ལོ་སྔོན་མའི་ཞི་རྒོལ་གྱི་རྗེས་ནས་བཙན་བྱོལ་བོད་མིའི་སྤྱི་ཚོགས་ཡོངས་སུ་བགྲོ་གླེང་ཆེ་ཤོས་ཤིག་ནི་སྐབས་རྗེས་མའི་བཀའ་ཁྲིའི་སྐོར་རེད། མི་མང་པོ་ཞིག་གིས་འདིའི་ཐད་རང་རང་གི་རྣམ་དཔྱོད་ཀྱི་རྩལ་བཏོན་ནས་བགྲོ་གླེང་གནང་བཞིན་པ་ནི་ངོ་མ་ཡིད་དུ་འོང་པ་ཞིག་རེད།
ལྷག་པར་དུ་བར་སྐབས་ཤིག་ནས་དྲ་ཐོག་གི་བགྲོ་གླེང་དེ་དག་ཀྱང་གུ་ཡངས་པོ་དང་། གུས་བརྩི་ཡོད་པ། གོ་རྒྱུ་ཡོད་པའི་ཕྱོགས་སུ་འཕེལ་གྱིན་པ་ནི་ང་ཚོའི་ང་རྒྱལ་མིན་པར། གཟི་བརྗིད་དུ་འགྲོ་བར་འདོད་ལ། ང་ཚོས་མུ་མཐུད་ནས་བློ་ཁ་ཡངས་པོར་ཕྱེ་སྟེ་རིག་པའི་རྩལ་སྡུར་བཞིན་འགྲོ་དགོས།
དེ་རིང་ངས་རང་གིས་བརྙེད་པའི་བཀའ་ཁྲིའི་འོས་གཞི་དེ་བསྒྲགས་འདོད་བྱུང་། ཡིན་ཡང་། འོས་གཞི་མ་བསྒྲགས་གོང་དུ་ཁོང་གི་འོས་ཆོས་ལས་འཕྲོས་པའི་གནས་ལུགས་འགའ་ཤས་སྔོན་གླེང་གི་ཚུལ་དུ་བཤད་འདོད་བྱུང་། མི་ཚང་མས་བཀའ་ཁྲིའི་འོས་གཞི་རྩོད་སྐབས་འཐད་ཕྱོགས་ཀྱི་ཐ་སྙད་བཀོལ་བ་མང་ཤོས་ནི་ལོ་གཞོན་དང་བུད་མེད་གཉིས་རེད། འོས་ཆོས་ཀྱི་རྩ་བའི་ཆ་རྐྱེན་ཡང་ལོ་གཞོན་དང་བུད་མེད་ཡིན་མིན་ལ་ཐུག་དགོས་པ་དང་། དེའི་རྗེས་ནས་འོས་ཆོས་གཞན་དག་བགྲང་གི་ཡོད་པ་ལྟར་སྣང་། གལ་སྲིད་ང་ཚོས་འདི་ལྟར་བཀའ་ཁྲིའི་འོས་གཞི་བཙལ་ཚེ་མི་རྣམས་ཀྱི་མིག་གཞོན་སྐྱེས་ཀྱི་ནང་དུ་ཤོར་ཏེ་གཞོན་སྐྱེས་མིན་པའི་འོས་གཞི་གཞན་པ་བརླག་རྒྱུའི་ཉེན་ཁའང་མཐོང་གི་འདུག
ངའི་བསམ་ཚུལ་ཡིན་ན། གལ་སྲིད་ང་ཚོས་དེ་རིང་ཆོས་བྱེད་ཀྱི་སྐྱེ་བུ་ཞིག་རང་གི་རྩ་བའི་བླ་མར་འདེམ་གིན་ཡོད་ན་ཆོས་པ་རྣམ་དག་ཅིག་འདེམ་ངེས་པ་ནི་སུ་ལའང་དོགས་པ་མེད། དེར་བརྟེན། སྲིད་ཀྱི་ལས་ཀ་བྱེད་མཁན་ཞིག་ང་ཚོའི་དབུ་ཁྲིད་ལ་འདེམ་ནའང་ཆབ་སྲིད་ཀྱི་མིག་རྒྱང་ཡོད་མཁན་ (A man with a political vision) ཞིག་འདེམ་དགོས་པ་ནི་གནས་ལུགས་གཅིག་མཚུངས་ཡིན་པར་འདོད། དེ་བས་ལོ་ཚོད་ཀྱི་ཆ་རྐྱེན་དེ་ནི་གནད་ཆེན་པོར་མ་རྩིས་ན་ལེགས་པར་འདོད་ཡོད།
ལངས་ཕྱོགས་མ་ཡིན་པར་སྲིད་བྱུས་ཀྱི་ཆ་ནས་བཤད་ནའང་། མ་འོངས་པར་བཀའ་ཁྲིར་སུ་བསླེབ་ནའང་ད་ལྟའི་སྲིད་བྱུས་འདི་ལག་བསྟར་བྱེད་དགོས་པ་ནི་གནས་སྟངས་ཀྱིས་ཐག་བཅད་ཡོད་པ་རེད། ངའི་ཤེས་ཚོད་ལ། དེང་སྐབས་ཤར་ནུབ་གང་དུའང་ཕྱི་འབྲེལ་སྲིད་བྱུས་ཀྱི་ཆ་ནས་རྣམ་པ་གསུམ་མཐོང་གི་ཡོད། དེ་དག་ནི་མཁྲེགས་འཛིན་ Hard Power དང་། ཞི་འཇམ་ Soft Power། ཞི་དྲག་ཟུང་འབྲེལ་ Smart Power བཅས་རེད། རྒྱ་ནག་གིས་ཅང་ཙེ་མིན་གྱི་སྐབས་ནས་བཟུང་ Soft Power ཞེས་པ་འདི་དངོས་སུ་ལག་བསྟར་བྱེད་ཀྱིན་པ་ཁྱབ་བསྒྲགས་བྱས་པ་ནི་ངས་དྲན་གྱི་འདུག སྲིད་བྱུས་འདིའི་འོག་ནས་ཁོང་ཚོས་ཐ་ན་ཁྱིམ་མཚེས་རྒྱལ་ཁབ་དག་གི་དཀའ་རྙོག་ལའང་ལག་པ་མི་འཆང་བར་ཞི་འཇམ་གྱི་རྣམ་འགྱུར་བསྟན་པ་དང་། དམིགས་ཡུལ་གཙོ་བོ་ནི་ཟིང་ཆ་མེད་པའི་སྒོ་ནས་དཔལ་འབྱོར་འཛུགས་སྐྲུན་ལ་ཤུགས་བརྒྱག་རྒྱུ་དེ་རེད། དེ་རིང་རྒྱ་ནག་འདི་སྟོབས་ཆེན་རྒྱལ་ཁབ་ཀྱི་གྲས་སུ་ཚུད་པའང་སྲིད་བྱུས་འདིའི་དབང་གིས་རེད། ཨ་རི་ལྟ་བུ་ཡིན་ན། ད་ལོར་ལྕམ་ཁི་ལིན་ཊོན་གྱིས་གྲོས་ཚོགས་གོང་མའི་ཉན་ཞིབ་གཏམ་བཤད་སྐབས་སུ། ཨ་རིའི་ཕྱི་འབྲེལ་སྲིད་བྱུས་ནི་ Smart Power ཞི་དྲག་ཟུང་འབྲེལ་ཡིན་པར་བསྒྲགས་པ་རེད། འདིའི་རྒྱུ་མཚན་ནི་ཨ་རིས་དེང་སྐབས་དམག་འཁྲུག་གཉིས་ད་དུང་མཇུག་སྒྲིལ་ཐུབ་ཡོད་པ་མ་རེད་ལ། བྱང་ཀོ་རི་ཡ་དང་ཨི་རན་ལྟ་བུ་དམག་འཁྲུག་གི་གྲ་སྒྲིག་བྱེད་སའི་ལུང་པའང་ཡོད་པ་རེད། བཙན་བྱོལ་བོད་གཞུང་གི་སྲིད་བྱུས་ནི་ Soft Power རེད། འདི་ནི་སྐུ་མདུན་གྱི་བླ་ན་མེད་པའི་ཐུགས་དགོངས་དང་། བོད་རྒྱ་མི་རིགས་གང་ཡིན་རུང་འཐབ་རྩོད་འདིའི་བརྒྱུད་རིམ་ཁྲོད་འདོར་མི་རུང་བའི་རྩ་དོན་ཆགས་ཡོད་པ་རེད། དེར་བརྟེན་བཀའ་ཁྲི་རྗེས་མ་སུ་བསླེབ་ནའང་སྲིད་བྱུས་འདི་ནི་ང་ཚོའི་རྩ་བའི་ལྟ་གྲུབ་ཅིག་ཆགས་ཡོད་སྟབས། རྒན་གཞོན་དང་ཆབ་སྲིད་ཀྱི་ལངས་ཕྱོགས་ལ་དབྱེ་བ་མེད་པར་གཅིག་མཚུངས་ཡིན་པར་འདོད།
ཡིན་ཡང་། ང་ཚོར་སྲིད་དོན་གྱི་མིག་རྒྱང་ཞིག་དགོས་པ་རེད། རང་བཙན་དང་། རང་སྐྱོང་། རང་ཐག་རང་གཅོད་བཅས་རེད། འདི་དག་ཡོད་ཚད་ང་ཚོས་ད་བར་དུ་གླེང་བ་རེད། ང་རང་ལ་མཚོན་ན་གལ་སྲིད་ཉི་མ་ཞིག་ལ་བོད་དོན་འདི་ཐག་གཅོད་དགོས་ན་པེ་ཅིན་དང་ངྷ་ས་གཉིས་ཀྱི་གང་ཡིན་རུང་བོད་མི་རིགས་ཀྱི་རང་ཐག་རང་གཅོད་ཀྱི་རྩ་དོན་འདི་འདོར་གི་མ་རེད་བསམ། འདི་ནི་རྒྱལ་སྤྱིའི་ཁྲིམས་ཀྱིས་ངོས་ལེན་ཡོད་པ་དང་། རྒྱ་ནག་གི་ཆབ་སྲིད་གཞུང་ལུགས་ཀྱིས་ཀྱང་ངོས་ལེན་ཡོད་པ་ཞིག་རེད། དེ་བས་ངས་ནི་མ་འོངས་པའི་བཀའ་ཁྲི་དེ་འཚོལ་སྐབས་གནད་དོན་འདིའི་རིགས་ལ་བསམ་བློ་གཏོང་གི་ཡོད། ད་ལྟའི་ཆར་འདིའི་ཕྱོགས་ནས་ང་ལ་འོས་གཞི་ཞིག་རག་པ་ནི་བཀའ་བློ་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཡིན།
ངས་ལོ་ཤས་གོང་དུ་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་ལ་བཀའ་འདྲི་ཞུ་མྱོང་ལ། ཁོང་གིས་ད་ནི་གངས་སྐྱིད་དུ་ཡོང་ནས་ལས་ཀ་བྱེད་པ་ལས་ཕྱི་ལོགས་ནས་ལས་ཀ་བྱས་ན་ཕན་ཐོགས་འདུག་ཅེས་གསུངས་བྱུང་། འོན་ཀྱང་། ཉེ་ཆར་མཐོ་རིམ་གྱི་མི་སྣ་ཞིག་བརྒྱུད་ནས་གོ་དུས། ཁོང་གི་སྐུ་ཟླས་ཀྱང་ད་ནི་གངས་སྐྱིད་ནས་ཕྱག་ལས་གནང་བར་ཐུགས་མོས་གནང་གི་མེད་སྐོར་བརྗོད་བྱུང་། དེ་ནི་ཚང་མས་ཤེས་གསལ་ལྟར། སྔོན་ཆད་ཀྱི་འབུམ་དགུ་བ་ལས་འཕྲོས་པའི་གླེང་ལྷག་དེའི་དབང་གིས་ཡིན་ཚོད་འདུག
གང་ལྟར་ང་ནི་ཁོང་གི་སྲིད་དོན་གྱི་མིག་རྒྱང་དང་། རྒྱབ་ལྗོངས། ཤེས་འཇོན། དགོང་ལོ་བཅས་ཕྱོགས་གང་ཐད་ནས་ ༢༠༡༡ ལོར་བཀའ་ཁྲིའི་འོས་གཞི་ནི་ཁོང་ལས་ལྷག་པ་ཞིག་མཐོང་གི་མི་འདུག་ལ། ངའི་བཀྲུས་ན་མི་དག་པའི་ཐོབ་ཐང་སྟེ། མི་གཅིག་གི་འོས་ཤོག་གཅིག་པུའང་ཁོང་ལ་འཕེན་རྒྱུ་ཡིན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྐུ་ཞབས་གླེན་རྒན། བོད་རྒྱའི་གནད་དོན་འདི་དུས་རབས་ཕྱེད་ལྷག་ལ་ཐག་མ་ཆོད་པར་ལྷག་ཡོད་པར་མ་ཟད་མཐར་གཏུག་ན་གནད་དོན་འདི་མི་རིགས་གཉིས་ཀྱི་གནད་དོན་རེད། གལ་སྲིད་ཁྱེད་ཀྱི་ཐུགས་འདོད་ལྟར་རྒྱ་སྐད་ཤེས་པའི་བཀའ་ཁྲི་ཞིག་བྱུང་ན་འང་དེས་གུང་ཁྲན་ཏང་མགོ་མཇུག་སློག་ཐུབ་བམ། གལ་སྲིད་མགོ་རྟིང་སློག་ཐུབ་པའི་དབང་དུ་བཏང་ན་དེ་རྗེས་རྒྱ་རིགས་མི་རིགས་ཀྱིས་ང་ཚོར་སྙིང་རྗེ་ནས་རང་དབང་སྤྲོད་སྲིད་དམ། གུང་ཁྲན་ཏང་མགོ་རྟིང་སློག་རྗེས་རྒྱ་མི་རིགས་བྱང་ཆུབ་སེམས་དཔར་གྱུར་འགྲོ་བ་ཨེ་རེད། ཡང་ན་ད་ལྟའི་བར་དུ་ང་ཚོས་བོད་རྒྱའི་གནད་དོན་ཐག་མ་ཆོད་པར་ལྷག་པ་དེ་༧གོང་ས་མཆོག་གིས་རྒྱ་སྐད་མ་ཤེས་པས་རེད་དམ། ད་དུང་དྲི་བ་ཞིག་ཡོད་པ་ནི་རྒྱ་ནག་དམངས་གཙོར་གྱུར་ན་བོད་ལ་རང་དབང་འཐོབ་པར་ཕན་ཐོག་ཅི་ཞིག་ཡོད། སྐུ་ཞབས་གླེན་རྒན་ངས་ཁྱེད་ལ་ལྷག་བསམ་མི་འདུག་ཅེས་བརྗོད་ཀྱིན་མེད་མོད། བསམ་བློ་ལས་སླ་བོ་ཞིག་བཏང་ནས་རང་མགོ་རང་གིས་མ་གཡོགས་ན་ཨེ་ཆོག་གི། ཁ་དྲོ་བཀྲ་ཤིས་མུ་མཐུད་ནས་བཀའ་ཁྲིའི་སྐོར་ལ་བསམ་ཚུལ་གསུངས་རོགས། །
ང་ཚོས་བརྒྱ་བཤད་སྟོང་ལབ་ཅི་ལྟར་བྱས་ཀྱང་མ་འོངས་པའི་བཀའ་ཁྲིར་ངེས་པར་དུ་ཚང་དགོས་པའི་ཁྱད་ཆོས་གཅིག་ཡོད་པ་ནི་རྒྱ་ནག་གི་རྒྱལ་རབས་ལོ་རྒྱུས་ལ་རྒྱུས་མངའ་ཡོད་པ་ཞིག་དང་རྒྱ་ནག་དམར་པོའི་གཞུང་ལ་ཆ་རྒྱུས་ཡོད་པ་ཞིག་དགོས་སྙམ། གང་ཞེ་ན་ང་ཚོའི་ཁ་གཏད་ས་དེ་རྒྱ་ནག་ཡིན་པ་དང་མ་འོངས་བཀའ་ཁྲིའི་ལས་འགན་ཀྱང་བོད་རྒྱ་ལག་ནས་བཅིང་གྲོལ་བྱ་རྒྱུ་དེ་ཁོ་ན་རེད། དེ་ཕྱིར་ཁ་གཏོད་ཡུལ་རྒྱ་ནག་ལ་རྒྱུས་མངའ་མེད་པར་རྡ་ས་ནས་ངར་སྐད་རྫ་རྡོ་ལྟར་སྒྲིག་ན་མུན་ནག་མདའ་འཕེན་གྱི་རྗེས་སུ་འགྲོ་བ་ལས་ཕན་ཐོག་ཅི་ཡང་འབྱུང་མི་སྲིད། སྤྱིར་དབྱིན་ཅིའི་སྐད་ཡིག་ཤེས་མིན་དང་རྒྱ་ཡིག་རྒྱ་སྐད་ཤེས་མིན་ནི་བཀའ་ཁྲི་ལ་འཛོམས་ན་ཕུན་སུམ་ཚོགས་པའི་ཡན་ལག་ཡིན་མོད། ངེས་པར་དུ་ཚང་དགོས་པའི་ཁྱད་ཆོས་ནི་གཏན་ནས་མིན། དེ་ཕྱིར་ངས་བཙན་བྱོལ་བོད་མི་སྤར་མོ་གང་པོའི་ནང་དུ་ཡུན་རིང་བསམ་གཞིགས་བྱས་ནས་རྙེད་པའི་མ་འོངས་བཀའ་ཁྲིའི་འོས་གཞི་ནི་རྒྱ་ནག་གི་གནའ་དེང་ལོ་རྒྱུས་ལ་མཁྱེན་རྒྱ་ཡངས་པའི་སྐུ་ཞབས་ཚེ་རྒྱམ་ལགས་ཡིན།
སྐུ་ཞབས་ལུང་རིགས་ལགས་བཀའ་ཁྲིར་བསྐོར་ལ་བསམ་ཚུལ་འབྲེལ་བཤད་གནང་བ་ཐུགས་རྗེ་ཆེ། སྐུ་ཉིད་ནས་བཀྲས་མཐོང་བསྟནའཛིན་རྣམ་རྒྱལ་གྱི་ལོ་རྒྱུས་གང་ཐུབ་འདིར་བྲིས་ནས་བཀོད་ཐུབ་ན་བདག་ལྟ་བུ་གང་ཟག་མང་པོ་ཞིག་ལ་ཕེན་ཐོག་ཡོད།
ཨ་རིག་ལགས། མུ་མཐུད་དུ་གླེང་རོགས། རྒྱ་སྐད་ཤེས་པ་ཙམ་གྱིས་རྒྱ་ཡི་དོན་དག་སེལ་ཐུབ་ཀྱིན་མེད། དྲུག་བཞིའི་དོན་རྐྱེན་ཁྲོད་ཀྱི་སློབ་ཕྲུག་ཚོར་བསམ་བློ་གཏོང་རོགས། ལས་སླ་བོ་ཡོད་པ་མ་རེད། ད་སྐབས་བོད་དོན་ལ་དམིགས་བསལ་གྱི་དོ་སྣང་ཞིག་ཡོད་པ་དང་། ང་ཚོར་ད་དུང་འཚོ་གནས་ཀྱི་མདུན་ལམ་ཞིག་ཡོད་པ་འདིའི་གཞི་རྩ་ངེས་པར་དུ་བརླག་མི་ཉན་ཡཱ།
ངས་ཤེས་བྱུང་ལུང་རིག་རྒྱལ་ཐུགས་རྗེ་ཆེ། དྲང་མོ་བཤད་ན་ང་ལ་དགོས་པ་ནི་བོད་མི་མང་སྤྱི་མཐུས་དང་བཀའ་བློན་གཙོའི་གཞུང་ཞབས་མི་པ་སུམ་ཆའི་གཉིས་ཀྱིས་རྒྱའི་སྐད་ཡིག་ཤེས་དགོས་པ་དེ་ཡིན་ལ་ང་ཚོར་མེད་པའང་འདི་ཡིན། གཅིག་བྱས་ན་ཕྱི་སྡོད་བོད་མི་ཕལ་ཆེ་བའི་འདི་ཁས་ལེན་རྒྱུ་མ་རེད། གཞན་རྒྱལ་བའི་སྐུ་ཚབ་ཡིན་མ་ཡིན་མེད་ལ་སྐུ་སྤུན་ཡིན་མ་ཡིན་ཡང་མེད། ངས་བློ་ངོར་བཀའ་ཁྲི་འོས་པའི་མི་མང་པོ་ཞིག་ཡོད་ཀྱང་བཀའ་ཁྲི་འཇོན་པའི་མི་ཉུང་ཉུང་ཞིག་ཀྱང་མེད།
ཨ་རིག་གི་སྐད་ཆ་འདི་ལ་རིན་ཐང་འདུག འོན་ཀྱང་། སྐུ་ཉིད་ནས་བཀའ་ཁྲིར་སུ་འདེམ་འདོད་པ་ཡིན། ཨ་ཀྱཱ་ཚང་། དེ་མིན་ན་སྐུ་སྒེར་དྲུང་ཆེ་རྔ་བ་ཚེ་རྒྱམ་ལགས་རེད། ཨ་རིག་ལགས། ཁོང་རྣམ་པ་གཉིས་དབུ་ཁྲིད་ལ་མ་འོས་པ་མ་རེད། བོད་མི་རིགས་ཀྱིས་ཡིད་ཆེས་མེད་པ་ནི་དེ་བས་ཀྱང་མ་རེད། གཙོ་བོ་བོད་དོན་འདི་རྒྱ་ནག་མཉམ་དུ་ཁ་ཐུག་ཏུ་བཤད་ན་ཐག་མི་ཆོད་པའི་གནད་དོན་དེ་ཡིན། རྒྱ་རིགས་མི་དམངས་མཉམ་དུ་འབྲེལ་འདྲིས་བྱེད་ན་བཀའ་ཁྲི་ཁོང་གིས་རྒྱ་སྐད་ཤེས་དགོས་པའི་ངེས་པ་མི་འདུག ཁོང་ལ་ཕྱག་རོགས་བདུན་ཡོད་ཆོག་པའི་གྲས་ཀྱི་གཅིག་ནི་རྒྱ་ནག་གི་མི་དམངས་ལ་འབྲེལ་བ་བྱ་ཐུབ་མཁན་ཞིག་ཡིན་ན་འགྲིག་གི་འདུག་སྙམ།
ང་ཚོས་ཤེས་དགོས་པ་ཞིག་ལ་འབྱུང་འགྱུར་གྱི་བཀའ་ཁྲི་འདི་དབྱིན་བྱང་ཆུད་ན་རབ་དང་རྒྱ་སྐད་ངེས་པར་ཏུ་བྱང་ཆུབ་པ་ཞིག་དགོས་བོད་རྒྱའི་གནད་དོན་འདི་བོད་རྒྱ་མཉམ་འབྲེལ་གྱིས་སེལ་དགོས་པ་གཅིག་ཡིན་པ་ལས་རྒྱལ་སྤྱིའི་ལྡིང་ཆ་བེད་སྤྱད་དེ་སེལ་ཐུབ་པ་ཞིག་གཏན་ནས་མིན། རྒྱལ་སྤྱིས་གནོན་ཤུགས་མ་བཟོད་པར་བོད་ལ་རང་དབང་སྤྲོད་མི་སྲིད་ལ་གུང་ཁྲན་ཏང་ལ་སྙིང་རྗེ་སྐྱེས་ནས་བོད་ལ་རང་དབང་སྤྲོད་མི་སྲིད་། ཐབས་ལམ་ཉག་གཅིག་ནི་གཞི་རིམ་རྒྱ་རིགས་མི་དམངས་དང་མཉམ་འབྲེལ་བྱས་སྟེ་གུང་ཁྲན་ཏང་མགོ་གཏིང་སློག་ཐབས་བྱེད་རྒྱུ་དེ་རེད། ང་ཚོའི་གནད་ཡོད་མི་སྣ་དག་གིས་རྒྱ་སྐད་མ་ཤེས་ན་རྒྱ་ནག་གིས་བཤད་པ་ལྟར་ཏ་ལའི་བླ་མ་དང་ཉེ་བོ་ཡོད་པའི་བོད་མི་འགའ་ཞིག་ཐུག་འཕྲད་བྱུང་ཞེས་པ་དེ་་ལས་མ་འདས།
གངས་རིའི་གླིང་བུ་ལགས། ཐོག་མ་དེར་རྒྱ་ནག་དང་རྒྱ་གཞུང་གི་སྲིད་བྱུས་ནི་ཧ་ལས་པའི་ལྐོག་གྱུར་དེ་འདྲ་མ་རེད་འདོད། གཙོ་བོ་ནི་ང་ཚོས་ཤེས་ནའང་བཅོས་ཐབས་དང་བྱེད་ཐབས་མེད་པ་དེ་རེད། དེའི་ཁར་རྒྱ་ནག་ལ་དམིགས་བསལ་གྱིས་རྒྱུས་མངའ་ཡོད་མཁན་ཞིག་འཚོལ་གི་ཡིན་ལབ་ན། དེ་འདྲ་ཞིག་བརྙེད་ཁག་པོ་རེད། ཐ་ན་སྐུའི་གཅེན་པོ་རྒྱལ་ལོ་དོན་གྲུབ་མཆོག་ཀྱང་ཨུ་ཐུག་བསྡད་པ་འདྲ་བོ་རེད། རྒྱ་སྐད་ཤེས་མཁན་ཡོད་ཀྱང་རྒྱ་ནག་གིས་སྐད་ཆ་བཤད་ཀྱིན་མེད་སྐབས་ཤིག་ལ་རྒྱ་སྐད་ཤེས་མཁན་ཞིག་གིས་ཀྱང་ཕན་ཐོགས་གི་མ་རེད། ངའི་བསམ་ཚུལ་ཡིན་ན་སྐབས་རྗེས་མའི་བཀའ་ཁྲི་དེ་ནི་ངེས་པར་དུ་དབྱིན་སྐད་དང་བོད་སྐད་ལ་བྱང་ཆ་ལྡན་པ་ཞིག་དགོས་པ་རེད། དེའི་རྒྱུ་མཚན་ནི་བོད་ཀྱི་རྩ་དོན་དེ་བོད་མི་ཚོས་བསྒྲུབ་དགོས་ཀྱང་། ང་ཚོ་རྒྱལ་སྤྱིའི་སྤྱི་ཚོགས་ལས་ཁ་བྲལ་ནས་འགྲོ་ས་མེད་ལ། ང་ཚོའི་འཐབ་རྩོད་ཀྱི་གོ་ར་དེའང་རྒྱལ་སྤྱིའི་སྡིངས་ཆ་འདི་ཡིན་དགོས། དེ་བས་དབྱིན་སྐད་ལ་བྱང་ཆ་ལྡན་པ་ཞིག་དགོས་པ་ནི་དངོས་ཡོད་གནས་ཚུལ་རེད།
རྩོམ་སྒྲིག་པ་ལགས།་་་ཁྱེད་ཀྱིས་འོས་གཞི་བཏོན་པ་ལ་ཡི་རངས་བྱེད།་་་་་ངས་ལྟོས་ན་ལས་ཐོག་སྐབས་སུ་ནུས་བ་བཏོན་མ་ཐུབ་མཁན་ཞིག་བསྐྱར་དུ་འདེམས་ན་ནུས་བ་ཇི་འདྲ་ཞིག་འདོན་ཐུབ་མིན་ལ་ང་ཚོའི་བསམ་གཞིག་བྱེད་དགོས།་་་ཡང་གཅིག་བཤད་ན་ང་ཚོའི་རྩོད་སྒྲུབ་བྱས་ས་དང་ཁ་གཏད་རྒྱ་གཞུང་ཡིན་པ་ཡིན་ཚང་བཀའ་ཁྲི་འོས་ཆོས་ལ་ངེས་བར་དུ་རྒྱ་གཞུང་གི་སྲིད་ཇུས་གནད་འགག་དང་འགྲོ་སྟངས་ཡག་པོ་ཞིག་མཁྱེན་རྟོགས་དགོས་རྒྱུ་གལ་ཆེན་ཞིག་ཏུ་མཐོང་།
དེ་འདྲ་གསུང་ག་ལ་དགོས། དྲ་ཐོག་འདིར་འཁོར་མཁན་སུ་ཡིན་རུང་གཙོ་བོ་རང་རང་གི་ལྟ་ཚུལ་རེ་འདོན་རྒྱུ་དེ་རེད། མི་ཕལ་ཆེ་བ་ཞིག་གིས་དེང་སྐབས་མཆན་འདེབས་དུས་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུས་ནས་བསྡད་ཡོད་པ་རེད། དེའང་མི་ཕ་རོལ་བོ་དེར་རྒྱབ་སྐྱོར་དང་སེམས་སྐུལ་དུ་འགྱུར་གི་རེད། འོན་ཀྱང་། རང་རང་གི་ལྟ་ཚུལ་དྲང་པོར་འདོན་རྒྱུའི་གཤིས་ཀ་ཞིག་འགྲུབ་རྒྱུ་ནི་དེ་བས་ཀྱང་གལ་ཆེ་བར་འདོད། འཐད་ཕྱོགས་དང་དགག་ཕྱོགས་གང་ཡིན་རུང་དེ་མི་ཞིག་གི་རྣམ་དཔྱོད་དང་ཡིད་ཆེས་ལས་བྱུང་བའི་ལྟ་ཚུལ་ཞིག་ཡིན་སྟབས་རང་བཞིན་གྱིས་ཕ་རོལ་བོ་དེར་རྒྱབ་སྐྱོར་དུ་འགྱུར་སྲིད་པ་རེད།
དཀའ་དྲིན་བླ་མེད་དུ་ཆེ་ཞུ།།
དཀོན་མཆོག་དར་རྒྱས་ལགས་སུ། ངའི་འོས་གཞིའི་ཐོག་ཁྱེད་རང་འཐད་པ་མེད་ན་དེ་ཁྱོད་ཀྱི་རང་དབང་རེད། རང་རང་གི་འོས་ཤོག་གི་ཐོབ་ཐང་ཡང་གཙང་མ་རེ་ཡོད་པ་རེད། དེ་བས་རང་རང་གི་འོས་གཞིའི་རིགས་བཙལ་ནས་དེ་ལ་གྲ་སྒྲིག་བྱ་དགོས་པ་རེད། འདི་ནས་དོན་མེད་མི་ལ་ཁ་གཏོང་བ་དང་གཞི་མེད་ཀྱི་སྒྲོ་སྐུར་བྱས་ན་ཡག་པོ་མ་རེད། དེ་བས་རྗེས་ཕྱོགས་ཁྱོད་ཀྱིས་འོས་གཞི་འཁྱེར་ཤོག་དང་ངས་ནི་འཐད་པ་མེད་ཀྱང་དེར་གཞི་མེད་ཀྱི་སྐྱོན་འཛུགས་མི་བྱེད། འདི་ནི་ཁྱོད་དང་ཁྱོད་ཀྱི་འོས་མིའི་གཞི་རྩའི་ཐོབ་ཐང་དང་ཁེ་དབང་། མཚན་མཐོང་བཅས་ལ་བརྩི་བཀུར་བྱ་བའི་ཆེད་དུ་ཡིན།
ཆོལ་གསུམ་གཅིག་གྱུར་གྱི་བོད་རང་བཙན་ཞིག་བྱུང་ནའང་རང་ཉིད་ཕ་ཡུལ་ལོག་རྩིས་རྩ་བ་ནས་མེད་པའི་རྒྱལ་ལོ་དོན་འགྲུབ་དང་། བོད་རང་ལྗོངས་ལྗོངས་ཤིག་བྱུང་ན་དེ་ལྷག་མི་དགོས་པའི་དམིགས་ཡུལ་ངན་པ་ཅན་རང་སྐྱོང་ལྗོངས་ཀྱི་ཁོངས་སུ་ཡིན་པའི་བཀྲས་མཐོང་བསྟན་རྣམ་རྒྱལ་དང་། བསོད་ནམས་སྟོབས་རྒྱས་ཅན་གྱི་ཕྱོགས་གཏོགས་ཡིད་འགུ་ཐབས་ལ་འཇུག་སྟེ་རེ་སྟོང་ལག་བཟེད་ཀྱིས་རང་མཐུ་རང་འགྲུབ་ཟེར་བའི་དཔེ་ལྟར་རང་གི་ཕ་ཡུལ་འཇོལ་ས་ཁུལ་རྒྱང་རིང་དུ་དོར། ང་བསོད་དེ་དམན་པ་ཞིག་ལ་སྐྱེ་ས་མདོ་སྟོད་རེད། ཡིན་ནའང་། སྟབས་ལེགས་པ་ཞིག་འཚར་ལོང་བྱེད་ས་དབུས་གཙང་རེད་ཅེས་ཟེར་མཁན་ཟམ་གདོང་བཅས་དཔུང་སྒྲིོག་པས་ནས་ངོ་ལྐོག་བྱ་སྤྱོད་དེ་རིགས་སྐྱར་དུ་རོ་ལངས་རྒྱག་པའི་དུས་ལ་སླེབས་རེད། ད་དུང་བཀྲས་མཐོང་བསྟན་འཛིན་རྣམ་རྒྱལ་ལ་འབུམ་ཕྲག་ཁ་ཤས།
ཕྲེང་ཟུར་དོན་གྲུབ་ཆོས་འཕེལ་ལགས། རྒྱབ་སྐྱོར་གནང་བ་ཡག་བྱུང་། ཁོང་གིས་མཛད་འགན་བཞེས་མིན་ནི་གལ་ཆེ་ཤོས་རེད། བཀའ་ཁྲི་སྐབས་སྔ་མའི་འོས་ཁོངས་སུ་ཞུགས་རྒྱུར་འབྲེལ་ཡོད་མི་སྣ་མང་པོ་ཞིག་གིས་ཁོང་ལ་འབོད་སྐུལ་ཞུས་ཀྱང་ཞལ་བཞེས་གནང་མི་འདུག འོན་ཀྱང་། ཉེ་ལམ་གོ་བ་ལྟར་ན། ཁོང་གིས་ཐད་ཀར་དུ་བཀའ་ཁྲིའི་འོས་ཁོངས་སུ་བཞུགས་པར་ཞལ་བཞེས་གནང་མེད་ཀྱང་། ཁོང་གིས་བསམ་བློ་གཏོང་གི་ཡིན་རབས་ཤིག་གསུངས་འདུག ང་ལ་བཤད་པ་ལྟར་ན། ཁོང་གིས་བསམ་བློར་འགྱུར་བ་བཏང་འདུག་ཟེར། འདིའང་གནས་ཚུལ་ལེགས་པོ་ཞིག་དྲན་བསྡད་ཡོད།
དྲ་གྲོགས་སྤུན་ཟླ་རྣམས་ལ། བཀའ་ཁྲིའི་འོས་དམིགས་སྐོར་གླེང་མོལ་མང་ཙམ་གནང་མུས་དེ་སྤྱི་ཚོགས་ཞབས་ཞུ་ཚད་ལྡན་ཞིག་ཡིན། བཀའ་ཁྲི་ཟུར་པ་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་ཞབས་འོག་ལོ་མང་ལས་ཀ་བྱས་པའི་ཉམས་མྱོང་ཡོད་མཁན་ཞིག་ཡིན་སྟབས་བཀའ་ཁྲིའི་མཛད་འགན་བཞེས་མིན་ཇི་ལྟར་ཡང་འོས་དང་མི་འོས་ཐོག་ལ་གླེང་སྐབས་འོས་ངེས་ཅན་ཞིག་ཡིན་བསམ་གྱི་ཡོད། ཕྱི་རྒྱལ་ལ་རྒྱུན་རིང་བཞུགས་པར་བརྟེན་བཙན་བྱོལ་སྤྱི་ཚོགས་ཀྱི་བསམ་བློ་དང་མི་རན་པ་དེ་འདྲ་ཡོང་སྲིད། ཁཽང་གི་བཙན་བྱོལ་སྤྱི་ཚོགས་ལ་ཕན་རླབས་ཅན་གྱི་ཕྱག་ལས་མང་པོ་གནང་ཡོད།
ལུང་རིགས་རྒྱལ་གྱིས་འདོད་པའི་བཀའ་ཁྲིའི་འོས་གཞི་དེ་ལ་རྒྱབ་སྐྱོར་ཡོད། སྔོན་ཆད་ད་ལྟའི་བཀའ་ཁྲི་འདི་ཡང་བསྐྱར་བཀའ་ཁྲིར་འོས་འདེམས་མ་བྱས་པའི་སྔོན་དེར་ང་རང་གིས་ཀྱང་བཀའ་བློན་ཁྲི་པ་ལས་འཕྲོས་པའི་རྩོམ་ཐུང་ཞིག་བོད་ཀྱི་དུས་བབ་ནང་བཀོད་མྱོང་བ་དེའི་ནང་དུ་བཀའ་ཁྲིའི་འོས་གཞི་ལ་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་བཞག་ཡོད། དྲ་གྲོགས་ཚོས་ཁོང་གི་ལོ་རྒྱུས་ཤེས་རྟོགས་ཡོང་འདོད་ན་༼ བོད་གནས་ལག་དེབ་༽ཅེས་པར་གཟིགས་ཀྱང་འགྲིག་བསམ། མ་གཞི་ནས་མི་སྐྱོན་མེད་ཅིག་ང་ཚོས་གང་དུ་ཡང་རྙེད་མི་སྲིད་པས། སྐྱོན་སྣ་རེ་ཙམ་ལ་མུ་མཐུད་དུ་འཇུས་ནས་བསྡད་ན་འབྱུང་འགྱུར་གྱི་བཀའ་ཁྲིའི་འོས་གཞི་ནི་གང་ཞིག་ནས་འཚོལ་དགོས་པ་ཡིན་ནམ་བསམ་ཡོང་།
རི་བོང་ལགས། ངས་གཙོ་བོ་ཁོང་གི་སྲིད་དོན་གྱི་ལངས་ཕྱོགས་དེ་གལ་ཆེར་བཟུང་ཡོད། དེ་བཞིན་བོད་མི་སུ་ཞིག་བཀའ་ཁྲིར་ཕེབས་ཡང་ཁོང་ཚོའི་སྲིད་བྱུས་ནི་ད་ལྟ་བཞིན། འཚེ་བ་མེད་པ་དང་། དྲང་བདེན། ཕྱི་གསལ་ནང་གསལ་བཅས་ལ་གཞི་འཛིན་པ་ནི་གཅིག་གྱུར་ཡིན་པར་འདོད། ཁོང་གི་དགུང་ལོའི་བབ་ཀྱང་མི་རབས་གསར་རྙིང་བར་གྱི་མཐུད་མཚམས་ལྟ་བུ་ཞིག་ཏུ་ཡོད་པར་འདོད།
ཨ་རིག་ལགས། ཁོང་ཉིད་གངས་སྐྱིད་ལ་ཐང་ཆད་དོན་ནི་སྔོན་ཆད་ཁོང་བཀའ་ཁྲི་ཡིན་སྐབས་འབུམ་དགུ་བ་ཞེས་པའི་དཔལ་འབྱོར་གྱི་བཤད་ཉེས་ཤིག་འཁོར་བ་དེ་ཡིན་པ་འདྲ། འོན་ཀྱང་། འདི་ལ་བདེན་པ་ཁུངས་སྐྱེལ་འདྲ་བྱུང་མེད་ཚོད་ཡིན། མ་གཞི་ནས་ང་ཚོའི་སྤྱི་ཚོགས་ནང་ནས་མི་ཞིག་གི་རྐང་བ་ནས་འཐེན་དགོས་ན། རྒྱ་དམར་ནག་གི་སོ་བ་དང་། རྒྱལ་བ་རིན་པོ་ཆེའི་བཀའ་དང་འགལ་ཚུལ། དེ་མིན་ན་དཔལ་འབྱོར་གྱི་རུལ་སུངས་ཡོད་ལུགས་ཙམ་གླེང་གི་རེད། རྗེས་ཕྱོགས་བཤད་ཡམས་ཀྱི་རིགས་ལ་ང་ཚོའི་སུ་ཡིན་རུང་ཉམ་འཇོག་བྱ་དགོས་པར་འདོད་དོ།
གངས་སྐྱིད་ལ་ཡིད་ཐང་ཆད་པའི་མི་ཞིག་བཀའ་ཁྲིར་བསྐོས་ན་ཡག་པོ་རེད་ཟེར་བ་འདི་རྩེད་མཚར་མིན་ན་རྒྱུ་མཚན་ཞིབ་ཕྲ་གསུང་རོགས།
རྩོམ་སྒྲིག་པ་ལགས། ཁྱེད་ཀྱིས་བཀའ་ཁྲིའི་འོས་གཞི་བཏོན་པ་ལ་ཐུགས་རྗེ་ཆེ་ཞུས་པ་ཡིན། འོས་པའི་འོས་ཆོས་དང་ཇི་ལྟར་འོས་ཚུལ་སོགས་ཁ་གསལ་འབྲི་དགོས་པ་ལས། བཀའ་ཁྲིའི་འོས་གཞི་རྙེད་སོང་ངས་ཁོ་ལྡུག་གི་ཡིན་ཟེར་བ་ཙམ་གྱིས་མི་ཕན་ལ།༼གང་ལྟར་ང་ནི་ཁོང་གི་སྲིད་དོན་གྱི་མིག་རྒྱང་དང་། རྒྱབ་ལྗོངས། ཤེས་འཇོན། དགོང་ལོ་བཅས་ཕྱོགས་གང་ཐད་ནས་༽ཞེས་འདི་འདྲའི་རགས་རིམ་ཞིག་གིས་ཀྱང་མི་ཆོག་པས་རྒྱུ་མཚན་གསལ་བོ་བྲིས་ན་ཡག་པོ་འདུག ཉམས་མྱོང་མེད་མཁན་ཚོ་ལའང་བློ་སྐྱེད་གསར་བ་རེ་རེག་ངེས།
ལུང་རིགས་ལགས།
གནས་ལུགས་དང་རྒྱུ་མཚན་གྱི་རྒྱབ་ལྗོངས་གླེང་སྟེ། བཀའ་ཁྲིའི་འོས་གཞི་བཏོན་པར་རྗེས་སུ་ཡི་རངས་ཞུ།
ད་དུང་ང་ཚོས་འཚོལ་དགོས། དོན་དམ་གྱི་བཀའ་བློན་ཞིག་འཚོལ་དགོས།
གཞིས་བྱེས་གཉིས་ཀྱི་བདེ་སྡུག་དང་། འབྱུང་འགྱུར་མི་རིགས་འདི་དང་མི་རབས་འདིའི་སླད། ད་དུང་གནད་དོན་མང་པོ་ཞིག་གི་འགན་ཁུར་ཐུབ་པའི་བཀའ་ཁྲི་ངོ་མ་ཞིག་འཚོལ་དགོས།།