ཟླ་འདིའི་ཕྱི་ཚེས་ ༡༡ ཉིན་ཐའེ་ཝན་ཧྲན་ལེན་རོལ་དབྱངས་ཚོགས་པའི་གོ་སྒྲིག་འོག་ཐའེ་པེ་རུ་བོད་མིའི་རང་དབང་སྐོར་གྱི་རོལ་དབྱངས་འདུ་ཚོགས་ཤིག་སྐོང་འཆར་ཡོད་འདུག་ལ། འདི་ནི་ཧྤི་རེ་ཌེ་ Freddy གཙོས་རོལ་དབྱངས་ཚོགས་པ་འདིའི་ཐའེ་ཝན་གཞོན་སྐྱེས་རྣམས་ཀྱི་ཆབ་སྲིད་དང་བོད་དོན་ཐད་ཐའེ་ཝན་གྱི་གཞོན་སྐྱེས་རྣམས་ལ་འབོད་སྐུལ་བྱ་ཆེད་ཡིན་འདུག
ཐེངས་འདིའི་རོལ་དབྱངས་འདུ་འཛོམས་ཐད་ཚོགས་པ་འདིའི་སྣེ་འཁྲིད་མཁན་ Freddy ཡིས་རང་དབང་ཚགས་པར་གྱི་བཅར་འདྲིའི་སྐབས་བརྗོད་དོན། ད་ལྟའི་དུས་འདིར་ཐའེ་ཝན་ལ་ཆེས་མཁོ་བ་ནི་གཞོན་སྐྱེས་ཚོ་ལས་འགུལ་གང་རུང་ལ་འཛུལ་ཞུགས་བྱ་རྒྱུ་དེ་ཡིན་སྟབས། ང་ཚོ་རོལ་དབྱངས་ཚོགས་པའི་ངོས་ནས་གཞོན་སྐྱེས་ཚོས་ཆབ་སྲིད་ལ་ཡིད་ཆེས་དང་བློ་གཏད་བྱ་ཆེད་དང་། སྤྱི་ཚོགས་ཐོག་གཞོན་སྐྱེས་ཚོ་དགོས་མཁོ་ཇི་འདྲ་ཆེ་མིན་ཤེས་རྟོགས་བྱ་ཆེད་འདུ་འཛོམས་འདི་གོ་སྒྲིག་བྱེད་ཀྱིན་ཡོད། ཕྱི་ཚེས་ ༡༡ ཉིན་གྱི་བོད་རང་དབང་རོལ་དབྱངས་འདུ་འཛོམས་འདི་ནི་ཐའེ་ཝན་གྱི་གཞོན་སྐྱེས་རྣམས་ཀྱི་ཆབ་སྲིད་ཀྱི་འདུ་འཛོམས་ཆེ་ཤོས་ཤིག་ཏུ་འགྱུར་བའི་རེ་བ་བྱེད་བཞིན་ཡོད། ཅེས་བཤད་འདུག།
ཡང་ཁོང་གིས། ཐའེ་ཝན་མི་མང་གིས་བོད་ཀྱི་རྩ་དོན་ལ་ཐུགས་ཁུར་དང་རྒྱབ་སྐྱོར་བྱས་པ་ཡིན་ན། ཐའེ་ཝན་རྒྱལ་ཁབ་འདི་ཉིད་རྒྱ་ནག་དང་གཅིག་མཚུངས་མིན་པ་དང་། རང་བཙན་གྱི་རྒྱལ་ཁབ་ཅིག་ཡིན་པ་ལས་རྒྱ་ནག་གི་ཆ་ཤས་མིན་པ་འཛམ་གླིང་ལ་གསལ་བཤད་བྱ་ཐུབ། འདི་ནི་ང་ཚོའི་འདུ་འཛོམས་ཀྱི་ཐོག་མའི་དམིགས་ཡུལ་ཡིན་སྟབས། ང་ཚོས་ངེས་པར་དུ་འཛམ་གླིང་མི་མང་ལ་གནད་དོན་འདི་གསལ་བོ་བཟོ་དགོས། དེ་བཞིན། ཕྱི་ཚེས་ ༡༡ ཉིན་གྱི་དགོང་མོའི་ཆུ་ཚོད་ ༦ པའི་སྟེང་འདུ་འཛོམས་དེར་འཛོམས་པའི་མི་མང་ཡོངས་ཀྱིས་བོད་རང་བཙན་སྐད་འབོད་བྱ་རྒྱུ་ཡིན། ངས་ཐེངས་འདིའི་འདུ་འཛོམས་འདི་ང་ཚོའི་རེ་བ་གསར་བ་ཞིག་དང་སྟོབས་ཤུགས་གསར་བ་ཞིག་ཏུ་ངོས་འཛིན་བྱེད་བཞིན་ཡོད་ལ། འཛམ་གླིང་མི་མང་གིས་ཐའེ་ཝན་གྱིས་རིན་ཐང་གི་སྟོབས་ཤུགས་ཤིག་ལ་རྒྱུན་འཁྱོངས་བྱེད་བཞིན་པ་མཁྱེན་པར་བྱེད་ངེས་ཡིན། ང་ཚོས་བོད་ཀྱི་གནད་དོན་གཙོས་འཛམ་གླིང་སྟེང་གི་སྡུག་སྦྱོང་མནར་གཅོད་མྱངས་དང་མྱོང་བཞིན་པ་ཡོངས་དང་། དེ་མིན་འཛམ་གླིང་སྟེང་འགྲོ་བ་མིའི་ཐོབ་ཐང་དང་རང་དབང་དོན་གཉེར་བ་ཡོངས་ལ་ཐའེ་ཝན་མི་མང་གིས་ཐུགས་འཁུར་དང་རྒྱབ་སྐྱོར་བྱ་ཆེད་འབོད་སྐུལ་ཞུ་རྒྱུ་ཡིན། ཅེས་བརྗོད་ཡོད།
ཐའེ་ཝན་ཧྲན་ལེན་རོལ་དབྱངས་ཚོགས་པ་ནི། དུས་ཡུན་རིང་བོར་བོད་དོན་ཐོག་རྒྱབ་སྐྱོར་གནང་བཞིན་པའི་རོལ་དབྱངས་ཚོགས་པ་ཞིག་ཡིན་ལ། ལོ་སྔོན་མར་ཚོགས་པ་འདིའི་སྣེ་འཁྲིད་པ་ Freddy གཙོས་ཚོགས་མི་བཞི་ངྷ་སར་འབྱོར་ཏེ་༧གོང་ས་མཆོག་ལ་མཇལ་ཁ་ཞུས་རྗེས་ལོ་འདིའི་སྤྱི་ཟླ་ ༣ པའི་ནང་ཐའེ་པེ་རུ་གཞི་རྒྱ་ཆེ་བའི་རོལ་དབྱངས་འདུ་འཛོམས་ཤིག་གནང་སྟེ། ཐའེ་ཝན་ནང་བོད་དོན་ཁྱབ་བསྒྲགས་ཤུགས་ཆེར་སྤེལ་ཡོད་པ་རེད།
![Uyghur Scholar Rahile Dawut [Photo: Uyghur Human Rights Project]](https://tibettimes.net/wp-content/uploads/2023/09/Uyghur-Scholar-Rahile-Dawut-Photo-Uyghur-Human-Rights-Project-360x180.jpg)
དེང་སང་རང་དབང་ཞེས་པའི་གོ་དོན་དང་ངོས་འཛིན་ཅི་ལ་བྱེད་དགཽས་སམ།རོལ་དབྱངས་ཤིག་བཏང་ནའང་རང་དབང་དང་།མ་འོངས་པར་ཇ་ཞིག་འཐུང་ནའང་རང་དབང་གི་དོན་དུ་གཅིག་བྱས་ན་འགྱུར་སྲིད།
ཐེ་ཝན་མི་དམངས་དང་ལྷག་པར་ཕོ་རས་ཌི་རོལ་དབྱངས་ཚོགས་པས་བོད་ཀྱི་རྩ་དོན་ཆེད་དུ་མུ་འཐུད་རྒྱབ་སྐྱོར་གནང་བར་ངས་རྗེས་སུ་ཡི་རངས་དང་ཐུགས་རྗེ་ཆེ་ཞུ།
ད་དུང་བོད་དང་། ཡུ་གུར་སོགས་གྲངས་ཉུང་མི་རིགས་ཙམ་མ་ཟད་རྒྱ་ནག་མི་དམངས་ལའང་ངེས་པར་དུ་རང་དབང་དགོས། རང་དབང་ནི་འགྲོ་བ་མིའི་ལྷན་སྐྱེས་སུ་མངའ་བའི་ཐོབ་ཐང་དང་། རང་བྱུང་གི་ཁམས་ཆེན་པོའི་ནང་གཤིས་སུ་གྲུབ་པའི་བདེན་པའི་ཆོས་ཉིད་ཁོ་ན་ཡིན།།
ལས་འཆར་དེ་ནི་ཆབ་སྲིད་ཐོག་རང་གཞན་གཉིས་ཕན་གྱི་ལས་འགུལ་ཞིག་ཏུ་ངོས་འཛིན་བྱེད་ཆོག་སྙམ།