚོ་ལ་ཞིབ་ཕྲ་བསམ་བློ་བཏང་དུས་ཁོང་གི་སྐུ་དྲིན་དང་མཛད་རྗེས་དེ་དངོས་གནས་བློ་ཡུལ་ལས་འདས་པ་རེད།

གྲོགས་བློ་ལྡན་ནམ་བློ་མེད་ལགས། དྲ་གྲོགས་ཚང་མ་ཁ་གཅིག་གྲག་གིས་ཤེས་འཇོན་གཉིས་ལྡན་ཞེས་གླེང་བཞིན་པ་འདི་མི་རང་སྟེང་ནས་ཟེར་གི་ཡོད་ལེ་རེད་།ཉིད་ཀྱིས་ཅི་ཞིག་འགྲེལ་གྱིན་ཡོད།

བློ་ལྡན་གྱིས་བཤད་པར་རྒྱབ་སྐྱོར་ཡོད། མི་རང་གི་ཐོག་ནས་འཇོན་པའི་མི་ཞིག་འདེམས་དགོས། བློ་ལྡན་རང་གིས་གསུངས་དང། མི་རང་གི་ཐོག་ནས་འཇོན་མཁན་སུ་དང་སུ་འདུག

དྲ་གྲོགས་འཕྲུལ་མིག གོང་གི་མཆན་ཞིག་གི་ནང་ངས་ཉིད་ལ་༼ཟམ་གདོང་རིན་པོ་ཆེའི་མཛད་རྗེས་ངས་ཤེས་ལ་གུས་བརྩི་ཡོད། ཁྱེད་རང་གིས་འབྲི་ཐུབ་ན་ངས་ཁ་སྣོན་བྱེད་ཐུབ་པ་དེ་འདྲའང་ཡོང་སྲིད།༽ཅེས་བརྗིད་ཟིན་པས་འདིར་བསྐྱར་དུ་ཡོང་བ་ཡིན། ངས་མིང་རྫུན་མ་དང་སྨྱུག་མིང་སོགས་མ་བཀོལ་བར་རང་མིང་ཁྱིམ་མིང་འདྲ་པར་དང་བཅས་པ་དངོས་སུ་བཤམས་ཏེ་བགྲོ་གླེང་བྱེད་བཞིན་ཡོད་པས། འགན་ཁུར་ཡོད་པའི་སྒོ་ནས་ལུང་དང་རིགས་རྒྱུ་མཚན་དཔང་པོར་བཞག་སྟེ་བགྲོ་གླེང་གནང་ན་དགའ་བསུ་ཡོད། དེ་མིན་རང་གཞན་སེམས་པ་མ་སྐྱིད་པའི་རྒྱུ་དང་དུས་ཚོད་དང་ནུས་པ་ཆུད་ཟོས་སུ་འགྲོ་གཞི་ལས་མ་འདས།

ཉིད་ཀྱིས་གསུང་པ་བཞིན་ད་ལྟའི་བཀའ་ཁྲི་མཛད་རྗེས་ཆེན་པོ་རེད་ལ་མཁས་པའི་མཚན་སྙན་ཧ་ཅང་ཆེན་པོ་རེད། དེ་ངས་ཁས་ལེན་ཞུ་བཞིན་ཡོད། འོན་ཀྱང་རྒྱ་གར་དང་ཕྱི་མི་འགའ་ཞིག་གི་མདུན་དུ་མཁས་གྲགས་རྗེ་བཙུན་པདྨ་ལས་ཆེ་བ་ཡོད་པ་ཙམ་གྱིས་མཛད་རྗེས་རྗེ་བཙུན་པདྨ་ལས་ཆེ་བ་ཡོད་པར་སྒྲུབ་མི་ཐུབ།

སྐད་ཆ་གཞན་ཞིག་བཤད་ན། བོད་གཞིས་བྱེས་གཉིས་ན། ཨ་མ་རྗེ་བཙུན་པདྨ་ཞེས་པའི་གླུ་གཞས་ཤིག་ག་ཚོད་ཁྱབ་སོང་། ཟམ་གདོང་རིན་པོ་ཆེ་ལ་བསྟོད་གཞས་འབུལ་མཁན་འདུག་གམ། ཨ་མ་རྗེ་བཙུན་པདྨའི་བཀའ་དྲིན་དྲན་པའི་སྙན་རྩོམ་ངའི་ལག་ལ་ཡོད་པ་ཁོ་ནར་ཆིག་སྟོང་ལྔ་བརྒྱ་ལྷག་འདུག དེ་འདྲ་ཞིག་ཟམ་གདོང་རིན་པོ་ཆེ་ལ་འདུག་གམ། བོད་མི་མང་སྤྱི་འཐུས་ལྷན་ཚོགས་ཀྱིས་ཨ་མ་རྗེ་བཙུན་པདྨའི་མཛད་རྗེས་ལ་ངོས་འཛིན་དང་ཆེ་མཐོང་གི་སྒོ་ནས་གངས་ཅན་བོད་ཀྱི་ཨ་མ་ཞེས་པའི་གཟེངས་རྟགས་སྤྱི་མོས་ཀྱིས་ཕུལ་བ་འདྲ་བོ་ཟམ་གདོང་རིན་པོ་ཆེ་ལ་ཕུལ་སོང་ངམ།

དངོས་ཡོད་ཀྱི་ཐོག་ནས་བཤད་ན། ཟམ་གདོང་རིན་པོ་ཆེས་ཌལ་ཧོར་སློབ་གྲྭའི་སློབ་སྤྱི་གནང་བ་དང་དེ་ནས་ཝ་ཎའི་གཙུག་ལག་སློབ་ཁང་གི་ངེས་སྟོན་པ། བོད་མི་མང་སྤྱི་ལྷན་གྱི་ཚོགས་གཙོ་ཐེངས་ཁ་ཤས་བསྟུད་མར་གནང་སྟེ་གྲོས་ཚོགས་ལམ་ལུགས་ལ་ལེགས་བཅོས་གནང་བ། རྒྱ་གར་གྱི་གཙུག་ལག་སློབ་ཁང་ཁག་གི་ཉེ་བའི་རིགས་བདག་གི་ཚོགས་གཙོ་ལོ་ཤས་གནང་བ། བཀའ་བློན་ཁྲི་པ་གནང་བ་སོགས་ཀྱི་ཐོག་ནས་མཛད་རྗེས་ཆེན་པོ་བཞག་ཡོད་པ་རེད།
འོན་ཀྱང་ཁོང་མཁས་པ་ཆེན་པོ་ཡིན་ཡང་རྗེ་བཙུན་པདྨས་བྲིས་པ་འདྲ་བའི་དེབ་གཅིག་ཀྱང་བྲིས་མེད། གླེང་བརྗོད་དེ་འདྲ་ཁ་ཤས་ཡོད་རེད། ཁོང་འཛིན་སྐྱོང་གནང་མཁན་ཞིག་རེད་དེ། ཝ་ཎའི་སློབ་ཕྲུག་དེ་ཚོ་ཕལ་མོ་ཆེ་ཁ་ཡོད་ཀྱང་ལག་པ་མེད་པ་འདྲ་བོ་མ་གཏོགས་གསོ་སྐྱོང་ཐུབ་མེད། གྲངས་འབོར་ཡང་ཉུང་ཉུང་རེད། ལྷག་པར་དུ་ཝ་ཎའི་དགེ་རྒན་འོས་སྦྱོང་པ་ཚོ་ནི་དགེ་འོས་རྫུན་མ་རེད། དེ་ནས་ཐོན་པའི་དགེ་འོས་རྫུན་མ་དེ་ཚོ་གཏན་སློབ་ཁག་ལ་སོང་རྗེས་བོད་ཕྲུག་ཚོར་ཡི་གེ་ཡག་པོ་བསླབས་ཐུབ་ཀྱི་མེད། དེ་ལ་བརྟེན་ནས་ད་ལྟའི་བཙན་བྱོལ་གྱི་བོད་ཕྲུག་མང་པོ་ཞིག་གི་བོད་ཡིག་ཤེས་ཚད་སྐྱོ་བོ་ཆགས་པ་རེད། དེ་མིན་ཤེས་ཡོན་སྲིད་བྱུས་ནི་ད་ལྟ་ལམ་ལ་མ་སོང་བར་བསྡད་ཡོད་རེད། དཔལ་འབྱོར་གྱི་སྲིད་བྱུས་ནི་ཕམ་ཉེས་རེད། ཁྱེད་རང་གིས་བུ་ལོན་གཙང་མ་བཟོས་པ་རེད་ཟེར། དེ་བཤད་སྟངས་ཤིག་རེད། བཟོ་གྲྭ་དང་ཚོང་ཁང་། ཟ་ཁང་དེ་ཚོ་གཏན་དུ་བཙོང་ཚར་དུས་ཚུར་དུས་གཅིག་ལ་དངུལ་ཕོན་ཆེ་ཙམ་ཡོང་གི་རེད། དེའི་རྗེས་ནས་ཡོང་རྒྱུ་མེད་པ་རེད།

གཞིས་ཆགས་སྲ་བརྟན་གྱི་ཆེད་ཡིན་ཞེས་སོ་ནམ་སྲོལ་རྒྱུན་ཅན་དུ་བསྒྱུར་བ་དེར་ཡང་ཆོ་བྱུང་མེད། ད་ཁྱེད་རང་གསུངས་དང་། ག་རེའི་ཐོག་ནས་རྗེ་བཙུན་པདྨ་ལས་མཛད་རྗེས་ཆེ་བ་བྱུང་འདུག

དྲ་གྲོགས་ཁང་རྡོར་ལགས། ཁྱེད་རང་གིས་བགྲོ་གླེང་གནང་སྟངས་དེ་ཡག་པོ་འདུག དེའི་ཕྱིར་ངས་ཀྱང་རང་གི་མཐོང་ཐོས་འགའ་ཞུ་འདོད་བྱུང། རྒྱ་གར་གྱི་ཤེས་ཡོན་གྱི་བསྟི་གནས་ཝ་ར་ན་སི་ལྟ་བུར་ཡང་ཤེས་ཡོན་པ་རྣམས་ཀྱིས་གཞན་དང་མི་འདྲ་བའི་མཐོང་ཆེན་བྱེད་པ། དཔེར་ན། རྒྱ་གར་གྱི་མཐོ་སློབ་ཡོངས་རྫོགས་ཀྱི་དབུ་འཛིན་དུ་ལོ་མང་རིང་བསྐོ་བཞག་བྱས་པ་དང། མ་ཟད་ཀརྨ་པ་རྒྱ་གར་ལ་ཐེངས་དང་པོར་ཕེབས་དུས་གསར་ལམ་ཁག་དུ་རིན་པོ་ཆེ་ཞེས་བཀོད་པར། ཝ་ར་ན་སིའི་རྒྱ་གར་པ་རྣམས་ཀྱིས་ང་ཚོའི་རིན་པོ་ཆེ་མ་གཏོགས་རིན་པོ་ཆེ་ཞིག་ཡོད་དམ། འདི་འདྲའི་ཆུང་ཆུང་ཞིག་རིན་པོ་ཆེ་གང་འདྲ་ཆགས་པ་རེད། ཅེས་བོད་མི་ཚོ་ལ་དྲི་བ་གཏོང་བཞིན་པ་འདིས་ཀྱང་ཡུལ་དེའི་ཤེས་ཡོན་པ་རྣམས་ཀྱིས་ཁོང་ལ་ག་ཚད་ཅིག་བརྩི་འཇོག་བྱེད་ཀྱིན་པ་མཚོན་གྱིན་མི་འདུག་གམ། མི་རིགས་གཞན་གྱིས་ཤེས་ལྡན་མི་སྣས་དེ་ལྟར་གདེངས་འཇོག་ཐོབ་མཁན་ཁོང་མ་གཏོགས་བོད་པ་ཚང་ལ་སུ་ཡོད། རྗེ་བཙུན་པདྨ་ལ་སུས་དེ་ལྟར་བྱས་སོང། སྔ་ལོའི་ཛ་དྲག་གི་གནས་སྐབས་དེར་༸གོང་ས་མཆོག་གིས་དབྱིན་ཅིའི་ལུང་བར་ཛ་དྲག་གི་དུས་སྐབས་འདི་འདྲར་ང་ཕྱི་ལོག་ལ་འགྲོ་བསྐྱོད་བྱས་ནས་བསྡད་ཆོག་པ་དེ་བླ་རྒན་མགོ་དཀར་བོ་དེའི་བཀའ་དྲིན་ཡིན་གསུངས་པ་ལས། རྗེ་བཙུན་པདྨའི་བཀའ་དྲིན་ཡིན་གསུངས་འདུག་གམ། དེ་མ་ཟད་བཙན་བྱོལ་བོད་གཞུང་བུ་ལོན་གྱི་འདམ་ལས་འདྲེན་མཁན་དང་། ལྐོག་ཟ་རུལ་སོང་གི་གཡང་ལས་སྐྱོབ་མཁན། ཤེས་རིག་སྲིད་ཇུས་གསར་བའི་ཉི་གཞོན་འདྲེན་མཁན། ཕྱོགས་ཞེན་དང་མཁྲེགས་འཛིན་གྱི་དྲི་ཙམ་ཡང་མེད་མཁན། བཀའ་ཁྲི་ཁོང་ཚང་་མ་གཏོགས་སུ་འདུག དེ་འདྲའི་བསམ་བློ་བཏང་དུས་ཁོང་གི་བཀའ་དྲིན་ནི་བོད་རིགས་རྣམས་ཀྱིས་གཞལ་ཐབས་དཀའ་བ་ཞིག་རེད། སྤྱིར་རྗེ་བཙུན་པདྨ་ལ་བྱས་རྗེས་མི་འདུག་ཞུ་གི་མེད་མོད། བཀའ་ཁྲི་དང་བསྡུར་ན་དངོས་གནས་ཉི་མའི་དྲུང་ན་མེ་ཁྱེར་ཡིན་པ་དེ་ཤེས་དགོས།

ཁོ་རེ་རྭ་ལོ། བརྙས་བརྐོ་མཁན་མི་གཉིས་ཟེར་བའི་ཁོངས་སུ་ང་མེད། གང་བྱུང་བཤད་མཁན་ཨ་རིག་གླེན་རྒན་ཡིན་པ་གསལ་པོ་བཟོས་ཡོད་དཱ།

ཁོ་རེ་ཁང་གསར་རྡོ་རྗེ། ངས་ནི་ཁྱོད་ལ་མིང་ཤས་བཟོས་མེད། རང་ཉིད་ཀྱི་བསམ་ཚུལ་རྣམས་དྲང་པོར་བཤད་པ་ཙམ་ཡིན། ཁྱོད་དྲ་ཐོག་འདི་ནས་འགྲོ་བ་དེ་དང་ངའི་སྐད་ཆ་འབྲེལ་བ་མེད་པ་གསལ་པོ་བཟོ་བཞིན་ཡོད།

ཚང་མས་གཟབ་གཟབ་མ་བྱས་ན་་་ཁང་རྡོ་འདི་༼ ལུག་མགོ་བསྟན་ནས་ཁྱི་ཤ་བཙོང་༽མཁན་ཞིག་རེད་འདུག།

ཨ་རིག་གླེན་རྒན། ཁང་གསར་བས་བཅའ་ཁྲིམས་ཀྱི་ལུང་ཁ་ཤས་དྲངས་པ་ཙམ་ལ་ཁྱོད་ཀྱིས་ཧང་སངས་སངས་ཀྱིས་མི་རང་ག་བ་ཞིག་མ་རེད་སྔོན་ནས་དྲན་ལུགས་བཤད་མ་ཡོང་།

ཁང་གསར་བ་འདི་འབྲི་རྩལ་ལེགས་ཙམ་ཞིག་ལས་གཞན་ཁོས་ཆབ་སྲིད་དང་རིག་གནས་ཀྱི་གནད་འགག་ཅི་ཤེས་ཀྱི་འདུག

ཁང་གསར་བ། བཅའ་ཁྲིམས་སུ་གསལ་ཡོད་རུང་མེད་རུང་ང་ཚོའི་མགོ་ལ་དབྱིན་མ་བོད་ཀྱི་བུ་མོ་བོད་སྐད་ཡག་པོ་མི་ཤེས་པ་ཞིག་འཇོག་གི་མིན། རྗེ་བཙུན་པདྨ་མཛད་རྗེས་ཆེ་བ་དངོས་ཡོད་ཡིན་རུང་། ཁོང་བཀའ་ཁྲིར་བཞག་ན་ཆབ་སྲིད་ཀྱི་ཐོག་ནས་མཐོང་སྣང་ཡག་པོ་ཡོང་གི་མ་རེད།

ཁྱོད་ཀྱིས་སྤྱི་ཚོགས་ཀྱི་བསམ་བློ་གཏོང་སྟངས་སྐོར་ལ་མང་པོ་ཞིག་བཤད་འདུག འདི་བོད་ཀྱི་བསམ་བློ་གཏོང་སྟངས་དང་འཚམ་དགོས་པ་རེད་མ་གཏོགས་ནུབ་ཕྱོགས་ཀྱི་སྤྱི་ཚོགས་ལ་ར་མགོ་ལུག་སྦྱར་མ་བྱེད།

༤ བུད་མེད་འཇོན་ཐང་ཅན་ཚོའི་སྐོར་ཟུར་ཙམ་ཡང་མ་གླེང་བར་བཀའ་ཁྲིར་འོས་པ་མེད་ཟེར་ཤག་ཤག་དེ་ཡག་པོ་མ་རེད། ང་རང་གི་ལྟ་ཚུལ་ལྟར་ན། སྤྱི་ཚོགས་ཀྱི་བསམ་བློའི་ཁྱེར་སོར་རག་ཆེན་པོ་ལས་ཀྱི་འདུག ནུབ་ཕྱོགས་རྒྱལ་ཁབ་ཁག་ལ་སྤྱི་ཚོགས་ཀྱིས་ཕོ་མོ་འདྲ་མཉམ་དུ་བལྟ་ལ། བུད་མེད་རང་ངོས་ནས་ཀྱང་དེ་ལྟར་ལྟ་ཡི་འདུག རང་རེའི་བོད་རིགས་བུད་མེད་ནུབ་ཕྱོགས་སུ་སླེབས་རྗེས་ནུབ་ཕྱོགས་བུད་མེད་དེ་ཚོ་དང་དཔུང་པ་མཉམ་གཤིབས་ཀྱིས་འགྲོ་ཐུབ་ཀྱི་འདུག དེར་བརྟེན་སྤྱི་ཚོགས་ཀྱི་བསམ་བློ་གཏོང་སྟངས་ལ་ཁྱད་པར་ཆེན་པོ་འདུག

༥ ལས་དོན་མང་པོ་ཞིག་ནི་མི་ཞིག་ལ་འགན་སྤྲད་དེ་བྱེད་བཅུག་ན་ཁོ་རང་གཅིག་ཆགས་འགྲོ་བ་དེ་ཡང་དོན་དངོས་རེད། དཔེར་ན། ད་ལྟའི་དཔལ་འབྱོར་བཀའ་བློན་ནི་དེ་སྔོན་རྩིས་ཞིབ་ནང་ཡུན་རིང་བཞུགས་པ་ཙམ་ལས་དེ་ཙམ་གྱི་ཉམས་མྱོང་ཡོད་པ་ཞིག་མ་རེད། ཁོང་ཐོག་མར་དཔལ་འབྱོར་ལ་བསྐོ་སྐབས་ཚང་མས་ཧང་སངས་སངས་བྱས་པ་རེད། དེ་བཞིན་བློ་བཟང་སྙན་གྲགས་ལགས་ཐོག་མར་བཀའ་བློན་དུ་བསྐོ་སྐབས་དེ་ལྟར་བྱས་པ་རེད། འོན་ཀྱང་ཁོང་གཉིས་སོ་སོའི་ལས་གནས་སྒང་ལ་སླེབས་རྗེས་བཀའ་བློན་གོང་མ་ཚོ་ལས་སྐྱོ་བ་བྱུང་མེད། ད་ལྟའི་ཆོས་རིག་བཀའ་བློན་སྤྱི་འཐུས་ཚོའི་ནང་གི་དྲག་གྲས་གང་ཡང་མ་རེད། འོན་ཀྱང་ཆོས་རིག་བཀའ་བློན་ལ་བསྐོས་རྗེས་འགྲིག་འགྲོ་བཞིན་པ་རེད། དེ་འདྲ་རེད།

༦ ངས་བསོད་ནམས་སྟོབས་རྒྱལ་གྱིས་བཀའ་ཁྲི་འཇོན་པ་རེད་ཟེར་དུས། བཀའ་ཁྲིའི་ལས་འགན་ལྗིད་པོ་མ་རེད་ཟེར་གྱི་མེད། འོན་ཀྱང་ང་ཚོའི་སྤྱི་ཚོགས་ནང་བཀའ་ཁྲི་ཟེར་དུས་ལས་འགན་དཔེ་མ་སྲིད་པའི་ལྗིད་པོ་ཡིན་པ་དང་། མི་རང་ག་བས་འཇོན་ཐབས་མེད་འདྲ་བསམས་བཞིན་པ་དེ་འདྲ་མ་རེད། ག་ཚོད་ཆེ་ནའང་རྒྱ་གར་གྱི་རྒྱལ་ས་ལྡི་ལིའི་སྤྱི་ཁྱབ་ཀྱི་འགན་ལས་ཆེ་བ་ཞིག་མ་རེད། ལྡི་ལི་ལ་མི་ས་ཡ་བཅུ་བཞི་ལྷག་ཡོད་རེད། དེ་ཚོའི་ཆབ་སྲིད་དང་དཔལ་འབྱོར། འགྲིམས་འགྲུལ། བདེ་སྲུང་། འཕྲོད་བསྟེན་སོགས་ཀྱི་འགན་ཁུར་དགོས་པ་ལྟ་བུ་ང་ཚོའི་བཀའ་ཁྲིས་ཁུར་མི་དགོས།

བཀའ་ཁྲིས་ཐད་ཀར་འགན་ཁུར་དགོས་ས་དེ་བཙན་བྱོལ་ནང་གི་བོད་མི་འབུམ་གཅིག་ལྷག་དང་། དེ་བས་རྒྱ་ཆེ་རུ་བཏང་ན་བོད་གཞིས་བྱེས་གཉིས་ཀྱི་བོད་མི་ས་ཡ་དྲུག་རེད།

ཆབ་སྲིད་ཀྱི་ཐད་༸གོང་ས་མཆོག་གིས་བཀའ་བློན་ལམ་སྟོན་ཕེབས་དང་ཕེབས་བཞིན་པ་དེ་ལས་ལྷག་པ་བྱེད་ས་ཡོད་མ་རེད་ལ་བྱེད་དགོས་དོན་ཡང་མེད། འཛིན་སྐྱོང་སོགས་ནི་ལྷན་ཁང་སོ་སོའི་བཀའ་བློན་དང་དྲུང་ཆེ། ལས་བྱེད་ཚོས་བྱས་འགྲོ་ཡི་རེད། ད་དུང་མ་ཤེས་པ་འདུག་ན། ད་ལྟའི་བཀའ་ཁྲིས་གནང་མུས་ལྟར་རྒྱ་གར་བ་དང་ཕྱི་རྒྱལ་གྱི་སློབ་སྟོན་པ་དེ་འདྲ་སྐད་བཏང་ན་འགྲིག་གི་རེད།

ཁང་གསར་རྡོ་རྗེ་ཟེར་བ་ཁྱོད་ཀྱིས་བཀའ་ཁྲི་ལས་ཀྱང་རྗེ་བཙུན་པདྨ་འཇོན་ཟེར་ན་དངོས་གནས་གད་མོ་ཤོར་ཡག་རང་རེད། མོས་སློབ་གྲྭ་འགའ་ཤས་ལ་བདག་པོ་རྒྱག་ཐུབ་པ་དེ་གཅིག་ནས་རྒྱལ་ཡུམ་ཆེན་མོ་དང་གཅེན་མོ་ཚེ་རིང་སྒྲོལ་མ་གཉིས་ཀྱིས་བཀའ་དྲིན་རེད། གཉིས་ནས་༸གོང་ས་མཆོག་གི་ཐུགས་རྗེ་བཀའ་དྲིན་རེད། སྐུའི་གཅུང་མོ་སོང་ཙང་ལས་ཀ་ག་རེ་ཡིན་ན་བྱེད་བདེ་བོ་ཡོད་པ་རེད། དེའི་ཐོག་ལ་མོ་ལ་གོ་སྐབས་མང་པོ་རེག་ཡོད་པ་རེད། གང་ཞེ་ན་ཆུང་དུས་ནས་སློབ་སྦྱོང་གི་གོ་སྐབས་གཞན་དང་མི་འདྲ་བ་ཞིག་རེག་ཡོད་པ་རེད། དངོས་གནས་བཤད་ན་དེ་ལས་ལྷག་ཅིག་འཇོན་དགོས་ཡག་འདྲ་བོ་ཞིག་ཡོད་པ་རེད། ཁྱོད་ཀྱིས་བཤད་པའི་བུད་མེད་གཞན་པ་ཚོ་དེ་འདྲ་ཞིག་ཀྱང་འཇོན་གི་མ་རེད། ཁྱོད་ཀྱིས་བཀའ་ཁྲིའི་སྐུ་ཡོན་གྱི་ཆ་ཙམ་ཡང་མཐོང་མི་འདུག དེའི་ཕྱིར་ང་ལ་ཡང་གསལ་བཤད་བྱེད་འདོད་མ་བྱུང་།

ཨ་རིག་ལགས། ངས་ཧིན་དི་མི་ཤེས། སྐུ་དྲག་གི་ཕྱོགས་ཁོ་ནར་ལངས་ཟེར་བའང་འཁྱོག་གཏམ་ལགས།

བུ་བཀའ་ཁྲིར་འོས་པ་མང་བ་ཇི་བཞིན་བུད་མེད་བཀའ་ཁྲིར་འོས་པའང་ཡོད། ལར་ནས་བཀའ་ཁྲི་ཞེས་ལས་འགན་འཇིགས་དགོས་པ་དེ་འདྲ་ཅང་ཡོད་པ་མ་མཐོང་། གོང་ན་༸རྒྱལ་བ་རིན་པོ་ཆེ་ཡོད་པ་རེད། དེ་སྔོན་བསོད་ནམས་སྟོབས་རྒྱལ་ལྟ་བུས་ཀྱང་བཀའ་ཁྲི་འཇོན་པ་རེད། ད་གཞན་ཞིག་གིས་མི་འཇོན་པ་མེད། གཙོ་བོ་ཁྱེད་ལྟ་བུའི་མགོ་མཁྲེགས་ཚོས་ཁས་ལེན་མ་ལེན་ཙམ་རེད།

བཀའ་བློན་སྟག་ལྷ་སྐལ་བཟང་དབྱངས་སྐྱིད་བོད་རིགས་མིན་པའི་སྐོར་དེ་རྫུན་གཏམ་ཡིན་འདུག ཁོང་བོད་ནང་འཁྲུངས་པ་དང་གོར་ཁའི་སློབ་གྲྭར་སོང་བའི་ཆ་ནས་སྐད་ཆ་དེ་འདྲ་ཞིག་ཁྱབ་པ་ཡིན་འདུག ངས་དཔྱད་པ་ཞིབ་ཚགས་མ་བྱས་པར་གོང་དུ་འབྲི་ཐལ་སོང་བར་དགོངས་དག་ཞུ།

ཁོ་རེ་ཁང་གསར། ཁྱེད་རང་གི་ཟིན་བྲིས་དེ་ཚོ་སྙན་པོ་དང་གཞན་དང་མི་འདྲ་བ་འདུག་སྟེ། ཆབ་སྲིད་དང་ཁྲིམས་ཀྱི་གོ་རྟོགས་ཁྱོད་ལ་ངོ་མ་ཡོད་ས་མ་རེད།

ཁྲག་དང་ངེད་གཉིས་ཀྱིས་ཧ་ཅང་གསལ་པོའི་སྒོ་ནས་བཀྲས་མཐོང་ལྷག་སྒྲོན་ལ་བོད་ཀྱི་ཡུལ་མིའི་འོས་ཆོས་ཚང་མི་འདུག་ཟེར་གྱི་ཡོད།

ཁོ་རེ་ཁང་གསར། བཀྲས་མཐོང་ལྷག་སྒྲོན་གྱི་ཨ་མ་ཕྱི་རྒྱལ་བ་རེད། མོ་རང་ཁེ་ཎ་ཌ་ལ་ཡོད་རེད། མོ་ལ་ཆ་རྐྱེན་ཇི་ལྟར་ཚང་གི་རེད། དགོད་མ་སློང་།

དྲྭ་གྲོགས་མེ་ལགས། སྐུ་ཉིད་ཀྱི་ཁ་རི་ཁ་ཐུག་གི་དགོངས་འཆར་ལ་གུས་བརྩི་ཡོད།
ངས་ཆབ་སྲིད་ཀྱི་གནད་ལུགས་མི་ཤེས་ཀྱང་བཙན་བྱོལ་བོད་མིའི་བཅའ་ཁྲིམས་ནང་ང་ལ་སྐད་ཆ་བཤད་ཆོག་པའི་དབང་ཆ་གནང་ཡོད་པས་མུ་མཐུད་བཤད་འདོད་བྱུང་།

༡ ངས་བཙན་བྱོལ་ནང་གི་བུད་མེད་འཇོན་ཐང་ཅན་ཁ་ཤས་དཔེ་མཚོན་དུ་བཀོད་པ་ཡིན། ཕོ་མཆོག་མོ་དམན་གྱི་ལྟ་སྟངས་དོར་ཏེ་བལྟས་ན། ཨ་མ་རྗེ་བཙུན་པདྨས་འཇོན་པ་ལྟ་བུ་ད་ལྟའི་བཀའ་ཁྲི་ཟམ་གདོང་རིན་པོ་ཆེས་ཀྱང་འཇོན་མེད། ཆབ་སྲིད་ཀྱི་ཐོག་ནས་དེ་ལྟར་རེད་ལ་འཛིན་སྐྱོང་གི་ཐད་ནས་ཀྱང་དེ་ལྟར་རེད། འདི་འདྲའི་བུད་མེད་ཅིག་དང་འགྲན་ཐུབ་པའི་སྐྱེས་པ་གཞན་ཞིག་འདུག་གམ། རྔ་བ་ཚེ་རྒྱམ་དང་བློ་བཟང་སེང་གེ་ལྟ་བུ་བཀའ་ཁྲིར་འོས་ཟེར་ན། བྱས་རྗེས་མིག་མདུན་དུ་མཐོང་རྒྱུ་ཡོད་པའི་ཨ་མ་རྗེ་བཙུན་པདྨ་དང་རིན་ཆེན་མཁའ་འགྲོ། བཀྲས་མཐོང་ལྷག་སྒྲོན་ལྟ་བུ་མི་འོས་པའི་རྒྱུ་མཚན་ཅི། ཁོང་ཚོ་བུད་མེད་ཡིན་པའི་ཕྱིར་ཟེར་རམ། ཁྱེད་རང་གིས་༼ཨ་མ་རྗེ་བཙུན་པདྨ་ནི་བྱམས་སྙིང་རྗེ་ཡི་བདག་མོ་ཞིག་དང་ལྷག་བསམ་རྣམ་དག་གི་མ་ཡུམ་ཞིག་རེད་ལ་བོད་ཕྲུག་ཁྲི་སྟོང་མང་པོའི་ཨ་མ་ཡང་ཡིན། ཡིན་ཡང་དེའི་རྐྱེན་གྱིས་བཀའ་བློན་ཁྲི་བར་འདེམས་འོས་པ་མ་རེད་༽ཅེས་བཀོད་འདུག བཀའ་བློན་ཁྲི་པར་འདེམས་མ་འོས་པའི་རྒྱུ་མཚན་དེ་ཅི་འདྲའི་དགོད་བྲོ་ཨང།
དེ་བས་ཀྱང་དགོད་བྲོ་བ་ཞིག་ནི་རིན་ཆེན་མཁའ་འགྲོའི་ཐད། ཁྱེད་ཀྱིས་༼རིན་ཆེན་མཁའ་འགྲོ་ནི་ཕར་འགྲོ་ཚུར་འགྲོ་བྱེད་ནས་ཆབ་སྲིད་པའི་གྲིབ་ནག་འོག་མཐར་མ་མྱོང་ལ། གོ་ཐོས་སུ་ད་སྐབས་ཧ་ཅང་གིས་ཐང་ཆད་ཡོད་པར་བརྗོད༌༽ཅེས་བཤད་པ་འདི་རེད། ཆབ་སྲིད་པའི་གྲིབ་ནག་འོག་ནས་ཐར་བའི་བཀའ་བློན་ཁྲི་པའི་འོས་གཞི་ཞིག་སུ་འདུག ཐང་ཆད་པའི་སྐོར་ཟེར་ལོ་ཐོས་ལོ་འདིས་ཅི་མཚོན། གཉིས་ཀ་ཁུངས་དང་བཅས་བརྗོད་ཐུབ་ན་ལེགས།

༢ འཛིན་གྲྭའི་འགན་བདག་འདེམས་ཀྱིན་མེད་པ་ངས་ལོས་ཤེས། གོང་གི་བུད་མེད་འདི་དག་འཛིན་གྲྭའི་འགན་བདག་གི་གོང་དུ་སླེབས་ཟིན་པ་ཤ་སྟག་རེད།

༣ བཀྲས་མཐོང་ལྷག་སྒྲོན་བོད་སྐད་བདེ་པོ་མེད་ཀྱང་ཚིག་གཅིག་ཀྱང་མི་ཤེས་པ་དེ་འདྲ་མ་རེད། ཁོང་ལྟ་བུ་བཀའ་བློན་ཁྲི་པའི་འོས་འགྲན་ནང་ཞུགས་ན་ཁྲིམས་མཐུན་ཡིན་པ་དེ། ཙན་བྱོལ་བོད་མིའི་བཅའ་ཁྲིམས་ཀྱིས་ཆ་རྐྱེན་བསྐྲུན་འདུག བཙན་བྱོལ་བོད་མིའི་བཅའ་ཁྲིམས་ཀྱིས་གནང་བའི་ཁེ་དབང་ཞིག་ཁྱེད་ཀྱིས་ཇི་ལྟར་ནག་གསུབ་གཏོང་ཐུབ། ཁྱོད་ཀྱིས་བཀྲས་མཐོང་ལྷག་སྒྲོན་ལ་༼བཀའ་བློན་ཁྲི་བའི་ཐོག་མའི་འོས་ཆོས་ཀྱང་མེད། ༽ཅེས་བཤད་འདུག འོས་ཆོས་ཐོག་མ་དེ་ཇི་ལྟར་ཚང་མི་འདུག བཅའ་ཁྲིམས་རང་གི་ཐོག་ནས་ཁུངས་སྐྱེལ་གནང་ན་འོས།

ངས་ནི་ཕོ་མོ་འདྲ་མཉམ་ལ་གཉིས་ནས་བརྩི་བཞིན་ཡོད་པ་འདིས་མིན་ནམ། བཙན་བྱོལ་ནང་བུ་ཚོས་གང་འཇོན་པ་རྣམས་བུད་མེད་ཚོས་ཀྱང་འཇོན་འདུག་པར་མཐོང་ལ། བུད་མེད་ཚོས་མ་འཇོན་པ་ཞིག་བུ་ཚོས་ཀྱང་འཇོན་དཀའ་བར་སྙམ།

ངས་མིང་ཐོ་ཁ་ཤས་བཏོན་པ་ཙམ་ལ་ངར་ངར་གནང་དགོས་པ་མ་རེད། འདི་ཙམ་ལ་ངར་ངར་གནང་མཁན་མང་པོ་བྱུང་ན་དངོས་གནས་བུད་མེད་ཀྱི་བཀའ་བློན་ཁྲི་པ་ཞིག་འབྱུང་དཀའ་བ་རེད།

ངས་བཙན་བྱོལ་གྱི་བུད་མེད་ཁོངས་འཇོན་ཐང་ཅན་འགའ་ཞིག་མཐོང་གི་འདུག

༡། དཔེར་ན། བོད་ཁྱིམ་ཁྱབ་ཁོངས་ཀྱི་སློབ་གྲྭ་ཁག་བཅུ་གྲངས་བཙུགས་ཏེ་བཙན་བྱོལ་གྱི་བོད་ཕྲུག་བརྒྱ་ཆ་ ༥༠ ལྷག་ལ་སློབ་སྦྱོང་གི་གོ་སྐབས་གནང་མཁན། ཤེས་རིག་བཀའ་བློན་ཟུར་པ། གངས་ཅན་བོད་ཀྱི་ཨ་མའི་གཟེངས་རྟགས་ཀྱིས་མཚོན་རྒྱལ་སྤྱིའི་གཟེངས་རྟགས་བཞེས་མྱོང་མཁན། བོད་ཀྱི་སྐུ་ཚབ་ཚོགས་པའི་ཁོངས་སུ་བོད་དང་རྒྱ་ནག་ལ་ཕེབས་མྱོང་བ་ལྷ་སྐུ་རྗེ་བཙུན་པདྨ་གཅིག་ཡིན།

༢། བུད་མེད་ཚོགས་པའི་ཚོགས་གཙོ་ཟུར་པ་དང་བོད་ཀྱི་བཙུན་མའི་ལས་འཆར་གྱི་འགན་འཛིན། བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་ཕྱག་འདེབ་མཁན། ཤེས་རིག་དང་འཕྲོད་བསྟེན་བཀའ་བློན་ཟུར་པ། དཔའ་མཛངས་ཀྱི་འབོད་སྒྲ་ཞེས་པའི་རྒྱལ་སྤྱིའི་གཟེངས་རྟགས་ཐོབ་མྱོང་བའི་བཀའ་ཟུར་རིན་ཆེན་མཁའ་འགྲོ་གཉིས་ཡིན།

༣། བུད་མེད་ཚོགས་པའི་ཚོགས་མི་དང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུལས་དོན་ལོ་མང་གནང་མྱོང་བ། དེང་སྐབས་མཐོ་སློབ་དང་གཞོན་སྐྱེས་ཁག་གི་ཁྲོད་ནས་སྣེ་ཁྲིད་ཀྱི་ནུས་པ་འདོན་ཐུབ་མཁན་གསོ་སྐྱོང་ཐུབ་སླད། ཟབ་སྦྱོང་སྣ་མང་གོ་སྒྲིག་གནང་མཁན། བོད་མི་མང་སྤྱི་འཐུས་ལས་ཐོག་ཨོ་དགའ་ཚང་ཆུ་སྒྲོན་གྱིས་གསུམ་ཡིན། སྔ་ལོ་བོད་ནང་ཛ་དྲག་གི་གནས་ཚུལ་བྱུང་སྐབས། རྒྱ་གར་དང་རྒྱལ་སྤྱིའི་ནང་ལས་འགུལ་སྤེལ་སྐབས་སྤྱི་འཐུས་ཚོའི་ནང་ནས་ཁོང་འཇོན་ཤོས་ཤིག་ཡིན་པར་གྲགས། དབྱིན་སྐད་དང་ཧིན་སྐད་ཧ་ཅང་ལེགས། བོད་སྐད་ཀྱང་འགྲིག་ངེས་ཤེས།

༤། ད་དུང་ལོ་མང་དགེ་རྒན་གྱི་ཕྱག་ལས་གནང་མྱོང་བ་དང་། དེ་རྗེས་ཨ་རིར་འབུམ་རམ་པའི་སློབ་སྦྱོང་ཟིན་རྗེས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོའི་འགན་བཞེས་ཏེ་ལས་དོན་ནུས་པ་ཐོན་པ་གནང་མཁན་བུ་མོ་ཚེ་རིང་ཡེ་ཤེས་སམ་ཡོངས་གྲགས་སུ་བྷི་ཚེ་རིང་ཟེར་བ་ཁོང་ཡང་བུད་མེད་ཁོངས་ནས་འཇོན་ཤོས་ཤིག་རེད།

༥། ད་དུང་བོད་རང་བཙན་སློབ་ཕྲུག་ཚོགས་པའི་འགན་བཞེས་མི་སྣ་དང་བོད་ཀྱི་དཔའ་མོ་གྲགས་ཅན་བཀྲས་མཐོང་ལྷག་སྒྲོན་ཡང་ཤེས་ཚད་དང་ཉམས་མྱོང་། མཐོང་རྒྱ་ཐོས་རྒྱ། དཔའ་བློ་ཁོག་སོགས་འགྲན་ཟླ་མེད་པ་ཞིག་ཡིན། སྒེར་གྱི་ལྟ་ཚུལ་རང་བཙན་གཙང་མ་རེད། ད་ལྟ་ཁེ་ན་ཌར་བཞུགས་ཡོད།

༦། བོད་གཞུང་གི་ལས་དོན་ཐོག་ཧ་ལམ་ཚེ་གང་ཞབས་འདེགས་ཞུས་ཏེ་གནས་རིམ་དྲུང་ཆེ་ཙམ་བར་སླེབས་རྗེས། བོད་གཞུང་འཕྲོད་བསྟེན་བཀའ་བློན་གྱི་འགན་ཁུར་བཞེས་མྱོང་བ་བསམ་མཁར་དབྱངས་སྐྱིད་ཀྱང་འཇོན་པོ་རེད།

ད་དུང་ད་ལྟའི་བཀའ་བློན་སྟག་ལྷ་སྐལ་བཟང་དབྱངས་སྐྱིད་ཀྱང་ཡོད་པ་རེད། ང་མི་གཅིག་གིས་འདི་ཙམ་དྲན་དུས་རྣམ་པ་ཚོས་ཁ་སྣོན་ཏོག་ཙམ་གནང་རྒྱུ་ཏན་ཏན་ཡོད་རེད། འདི་ཚོའི་ནང་ནས་གཅིག་བདམས་ན་བཀའ་བློན་ཁྲི་པ་མ་འཇོན་པ་ལྟ་ཨ་ཡོད། མི་ཟེར་བ་དེ་ཡར་བཞག་ན་རིམ་པས་ཁོ་རང་གཅིག་ཆགས་འགྲོ་ཡི་འདུག

བོད་པ་ཚང་ལ་བཀའ་ཁྲིའི་འགན་ཐེག་མཁན་གྱི་བུད་མེད་ཅིག་མེད་པ་གསལ་བོ་རེད། དེ་ཨུ་ཚུགས་རྒྱག་དོན་ཡོད་པ་མ་རེད། ད་ཡིན་ན་ལྐོག་ཟ་རུལ་སོང་གི་དྲི་ཙམ་ཡང་མེད་ལ། ཤེས་ཡོན་དང་ལྷག་བསམ་གྱིས་ཕྱུག་པའི་དྲང་ཚུགས་ཅན་བཀའ་ཁྲི་ཟམ་གདོང་འདྲ་བོ་ཞིག་ང་ཚོ་ལ་རེག་མི་སྲིད། ཡིན་ནའང་ཐུབ་བསྟན་ལུང་རིགས་ལ་ཁོ་རང་གི་ཤན་ཅུང་ཞུགས་ཡོད་པ་རེད་ལྐོག་ཟ་རུལ་སོང་ནི་མེད་ཚོད་འདུག ཉམས་མྱོང་གང་ཡང་གང་འཚམ་ཡོད་པ་རེད། ཁོ་འདེམས་ན་གང་འདྲ་ཡིན་ནམ།

བཀའ་བློན་ཁྲི་བར་བུད་མེད་འདེམས་ན་རྩོད་པ་མེད་པ་འདྲ འོན་ཀྱང་དེར་འོས་པའི་བུད་མེད་ཤེས་འཇོན་གཉིས་ལྡན་ཞིག་ཡོད་མེད་དེ་རེད། གལ་ཏེ་དེ་འདྲ་ཞིག་རྙེད་ན་འོས་ཤོག་བླུག་རུང་བ་ཞིག་རེད། །

བཀའ་ཁྲིར་འོས་པའི་བོད་མོ་ཞིག་དཀོན་པ་མ་ཟད། བོད་མི་ཞིག་ཀྱང་དཀོན་པོ་འདུག ངོ་མ་བཤད་ན། ཨ་རིག་གླེན་རྒན་གྱིས་བཤད་པ་ལྟར། དངོས་གནས་སླར་ཡང་བླ་རྒན་ཞིག་འཚོལ་ཐབས་བྱས་ན་བཟང་བ་འདྲ། མ་མཐའ་ཡང་ཁྱིམ་ཚང་གི་ཆེད་དུ་འདུར་མི་དགོས་ལ། རྨོངས་ཚོད་ཀྱི་འཇུག་པ་དེ་ཡང་བླ་རྒན་ཚོར་མེད་པས། ཨེ་་་་་་་་་་་་་་་ཕལ་ཆེར་བླ་རྒན་ཞིག་འཚོལ་དགོས་རྒྱུ་རེད།

དཀོན་མཆོག་མཁྱེན། ཨ་རིག་གླེན་རྒན་འདིས་བོད་ཀྱི་མི་སྐྱ་ཕོ་མོ་ལ་མཐོང་ཆུང་དང་བརྙས་བཅོས་བྱེད་ལུགས་ལ་གཟིགས་དང་། ཁྱེད་ཀྱི་ངག་གི་ཉེས་པ་དེ་གང་དུ་བཞག ཨ་ཨ་་་་་་་་་་་་་་་་

མི་སྐྱ་ཕོ་མོ་ཕལ་བའི་ནང་ན་བཀའ་ཁྲི་ཐུབ་མཁན་གཅིག་ཀྱང་མེད།
དེས་ན་ཡང་བླ་རྒན་གྲྭ་རྒན་གང་རུང་ཞིག་གིས་བོད་མི་སྐྱོང་རང་སྐྱོང་རེད།
ངོ་མ་མི་སྐྱ་འདི་ཚོ་ད་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་

ཧ་ཧ་

གལ་སྲིད་བུད་མེད་ཅིག་གདམ་དགོས་ཀྱི་ཡོད་ན། དེང་གི་ཕྱི་དྲིལ་བཀའ་བློན་ལས་ཐོགས་སྟག་ལྷ་སྐལ་བཟང་གཡང་སྐྱིད་ཡག་ཤོས་མ་རེད་དམ།

ངོས་གནས་རེད། གལ་སྲིད་ཁྱེད་ཀྱིས་བུད་མེད་སུ་ཞིག་གི་བཀའ་ཁྲིའི་འོང་འགན་ཐེག་ངེས་རེད་སྙམ་པའི་ཡིད་ཆེས་ཡོད་པའམ། ཡང་ན་ཁྱེད་རང་གིས་བཀའ་ཁྲི་འདེམས་འདོད་ཡོད་པའི་བུད་མེད་དེའི་མིང་ནས་སྨོས་དང་། ཁྱེད་ལ་མི་མང་གི་རྒྱབ་སྐྱོར་ཐོབ་སྲིད། དེ་མིན་སྤྱིར་བུད་མེད་བཀའ་ཁྲི་འོས་མིན་སྐོར་ལ་རྕོད་པ་མེད་པ་འདྲ།