པེ་ཅིན་སློབ་ཆེན་གྱི་དགེ་རྒན་འཛིན་བཟུང༌།

ཕྱི་ཚེས་ ༨ ཉིན་གྱི་དགོང་མོ་རྒྱ་ནག་པེ་ཅིན་སློབ་གྲྭ་ཆེན་མོའི་ཡུ་གུར་བའི་སློབ་དཔོན་ཆེན་མོ་ཨཱཡེ་ལེམ་ཁྲའོ་ཊེ་ Ilham Tohti  ལགས་སུ། ཐེངས་འདིར་ཡུ་གུར་ནང་བྱུང་བའི་དོན་རྐྱེན་གྱི་སྣ་འདྲེན་པ་ཡིན་ཚུལ་གྱི་ཉེས་འཛུགས་འོག་འཛིན་བཟུང་བྱས་ཡོད་འདུག དེ་ནི་ཉིན་འགའི་སྔོན་ལ་ཞིན་ཅང་ཡུ་གུར་རིགས་རང་སྐྱོང་ལྗོངས་ཀྱི་སྤྱི་ཁྱབ་པ་ནའོ་ཨར་པེ་ཁུ་ལུས་ཟེར་བ་དེས། སྐུ་ཞབས་མོ་ཨཱཡེ་ལེམ་ཁྲའོ་ཊེ་ལགས་ཀྱིས་གཙོ་སྒྲུབ་བྱས་ཤིང༌། ད་ལྟ་ཡུ་གུར་ནང་དར་ཁྱབ་ཆེ་བའི་༼ ཡུ་གུར་གནས་འཕྲིན ༽ ཞེས་པའི་དྲ་བའི་སྟེང༌། ཡུ་གུར་མི་རིགས་ཀྱི་གནད་དོན་གཙོས་པའི་ཆབ་སྲིད་དང་འབྲེལ་བའི་བརྗོད་གཞི་འདྲ་མིན་སྤེལ་ཡོད་ཚུལ་དང་། ལྷག་པར་དུ་ཟླ་སྔོན་མའི་ཕྱི་ཚེ་ ༢༦ ཉིན་རྒྱ་ནག་ཀུང་ཏུང་གི་བྱིས་པའི་རྩེད་ཆས་བཟོ་གྲྭ་ཞིག་ནས་ཡུ་གུར་བ་དང་རྒྱ་རིགས་གཉིས་བར་འཁྲུག་འཛང་གི་དོན་རྐྱེ་བྱུང་བའི་སྔ་ཕྱིའི་གནད་དོན་ལ་གླེང་སློང་ཤུགས་ཆེན་བྱས་པ་སོགས་དགེ་རྒན་མོ་ཨཱཡེ་ལེམ་ཁྲའོ་ཊེ་ནི་ཐེངས་འདིར་ཡུ་གུར་ནང་བྱུང་བའི་དོན་རྐྱེན་གྱི་སྣ་འདྲེན་པ་ཡིན་ཚུལ་བརྗོད་དེ་འཛིན་བཟུང་བྱས་པ་ཞིག་ཡིན་འདུག

པེ་ཅིན་སློབ་གྲྭ་ཆེན་མོའི་སློབ་དཔོན་ཆེན་མོ་སྐུ་ཞབས་མོ་ཨཱཡེ་ལེམ་ཁྲའོ་ཊེ་ལགས་ཀྱིས་ཞིན་ལཱང་ ( www.sina.com ) ཞེས་པའི་དྲ་ཚིགས་སོགས་ཀྱི་བརྒྱུད་ལམ་ཁག་ཅིག་ཏུ། སྔོན་མ་ནས་རྩོམ་ཡིག་མང་པོ་སྤེལ་ཏེ། ཀྲུང་གོའི་དབུས་གཞུང་གིས་དྲག་གནོན་ལ་བརྟེན་ཏེ་མི་རིགས་ཀྱི་གནད་དོན་ཐག་གཅོད་བྱེད་ཀྱིན་ཡོད་པ་དེར་མོས་མཐུན་མེད་པ་དང༌། གྲངས་ཉུང་མི་རིགས་ཁག་དང་ཧན་མི་རིགས་མཉམ་འབྲེལ་ཐོག སྤྱི་དམངས་ཀྱི་ཐོབ་ཐང་བརྩོན་ལེན་བྱ་དགོས་པ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་གྲངས་ཉུང་མི་རིགས་ཁག་ཏུ་ལག་བསྟར་བྱེད་ཀྱིན་པའི་སྲིད་བྱུས་དང་། ལྷག་པར་དུ་གཅིག་བསྡུད་ལམ་ལུགས་ཀྱི་སྲིད་ཁྲིམས་འདིའི་འོག་ཏུ་སྤྱི་འབངས་ལ་ནམ་ཡང་བདེ་སྐྱིད་ཡོང་ཐབས་མེད་པའི་བསྒྲགས་གཏམ་སྤེལ་ཡོད་སྟབས། རྒྱ་གཞུང་གིས་ཞིན་ལཱང་དྲ་བའི་སྟེང་གི་སྐུ་ཞབས་མོ་ཨཱཡེ་ལེམ་ཁྲའོ་ཊེ་ཡི་ཟིན་བྲིས་བཀག་སྡོམ་བྱས་ཡོད་འདུག

སྐུ་ཞབས་མོ་ཨཱཡེ་ལེམ་ཁྲའོ་ཊེ་ལགས་འཛིན་བཟུང་མ་བྱས་སྔོན་ཙམ་ལ། ཡུ་གུར་གནས་འཕྲིན་དྲ་བའི་སྟེང༌། ཆེས་མཐའ་མཇུག་གི་དཔྱད་གཏམ་ཞིག་སྤེལ་བའི་ནང༌། ཡུ་གུར་གནས་འཕྲིན་དྲ་བའི་གཙོ་སྒྲུབ་པའི་ངོས་ནས། ནའོ་ཨར་པེ་ཁུ་ལུས་ལགས་ལ་བརྗོད་འདོད་པ་ནི། ཁྱོད་ཀྱིས་བཤད་པ་བདེན་པ་རེད། ཁྱོད་ཀྱིས་ཅི་ཞིག་བཤད་ཀྱང་བདེན་དུ་འགྲོ་བ་རེད། ངས་མགོ་ཁྲིད་མང་པོ་ཞིག་ལ་ཁ་རྡུང་བཏང་མྱོང་ཡོད། གཅིག་བྱས་ན། ངའི་ཁ་རྡུང་མི་འདོད་མཁན་ཁྱོད་རང་ཚུད་པའི་གཞན་མང་པོ་ཞིོག་ལ་ཕོག་ཡོད་སྲིད་ཀྱང༌། བདེན་རྫུན་དྲང་སྙོམས་ཟེར་བ་ཞིག་ཡོད་པ་རེད། ངས་ད་ལྟ་རང་ཉིད་ལ་སྐུལ་མ་བྱ་རྒྱུ་ཞིག་ནི། ཞི་དལ་ངང་རིང་དང༌། བབ་བརླིང་བརྟན་གསུམ་གྱིས་དོན་རྐྱེན་འདིའི་གནད་དོན་དངོས་ལ་ཞིབ་བཤེར་བྱ་རྒྱུ་དེ་ཡིན། ཁྲིམས་དང་ལྡན་པའི་སྤྱི་ཚོགས་གང་ཞིག་ཡིན་རུང༌། རྩོད་རྙོག་རིགས་དྲང་སྙོམས་ཀྱིས་ཐག་གཅོད་བྱེད་པའི་ཐབས་ལམ་ཉག་གཅིག་ནི། ཁྲིམས་ལ་གཏུག་བཤེར་བྱ་རྒྱུ་དེ་ཡིན་སྟབས། སྐབས་དེར་ཁྱོད་རང་གི་ངོས་ནས་ང་ལ་ཁྲིམས་རྩོད་པ་རྩ་འཛུགས་བྱ་མི་དགོས། ངས་གཞན་གྱི་རྩ་འཛུགས་འོག་གི་ཁྲིམས་རྩོད་པ་སུ་ཡང་ངོས་ལེན་བྱ་འདོད་མེད། ཅེས་བཀོད་འདུག

ཉིན་འདི་འགར་རྒྱ་གཞུང་གིས་ཡུ་གུར་ནང་གི་ཁ་ཆེ་ལྷ་ཁང་ཁག་སྒོ་བརྒྱབས་ཡོད་པ་མ་ཟད། རྒྱལ་སྤྱིའི་གསར་འགོད་པ་ཁག་ཀྱང་ཞིན་ཅང་ནས་ཕྱིར་ལོག་དགོས་པའི་བཀའ་རྒྱ་བཏང་ཡོད་འདུག དེ་བཞིན། ཞིན་ཅང་ནང་དམག་མི་ཕོན་ཆེན་མུ་མཐུད་ཁ་སྣོན་བྱས་ཏེ། ཕྱི་ཚེས་ ༩ ཉིན་རྒྱ་ནག་ཅང་སུའུ་ཞིང་ཆེན་ནས་དམག་མི་བརྒྱད་སྟོང་བཞི་བརྒྱ་ ༨༤༠༠ དང༌། ཧྭི་ནན་ཞིང་ཆེན་ནས་དམག་མི་ཉིས་སྟོང་བརྒྱད་བརྒྱ་ ༢༨༠༠ ། ཧྥུ་ཅིན་ཞིང་ཆེན་ནས་དམག་མི་ཉིས་སྟོང་བརྒྱད་བརྒྱ་ ༢༨༠༠ བཅས་བསྡོམས་པའི་དྲག་ཆས་ཐོགས་པའི་དམག་མི་ཆིག་ཁྲི་བཞི་སྟོང་ ༡༤༠༠༠ མཁའ་ལམ་བརྒྱུད་ཞིན་ཅང་ཝུ་རུ་མུ་ཆི་ནང་དུས་གཅིག་ཏུ་བབས་ཡོད་འདུག དམག་མི་སྐྱེལ་འདྲེན་གྱི་དབང་གིས་ཉིན་འདི་འགར་ཞིན་ཅང་གི་གནམ་ཐང་སོ་སོའི་སྤྱི་དམངས་ལ་གནམ་གྲུའི་འཛིན་བྱང་རག་གིན་མེད་པའི་གནས་ཚུལ་འདུག ད་ལྟ་ཡུ་གུར་གྱི་རྒྱལ་ས་ཝུ་རུ་མུ་ཆི་གཙོས་པའི་གྲོང་ཁྱེར་དང་གྲོང་གསེབ་ཡོངས་སུ་དམ་དྲགས་ཤུགས་ཆེན་བྱས་ཏེ། ཡུ་གུར་བ་མང་པོ་ཞིག་ས་གཞན་ལ་ཉེན་གཡོལ་དུ་འགྲོ་བཞིན་ཡོད་འདུག དེ་རིང་སྔ་དྲོ་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཐེངས་འདིའི་ཡུ་གུར་ནང་མི་ཤི་བའི་གྲངས་འབོར་སྔར་ལས་འཕར་ཏེ་ ༡༨༤  ཟིན་ཡོད་ཚུལ་བསྒྲགས་འདུག

ཉིན་འདི་འགར་རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ནང་། ད་ལྟ་ཡུ་གུར་ནང་ཞི་འཇགས་ཡོང་ཡོད་པ་མ་ཟད། དོན་རྐྱེན་ཁྲོད་འདས་གྲོངས་སུ་སོང་བ་དག་གི་ནང་མིར་རྒྱ་སྒོར་འབུམ་གཉིས་ ༢ དང་ཕུང་བོ་དུར་འཇུག་ཆེད་རྒྱ་སྒོར་ཉིས་ཁྲི་ ༢ རེ་སྤྲད་ཡོད་ཚུལ་བརྗོད་འདུག རྒྱ་གཞུང་གིས་ཨ་རིར་གནས་བཞུགས་ལྕམ་རེ་བྷེ་ཡ་ཁ་ཌེར་ Rebiya Kadeer ལགས་སུ་ཐེངས་འདིའི་དོན་རྐྱེན་གྱི་བརྒྱུད་སྐུལ་བ་གཙོ་བོ་ཡིན་ཚུལ་གྱི་ཉེས་འཛུགས་བྱས་པ་དེར། ཨ་རིའི་གྲོས་ཚོགས་འཐུས་མི་ཁག་ཅིག་གིས་ངོ་རྒོལ་གྱི་རྣམ་འགྱུར་བསྟན་ཡོད་པ་མ་ཟད། ཁ་ཆེ་ལུང་པ་ཁག་ཅིག་ནས་ཀྱང་ཐེངས་འདིའི་ཞིན་ཅང་གི་དོན་རྐྱེན་དེར། རྒྱ་ནག་གཞུང་ཕྱོགས་ནས་ཆེད་དུ་རྒྱ་རིགས་མི་དམངས་ལ་བཏིང་སྐུལ་བྱས་ཏེ། ཡུ་གུར་མི་རིགས་དང་ཧན་མི་རིགས་གཉིས་བར་གྱི་འགལ་བའི་ངོ་བོར་བསྒྱུར་ཐབས་བྱེད་ཀྱིན་འདུག ཅེས་སྐྱོན་བརྗོད་བྱེད་ཀྱིན་ཡོད་པ་རེད།

༼གོང་གི་པར་གསུམ་པ་དེ་ནི་ཅིང་སུའུ་དང་ཧྭི་ནན། ཧྥུ་ཅིན་བཅས་ནས་དམག་མི་ཆེད་གཏོང་ལ་འཛིན་བྱང་གོ་སྒྲིག་བྱས་པའི་རེའུ་མིག་རེད།༽