ང་ཚོ་བོད་མིའི་རང་དབང་གི་གནད་དོན་འདི་ལྟ་བུ་ཞིག་ཆགས་དོན། ང་ཚོ་བོད་པའི་མི་རབས་ཁ་ཤས་གོང་ནས་འཛམ་གླིང་གི་དེང་དུས་ཤེས་ཡོན་ལ་དོ་སྣང་མ་བྱས་པ་དང་། རང་གི་ཆབ་སྲིད་ཚགས་ཚུད་མ་བྱུང་སྟབས་ང་ཚོར་དཀའ་ངལ་ཞིག་འཕྲད་པ་རེད། ང་ཚོས་རྒྱ་མི་གུང་ཁྲན་གཅིག་པུ་ལབ་རྒྱུ་ཡོད་པ་མ་རེད། སོ་སོའི་ངོས་ནས་ཚགས་ཚུད་མ་བྱས་པར་བརྟེན་ནས་བྱུང་བ་རེད། ཅེས་༧གོང་ས་མཆོག་གིས་གསུངས་སོང།
ངྷ་ས་ནང་ཆོས་གོ་སྒྲིག་ཚོགས་ཆུང་གི་གོ་སྒྲིག་འོག ལོ་ལྟར་༧གོང་ས་མཆོག་གིས་སློབ་གྲྭ་ཁག་གི་སློབ་མ་རྣམས་ལ་དམིགས་བསལ་གྱིས་ནང་ཆོས་ངོ་སྤྲོད་གནང་བཞིན་པ་ལྟར། སྐབས་གསུམ་པའི་ནང་ཆོས་ངོ་སྤྲོད་དེ་ཕྱི་ཚེས་ ༢༤ དང་ ༢༥ ཉིན་གཉིས་རིང་ངྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་ཕྱོགས་ཡོང་གི་སློབ་མ་གཙོས། ངྷ་ས་ས་གནས་ཡུལ་མི་དང་ཕྱི་གླིང་བ་སོགས་མི་གྲངས་ ༥༠༠༠ ལྷག་ལ་༧རྒྱལ་སྲས་ཐོགས་མེད་ཀྱི་ལག་ལེན་སོ་བདུན་མ་བརྗོད་གཞིར་བཟུང་སྟེ་ནང་ཆོས་ངོ་སྤྲོད་དང་ལམ་སྟོན་བཀའ་སློབ་གནང་ཡོད། ཉིན་དེར་ངྷ་ས་ནང་ཆོས་གོ་སྒྲིག་ཚོགས་ཆུང་དུ་སློབ་གཉེར་གནང་བཞིན་པའི་སློབ་གཉེར་པ་ཁག་ཅིག་གིས་མཚན་ཉིད་རྟགས་གསལ་གནང་སོང་ལ། དེ་དང་འབྲེལ་ཏེ་༧གོང་ས་མཆོག་གིས་ནང་ཆོས་ངོ་སྤྲོད་དང་སློབ་མ་ཡོངས་ལ་ལམ་སྟོན་བཀའ་སློབ་གནང་དོན། རྟགས་གསལ་གཏོང་བའི་རིགས་ལམ་དེ། བློ་གྲོས་དང་རྣམ་དཔྱོད་གོང་དུ་སྤེལ་བ་དང་བསྒྱུར་བཀོལ་ཡོང་བའི་ཐབས་ལམ་ཞིག་ཆགས་བསྡད་ཡོད། མཚན་ཉིད་སྦྱོང་ཟེར་བ་དེ་ཆོས་པ་ཁོ་ནས་སྦྱོང་ཟེར་བ་རྩ་ནས་མ་རེད། ཆོས་རྭ་ནས་རབ་བྱུང་། རབ་བྱུང་ནས་གཞུང་ཆེན་ལ་སྦྱོང་བ་ལས་གཞན་པར་མི་སྦྱོང་པའི་ལྟ་ཚུལ་དེ་འདྲ་ཡོད་ན། དེ་ནོར་འཁྲུལ་དང་རྗེས་ལུས་ཀྱི་བསམ་ཚུལ་རེད། ཡོན་ཏན་སྦྱོང་མཁན་ཞིག་ཡིན་ཕྱིན་རིགས་ལམ་ལ་སློབ་སྦྱོང་བྱས་པ་ཡིན་ན། ཤེས་བྱའི་སྡེ་ཚན་གང་ཡིན་ཡང་དེ་ཤེས་པ་ཞིག་ཏན་ཏན་ཆགས་ཀྱི་རེད་ལ། རང་ཉིད་ཀྱི་བསམ་བློར་མཚོན་ནའང་གྲུང་དུ་འགྲོ་བར་ཁྱད་པར་ཞིག་ཏན་ཏན་ཡོང་གི་རེད། ཆོས་དང་འཇིག་རྟེན། ཆོས་དང་སྲིད། རིག་གནས་ཆེ་ཆུང་སོགས་གང་ཡིན་ཡང། སློབ་སྦྱོང་སྤྲོད་མཁན་གྱིས་རིགས་ལམ་གྱི་ཐོག་སློབ་གསོ་སྤྲད། སློབ་སྦྱོང་བྱེད་མཁན་གྱིས་ཀྱང་རིགས་ལམ་གྱི་འགྲོ་སྟངས་ཐོག་དཔྱད་པ་བྱ་རྒྱུ་དེ་ཧ་ཅང་གལ་ཆེན་པོ་རེད། ཅེས་གསུངས་བྱུང་།
ཡང་༧གོང་ས་མཆོག་གིས་ཆོས་ཟེར་བའི་གོ་དོན་འགྲེལ་བཤད་གནང་དོན། བོད་སྐད་ནང་ཆོས་ཟེར་བ་དེ་བཅོས་བསྒྱུར་བཏང་བའི་དོན་རེད། ལེགས་སྦྱར་ནང་ཆོས་ཟེར་བ་དེ་ངྷར་མ་རེད། སྲུང་བ་དང་འཛིན་པའི་དོན་རེད། རང་གི་ངོ་བོ་འཛིན་པ་དང་མཚན་ཉིད་འཛིན་པའི་དོན་རེད། ང་རང་ཚོས་དངོས་སུ་བཤད་པའི་ཆོས་ཏེ་སྡུག་བསྔལ་ལ་འཛིན་པ་དང་སྡུག་བསྔལ་ལས་སྐྱོབ་པ། སྡུག་བསྔལ་འདི་མཐར་ཐུག་སེམས་སྐྱིད་མ་སྐྱིད་ཀྱི་ཐོག་ནས་སླེབས་འོང་གི་ཡོད་པ་ཡིན་དུས། སེམས་འདུལ་དགོས་བ་ཅིག་དང་། སེམས་འགྱུར་བ་ཞེས་པ་དེ་སེམས་མ་སྐྱིད་པ་དེ་ཉུང་དུ་བཏང་ནས་སེམས་སྐྱིད་པོར་གཏོང་རྒྱུ་མ་གཏོགས་དེ་ལས་ལྡོག་ཏེ་སེམས་སྐྱོ་རུ་འགྲོ་རྒྱུ་དེ་མ་རེད། ཆོས་ཟེར་བ་དེ་སྡུག་བསྔལ་སེལ་བྱེད་ཀྱི་ཐབས་ཤེས་ཤིག་རེད། ཆོས་ཟེར་བ་དེ་མི་ཚེ་སྐྱེལ་སྟངས་ཀྱི་ཐབས་ཤེས་མ་རེད། སྤྱིར་བཏང་ང་ཚོ་མིའི་འཚོ་བའི་ནང་ཧ་ཅང་གསལ་བོ་རེད། མིའི་སེམས་ག་ཚོད་ཀྱི་ཞི་ཞིང་དུལ་བ་ཡོད་པ་དེར་སྡུག་བསྔལ་བྱུང་ནའང། རྣམ་རྟོག་དེ་འདྲ་མི་འདུག སེམས་ལ་ཞི་བདེ་མེད་མཁན་གྱི་མི་དེར་དངུལ་འབོལ་པོ་དང་མཐུན་རྐྱེན་བཟང་པོ་གང་འདྲ་ཡོད་ཀྱང་མི་དེ་སྐྱིད་པོ་ཡོད་པ་མ་རེད། ཕྱི་ལོགས་སུ་གང་འདྲ་བྱས་པ་ཡིན་ནའང་གཙོ་བོ་ནང་སེམས་ཀྱི་མ་མཐུན་པའི་དབང་གིས་མ་སྐྱིད་པ་མང་བ་ཡོང་གི་ཡོད་པ་རེད། ང་ཚོ་མང་པོ་ཞིག་གིས་ཆོས་ཟེར་དུས་སྨོན་ལམ་རྒྱག་རྒྱུ་དང་ཁ་འདོན་བསྔགས་འདྲ་དྲངས་སྡོད་པ་དེ་ཆོས་ཕལ་བ་རེད། ཡང་། རིགས་གཅིག་གིས་ལུས་ཀྱི་དཀའ་སྡུག་རྐྱང་རྐྱང་ལ་བརྟེན་ནས་ཆོས་སྒྲུབ་ཀྱིན་ཡོད་པ་རེད། དེ་གཙོ་བོ་ལུས་ལ་བརྟེན་པའི་ཆོས་ཡིན་པ་རེད། ཤཱཀྱ་ཐུབ་པའི་ཆོས་དེ་ཕྱི་ལུས་ཀྱི་རྣམ་འགྱུར་ལ་ལྟོས་པ་ཞིག་མ་རེད། གཙོ་བོ་སེམས་དེ་གལ་ཆེན་པོར་བཟུང་བ་དེ་འདྲའི་ཆོས་ཤིག་རེད། ལོ་ནས་ལོར་བསྟུད་དེ་སྒོམ་སོགས་བརྒྱབ་ནས་སྡུག་བསྔལ་སེལ་མ་ཐུབ་པ་ཡིན་ན་ཆོས་ཆོས་སུ་མ་སོང་བ་རེད། ང་རང་ཚོ་མང་པོ་ཞིག་གིས་ཆོས་བྱེད་ཀྱིན་ཡོད་པ་རེད་དེ། ལམ་སང་ཁོང་ཁྲོ་དང་མགོ་སྐོར་གཏོང་བའི་བཟོ་འདྲ་བོ་ཡོང་གི་ཡོད་པ་དེ་དག་སེམས་མ་སྐྱིད་པའི་དབང་གིས་རེད། དེ་བས། ང་ཚོས་ཆོས་དེ་ཁ་དང་ཚིག་ཙམ་གྱི་ཆོས་མ་གཏོགས་མངོན་དུ་གྱུར་བའི་ཆོས་དེ་ཆགས་ཐུབ་ཀྱི་ཡོད་པ་མ་རེད། ཆོས་ཟེར་བའི་གོ་བ་དེ་རྟོགས་དགོས་ཀྱི་འདུག དེ་རྟོགས་པ་ཡིན་ན་རང་དང་སྤྱི་ཚོགས་ཡོངས་ལ་ཕན་པ་ཞིག་ཆགས་འོང་གི་ཡོད་པ་རེད། སྡུག་བསྔལ་གྱི་རྩ་བ་བདག་དུ་འཛིན་པའི་བདག་འཛིན་དང་རང་གཅེས་པར་འཛིན་པའི་གཅེས་འཛིན་གཉིས་པོ་དེ་སེམས་ཀྱི་གཏིང་ནས་རྐྱེན་ཆ་ཚང་ཞིག་ལ་བརྟེན་ནས་འོང་དུས། རང་གཅེས་བར་འཛིན་པའི་གཅེས་འཛིན་གྱི་སྡུག་བསྔལ་དང་། བདེན་པར་འཛིན་པའི་བདེན་འཛིན་གྱི་སྡུག་བསྔལ་གྱི་རྩ་བ་དེ་ཤེས་པའི་ཐོག་ནས་དེ་གཉིས་བགོ་བྱ་བྱེད་ཐུབ་ན་ལག་པ་ལྕགས་ཐག་གིས་བཅིངས་ཡོད་ཀྱང་ལྕགས་ཐག་གྲོལ་འགྲོ་བའི་དཔེ་ལྟ་བུ་རེད། དངོས་གནས་སེམས་ནང་བདེ་སྐྱིད་ཡོང་རྒྱུ་ཞིག་ཏན་ཏན་ཡོད་པ་རེད། དེ་བས། ནང་པའི་ཆོས་བྷི་རྡ་ངྷར་མ་ཟེར་བ་དེ་སངས་རྒྱས་ཀྱི་གསུངས་བཞིན་ཁོང་ཉིད་ཀྱི་གོ་འཕང་དེ་འདྲ་ཞིག་སྒྲུབ་པའི་ཐབས་ལམ་དེ་ལ་ཟེར་བ་རེད། ཅེས་གསུངས་སོང་།
མཐའ་མའི་དྲི་བ་དྲི་ལན་གྱི་སྐབས་སུ། སློབ་ཕྲུག་ཅིག་གིས་ཆོས་ཕྱོགས་ལ་སློབ་གྲྭ་ཁག་གིས་དོ་སྣང་བྱས་ཏེ་གྲུབ་འབྲས་གང་འཚམ་ཐོན་འདུག་ནའང་། ཆབ་སྲིད་ཀྱི་གོ་རྟོགས་ཏེ་ཧ་ཅང་སྐྱོ་བོ་ཡིན་པའི་སྐོར་གྱི་དྲི་བ་དྲིས་པར་༧གོང་ས་མཆོག་ནས་བཀའ་ལན་བསྩལ་དོན། ང་ཚོ་རྒྱ་གར་ལ་ཐོག་མར་འབྱོར་ཏེ་ལོ་གཅིག་ནང་ཚུད་ལ་གཞན་ཅི་ཡང་མེད་དུས་སུ་མ་སུ་རི་སློབ་གྲྭ་དེ་ཐོག་མར་བཙུགས་པ་རེད། དེ་ཆོས་སློབ་སྦྱོང་བྱེད་པའི་ཆེད་དུ་བཙུགས་པ་མ་རེད། ང་ཚོ་བོད་མིའི་རང་དབང་གི་གནད་དོན་འདི་ལྟ་བུ་ཞིག་ཆགས་དོན། ང་ཚོ་བོད་པའི་མི་རབས་ཁ་ཤས་གོང་ནས་འཛམ་གླིང་གི་དེང་དུས་ཤེས་ཡོན་ལ་དོ་སྣང་མ་བྱས་པ་དང་། རང་གི་ཆབ་སྲིད་ཚགས་ཚུད་མ་བྱུང་སྟབས་ང་ཚོར་དཀའ་ངལ་ཞིག་འཕྲད་པ་རེད། ང་ཚོས་རྒྱ་མི་གུང་ཁྲན་གཅིག་པུ་ལབ་རྒྱུ་ཡོད་པ་མ་རེད། སོ་སོའི་ངོས་ནས་ཚགས་ཚུད་མ་བྱུང་བར་བརྟེན་ནས་བྱུང་བ་རེད། དེ་བས། ང་ཚོས་སློབ་གྲྭ་བཙུགས་དོན་དེ་ཆོས་ཕྱོགས་ལ་སློབ་སྦྱོང་བྱས་ཏེ་དགེ་བཤེས་ཆགས་རྒྱུ་དེ་འདྲ་གཙོ་བོར་བཟུང་བ་ཞིག་མ་རེད། བོད་པ་ཞིག་ཡིན་པའི་ཆ་ནས་ཆོས་གལ་ཆེན་པོ་རེད། ང་ཚོ་ནང་ཆོས་ཀྱི་སྤྱི་ཚོགས་ཤིག་ཆགས་བསྡད་ཡོད་པ་རེད། དེ་འདྲ་ཡིན་སྟབས་ནང་ཆོས་ཤེས་དགོས་ཀྱི་འདུག ཅེས་བརྗོད་ཀྱིན་ཡོད་པ་རེད། ཡིན་ནའང་། དེ་གཅིག་པུའི་འདང་གི་ཡོད་པ་མ་རེད། ཆབ་སྲིད་ཀྱི་སློབ་གསོ་སྤྲོད་རྒྱུ་དེ་བོད་པའི་རྩ་དོན་གྱི་གནས་སྟངས་གང་འདྲ་ཞིག་ཏུ་སླེབས་ཡོད་པ་དེར་ཐུག་ཡོད་པ་དང་། དཀའ་ངལ་དེ་སེལ་ཐབས་གང་འདྲ་ཞིག་ཡོད་མེད། གཙོ་བོ་དགེ་རྒན་གྱི་ལམ་སྟོན་ལ་རག་ལས་ཡོད་པ་རེད། ཁྱེད་རང་ཚོ་མང་ཆེ་བ་གཞོན་སྐྱེས་ཡིན་པ་དང་བོད་བསྟན་སྲིད་དོན་དུ་སེམས་ཁུར་གནང་གི་ཡོད་པ་རེད་ལ། གནང་དགོས་པ་ཞིག་ཀྱང་རེད། བོད་ནང་དཀའ་ལས་གང་འདྲ་ཞིག་སྐྱོན་གྱི་འདུག ང་ཚོ་རང་དབང་ལུང་པར་སྨྲ་བརྗོད་རང་དབང་ཡོད་པ་རེད། ག་རེ་ཡིན་ན་བྱེད་ཐུབ་པ་ཞིག་རེད། དེ་འདྲ་ཡིན་དུས། བསམ་ཐུབ་པ་དང་བཤད་ཐུབ་པ། སྒྲུབ་ཐུབ་པ་དེ་འདྲ་དགོས་ཀྱི་ཡོད་པ་རེད། དེ་བཞིན་བསམ་ཕོད་པ་དང་བཤད་ཕོད་པ་གལ་ཆེན་པོ་ཡིན་ནའང། མཐར་འབབ་ས་དེ་འབྲས་བུ་དེར་ཕན་པ་ཅི་ཞིག་འདུག་དེར་བསམ་བློ་གཏོང་དགོས་པ་གལ་ཆེན་པོ་རེད། དངོས་ཡོད་གནས་ཚུལ་རྟོགས་པའི་ཐོག་ནས་སྙིང་སྟོབས་དང་ལྷག་བསམ་བསྐྱེད་རྒྱུ་དེ་གཙོ་བོ་རེད། ཅེས་གསུངས་སོང།
ཐེངས་འདིའི་ནང་ཆོས་ངོ་སྤྲོད་ཀྱི་ཉིན་གྲངས་གཉིས་རིང་། ས་གནས་ཁག་མི་འདྲ་བ་ ༣༢ ནས་ཕེབས་པའི་སློབ་ཆེན་ཁག་ ༨༢ ཡི་སློབ་མ་དང་། རྒྱལ་ཁབ་མི་འདྲ་བ་ ༦ ནས་ཕེབས་པའི་སློབ་མ་དང་མི་སྣ་འདུས་ཡོད་པ་དང་། བོད་ཁྱིམ་ཁོངས་གཏོགས་ཀྱི་སློབ་གྲྭ་ཁག་མ་འདུས་པའི་གཞོན་སྐྱེས་དང་ཤེས་རབ་དགའ་ཚལ་སློབ་གླིང་བཅས་ཀྱི་སློབ་མ་ ༣༠༠༠ སྟོང་ལྷག་ཚོགས་ཁང་དུ་འདུས་ཡོད་པ་དང་། འཛིན་རིམ་དགུ་བའི་སློབ་མ་དང་ངྷ་སར་གནས་སྡོད་མི་མང་སོགས་མི་གྲངས་ ༥༠༠༠ ལྷག་འདུས་ཡོད་འདུག
ཆོས་མིན་སྲིད་མིན་ཞིག་གིས་ང་ཚོ་ལ་ཕན་ཐོགས་ནི་མ་རེད་།
དངོས་གནས་ཡག་པོ་རེད་སློབ་གྲ་ལ་དེང་རབས་དང་མཐུན་པའོ་སློབ་གསོ་དགོས་ནི་རེད་
དགེ་རྒན་དེ་ཚོ་སྙིང་རྗེ་གཏིང་ནག་ཟེར་མི་རུང་། དགེ་རྒན་གྱི་ཤེས་ཚད་མེད་བཞིན་དགེ་རྒན་བྱས་ན་ཡོངས་རྒྱུ་འདི་ལས་མེད།
གྲོགས་པོ་བློ་ལྡན་ལགས།ཐུགས་ཁྲེལ་མ་བྱེད།ནང་ཆོས་ནི་མིའི་སེམས་ཁམས་ལ་འཕྲོད་ཅིང་ཕན་པའི་ཤེས་ཡོན་ཞིག་ཡིན་པས་དེས་སློབ་མ་ཚོའི་མདུན་ལམ་ལ་གནོད་མི་ནུས།སློབ་མ་ཚོའི་མདུན་ལམ་མ་ཡོང་བ་དེ་ནི་ལོ་ངོ་དུ་མར་འབྲེལ་འདྲིས་བྱས་ཏེ་དུས་ཚོད་ཡོངས་སུ་ཆུད་ཟོས་སུ་བཏང་བའི་དགེ་རྒན་ཁོག་རུལ་གཏིང་ནག་དེ་ཚོ་རེད།
ང་བོད་ཁྱིམ་སློབ་གྲྭའི་འགན་འཛིན་དེ་ཚོར་རྣམ་དོག་ཟ་ཡི་ཡོད། ངོ་ཚ་མེད་པ་འདི་ཚོས་སློབ་མ་ཚོར་ནང་ཆོས་རྐྱང་ཁྲིད། ད་ལྟ་སློབ་མ་ཚོ་མདུན་ལམ་གང་འདྲ་ཞིག་ལ་བསྐྱལ་སོང་།
hievery one, dont mix religion and politic, lord buddha cant do that. thats why (gelsey pang ney rubjung gi)
།གང་ལ་གང་འཚམས་དེ་ལ་དེ་སྟོན་པ། །འཕགས་མཆོག་ཕྱག་ན་པད་མོར་གུས་འཕྱག་འཚལ།
ངྷ་ས་ནང་ཆོས་གོ་སྒྲིག་ཚོགས་ཆུང་ལ་སེམས་དབུས་ནས་བསྔགས་བརྗོད་དང་རྒྱུན་གནས་ཡོང་བའི་རེ་སྨོན་ཡོད།
༸རྒྱལ་དབང་མཆོག་སྐུ་ཚེ་ཡུན་དུ་བརྟན་ཅིང་། བདག་སོགས་གངས་ཅན་པ་རྣམས་ལ་དུས་དང་རྣམ་པ་ཀུན་ཏུ་བརྩེ་བས་ཟུང་དུ་གསོལ།།
ཁྱེད་ནི་བླ་མ། ཁྱེད་ནི་ཡི་དམ། ཁྱེད་ནི་མཁའ་འགྲོ བདག་དང་འགྲོ་བ་གངས་ཅན་སྤྱི་བོ་ཡོངས་ཀྱི་མིག་གི་དཔྱིད་དུ་བཞུགས་ཡོད་ཀྱང་། ད་དུང་ལོངས་པའི་ཚུལ་ཏུ་ལུས་པའི་ཉམ་ཐག་གི་སྐྱེ་འགྲོ་ངེད་ཅག་ཐུགས་ནས་བརྩེ་བ་ཆེན་པོས་རྗེས་སུ་བཟུང་བ་བཀའ་དྲིན་ཆེ། སྐུ་ཚེ་བརྟན་ཞིང་བཞེད་དོན་འགྲུབ་པར་སྨོན།
ཡག་པོ་བྱུང་འདུག་དགའ་སུ་ཡོད།
གོ་སྒྲིག་ཚོགས་ཆུང་ལ་ཐུགས་རྗེ་ཆེ་ཞུ་