ཐེ་ཝན་དུ་བོད་དོན་ལས་འགུལ།

ཕྱི་ཚེས་ ༡༡ ཉིན་གྱི་སྔ་དྲོ་ཐའེ་ཝན་བོད་ཀྱི་གྲོགས་པོ་ཚོགས་པ་ Taiwan Friends of Tibet  ཡི་གོ་སྒྲིག་འོག་རྒྱལ་ས་ཐའེ་པེ་གྲོང་ཁྱེར་གྱི་ཐང་ཆེན་བརྒྱད་པ་ A8 ཞེས་པ་རུ་མི་གྲངས་ཁྲི་གཅིག་ ༡༠༠༠༠ ལྷག་འདུ་འཛོམས་བྱས་ཏེ། བཙན་བྱོལ་བོད་མིའི་མི་ལོ་ལྔ་བཅུའི་དུས་དྲན་ཆེད། གཞི་རྒྱ་ཆེ་བའི་རོལ་དབྱངས་འདུ་འཛོམས་ཤིག་འཚོགས་ཡོད་པ་དང་། ཐེངས་འདིར་ཐའེ་ཝན་གྱི་རང་དབང་རོལ་དབྱངས་ཚོགས་པ་བཅུ་ལྷག་གི་འཁྲབ་སྟོན་པ་དང་གཞས་པ་མཉམ་འཛོམས་ཀྱིས་ཉིན་དེའི་ཞོགས་པའི་ཆུ་ཚོད་ ༡༠ དང་ཕྱེད་ཀ་ནས་མགོ་འཛུགས་གནང་ཡོད་འདུག

ཉིན་དེའི་དགོང་མོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་རང་དབང་དང་དམངས་གཙོ། དྲང་བདེན། ཁྲིམས་ལུགས་བཅས་ནི་འགྲོ་བ་མིའི་རིགས་སྤྱིའི་འཚོ་གནས་དང་ཁེ་ཕན་ལ་མེད་དུ་མི་རུང་། ཞེས་པ་དང་། དེ་བཞིན་ཁོང་གིས་ཐའེ་ཝན་གཞོན་སྐྱེས་ཚོར་གནང་བའི་བཀའ་སློབ་ཁག་ཅིག་བཅས་ཀྱི་གློག་བརྙན་གཟིགས་འབུལ་ཞུས་ཡོད་པར་དེར་ཐའེ་ཝན་མི་དམངས་ཚོས་དགའ་བསུ་ཆེན་པོ་ཞུས་ཡོད་འདུག

 སྐབས་དེར་ཐའེ་ཝན་བོད་ཀྱི་གྲོགས་པོ་ཚོགས་པའི་གཞས་པ་པཱ་ནེའར་ཡིས་བརྗོད་དོན།  ང་རང་གི་ངོས་ནས་བོད་ཀྱི་ད་ལྟའི་གནས་སྟངས་དང་བོད་རིགས་མི་དམངས་ལ་གདུང་སེམས་མཉམ་སྐྱེད་བྱེད་བཞིན་ཡོད། ང་ཚོས་འདི་ལྟར་རྒྱ་ནག་ལ་འབོད་སྐུལ་དང་སྐྱོན་བརྗོད་བྱས་དོན་ནི་རྒྱ་ནག་ནང་འགྲོ་བ་མིའི་ཐོབ་ཐང་དང་རང་དབང་མེད་པའི་རྐྱེན་གྱིས་ཡིན། ང་ཚོས་རང་ཉིད་ཀྱི་གླུ་གཞས་ཀྱི་ལམ་ནས་འགྲོ་བ་མིའི་རིགས་ཀྱི་རང་དབང་དང་དམངས་གཙོར་འབོད་སྐུལ་བྱེད་བཞིན་ཡོད་ཅེས་དང་།

ཧྲན་ལེན་རོལ་དབྱངས་ཚོགས་པའི་གཞས་པ་ཞོའོ་ཧོ་ཡིས་བརྗོད་དོན། ཐའེ་ཝན་མི་མང་གིས་ཀྱང་བོད་ཀྱི་རང་དབང་སྐོར་ལ་ལས་དོན་མང་པོ་ཞིག་སྒྲུབ་དགོས། ང་ཚོས་ཇི་ལྟར་བྱས་ན་ད་གཟོད་སྤུན་ཟླ་མི་རིགས་ཀྱི་རང་དབང་ལ་རྒྱབ་སྐྱོར་བྱ་ཐུབ་པར་བསམ་བློ་གཏོང་དགོས། འགྲོ་བ་མིའི་རིགས་ལ་བཅིངས་གྲོལ་ཐོབ་པ་ཡིན་ན། ང་ཚོར་ཡང་རང་བཞིན་གྱི་བཅིངས་གྲོལ་ཐོབ་གི་རེད། ཅེས་རོལ་དབྱངས་ཚོགས་པ་ཁག་སོ་སོས་བོད་དོན་དང་འབྲེལ་བའི་བྱེད་སྒོ་སྣ་ཚོགས་སྤེལ་ཡོད་འདུག

ཧྲན་ལེན་རོལ་དབྱངས་ཚོགས་པའི་གཞས་པ་ Freddy ཡིས་དེར་ཡོད་མི་མང་རྣམས་ལ་ལག་པས་  T for Tibet  གཟུགས་བསྟན་ཏེ་བོད་དོན་རྒྱབ་སྐྱོར་གྱི་རྣམ་པ་མཚོན་ཡོད་པ་མ་ཟད། དེར་ཡོད་མི་མང་ཁྲི་ལྷག་གིས་བོད་རང་བཙན་གྱི་སྐད་འབོད་བྱས་ཡོད་པ་རེད། ཐེངས་འདིའི་རོལ་དབྱངས་འདི་འཛོམས་སྟེང་རྒྱལ་སྤྱིའི་གསར་ལམ་ཁག་གི་གསར་འགོད་པ་འདུ་འཛོམས་བྱས་ཏེ། གནས་ཚུལ་གང་སར་ཁྱབ་བསྒྲགས་ཤུགས་ཆེན་བྱས་ཡོད་པ་རེད།