འདི་ཟླའི་ཚེས་ ༡༤ ནས་ཚེས་ ༢༠ བར་གཡུང་དྲུང་བོན་གྱི་སྐོར་བགྲོ་གླེང་ཐེངས་བཅུ་པ་དེ་བཞིན་དཔལ་གཤེན་བསྟན་སྨན་རིའི་གླིང་གི་གཡུང་དྲུང་བོན་གྱི་དཔེ་མཛོད་ཁང་ཆེན་མོར་ཚོགས་གནང་ཡོད་པ་རེད།
བོད་མི་མང་སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་དེ་རིང་ཕྱི་ཚེས་ ༢༣ ཉིན་འདི་གར་གནས་ཚུལ་ངོ་སྤྲོད་གནང་བ་ལྟར་ན། དུས་རབས་ཉེར་གཅིག་པའི་དུས་མགོ་ཚུགས་པ་ནས་བཟུང་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་འཛིན་འོག་བོན་གྱི་བགྲོ་གླེང་འདུས་སྡེ་གསར་འཛུགས་ཀྱིས་ལོ་རིམ་བཞིན་སློབ་ཕྲུག་རྣམས་ཀྱི་དབྱར་ཁའི་གུང་གསེང་དང་བསྟུན་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་གཡུང་དྲུང་བོན་གྱི་གཞུང་ལུགས་ཁག་སོགས་བརྗོད་བྱ་གཙོ་བོར་བཟུང་སྟེ་བདུན་ཕྲག་གཅིག་རིང་གཡུང་དྲུང་བོན་གྱི་སྐོར་བགྲོ་གླེང་ཞིག་མུ་མཐུད་ཚོགས་བཞིན་ཡོད་པ་ལྟར། འདི་ཟླའི་ཚེས་ ༡༤ ནས་ཚེས་ ༢༠ བར་གཡུང་དྲུང་བོན་གྱི་སྐོར་བགྲོ་གླེང་ཐེངས་བཅུ་པ་དེ་བཞིན་དཔལ་གཤེན་བསྟན་སྨན་རིའི་གླིང་གི་གཡུང་དྲུང་བོན་གྱི་དཔེ་མཛོད་ཁང་ཆེན་མོར་ཚོགས་གནང་ཡོད་པ་རེད།
བགྲོ་གླེང་དབུ་འབྱེད་གཡུང་དྲུང་བོན་གྱི་བསྟན་པའི་མངའ་བདག་༧སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་མཆོག་གིས་གནང་ཞིང་བགྲོ་གླེང་གོ་སྒྲིག་ཚོགས་གཙོ་ཁྲི་གཡུང་དྲུང་ནས་ངོ་སྤྲོད་གསུང་བཤད་དང༌། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་ཟུར་པ་བྱ་དུར་བསོད་ནམས་བཟང་པོ་མཆོག་གིས་བགྲོ་གླེང་གི་ཟབ་གནད་སྐོར་ལ་གསུང་བཤད། ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་འདི་ཕྱིའི་ལེགས་ཉེས་ཀྱི་བླང་དོར་བཀའ་སློབ་བསྩལ་གནང་མཛད་པ་དང༌། བགྲོ་གླེང་དངོས་གཞིའི་སྐབས་ཉིན་རིམ་བཞིན་སྤྱི་འཐུས་དགེ་བཤེས་སྨོན་ལམ་མཐར་ཕྱིན་གྱིས་བོད་ཀྱི་ད་ལྟའི་ཆབ་སྲིད་ཀྱི་གནས་བབ་དང་མ་འོངས་པའི་མངོན་འདོད་སྐོར་དང༌། བཤད་སྒྲུབ་མཁན་པོ་དགེ་བཤེས་གཤེན་བསྟན་རབ་གསལ་ལགས་ཀྱིས་བོན་ཕྲུག་རྣམས་ཀྱི་ད་ལྟའི་འགན་འཁྲི་དང་མ་འོངས་ལངས་ཕྱོགས་སྐོར། བཤད་སྒྲུབ་སློབ་དཔོན་དགེ་བཤེས་ཉི་མ་དོན་གྲུབ་ལགས་ཀྱིས་གཡུང་དྲུང་བོན་གྱི་ལྟ་གྲུབ་དེང་རབས་རིག་པའི་ལམ་ནས་ངོ་སྤྲོད་གནང་སྟངས་སྐོར། ལྷ་གདོང་དགེ་བཤེས་བསོད་ནམས་རྒྱལ་མཚན་ལགས་ཀྱིས་བོན་གྱི་རིག་གཞུང་ལ་དེང་དུས་གཞོན་སྐྱེས་རྣམས་ཀྱིས་ལྟ་སྟངས་སྐོར། བོན་སྒོ་རྩོམ་སྒྲིག་པ་ཆོས་འཁོར་ཚང་དགེ་བཤེས་ཉི་མ་འོད་ཟེར་ལགས་ཀྱིས་བོན་གྱི་ཐུན་མོང་མ་ཡིན་པའི་ཐ་སྙད་ཁག་ཅིག་ངོ་སྤྲོད། ཨཱཅརྱ་བཟང་མོ་གཡང་རིས་ནས་༼བོན་བན་གྱི་བཙུན་མའི་སྡོམ་རྒྱུན་དང་འབྲེལ་བའི་དཔྱད་པ་མེ་ལོང་མ་༽ཡི་ནང་དོན་གནད་བསྡུས་སྐོར་བཅས་ལ་འགྲེལ་བརྗོད་དང༌། དྲི་བ་དྲིས་ལན། གཞན་ཡང་རིག་རྩལ་འགྲན་པའི་གར་སྟེགས་ཞེས་སློབ་ཕྲུག་ནང་ཕན་ཚུན་སྡེ་ཚན་ཁག་བགོས་ཀྱིས་དྲི་བ་དྲིས་ལན་སོགས་མཛད།
མཇུག་བསྡོམས་མཛད་སྒོའི་སྐབས་༧སྐྱབས་རྗེ་ཁྲི་འཛིན་རིན་པོ་ཆེ་མཆོག་ནས་གསུང་བཤད་སློབ་དཔོན་རྣམ་པར་ཐུགས་རྗེ་ལེགས་གསོལ་གྱི་མགུལ་དར་དགྱེས་བསྩལ་དང༌། ཞང་བོད་ཡིག་གཟུགས་ཀྱི་སྒྱུ་རྩལ་དང༌། རྩོམ་རིག་འགྲན་བསྡུར་ཁྲོད་ཨང་ཐོབ་པ་རྣམས་ལ་བྱ་དགའ་ལེགས་སྐྱེས་བསྩལ། ཚོགས་ཞུགས་པ་རྣམས་ནས་དགེ་ཕན་མྱོང་ཚོར་ཇི་བྱུང་དང༌། མ་འོངས་ཡར་རྒྱས་གསར་གཏོད་ཀྱི་ལེགས་ཚོགས་སྐོར་ལ་དགོངས་འཆར་དང༌། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཆེ་མཆོག་ནས་གསུང་བཤད། ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ནས་ལམ་སྟོན་བཀའ་སློབ། གོ་སྒྲིག་ཚོགས་གཙོ་ནས་མཇུག་བསྡོམས་གསུང་བཤད་བཅས་བསྩལ་གནང་གིས་མཛད་སྒོ་མཇུག་གྲུབ་ཡོད་པ་རེད། ཐེངས་འདིར་བོན་གཞིས་ཉིན་སློབ་གྱི་འཛིན་གྲྭ་བདུན་པ་ཡན་གྱི་སློབ་མ་དང༌། གཞན་ཡང་ཝཱ་ཎ་མཐོ་སློབ་གཙོས་པའི་མཐོ་སློབ་ཁག་གི་སློབ་མ་བཅས་ཁྱོན་སློབ་མ་ ༡༣༠ ལྷག་འདུ་འཛོམས་བྱུང་ཡོད་པ་རེད།
དྲ་གྲོགས་ཁང་གསར་ལགས་ཀྱིས་གསུངས་པར་རྒྱུ་མཚན་འདུག བགྲོ་གླེང་ནི་གསང་བ་ཞིག་མ་ཡིན་པས་ས་འགོད་པ་མགྲོན་འབོད་བྱས་ཀྱང་མ་འོས་མེད་སྙམ།
ཆོས་བརྒྱུད་ཆེན་མོ་བཞི་གཡང་དྲུང་བོན་བཅས་པ་འདི་འདྲ་ཞིག་འཚོག་རྒྱུ་བྱུང་ན་ཅི་མ་རུང་།
འདི་ཟབ་སྦྱོང་ལྟ་བུ་ཞིག་ལས་བགྲོ་གླེང་ཡིན་ས་མ་རེད།
འདི་འདྲའི་ཟབ་སྦྱོང་ལ་བོན་ཕྲུག་ཁོ་ན་སྐོང་བ་ཙམ་མ་ཡིན་པར། ཡོངས་ཁྱབ་གསལ་བསྒྲགས་སྤེལ་ཏེ་དོན་གཉེར་ཅན་ཚང་མ་ཞུགས་བཅུག་ན་ལེགས།
དགོངས་དག མགྲོན་ཤོག་བཏང་བ་ཡིན་ན་ཞེས་བཅོ་རོགས།
ཁོང་ཚོས་གསར་འགོད་པ་མགྲོན་ཤོག་བྱས་པ་ཡིན་ན་གནས་ཚུལ་འདི་ལས་རྒྱས་ཙམ་འགོད་ཐུབ་གི་རེད། ཡིན་ཡང་། ད་བར་དུ་བགྲོ་གླེང་ཐེངས་ ༡༠ གནང་ཡང་གསར་འགོད་པ་མགྲོན་འབོད་བྱས་ཡོད་པ་མ་རེད། གོང་གི་གསར་འགྱུར་འདི་ནི་སྐབས་དེའི་བགྲོ་གླེང་གི་ལས་རིམ་ཙམ་ལས་ཅི་ཡང་མ་རེད། བགྲོ་གླེང་གི་ནང་དོན་འདིར་འགོད་ཐུབ་ཡོད་མ་རེད། དགོངས་དག་ཞུ།
གཡུང་དྲུང་བོན་གྱི་བགྲོ་གླེང་གནང་པར་དགའ་བསུ་ཡོད། ད་དུང་བརྗོད་གཞི་དེ་དེའི་ཐོག་བགྲོ་གླེང་དེ་དང་དེ་གནང་སྐོར་སོགས་ཁ་གསལ་འདོན་ཐུབ་ན་ནང་བསམ་བློའི་གོ་རྟོགས་འཕེལ་རྒྱུར་ཕན་འབྲས་ཆེ་སྙམ།།
རབ་ན་ཆོས་ལུགས་རིས་མེད་ཀྱི་ཚོགས་ཆེན་རེ་ལོ་རེ་ཐེངས་གཉིས་ནས་གསུམ་ལ་ཚོགས་མ་ཐུབ་ཀྱང་ཚོགས་ཐེངས་གཅིག་རེ་ཚོགས་ཐུབ་པ་ཡིན་ན་དངོས་ནས་ཡག་པོ་འདུག་པ་མ་ཟད། ༧རྒྱལ་བའི་དགོངས་གཞི་ཡང་དེ་ལྟར་རེད་ལགས། ཨོ་རེད། ངས་གཡུང་དྲུང་བོན་གྱི་ཚོགས་ཆེན་འདི་ཡག་པོ་མི་འདུག་ཟེར་ནས་གཏན་ནས་བཤད་མེད་པ་ཐུགས་འཇག་འཚལ། འདི་ཡང་དངོས་ནས་དོན་དག་ལེགས་པོ་ཞིག་རེད།
འདིར་བོན་ཆོས་ཁྲོད་ཀྱི་གཞི་བདག་གི་སྐོར་ཞིག་གསུང་ཐུབ་ན་བཀའ་དྲིན་ཤིན་ཏུ་ཆེ། དེ་ཡང་གཉའ་ཁྲི་དང་དེའི་ཡར་སྔོན་དང་འབྲེལ་བ་ཡོད་པ་ཞིག་གི་སྐྱབས་འཇུག་ཞུ་གིན་ཡོད།
བོད་རང་གི་གདོད་མའི་ཆོས་ལུགས་གཡུང་དྲུང་བོན་དང་དེའི་རྗེས་འཇུག་པ་དག་གིས་འདི་ལྟར་དུས་རབས་གཉན་འཕྲང་ཅན་གྱི་སྐབས་སུ་རང་རེའི་ཆོས་རིག་ཆབ་དཔལ་བཞི་ཡི་སྐོར་ནས་བགྲོ་གླེང་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ། བོད་རང་གི་ཐུན་མིན་ཁྱད་ཆོས་ལྡན་པའི་གནའ་བོའི་ཆོས་ལུགས་ཤིག་དངརིག་གཞུང་ཞིག དེ་བཞིན་ལོ་རྒྱུས་ཤིག་འཚོལ་དགོས་ན་གཡུང་དྲུང་བོན་དང་དེའི་ཉམས་ལེན་པ། དེ་ཚོ་གནས་སའི་ཁོར་ཡུག་ཅིག་ནས་མ་གཏོགས་ང་ཚོར་ལག་ཡོང་ཅི་ཡང་རེག་མི་ཐུབ།