འཇོ་མདའ་ཁུལ་གྱི་ཛ་དྲག

སྐྱབས་ཆེ་དགོན་དུ་རྒྱལ་གཅེས་ཆོས་གཅེས་དང༌། ཏཱ་ལའི་ཁ་བྲལ་རིང་ལུགས་ལ་ངོ་རྒོལ་ཟེར་བའི་ལས་འགུལ་སྤེལ་མཁན་སྔ་རྗེས་ཐེངས་དགུ་ཙམ་ཕྱིན་ཀྱང་། དགེ་འདུན་པ་ཚོས་ངོས་ལེན་བྱས་མེད་ལ། དགེ་འདུན་པ་རྣམས་བྲོས་བྱོལ་དུ་ཕྱིན་ཏེ། ཟླ་བ་གཅིག་ལྷག་རིང་དགོན་མ་ལག་དང་བཅས་པ་སྟོང་པ་ཆགས་ཡོད་འདུག་ལ། དམག་མི་དང་ཉེན་རྟོག་མི་སྣས་མགྱོགས་མྱུར་ངང་དགེ་འདུན་པ་རྣམས་འཛོམ་དགོས་ཚུལ་དང་། གལ་ཏེ་མ་འཛོམས་ན་དགོན་པ་རྩ་མེད་གཏོང་རྒྱུ་ཡིན་པའི་ཉེན་བརྡ་ཡང་བཏང་ཡོད་འདུག

ཕྱི་ཟླ་ ༦ པའི་ཚེས་ ༢༧ ཉིན་སྐྱབས་ཆེ་དགོན་གྱི་ཆོས་སྡེའི་གཙོ་བོ་པདྨ་སྨད་པའི་གུང་ཁྲན་ཏང་ཡོན་གྱི་མིང་ཡོད་པའི་བོད་མི་འགྱུར་མེད་མགོན་པོ་དང༌། རྒྱ་ཚང་རྡོ་རྗེ་གཉིས་འཛིན་འཛིན་བཟུང་བྱས་ཏེ། སྐྱབས་ཆེ་དགོན་དུ་ཁྲིད་ཡོད་སྟབས་མི་དམངས་ལ་དངངས་འཚབ་སྐྱེས་ཏེ། མི་ ༢༧ ཙམ་གྱིས་གོང་གསལ་མི་གཉིས་པོ་གློད་གྲོལ་གཏོང་དགོས་པའི་རེ་འདུན་ཞུ་རུ་ཕྱིན་ཡང་། དམག་མི་ཚོས་དུག་རྫས་གཏོར་ཏེ་བོད་མི་རྣམས་མགོ་ཡུ་འཁོར་བ་དང༌། དྲན་པ་འཐོར་བ། མིག་གིས་མི་མཐོང་བ་བཟོས་རྗེས་ཉེས་རྡུང་ཚབས་ཆེན་བཏང་ཡོད་འདུག

ཐེངས་འདིའི་དོན་རྐྱེན་ཁྲོད་འཛིན་བཟུང་བྱས་པའི་མིང་ཤེས་པ་དག་ནི། ནོར་ལྷ་དང་མགོན་པོ་དར་རྒྱས། བུ་ལྷུག ཨ་འཇིག ཚུལ་ཁྲིམས། བསམ་འཕེལ་ནོར་བུ། བསོད་སྟོབས། རིས་ཆུང་ཉི་གྲགས། རིན་ཆེན་རྒྱལ་མཚན། འཇིགས་མེད་དབང་ཕྱུག བྱམས་པ། བྱང་ཆུབ་ཆོས་འཕེལ། ག་དགེ འགྱུར་མེད། དོན་འགའ། ཨོ་ཡོ་ཚེ་རིང༌། རྟ་པ་ཨ་འཇིག རྨུ་ཚ་ཚེ་བརྟན། ཨ་བརྟན། དབང་འདུས་ཕུན་ཚོགས། འཕྲིན་ལས། ཆོས་སྐྱོང་དབང་རྒྱལ་བཅས་ཡིན་པ་དང་། དེ་དག་གི་ནང་ནས་ནོར་ལྷ་དང༌། མགོན་པོ་དར་རྒྱས་གཉིས་ནག་ཉེས་ཆེ་ཤོས་དང༌། བྱེད་གཏེ་རུ་རྩིས་ཏེ་འཇོ་མདའ་རྫོང་དུ་བཙན་འཁྲིད་བྱས་ཡོད་འདུག སྐྱབས་ཆེ་དགོན་དུ་འཛིན་བཟུང་བཀག་ཉར་བྱས་པའི་ཁྲོད། བྱམས་པ་དང༌ཚེ་བརྟན། བུ་ལྷུག་གསུམ་ཕྱི་ཟླ་ ༧ པའི་ཚེས་ ༢ ཉིན་འཇོ་མདའ་རྫོང་དུ་བཙན་ཁྲིད་བྱས་ཡོད་པའི་གནས་ཚུལ་ཐོན་འདུག

ཉིན་དེའི་དགོང་མོ་ས་མ་རུབ་ཙམ་ལ་ཡུལ་མི་ ༤༠ ཙམ་གྱིས་གོང་གི་བོད་མི་རྣམས་གློད་གྲོལ་དགོས་པའི་རེ་འདུན་ཞུ་བར་འགྲོ་སྐབས་དུག་རྫས་དང༌། མེ་མདའ་བརྒྱབས་ཏེ་གནས་བརྟན་ཚེ་རིང་དང༌། ཚེ་བརྟན་འགྱུར་མེད། དགེ་ལྷ། གྲོ་སྐྱབས། ག་ཆུང་དར་རྒྱས། དཔའ་རྒྱལ། འཕྲིན་ལས་དར་རྒྱས། བུད་མེད་པ་སངས་སོགས་བོད་མི་མང་པོར་རྨས་སྐྱོན་ཆེན་པོ་ཐེབས་ཏེ། ཤི་གསོན་ཐེ་ཚོམ་གྱི་གནས་སུ་གྱུར་ཡོད་འདུག

ཁ་སང་ཕྱི་ཚེས་ ༧ ཉིན་གྱི་གནས་ཚུལ་འབྱོར་གསལ་ལ། འཇོ་མདའ་རྫོང་ཁོངས་ཀྱི་གྲོང་ཚོ་དྲུག་སྟེ། སྐེ་རེ་སྨད་མ། རི་འོག་རུ་པ། སྐེ་སྲིབ། སོས་ཁོག པདྨ་སྨད་མ། ནོར་མ་རུ་པ། སྐྱབས་ཆེ་དགོན་བཅས་ཀྱི་འཐུས་མི་ ༣༠ འཇོ་མདའ་རྫོང་དུ་ཆེད་བཅར་གྱིས་ཉེ་སྔོན་ཕྱི་ཟླ་ ༦ ཚེས་ ༢༧ ཉིན་འཛིན་གཟུང་བྱས་པའི་ཨ་ཤག་ཚང་ནོར་ལྷ་རང་ལོ་ ༤༧ དང་། ཚེ་བཟང་ཚང་མགོན་པོ་དར་རྒྱས་གཉིས་དང་། སྐྱབས་ཆེ་དགོན་དུ་འཛིན་བཟུང་བྱས་པའི་ནང་ནས་བྱམས་པ་དང༌། ཚེ་བརྟན། བུ་ལྷུག་གསུམ་ཕྱི་ཟླ་ ༧ པའི་ཚེས་ ༢ ཉིན་འཇོ་མདའ་རྫོང་དུ་བཙན་ཁྲིད་བྱས་པ་རྣམས་གློད་གྲོལ་དགོས་འབོད་སྐུལ་ཞུས་འདུག་ཀྱང་ད་བར་ཡ་ལན་གང་ཡང་བྱས་མི་འདུག

གཞན་ཡང་འདི་ལོའི་ས་ཟླའི་དུས་ཆེན་ཉིན་ལྷ་སར་མཆོད་མཇལ་བྱེད་མཁན་ཁམས་དང་ཨ་མདོ་གཙོ་གྱུར་བོད་མི་མང་པོ་འཛིན་བཟུང་བྱས་པའི་ནང༌། ཁམས་སྡེ་དགེ་མཁར་སྒང་བསོད་སྟོབས། མཁར་སྒང་བསྟན་པ་རྣམ་རྒྱལ། སྡེ་དགེ་མདོ་གཞུང་ཁྱུང་རྒྱལ། སྡེ་དགེ་སྒྲོན་མ་སྐྱབས། སྡེ་དགེ་རག་ཆབ་བ་ངག་རྡོ། སྡེ་དགེ་དཔེ་ཝར་བ་པད་རྡོ། ཁམས་ཚ་བ་སྒང་ཚེ་རིང་འགྱུར་མེད་བཅས་ད་དུང་གློད་གྲོལ་བཏང་མེད་པར་ལྷ་ས་རྒུ་རྩ་བཙོན་ཁང་དུ་རྡུང་རྡེག་དང༌། ཚ་འདྲི་མནར་གཅོད་ཚད་མེད་བྱེད་ཀྱིན་ཡོད་འདུག ཅེས་སྤྱི་འཐུས་རྒྱུན་ལས་ཆབ་སྲིད་སྡེ་ཚན་ནས་མཁོ་སྤྲོད་བྱས།