མཚོ་སྔོན་ཞང་ཆེན་མཚོ་ལྷོ་བོད་རིགས་རང་སྐྱོང་ཁུལ་མི་རིགས་སློབ་འབྲིང་གིས་སྤྱི་ལོ་ ༢༠༠༦ ལོའི་ཟླ་ ༨ ཚེས་ ༡༥ ཉིན་ནས་མགོ་འཛུགས་བྱས་ཏེ། བོད་ཀྱི་རིག་གནས་ཆེ་བ་ལྔའི་ཡ་གྱལ་ཚད་མ་རིག་པ་སློབ་ཚན་དུ་བདམས་ཡོད་དང་། ངྡི་ཚ་དགོན་པའི་ཕར་ཕྱིན་དམ་བཅའ་བཞག་ཅིང་། ཚད་མའི་ཁྲིད་རྒྱུན་ཡོད་པའི་དགེ་རྒན་གཉིས་གདན་འདྲེན་ཞུས་ཏེ། འཛིན་རིམ་བཅུ་བ་དང་བཅུ་གཅིག བཅུ་གཉིས་བཅས་ཀྱི་འཛིན་གྲྭ་ ༡༣ ཙམ་ལ་ཚད་མ་རིག་པའི་སློབ་ཁྲིད་དངོས་སུ་མགོ་འཛུགས་བྱས་ཡོད་པ་མ་ཟད། བོད་ཡིག་དགེ་རྒན་དག་ལའང་ཟུར་ཁྲིད་བྱེད་ཀྱིན་ཡོད་འདུག
ད་ལོའི་སྤྱི་ཟླ་ ༥ ཚེས་ ༢༣ ཉིན་མཚོ་ལྷོ་ཁུལ་མི་རིགས་སློབ་འབྲིང་གི་དགེ་སློབ་ལས་བྱེད་ཡོངས་དང་། ཁུལ་སློབ་གསོ་སྡེ་ཁག དེ་བཞིན། ས་གནས་མང་ཚོགས་སྟོང་ཕྲག་མང་པོ་ལྷན་འཛོམས་དབུས། མཚོ་ལྷོ་མི་རིགས་སློབ་འབྲིང་གི་སློབ་མ་ཚོར་བོད་ཀྱི་ཚད་མ་རིག་པ་སློབ་ཁྲིད་བྱས་པའི་གྲུབ་འབྲས་ལ་ཚོད་ལྟའི་ཚུལ་གྱིས་འཛིན་གྲྭ་འགྲན་བསྡུར་གྱི་བྱ་འགུལ་ཞིག་སྤེལ་ཡོད་པ་དང་། འགྲན་བསྡུར་དེའི་ཁྲོད་འཛིན་རིམ་བཅུ་བའི་སློབ་མ་ ༡༦ དང་། འཛིན་རིམ་བཅུ་གཅིག་པའི་སློབ་མ་ ༡༦ བཅས་གོ་སྒྲིག་བྱས་ཏེ། འཛིན་གྲྭ་ཕན་ཚུན་གཏུག་པ་དང་། སྔ་རྒོལ་ཕྱི་རྒོལ་གྱིས་མི་སྒེར་ཕན་ཚུན་གཏུག་པ་བཅས་བྱས་ཏེ། ཁུལ་རིམ་པ་དང་རྫོང་རིམ་པའི་འབྲེལ་ཡོད་སྡེ་ཁག་དང་། ས་གནས་མང་ཚོགས་ཀྱིས་དགའ་བསུ་ཆེན་པོ་ཐོབ་ཡོད་པ་མ་ཟད། སློབ་གྲྭ་གཞན་ལའང་མིག་དཔེ་བཟང་བོ་ཞིག་བཞག་ཡོད་འདུག
ཉིན་དེར་མཚོ་སྔོན་བོད་སྐད་བརྙན་འཕྲིན་ཁང་གི་གསར་འགོད་པ་ཆེད་དུ་བསྐྱོད་དེ། སློབ་གྲྭའི་ཚད་མ་རིག་པའི་འགྲན་བསྡུར་ལ་རྒྱུས་ལོན་བྱས་འདུག སྐབས་དེར་གསར་འགོད་པས་མི་རིགས་སློབ་འབྲིང་གི་སློབ་གཙོ་དོན་འགྲུབ་ཚེ་རིང་ལགས་སུ་བཅར་འདྲི་ཞུས་པར་ཁོང་གིས་བརྗོད་དོན།
སློབ་གྲྭ་འདིའི་ཚད་མ་རིག་པའི་སློབ་ཚན་གྱི་འཆར་གཞི་འདི་ནི། གནས་སྐབས་དང་ཚོད་ལྟ་ཙམ་མ་ཡིན་པར་ཕུགས་རྒྱང་རིང་བོར་དམིགས་པ་ཡིན། ངྷི་ཚ་དགོན་པའི་དགེ་འདུན་པ་གཉིས་ཆེད་དུ་གདན་དྲངས་ཏེ། སློབ་གྲྭ་འདིའི་ཚད་མ་རིག་པའི་དགེ་རྒན་དུ་བཞུགས་ཡོད། སློབ་གྲྭ་འདིར་ཕྱོགས་འདྲ་མིན་ནས་སློབ་མ་བསྡུས་ཡོད་ལ། སློབ་ཚན་དང་སློབ་མའི་གནས་སྟངས་ཀྱང་སྣ་ཚོགས་རེད། རྐྱེན་མང་པོ་ཞིག་གི་དབང་གིས་སློབ་སྦྱོང་ལ་ཧུར་བརྩོན་ཆུང་བ་དང་། བྱ་སྤྱོད་མི་ལེགས་པ་སོགས་ཀྱི་གནད་དོན་བྱུང་ཡོད་སྟབས། བོད་མི་རིགས་ཀྱི་ཐུན་མོང་མ་ཡིན་པའི་སྲོལ་རྒྱུན་ཚད་མ་རིག་པ་བསླབ་གཞིར་བདམས་ཏེ། སློབ་མ་ཚོའི་བློ་རིགས་རྣམ་དཔྱོད་འཕེལ་རྒྱས་དང་། བྱ་སྤྱོད་མི་བཟང་བའི་རྣམ་པར་བཅོས་བསྒྱུར། ཧུར་བརྩོན་ཞན་པའི་གནས་སྟངས་ལ་སྐུལ་འདེད་བཅས་ལ་རེ་བ་བཅིངས་ཡོད། ཅེས་བརྗོད་སོང་།
ཁོང་གིས་མུ་མཐུད་དུ་བརྗོད་དོན། ལས་གཞི་འདིར་ཐོག་མར་དཀའ་ངལ་ཡང་མི་ཉུང་བ་ཞིག་འཕྲད་བྱུང་། དང་པོ། དགེ་སློབ་སུ་ཞིག་ཡིན་རུང་ཚད་མ་རིག་པ་ནི་ཆོས་ལུགས་ཤིག་ཏུ་འདོད་པ། གཉིས་པ། ཚད་མ་རིག་པའི་བསླབ་གཞི་འདིས་འཛིན་རིམ་བཅུ་གཉིས་ཀྱི་མཐོ་རྒྱུགས་ལ་ཕན་ཐོགས་མེད་པ། གསུམ་པ། ཚད་མ་རིག་པའི་སློབ་ཚན་གྱི་དབང་གིས་སློབ་ཚན་གཞན་དག་ཉུང་དུ་འགྲོ་བ་བཅས་རེད། འོན་ཀྱང་། ལོ་གཉིས་ཀྱི་ལག་ལེན་དང་ཚོད་ལྟའི་གོ་རིམ་ཁྲོད། དགེ་སློབ་ཡོངས་ཀྱིས་ཚད་མ་རིག་པའི་དགེ་མཚན་གསལ་བོར་རྟོགས་ཡོད་པ་མ་ཟད། བསླབ་བྱ་གཞན་དག་བརྡར་ཤ་གཅོད་བྱེད་ཀྱི་ལག་ཆ་ལྟ་བུར་ངེས་ཟིན་ཐོབ་སྟེ། ད་ལྟ་ང་ཚོས་ཚད་མ་རིག་པའི་སློབ་ཚན་ཐོག་མ་གཏན་འབེབས་བྱེད་སྐབས་ཀྱི་རེ་བ་ལས་ཀྱང་བརྒལ་བའི་གྲུབ་འབྲས་ཐོབ་ཡོད། ད་ལྟ་དཀའ་ངལ་དང་དགལ་རྐྱེན་ཡོངས་ལས་རྒྱལ་ཏེ། ལས་གཞི་འདིའི་ཐད་ང་ཚོས་རྒྱལ་ཁ་ཆེན་པོ་བླངས་ཡོད། ཅེས་བརྗོད་སོང་།
ཡང་གསར་འགོད་པས་དགེ་རྒན་ཆེན་མོ་རྣམ་བྱམས་ཚེ་རིང་ཞུ་བར། སློབ་མ་ཚོར་ཚད་མ་རིག་པའི་སློབ་ཁྲིད་བྱེད་པར་དཀའ་ངལ་ཡོད་མེད་དང་། སློབ་ཕྲུག་ཚོར་ཚད་མ་རིག་པར་དོ་སྣང་ཆེ་ལུགས་དྲིས་པའི་ལན་དུ་ཁོང་གིས་བརྗོད་དོན། ཐོག་མར་སློབ་མ་ཚོས་རིགས་ལམ་གྱི་འགྲོ་སྟངས་མ་ཤེས་སྟབས་དཀའ་ངལ་ཅུང་འཕྲད་སོང་། རིམ་གྱིས་འགྲོ་སྟངས་ཤེས་བ་དང་མཉམ་དུ་དོ་སྣང་ཡང་ཤུགས་ཆེ་རུ་ཕྱིན་ཞིང་། ཚད་མ་རིག་པར་བྱང་གོམས་སོང་བ་དང་བསྟུན་ཏེ། ཚད་མའི་རིགས་པ་གཏོང་སྟངས་ཀྱིས་སློབ་ཚན་གཞན་དག་ལའང་རམས་འདེགས་ཀྱི་ནུས་པ་འདོན་ཐུབ་ཀྱིན་འདུག ད་ལྟ་སློབ་མ་ཚོར་ཚད་མ་རིག་པར་སྤྲོ་བ་ཆེན་པོ་སླེབས་ཏེ། སློབ་གྲོགས་ནང་ཁུལ་ཙམ་དུ་མ་ཟད་དགེ་རྒན་དང་སློབ་མའི་བར་དུ་ཡང་ཚད་མའི་རྩོད་སྒྲུབ་ཀྱི་ཐད་ནས་ཚ་ཚ་འུར་འུར་ལྟ་བུ་ཞིག་ཆགས་འདུག ཅེས་བརྗོས་སོང་།
སྐབས་དེར་མཚོ་ལྷོ་ཁུལ་སློབ་གསོ་སྡེ་ཁག་གི་མི་སྣས་གསར་འགོད་པའི་དྲི་བར་ལན་འདེབས་བྱས་དོན། སྔོན་གྱི་ལོ་རྒྱུས་ལ་བལྟས་ན་བོད་ཀྱི་སྲོལ་རྒྱུན་རིག་གནས་དེ་དགོན་སྡེ་ནས་དར་རྒྱས་སུ་སོང་བ་ལས་སློབ་གྲྭར་དར་ཁྱབ་དེ་ཙམ་མེད། དགོན་སྡེ་དང་ཆོས་ལུགས་ཀྱི་གནས་སྟངས་ལ་འགྱུར་ལྡོག་བྱུང་ན། རང་བཞིན་གྱིས་བོད་ཀྱི་རིག་གནས་ཡང་ཉེན་ཁའི་གནས་སུ་འགྲོ་བཞིན་ཡོད། དེར་བརྟེན། སློབ་གྲྭ་འདི་བརྒྱུད་དེ་སློབ་གྲྭ་གཞན་དག་ལའང་ཚད་མ་སོགས་བོད་ཀྱི་རིག་གནས་འཐུས་སྒོ་ཚང་བ་ཞིག་ལག་བསྟར་བྱ་ཐུབ་ན་ཕན་ཐོགས་ཆེན་པོ་འབྱུང་ངེས་རེད། ད་ལྟའི་ཆར་དགོན་སྡེ་སོ་སོར་ཡང་གྲྭ་བའི་ཁ་གྲངས་ཉུང་དུ་འགྲོ་བཞིན་ཡོད་པ་དང་། ལྷག་པར་དུ་ནང་ཆོས་དང་ཐུན་མོང་རིག་གནས་ཟུང་ལྡན་ཅན་གྱི་ཤེས་ཡོན་པ་ཉུང་དུ་འགྲོ་བཞིན་ཡོད་པའི་སྣང་ཚུལ་ལོ་རེ་ནས་ལོ་རེར་ཚབས་ཆེན་རེད།
དེར་བརྟེན། སློབ་གྲྭ་ཁག་ཏུ་ཚད་མ་རིག་པ་སྔོན་དུ་བཏང་སྟེ་ནང་དོན་རིག་པ་ཁྲིད་སྤེལ་གྱི་ཁོར་ཡུག་བསྐྲུན་རྒྱུ་ཁ་ཚ་དགོས་གཏུགས་ཀྱི་གནད་དོན་ཞིག་རེད། རིམ་གྱིས་མཚོ་ལྷོ་ཁུལ་སློབ་གསོ་སྡེ་ཁག་གི་སློབ་ཚན་གཏན་འབེབས་སྐབས་སུ་ཡོངས་ཁྱབ་རང་བཞིན་གྱིས་ཚད་མ་རིག་པ་འཛིན་གྲྭ་བདུན་པ་ནས་བཅུ་གཉིས་བར་གཏན་འབེབས་ཡོང་ཐབས་ལ་འབད་བརྩོན་བྱ་རྒྱུ་ཡིན། དེ་ལྟར་སློབ་གྲྭ་སོ་སོར་ཚད་མ་རིག་པ་དར་བ་ཡིན་ན། བོད་ཀྱི་རིག་གནས་སྲུང་སྐྱོབ་དང་དར་སྤེལ་ཕྱོགས་ལ་ནུས་པ་ཆེན་པོ་འདོན་ཐུབ་པ་རེད། དེ་རིང་གི་བྱ་འགུལ་འདི་བརྒྱུད་དེ། བོད་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་ཡོངས་ནས་ཚད་མ་རིག་པ་བསླབ་གཞིར་འདེམ་རྒྱུར་རྟིང་སྐུལ་བྱེད་ཀྱིན་ཡོད། ཅེས་བརྗོད་བྱུང་།
དེའི་རྗེས་གསར་འགོད་པས་སློབ་གྲྭ་དེའི་ཚད་མ་རིག་པའི་དགེ་རྒན་དགེ་འདུན་པ་བསམ་གཏན་རྒྱ་མཚོ་ལགས་སུ། དགོན་སྡེ་རིག་གནས་ལྟ་བུར་གྱུར་བའི་ཚད་མ་རིག་པ་འདི་ད་ལྟ་སློབ་གྲྭའི་ནང་ཁྲིད་སྤེལ་བྱས་པར་དགེ་སྐྱོན་གང་འདྲ་མཐོང་སོང་། ཞེས་དྲིས་པའི་ལན་དུ་ཁོང་གིས་བརྗོད་དོན། ང་རང་ལ་མཚོན་ན། ཚད་མ་རིག་པ་དགོན་སྡེ་རིག་གནས་ནས་སློབ་གྲྭའི་རིག་གནས་ཅན་དུ་བསྒྱུར་བ་འདི་རླབས་ཆེན་གྱི་བྱ་བཞག་ཅིག་རེད་དྲན་ཡོད། ཚད་མ་རིག་པར་སློབ་སྦྱོང་བྱེད་སྟངས་དེ་རིག་གནས་གཞན་པར་སློབ་སྦྱོང་བྱེད་སྟངས་དང་མི་འདྲ། གང་ཡིན་ཟེར་ན། སློབ་མའི་ལན་མ་བཏབས་ན་སློབ་ཁྲིད་བྱ་ཐབས་མེད། དགེ་རྒན་དང་སློབ་མ་ཕན་ཚན་རྩོད་པ་རྩོད་ལན་དང་། བརྒལ་བརྟག་གི་ལམ་ནས་འགྲོ་དགོས་པ་ཞིག་ཡིན། རིག་གནས་གཞན་དག་ལ་མཚོན་ན། དགེ་རྒན་གྱིས་ཁྲིད་སྟེགས་སྟེང་ནས་ཚིག་འགྲེལ་རྒྱག་གིན་ཡོད།
འོན་ཀྱང་། ཚད་མ་རིག་པར་སློབ་གཉེར་བྱེད་སྟངས་དེ་ཚིག་གི་ནང་དོན་རྒྱས་བཤད་ལས་བརྒལ་ཏེ། ཕྱོགས་འདྲ་མིན་ནས་རིགས་པ་དང་གཏན་ཚིགས་བཀོལ་ཏེ། དགེ་རྒན་དང་སློབ་མའི་བར་རྩོད་པ་བྱ་དགོས། དེ་ལྟར། དགེ་སློབ་བར་དྲི་བ་དྲིས་ལན་གྱི་རྣམ་པས་རྩོད་པ་མ་བྱས་ན་ཚད་མ་རིག་པ་ཁྲིད་སྲོལ་མེད། འགྲོ་སྟངས་འདིས་ཕྱོགས་ཁ་ཤས་ཤིག་ལ་ཕན་ཐོགས་ཀྱིན་ཡོད། དཔེར་ན། དགེ་སློབ་བར་འདྲ་མཉམ་གྱི་ལྟ་ཚུལ་ཞིག་སྐྱེད་སྲིང་བྱ་ཐུབ་ལ། སློབ་མ་ཚོར་དཔེ་ཀློག་དང་བརྩོན་སེམས་ཀྱི་ང་རྒྱལ་ཞིག་ཀྱང་བསླང་ཐུབ། སྔར་གྱི་ལུང་མང་པོ་ཞིག་བློ་ཐོག་ན་མེད་ན། ཕ་རོལ་བོས་ཤགས་འགྱེད་བྱེད་སྐབས། ལན་བསློག་རྒྱུ་མི་བརྙེད་སྟབས། ཚད་ལྡན་གྱི་ལུང་དང་རིགས་པ་མང་པོ་བློ་ཐོག་ལ་ངེས་པ་བྱས་ཏེ། སློབ་མའི་ཤེས་ཡོན་གྱི་རྨང་གཞི་ལྟ་བུར་འགྱུར་གྱིན་ཡོད། ཅེས་གསུངས་སོང་།
ཡང་གསར་འགོད་པའི་ཁོང་ལ་སློབ་མ་ཚོར་ཚད་མ་རིག་པ་ཐོག་མར་ཁྲིད་སྐབས་དཀའ་ངལ་འཕྲད་ཡོད་མེད་དྲིས་པའི་ལན་དུ་ཁོང་གིས། ཚད་མ་རིག་པའི་སློབ་ཁྲིད་ཐོག་མ་མགོ་འཛུགས་བྱས་ཏེ་སློབ་མ་ཕན་ཚུན་བར་རྩོད་པ་བྱུང་སྐབས། དགོན་པ་དང་མི་འདྲ་བར། འཇིག་རྟེན་པའི་རྩོད་པ་ཆགས་ཏེ། བྱིས་པ་རེ་ཟུང་བར་འཁྲུག་འཛིང་ཤོར་བ་དང་། ཉིན་འགའ་རེར་ཕན་ཚུན་ལ་ཁ་མི་གྲགས་པ། ཐ་ན་དགེ་རྒན་གྱི་སྟེང་ལའང་ཁོང་ཁྲོ་ལངས་པ་དེ་འདྲ་བྱུང་ཡོད། ད་ལྟ་ཚད་མ་རིག་པར་སློབ་གཉེར་བྱེད་སྟངས་ཀྱི་ལམ་སྣ་ཡག་པོ་ཟིན་འདུག རྩོད་སྒྲུབ་སྐབས་ཕན་ཚུན་ལ་ཚ་བརྒྱབས་པ་དང་། འཁོར་གསུམ་བསྐོར་བ། ཐ་ན་མགོ་ལ་ཕུར་ཕུར་བྱས་ཀྱང་། རྩོད་པ་མཇུག་རྫོགས་སྐབས་ཕན་ཚུན་ལ། བཀའ་དྲིན་ཆེ། ཞེས་བརྗོད་རྒྱུའི་གོམ་སྲོལ་ཞིག་ཆགས་འདུག ངེད་གཉིས་ཀྱིས་འཛིན་རིམ་བཅུ་བ་ནས་བཅུ་གཉིས་བར་གྱི་འཛིན་གྲྭ་ ༡༣ ཙམ་ལ་སློབ་ཁྲིད་བྱེད་ཀྱིན་ཡོད་ལ། 
ཉི་མ་རེ་ལ་སློབ་ཁྲིད་ཐེངས་དྲུག་ནས་བདུན་བར་བྱ་དགོས་པ་མ་ཟད། དགོང་མོའི་རང་སྦྱོང་སྐབས་དགེ་རྒན་ཚོ་རིམ་པ་གཉིས་སུ་བགོས་ཏེ། ཚད་མ་རིག་པ་སློབ་ཁྲིད་བྱེད་ཀྱིན་ཡོད། ཅེས་གསུངས་སོང་།
ཉིན་དེའི་འགྲན་བསྡུར་མཇུག་རྫོགས་ཁར་ཐུན་ཏེ་རྫོང་། དཀར་མིག་ཕུགས་དཀར་མིག་དགོན་པའི་དགོན་བདག་སྤྲུལ་སྐུ་འོལ་རྒྱ་ཚང་གིས་ཐེངས་འདིའི་འགྲན་བསྡུར་བྱ་དགའི་སྦྱིན་བདག་གནང་ཡོད་པ་མ་ཟད། རྗེས་ཕྱོགས་ཀྱང་རྒྱབ་སྐྱོར་བྱ་རྒྱུའི་འདུན་པ་བསྟན་ཡོད་འདུག ཉིན་དེའི་འགྲིན་བསྡུར་ཁྲོད། འཛིན་གྲྭ་ཕན་ཚུན་གཏུགས་པ་ལས་འཛིན་གྲྭ་བཅུ་གཅིག་པར་ཨང་དང་པོ་ཐོབ་ཡོད་པ་དང་། སློབ་ཕྲུག་མི་སྒེར་ཕན་ཚུན་གཏུགས་པ་ལས་འཛིན་རིམ་བཅུ་གཅིག་པའི་སློབ་མ་ཚེ་རིང་མགོན་པོ་ཞུ་བར་ཨང་དང་པོའི་བྱ་དགའ་ཐོབ་ཡོད་འདུག
རང་དབང་ལུང་པ་ལས་ཀྱང་ལྷག་ཙམ་གྱིས་རང་རེའི་ཆོས་དང་རིག་གཞུང་འཛིན་སྐྱོང་སྤེལ་གསུམ་གནང་བར་བསྔགས་བརྗོད་ཞུ།
བོད་ནང་དུ་སློབ་མ་ཚོར་ང་ཚོས་མིག་དཔེ་ཡར་འདྲེན་བྱ་དགོས་ངེས་སུ་མངོན།
འདིར་བལྟས་ན། ཝང་ལི་ཞོང་ལྟ་བུའི་རྒྱ་རིགས་ཤིག་གི་སར་ནས་ད་ཆ་སློབ་གྲྭའི་ནང་དུ་རྒྱ་མིའི་སྲིད་བྱུས་མི་ཉན་ཐབས་མེད་དུ་གྱུར་འདུག
ཉན་འདོད་མེད་ཀྱང༌། བཀའ་བློན་ཁྲི་པས་བཀའ་བཏང་ནས་ཉེན་དགོས་པ་བཟོས་འདུག
རྒྱ་རིགས་ཤིག་ལ་ངོ་ལྐོག་སྤྲེ་ལས་བྱེད་ནས། འབྲེལ་མོལ་ཞིག་ཡོང་རྒྱུ་ནི་ཧ་ཅང་ཁག་པོ་རེད།
ང་ཚོ་བྱང་ཆུབ་སེམས་དཔའ་མིན། ང་ཚོའི་ཤ་ཁྲག་གཅིག་གི་སྤུན་ཟླ་རྣམས་དམར་གསོད་གཏོང་གིན་འདུག་མོད།
སློབ་ཚན་གསར་བསྒྲིགས་ཀྱིས་སློབ་གཞིའི་ལས་རིམ་རླབས་ཆེན་དེ་དངོས་སུ་དབུ་འཛུགས་བྱས་པས། རུལ་བསུང་དང་སྦུག་སྲུབ་དོགས་མོའི་འདུ་ཤེས་ལས་ཡོངས་སུ་བརྒལ་བགྲོད་བྱས་ཏེ་འཕུར་མཆོང་ཧོན་འཐོར་དགོས་པ་དང་།
བྱས་རྗེས་བླ་མེད་ཀྱི་རྡོ་རིང་ཞིག་སླར་ཡང་བཙུགས་སོང་། ཁྱེད་སྤུན་ཟླ་རྣམས་ལ་རང་དབང་གི་དུས་སྐབས་བྲལ་ཡང་། སྤོབས་པ་དང་སྙིང་སྟོབས་བྲང་ཁོག་ཏུ་བཅུག་སྟེ།
གཞིས་བྱེས་ཆོལ་གསུམ་ཡོངས་ལ་མིག་དཔེ་བཟང་སྟོན་ཚད་མ་མཆིས་པ་བཞག་གནང་པ་འདི་ཙམ་ག་ལ་ཡིན། རང་ཉིད་ལ་འཁོས་ཀ་དམན་ཡང་གཏན་ཏུ་ཁྱེད་ཅག་གི་རྒྱབ་ནས་ཅེ་རེ་ལངས་ཏེ་བདོག
ད་ལམ་ཡང་ཆེས་དགའ་འོས་པའི་གསར་འཕྲིན་འདི་མཐོང་ཐོས་བྱུང་སྟེ། སྤྲོ་སེམས་རབ་ཏུ་འཁོར་བའི་ངང་། འབྲེལ་ཡོད་འཛིན་སྐྱོང་ལས་བྱེད་རྣམས་དང་། སྒོས་སུ་དགེ་རྒན་ཡོངས་ལ་སྐུ་དྲིན་བླ་མེད་དུ་ཆེ་ཆེ་ཞུ།
གཟིགས་དང་་་་་་་་མི་ཡུལ་ལ་རང་དབང་ལྡན་ཞིང་་་༧དབུ་ཁྲིད་བཟང་པོས་ཕུགས་རྒྱང་ཆོད་པའི་ལམ་སྟོན་ཟབ་ཟབ་མོ་དེ། ཅིས་ཕྱིར་ལག་ལེན་ཏུ་་་་་་་་་་་?
མདོ་སྨད་ཁུལ་གྱི་གཞུང་གཉེར་དང་སྒེར་གཉེར་གྱི་སློབ་གྲྭ་འགར་ཚད་མ་རིག་པ་སློབ་ཁྲིད་བྱེད་སྲོལ་དར་བཞིན་པ་འདི་དངོས་གནས་དགའ་འོས་པ་ཞིག་རེད། འདི་བོད་ཁུལ་གྱི་སློབ་གྲྭ་ཡོངས་ལ་དར་ཐབས་སུ་རྩོད་གྲྭ་ཡོད་པའི་དགོན་སྡེ་ཚོས་དམིགས་བསལ་རོགས་རམ་གནང་རྒྱུ་གལ་ཆེ་སྙམ། དེ་ལ་ས་གནས་སོ་སོའི་སློབ་གསོའི་སྡེ་ཁག་ནས་རྒྱབ་སྐྱོར་མཐུན་འགྱུར་གནང་རྒྱུ་ཡང་མེད་མི་རུང་བས། བོད་ཀྱི་རིག་གནས་ལ་རྒྱུ་མཚན་ཤེས་པའི་དགའ་ཞེན་ཅན་གྱི་སློབ་གསོའི་ལས་ཀྱི་སྣེ་མོ་པ་དག་གིས་ཧུར་བརྩོན་གནང་རོགས།
ཡིད་སྐྱོ་བ་ཞིག་ལ། བཙན་བྱོལ་བོད་མིའི་སློབ་གྲྭ་ཁག་ཏུ་ད་དུང་ཡང་ཚད་མ་རིག་པའི་སློབ་ཁྲིད་འདི་གཟུགས་བརྙན་ཙམ་ལས་མེད་པ་ནི་བཙན་བྱོལ་བོད་གཞུང་དམངས་གཉིས་ཀའི་ངོ་ཚ་ཞིག་ཡིན་པས། ད་ནི་སྐྱོན་བརྗོད་བྱེད་ཡུལ་རྒྱ་གཞུང་གི་སྟངས་འཛིན་འོག་ཡོད་པའི་བོད་ནང་གི་སློབ་གྲྭ་དག་གི་ཡར་རྒྱས་འདི་ཚོ་ལ་གཟིགས་ཏེ། མ་མཐའ་ཡང་ངོ་ཚ་དང་ཁ་ལ་རྒྱ་ཞིག་གི་སྟེང་ནས་ཀྱང་རང་ལག་གི་སློབ་གྲྭ་ཁག་ཏུ་འདིའི་ཕྱོགས་ལ་ཤུགས་རྒྱག་རན་འདུག
ང་ཚོའི་རླབས་ཆེན་གྱི་རིག་གཞུང་འདི་རླབས་ཆེན་གྱི་སོན་རྩ་དག་གི་བྲག་ཁོག་ཏུ་འཇིག་ཐུབ་པ་ངོས་མས་དགའ་འོས་བའི་དོན་བཟང་ཞིག་རེད།
དངོས་གནས་རླབས་ཆེན་རེད། ད་བར་བོད་ལ་སངས་རྒྱས་ཀྱི་ཆོས་དར་ཡོད་ཀྱང་དར་དགོས་རྩ་བ་ནས་ཆོད་མི་འདུག
མི་དམངས་ཚོས་རང་ཉིད་ནང་པ་ཞིག་ཡིན་ཁུལ་བྱེད་ཀྱང་བཀའ་བསྟན་ཕར་ཞོགས་ཐ་ན་སྐྱབས་འགྲོ་ཡང་ཤེས་ཀྱི་མེད་སྟབས། ཡུལ་ལྷ་མཁྱེན། རྒྱལ་པོ་མཁྱེན་ཞེས་མཐར་མི་མང་ཚོ་དེ་འདྲའི་ངང་རྫོགས་སོང་བ་ཤ་སྟག་རེད།
ཤྰ་ཀྱ་ཐུབ་པའི་ནང་བསྟན་ཆོས་ལུགས་ནི་འདས་པའི་ལོ་ཉིས་སྟོང་ལྔ་བརྒྱའི་གོང་གི་ཆེས་གནའ་བོའི་ཤེས་རིག་ཤིག་ཡིན་ཀྱང་། ད་ལྟ་ང་ཚོའི་བོད་རྒྱ་ཆེའི་མི་མང་དང། བོད་ཕྲུག་ན་གཞོན་ཚོར་མཚོན་ན་ནང་དོན་རིག་པའི་ཤེས་རིག་འདི་ནི།
གནའ་བོའི་ཤེས་རིག་མིན་པར་རིགས་གནས་གསར་པ་ཞིག་ཡིན་པས་བོད་ཀྱི་ལོ་ཆུང་ཚོས་ངེས་པར་དུའང། ཚད་མ་སོགས་ནང་དོན་རིག་པའི་ཤེས་ཡོན་གསར་པ་དག་ལ་སྤྱང་བརྩོན་བནཡེད་དགོས་ཡ།།
འདི་སོ་དངོས་ནས་ཡག་པོ་རེད། ད་ནི་སློབ་མ་དང་གྲ་བའི་བར་ཏུ་མཐུན་ལམ་སྔར་ལས་ཇེ་ཆེར་འགྲོ་ངེས་རེད་ལ། བོད་ཀྱི་ཐུན་མོང་མིན་པའི་རིག་གནས་ཀྱི་ཁྱད་ཆོས་ཀྱང་སྐྱ་སེར་མེད་པར་ཤེས་རྒྱུར་དངོས་ནས་ཁ་ཚ་དགོས་གཏུགས་ཡིན་པ་༧གོང་ས་མཆོག་གིས་ཀྱང་ལོ་མང་རིང་གསུང་ཡོད་པ་རེད། དངོས་ནས་དགའ་བསུ་ཞུ་འོས་པ་ཞིག་རེད།
མཚོ་ལྷོའི་ཁྲི་ཀ་རྫོང་མི་རིགས་སློབ་འབྲིང་དུ་ལོ་ཤས་གོང་ནས་མང་རའི་ཀླུ་ཚང་དགོན་པའི་དབུ་ཕར་རབ་འབྱམས་པ་བླ་ནག་ཡེ་ཤེས་བཟང་པོས་དགེ་སློབ་དག་ལ་བོད་ཀྱི་ཚད་མ་རིག་པ་ཁྲིད་དང་འཁྲིད་བཞིན་འདུག་ལ། གྲུབ་འབྲས་ཀྱང་གང་འཚམ་ཞིག་ཡག་པོ་འདུག་ཟེར། གོང་གི་མཚོ་ལྷོའི་སློབ་འབྲིང་གི་ཚད་མ་རིག་པའི་སློབ་ཁྲིད་ཀྱི་སྐོར་དེ་youtobeནང་དུ་འདུག